الفصل التاسع عشر من رواية روضتنى بقلم اسماء المصرى
الفصل التاسع عشر روضتنى
ظل ياسين يقرأ وبعدها رفع وجهه ناحيته وسأله بحيرة:
-هل انت حاولت قبل الرساله دي تقعد معاها وتتفاهم في مشاكلكم؟
رد نافياً:
-لأ، ده لأن مفيش مجال للتفاهم مع واحده بتتهم أخويا بالتحرش يا…..
ارتفع حاجبه على الفور وقاطعه بحدة:
-تاني هتقولي بتتهم!
رد وهو صارا على اسنانه:
-آه اتهام ومش حقيقي، أختك عايزه تعمل اي مشكلة عشان اخرجها من بيت العيلة حتى لو بفضيحة، زي ما راحت قالت الكلام ده لفارس الفهد اللي عامل فيها كبير عيلة.
لم يجب؛ بل نظر له بدهشة وفهم على الفور سبب غضبه ففارس دائما ما يعلم بتلك الأمور الخفية كما حدث معه وقت زيجته وحمل زوجته قبل الزفاف بل اﻷكثر انه قام بتعجيل زفافهما حتى يخفي ذلك السر الذي لا يعلمه غيره هو وابنة عمه فقال موضحا:
-فارس الفهد بيعرف كل حاجه لأنه كبير العيلة وأنت عارف ده من اﻷول يا مالك متعملش نفسك متفاجئ، وبعدين انت سيبت الموضوع اﻷساسي ومسكت في الفرعي اللي ملوش اهمية، أخوك بيتحرش بمراتك و…
قاطعه صارخاً لدرجة افزعت ساندي والصغيرة قمر:
-أنت بتخرف تقول ايه؟ هترجع تقولي بيتحرش! ده هري فاضي عشان اشتري لها شقه بره.
لم يوافقه الرأي وقال بضيق:
-لأ طبعاً الكلام ده مش مظبوط، نرمين مش هايفه ولا دماغها صغيرة عشان تتهم اخوك اتهام خطير كده لمجرد انها تخليك تجيب لها شقه بره، انا عارف اختي كويس.
ابتلع ريقه بمراره وغضب صائحاً:
-لااااا الظاهر اني بضيع وقتي مع كل واحد بتكلم معاه في العيلة دي، عموما لو ده طلبها انا هنفذهولها، بس عرفها انها هتخسر كتير أوي بسبب كلامها ده.
اندفع للخارج وهو يتقد غضبا جحيمياً ووقف أمام سيارته متمتماً بتوعد:
-بقى كده؟ الظاهر مفيش غير كلام اخويا فعلا وهطلبك في بيت الطاعه يا نرمين ويبقى يوريني فارس الفهد ولا أي راجل من عيلتك هيعملك ايه!
❈-❈-❈
استيقظت ونتظرت رجلي البيت حتى غادرا ودلفت لجناح زوجة أخيها وجلست بجوارها على الفراش تداعب صغيريها مبتسمة بحب وقالت متسائلة:
-هتفضلي مطنشه موضوعك كتير؟
رمقتها بنظرة حادة وقالت بضيق:
-ياريت محدش يتدخل في حياتي زي ما انا سيباكم…
قاطعتها چنى تصرخ بها بعنف:
-ياسمين… فوقي وشوفي ولادك اللي محتاجينك.
زفرت بضيق واكملت:
-خلينا نفترض إن الحمل كمل مع إن ده شيئ مستبعد، وولدتيه سليم كمان، هل انتي ضامنه إنك تبقى كويسه بعدها؟ بلاش كده لو تعبتي زي وقت چاسمين مين ساعتها اللي هيراعي الولاد لحد ما تخفي؟ هتخلفيهم عشان تسبيهم للداده؟!
