الفصل الخامس و الثلاثون من رواية لاجلك نبض قلبي للكاتبة اسماء المصري

تفرك يدها و تبلل شفتاها استعدادا لقصها ما حدث منذ خمس و عشرون عاما لتردد ” بعد ما عبد الرحمن سابها و لان البلد كلها كانت عارفه انها خطيبته محدش جه و اتقدم لها لحد ما البنات الاصغر منها فى العيله كلهم اتجوزو و خلفو كمان، لحد ما جه عريس من بره البلد… كان انسان كويس و مرتاح ماديا و حياخدها و يعيش بره ”

ابتلعت لعابها لتكمل ” خطبها شويه و بعدين بدء يطلب منها شويه تجاوزات و هى من خوفها احسن يسيبها كانت بتوافق عشان متبقاش اتخطبت واتسابت مرتين، طبعا تفكير جاهل و كان على قد تفكيرها فى الوقت ده، لحد ما اخد منها اللى هو عاوزه و بعدها فك الخطوبه ”

نظرت للمعه عين عدى المنذره بالشر و اكملت “فضلت هى مخبيه اللى حصل و كان كل ما يجيلها عريس ترفضه و كان عمك طاهر الله يرحمه محتار معاها…. لحد ما ابوك رجع من السعوديه بعد ما طاهر مات و اخدها تعيش معانا و وقتها عرف اللى حصل و بقى مفيش فى ايده حاجه يعملها غير انها تعيش كده ”

بحزن اكملت ” عاشت معانا و كانت بتشوفنى و انا بحمل و اخلف و هى مش من حقها حتى انها تفكر فى الجواز فبقت محمله عبد الرحمن الذنب هو و حياه ان لولا انه سابها مكانش ده حصل خصوصا انها عرضت عليه وقت ما سابها انه يتجوزها على حياه بس هو رفض طبعا بسبب اللى حصل لام عمر بسبب جوازه ابوك منى ”

ظل عدى صامتا فتخوفت هاله من رده فعله فهتفت بحذر ” عدى….. اوعى يا بنى السر ده يطلع بره، لا عمتك و لا ابوك حيستحملو ان حد يعرف بعد السنين دى كلها ”

اومأ بانكسار و ردد متسائلا ” و لوچين حنعمل معاها ايه؟ حنستنى لما تتحول لعمتى التانيه؟ و لا اسوء كمان ”

بكت حتى تقطعت نياطها فامسك عدى كوب من الماء و ناوله لها فارتشفت منه قليلا حتى تهدأ و رددت ” انا حتكلم مع سعيد و اقوله، البنت دى محتاجه مصحه نفسيه تتعالج فيها، و العلاج مش عيب ما عمر بجلاله قدره كان بيتعالج و العلاج هو اللى وصله للى هو فيه دلوقتى ”

اومأ عدى بالموافقه ووردد محذرا ” بس عشان تكونى فاهمه و تفهمى خالى…. انه لو متصرفش معاها انا اللى حتصرف ساعتها و من غير ما حد يزعل منى”

♡♡♡♡♡♡♡♡♡♡♡♡♡♡♡♡♡

فى منزل سعيد

اوصلها عدى لمنزل اخيها قبيل الذهاب للمشفى فدلفت بخطى ثابته حتى جلست فى مقابل سعيد الذى هتف بطيبه ” طمنينى على خديجه “