الفصل الثاني و الثلاثون من رواية لاجلك نبض قلبي للكاتبة اسماء المصري

تغيرت ملامح وجه عمر على الفور و تبدلت معالمه للضيق لتردد هاله بسرعه “اتفضلو نشرب الشاى فى الجنينه”

ذهب الجميع للحديقه فاقتربت هاله من عمر تحتضنه و تردد ” و لا يهمك يا حبيبى….ربنا ان شاء الله حينولك اللى نفسك فيه ”

حرك راسه بخزى و اخرج علبه سجائره ليشعل واحده و يزفر دخانها خارج رئتيه بقسوه فاقتربت منه خديجه تقبل راحته و تخلل اصابعها بخاصته و تستند براسها على كتفه و تردد بحب ” بحبك ”

ابتسم لها و قبلها من صدغها و ردد ” و انا بموت فيكى ”

اقترب عدى منهما و ردد بخبث ” ارحمونا شويه يا جدعان الواحد جاله جفاف عاطفى بسببكم ”

صدحت ضحكاتهم العاليه من مزاحه ليردد عمر “بكره تحصلنى يا دودى ”

نظر عدى لخديجه بنظرات مبهمه فرفع عمر حاجبيه و ردد بفضول” مالك يا بنى؟”

انتبه عدى لنفسه فاجابه على الفور ” لا…مفيش، بس كنت عايز ديچا تقعد تتكلم مع نيرو و تشوف رايها فى جوازنا هنا ”

ابتسمت لتردد بترحيب ” من عنيا يا عدى، حالا حكلمها ”

اصطحبها معه للحديقه حيث تجلس خطيبته لكنه اوقفها فجأه لينظر لها بتفحص و يردد بتخوف “انتى فيكى ايه؟ بقالك يومين مش بتيجى الشغل من ساعه ما كنتى تعبانه، هو الدكتور قالك ايه؟”

رددت و البسمه البلهاء لا تزال على وجهها ” قال انيميا…ما انا قلتلك”

ردد بتحذير” طيب قولى لعمر على تعبك بدل ما انا اللى حقوله لان شكلك تعبان حتى برغم الضحكه اللى بتحاولى ترسميها دى ”

اومأت براسها لتردد بخفوت ” حاضر…يعدى عيد جوازنا بس و حقوله ”

ابتسم ليردد بفضول ” مقلتليش…حتعملى ايه مفاجأه بعد ما خلتينى لغيت كل الاتفاقات؟! ”

ابتسمت بزهو لتردد ” ده سر و يلا بقى احسن عمر عمال بيبص علينا و حيقوم يولع فينا دلوقتى ”

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

كل هذا و عمر جالس بجوار صلاح ينظر لهما و هما يتحدثان بمفردهما فاخذت النيران تحرقه و هو يجدها تبتسم لعدى و تقترب منه اثناء محادثته فتوعد لها بسره ” و الله يا خديجه لعلمك تسمعى كلامى ”

جلست خديجه بجوار رفيقتها تسالها باهتمام ” ايه يا نيرو؟ موافقه على انك تعيشى هنا فى الڤيلا؟”

بتلعثم و قلق اردفت ” بصراحه مش عارفه، خايفه احسن مامته تبقى حما عليا و غير عمته صعبه اوى و برده انا مش عارفه اخواته حيحبونى و لا لأ؟!”