الفصل التاسع عشر من رواية روضتنى بقلم اسماء المصرى

نظرت له من بين دمع عينيها وقالت ببكاء:
-انا مش عارفه ازاي هملت الولاد كده؟ بجد الوقت بيجري مني وبلاقي اليوم خلص من غير ما اكون قضيت معاهم وقت كافي.

ابتسم لها وسحب نفسا عميقا وقال بجدية:
-أهو ده درس يعلمك إن في اولويات في الحياة، انا اولوياتي انتم وبعدكم الشغل وبعد كده عيلتي.. وأظن انتي كمان لازم تكون اولوياتك كده ومش هقولك خليني انا قبل الولاد او حتى معاهم، هم الأول يا ياسمينا وبعدين أنا وبعدين عيلتك.

رمقها بنظرة عاشقة وقبلها من أعلى رأسها وهو يقول:
-عايز ولادي يحسوا حنان امهم وانتي اللي تعوضيهم غيابي عنهم اللي فعلا غصب عني، لو كان ينفع اسيب شغلي وكل اللي ورايا وافضل معاكم مكنتش أتاخرت، بس مسؤليتي كبيرة وشيلتي تقيلة أوي.

دفنت رأسها بصدره وقالت بحب:
-ربنا يخليك لينا يا حبيبي، ممكن تجيب جاسر يبات معانا هنا هو كمان؟

غمز لها وأومأ متحركا للخارج وطرق الباب ففتحت المربية تنظر له برهبة؛ فأمرها فورا ودون مقدمات:
-هاتي جاسر يبات معانا في الجناح.

فعلت دون تعقيب أو ممطالة، فعاد بصغيره ووضعه بالمنتصف بجوار اخته الصغرى ما بينه وبين زو جته، واحكم عليهم الغطاء وسحبهم داخل حضـ ـنه وبدأ بتلاوة بعض اﻵيات الكريمة من سورة ياسين بتلاوة جميلة؛ حتى اغلقوا اعينهم واستمع لأصوات تنفسهم المنتظمة دليل على غطهم بنوم عميق.
❈-❈-❈

استيقظت على صوت طرقات عالية على باب منزلها فنظرت بجوارها لذلك النائم ودفعته بهدوء توقظه:
-ياسين، اصحى الباب بيخبط.

فتح عينه بخمول وتحرك من الفراش وهو يتمتم بضيق:
-أكيد مامتك يا ساندي مين هييجي الساعه 6 الصبح غيرها؟

زمت شفـ تيها للأمام بامتعاض ففتح هو ليتفاجئ برفيقه وزو ج اخته فرفع حاجبه لاعلى وسأله بخضة:
-مالك! في ايه؟

رد اﻵخر بغضب:
-يعني مش عارف في ايه؟

افسح له الطريق مشيراً للداخل هاتفاً:
-طيب اتفضل جوه نتكلم، مش هنتكلم على الباب.

تحركا للداخل فهم مالك بالحديث فورا:
-اختك بعتالي الرسالة دي وبعدها عملت بلوك، وولا حد من اهلك بيرد على تليفوناتي.

نظر للرسالة وفحواها فتعجب مما كتبته أخته فقد اتفقوا معها على الإنتظار قليلاً قبل أن تتخذ قرارها، ولكن من فحوى الرسالة يبدو أنها اتخذت قراراً نهائياً ولا رجعة فيه.

(بص يا مالك ومن غير مقدمات .. انا مش مرتاحه معاك من اول يوم جواز وانت عارف كويس ايه اللي حصل ومع ذلك اديت جوازنا فرصه عشان مبقاش فشلت من اول محاوله… وعديت حاجات كتير اوي وكان ممكن اعدي اكتر لو بس كنت شوفت في منك أمان لكن للأسف انت هتفضل كده، واهلك اللي عاملين لك غسيل مخ دول هيكونوا السبب اﻻساسي في خراب بيتك، وانا مش هخيرك بيني وبينهم لاني مبحبش ادخل في مقارنه خسرانه بالعكس انا هعفيك من أي حيرة وبقولك خلينا نخرج بالمعروف زي ما دخلنا بالمعروف، وربنا يرزقك بواحده تقدر تتحمل اسلوب الحياة اللي انت عايز تعيشني فيه لكن انا … أنا مستحيل اقبل بده وأرجوك متضيعش وقت وتخليني اضطر ادخل اهلي ونفضل نماطل وفي اﻵخر النهاية هتكون هي هي)