الفصل التاسع عشر من رواية روضتنى بقلم اسماء المصرى

ترجلا أمام باب الشركة ودلفا يتحدثان بمهام عملهما وفور صعودهما للطابق المنشود وجدا المساعدة تقف باحترام وتطئطئ رأسها باحترام قائلة:
-فارس باشا، عمر الباشا مستني حضرتك في ال Meeting room.

قوس جبينه وأومأ لها وتحرك برفقة مازن لغرفة اﻻجتماعات فوجده يجلس برفقة شخص مجهول فرفع حاجبة اﻷيسر بتسائل:
-السلام عليكم يا عمر.

مد راحته يصافحه فوقف المرافق ناظرا له باحترام وعمر يقوم بتعريفه:
-اﻻستاذ أمين، داهيه في الكمبيوتر والتكنولوجيا.

ابتسم لهما وجلسوا اربعتهم بعد المصافحة واستهل عمر حديثه قائلا:
-ده بقى اللي هيقدر يخترق رقم التليفون اللي كان مع مدحت بيه، أنا مردتش اخليه ينفذ ده من اي حساب أو لاب خارج الشركه لأن أنا مأمن الأجهزة هنا كويس.

استحسن حديثه ونظر لمازن هاتفا بصيغة آمرة:
-هات اللاب بتاعك يا مازن.

لم يمر سوى دقيقة واحدة حتى بدأ أمين عمله محاولا اختراق الرقم، اﻷمر الذي لم يستغرق وقتا طويلا حتى استطاع أن يهتف:
-دخلت.

اتسعت بسمة فارس فورا وسأله:
-نقدر نسمع المكالمات؟

رد عليه بوجه سعيد:
-نقدر نفتح كاميرا الموبايل ونشوف كل حاجه حوالين صاحبه من غير حتى ما يحتاج يتصل بحد.

اتسعت حدقتي مازن وسأل بحيرة:
-هو ده ممكن؟

أومأ له مؤكدا فعقب مازن بضيق:
-ده على كده كل واحد فينا ماشي بجهاز تجسس هو بنفسه اللي سمح بيه.

رد فارس بعد أن التفت ينظر له:
-متقلقش، كل موبايلتكم متأمنه.

رد وهو لا يزال يشعر بالحيرة:
-يعني احنا موبايلاتنا متأمنه وموبايلات المنظمة دي لأ؟!

انتبه فارس لحديثه فنظر يسأل عمر:
-صح… ازاي قدر يدخل بسهوله كده؟

رد أمين موضحا:
-ممكن التليفون بقاله فتره متحدثش عشان كده ال Fire wall بتاعه وقع بسرعه، بس ده مش معناه انه مش محطوط عليه برنامج حمايه.

نظر فارس للحاسوب وقال بفروغ صبر:
-افتح لنا الكاميرا خلينا نشوف حكاية التليفون ده، لأن ممكن اصلا يكونوا اتخلصوا من الرقم طالما كان مع مروان بيه ومدحت بيه.

فعل المهندس فورا فاستمعوا جميعا لحديث متداخل لبعض الرجال استطاعوا أن يفهموا منه أنهم رجال غسان الصباغ فابتسم عمر هاتفا:
-ده مع حد من الحراسه بتوعه.

تخوف فارس قليلا وسأله:
-أزاي قدرنا نخترق التليفون طالما لسه الرقم معاهم؟

رد أمين مؤكدا:
-يا فارس باشا صدقني كان عليه برنامج حمايه قوي، اينعم مش حديث اوي بس قدرت اخترقه والحمد لله.