الفصل السابع عشر من رواية روضتنى بقلم اسماء المصرى

الفصل السابع عشر #روضتني قيمة الخبرة ليست عبر الرؤية الجيدة... بل عبر الرؤية بحكمة. ويليام أوسلر. ❈-❈-❈ ارتفع صخب رأسها بداخلها وهي تشعر باقتراب الخطر، ولكن ها هي ابنة عمها تعود لعنادها الذي تعرفه وتحفظه عن ظهر قلب، انتظرت اقترابها من باب السيارة؛ فوقفت أمامها بإصرار وهتفت بحدة: -ياسمين. وقبل أن تتفوه بأي كلمة نظرت لها اﻷخرى بنظرات تحذيرية وهي تهمس لها: -مش وقته. نظرت خلفها لأخت زوجها والمربية التي ترافقها تدفع سيارة أطفال مزدوجه بها طفليها وقالت بجدية: -هتركبي العربية التانيه مع بوسي يا چوچو ولا ايه؟ نظرت لها چنى بنظرات متضايقة وقالت رافضة: -ﻷ أنا عايزه اتكلم معاكي. تنهدت ياسمين وزفرت بفروغ صبر وهمهمت بضيق: -مش هخلص أنا عارفه. التفتت لحارسيها وقالت بنبرة آمرة: -أركب يا زين أنت و أمجد في عربية المرافقة عشان البنات تركب معايا. أومأ لها باحترام؛ فجلست چنى باﻷمام بجوار مقعد السائق، وجلست كل من ياسمين ونرمين بالخلف، وتحركت السيارة وتبعتها سيارة المربية والمرافقة من الحراسات، التفتت چنى ووجهت حديثها لنرمين بغضب: -هتتكلمي انتي ولا اتكلم أنا؟ بللت ياسمين شفتيها وردت بسرعة: -احنا مش لوحدنا ومعانا السواق، فأجلوا كلام لما نوصل. صرخت بها چنى معترضة: -لأ يا ياسمين مش هنأجل كلام، انتي عايزه تثبتي لنفسك ايه بالظبط فهميني؟ أدارت وجهها تنظر من النافذة غير عابئة بصراخها؛ فتضايقت اﻷخرى من تجاهلها وتحدثت بحدة: -انتي موافقه على رأيها ده يا نرمين؟ ردت وهي تشعر بالضيق: -لأ طبعا، بس هي طول عمرها عنديه وعِندها هو اللي على طول موديها في داهيه. عادت ياسمين لتحذيرهما: -طيب أنا آخر مره هقول لكم اننا مش لوحدنا. صمتت نرمين وعقدت ساعديها أمام صدرها بغل، ولكن تهديدها لم يردع اﻷخرى التي صاحت مجدداً: -أنا هقول لفارس وزي ما تيجي تيجي، ولو عايزه تقاطعيني انتي حره، بس أنا مش هداري عليكي في الجريمه اللي عايزه تعلميها في حق نفسك وحق بيتك وجوزك يا ياسمين. تزامن حديثها وصولهم لباب الڤيلا؛ فترجل الجميع فسارعت ياسمين باللحاق بها تلك التي اندفعت بغضب للداخل وأوقفتها وسحبتها من ذراعها متوجهة للمكتب، وتبعتهما نرمين التي لا حول لها ولا قوة. اغلقت الباب وراءها واستمعت لابنة عمها وهي تحذرهما بصوت غليظ: -اقسم بالله لو واحده فيكم فتحت بوقها بكمله واحده أنا عمري ما هعرفها تاني، ومش ههدد بفضح أسراركم اللي أنا الوحيده اللي اعرفها؛ لاني اكيد مش هستخدم اسلوبكم ده. صرت چنى على أسنانها واقتربت منها تنظر لها بحزن وسألتها بحيرة: -انتي بتعملي كده ليه؟ مبتخلفيش وما صدقتي حملتي؟! تبادلت حديثها مع نرمين التي أضافت: -لو جرالك حاجه بيتك هيتدمر، لان اللي زي فارس ده بالرغم من قوته إلا إنه مستحيل يعرف يعيش من غيرك وكلنا عارفين هو بيحبك قد إيه. عادت چنى تحاول إقناعها: -وولادك مين اللي هياخد باله منهم لو لا قدر الله حصل حاجه؟ لتعقب نرمين: -ده غير المشاكل اللي فارس شايلها على كتافه ومش ناقص نزودها عليه و.... قاطعتهما وكأنها وجدت ضالتها: -ايووووه، المشاكل اللي فارس فيها ولسه هزودها عليه بحالة چاسمين، عايزين أروح اقوله كمان اني حامل وممكن يحصل مضاعفات واعمل حسابك إن في اجهاض ولا ولا... ابتلعت ريقها وقالت بوهن ورجاء: -وكل ده مش هغير حاجه، الخطر موجود كملت الحمل أو لأ، وأنا أملي في ربنا كبير ومش قادره أبداً آخد قرار بق/تل حته مني. دمعت عينيها وهي تضيف: -حاولوا تفهموني يا بنات، تخيلي كده لو مامتك ولا مامتك اخدت قرار تجهضكم، مكانش هيكون في لا نرمين ولا چنى، انتو فاهمين بتطلبوا إيه مني؟ ترجتها نرمين وهي تشاطرها البكاء: -يا سو عشان خاطري فكري كويس، أو أقولك حاجه ... إيه رأيك نروح لدكتور تاني ونشوف رأيه ايه؟ استحسنت چنى الفكره وأيدتها قائلة: -الله ينور عليكي، حلوه الفكرة دي يا سو.. ولو قال تمام يبقى كملي على بركة الله. ابتسمت بسخرية وتسائلت: -هعملها إزاي وأنا ممنوع أخرج من غير علمه وبجيش حراسه. ردت چنى فورا وقالت: -اي واحده فينا تعمل نفسها عايزه تكشف عند دكتور تاني وتروحي معانا. ابتلعت ريقها من جديد وهي تفكر؛ فهدرت بها نرمين: -هي الفكره دي كمان محتاجه تفكير كل ده؟ ولا أنتي عايزه تنتحري ونسيبك كده من غير ما نحاول نرجعك عن الفكره؟ زفرت بفروغ صبر وهتفت: -خلاااص، يا ساتر عليكم وعلى رزالتكم، خلاص خلينا نحجز عند اي دكتوره تانيه غير دي وتكون بعيده تماما عن عيلة الفهد .. المهم دلوقتي عايزه طريقه أعرف أقول بيها لفارس على حالة چاسمين؛ لانه قالي اطمنه أول ما أخرج من المستشفى وبصراحه مش قادره اشيله هم تعبها كمان. ربتت نرمين على ظهرها تؤازرها وتقول: -استني لما يرجع أفضل؛ عشان تتكلمي معاه براحه بدل ما يتخض. وقبل أن تنهي حوارها كان رنين هاتف ياسمين يصدح عالياً فزمت شفتيها وهي ترد: -حبيبي. تحدث بعصبية وهو يسألها: -مش قولتلك تكلميني أول ما تتطمني على الولاد؟ ابتلعت بتوتر ونظرت أمامها للفتاتان تطلب الدعم ولكنه صاح يوبخها: -يعني أعرف أنك وصلتي البيت من الحرس! ولحد دلوقتي ولا مكالمه تطمنيني بيها على صحتهم. تنهدت وردت فورا: -اطمن، الولاد كويسين و.... صاح بحدة أخافتها: -كويسين ازاي والدكتوره دينا بتقول إن چاسمين محتاجه نقل دم؟ تعلقت عينيها بجفنيها وردت توضح: -للأسف، بس مكنتش عايزه اشيلك الهم اكتر من اللي أنت فيه. هدأ صوته وهو يعقب: -مفيش حاجه أهم منك يا ياسمين، انتي والولاد أهم من أي مشاكل ممكن أفكر فيها. اغلقت عينها فهي تعلم كم يعشق عائلته فتحدث مكملا: -حددلك هتحتاج كام جلسة نقل دم؟ نفت وهي توضح: -لأ، الدكتور قال ممكن نحتاج جلسه بس في الشهر وطمني إنه مش خطر. بالرغم من أنها لم تكن بأحسن حال عندما استمعت لحديث الطبيب عن حالة ابنتها، إلا انها حاولت أن تخفف اﻷمر على زوجها الذي يحمل أطنان من الهموم تكهله حد الموت؛ فخففت عنه وطأة مرض رضيعتهما وهمست له برقة: -متخافش يا حبيبي، إن شاء الله هتكون كويسه والله. استمعت لصوت انفاسه المضطربة والغاضبة وهو يتمتم: -منك لله يا عاليا. ربما ظنت أنها قد تفرح بسماعها لتلك الكلمات، إﻻ أنها بهذا الوقت تحديداً لم يكن يشغل بالها سوى أمر حملها الذي تريد أن تطمئن عليه، ورغبتها الشديدة باﻻحتفاظ به. ❈-❈-❈ ضاقت عيناها بشكل غريب وهي تستمع لتوبيخه اللاذع: -كل ما أقول أنك هتقدري كل حاجه بعملها عشانك، الاقيكي بتحطيني في مواقف تكسف، بجد انتي طفلة وتصرفاتك كلها بتدل على كده. ردت بحدة وغضب: -طفله عشان عايزه ابقى معاك وجنبك؟ طيب يا زين تشكر يا سيدي على كلامك الحلو ده ولو شايف اني طفله ومش مناسبه ليك يبقى نفضها بقى بدل ما أنت معلقني جنبك كده. سحب نفساً عميقاً وزفره بصوت مسموع وسألها: -انتي بتتلككي؟ ما خلاص ياسمين هانم قالت هتتكلم مع الباشا ... عايزه ايه تاني؟ صرخت به: -مش عايزه حاجه، هو انت متضايق ليه كده وكأنك اتدبست مثلا! منا بقولك أهو لو رجعت في كلامك ومش عايز لا خطوبه ولا جواز قول. حاول أن يهدأ من نفسه وتكلم معها بصوت منخفض: -يا دعاء بلاش كده انتي عارفه اني بحبك، متتدلعيش عليا أنا مضغوط جامد في الشغل ميبقاش الشغل وانتي عليا. ابتسمت وهي ترد بمزاح: -ماشي يا ابو عضلات. ضحك وعقب عليها: -مالها العضلات مش عجباكي؟ أجابته متغزله به بجرأة: -ازاي مش عجباني؟ دي هي دي اللي وقعتني على جدور رقبتي يا زينو. اتسعت بسمته حتى أذنيه؛ فاقترب أمجد منه كعادته وشاكسه بتمثيله العزف على آلة الكمان وأصدر صوتا موسيقياً واﻵخر يدفعه بعيدا بغلظة حتى سقط أمجد على اﻷرض من قوة دفعه له، وبالرغم من ذلك لم يتوقف عن مشاكسته أو مضايقته وظل بجواره يتحرش به بمزاح ساخر حتى هدر به بصوت عال: -يا بني بطل يخرب بيت كده. سأله بفضول: -هنفرح بيك امتى بس يا زين؟ سؤاله حفز تلك المستمعة على الطرف اﻵخر؛ فأضافت هي اﻷخرى: -صح يا زين، صاحبك عنده حق ... هنفرح بيك امتى بقى؟ رد بوقاحة: -مستجله أوي انتي. حاولت تدارك تعجلها ففسرت: -لأ مش كده؟ بس عايزه أعرف ميعاد محدد عشان أبلغ شادي يظبط أجازته عليه، وكمان هو وعدني هيجيب لي فستان الفرح معاه وهو جاي من دبي. تنحنح بعد أن كاد يختنق بلعابه حتى يجلي صوته الذي تحشرج من إثر ذكرها لسيرة أخيها، وتذكر أفعاله معه وكذبه عليها بشأن عدم معرفته بأي أمر يخصه أو حتى تعرضه له؛ فتوتر قليلاً وسألها بعفوية: -انتي عرفتيه إن أنا اتقدمتلك؟ أجابته مؤكدة: -طبعا، أومال هقوله إن حد تاني هو اللي عايز يتجوزني!؟ علق مرار بحلقه وسألها من جديد: -ورأيه كان ايه؟ شخصت بصرها للأمام تنظر لذلك الاطار الذي يجمع أفراد عائلتها وشادي يحتضنها بجوار والديها، ابتسمت لذكرى تلك الصورة وقالت: -مقالش غير مبروك وربنا يتمم بخير، هو أنت كنت مستنيه يرفض مثلا؟ بلل شفتيه بلسانه وأجاب: -يعني! بحكم اللي بينه وبين فارس باشا. تحركت صوب فراشها وجلست عليه وهي تجيبه: -أظن شادي أعقل من كده، وهو عارف أنك بتشتغل عنده يعني ملكش دعوه بحاجه، وإلا كان بابا رفضك برده لنفس السبب. نظر لرفيقه الذي رأى ملامح وجهه التي تغيرت فجأة، وحاول أن ينهي معها المكالمة فقال: -طيب أنا مضطر أقفل عشان البريك بتاعي خلص. هتفت بلهفة: -طيب قولي بحبك. ابتسم رغما عنه وحاوط الهاتف وفمه معاً بكفيه وهمس لها: -بحبك. اغلق معها ونظر لأمجد وهتف بشرود: -في حاجه غلط. تعجب اﻵخر من حديثه فتسائل: -ايه اللي حصل وغيرك كده؟ قص عليه كذبه عليها بشأن شادي ورد فعله من زواجهما وقال: -واحد غيره كان رفض، ويمكن كمان كان قال لها على اللي أنا عملته فيه ... ده انا كنت بديله كل بوكس وشلوط يطلع من نافوخه، ولا لما كان بيقع مننا على اﻷرض وادوس على دماغه بجزمتي. سأله أمجد بحيرة: -وأنت كنت متوقع يحصل إيه لما يحكي لأخته؟ انها هتسامحك مثلا؟ شعر بالحيره تجتاحه وتحدث بضيق: -مفكرتش، بجد مفكرتش لا في رد فعل فارس باشا، ولا شادي وأبوها، ولا في رد فعلها هي شخصيا لما الحقيقى تبان، مشيت في العلاقة دي زي المسحور مبصتش لا ورا ولا قدام ... كنت بعيش اللحظه بلحظتها والسبب الرئيسي في ده هي. جعد جبينه بحزن وأطنب: -معاها بنسى كل حاجه، مش بتديني فرصه أفكر في اي حاجه غير في اللحظات الحلوه اللي بنقضيها سوا وغير كده كله مش مهم ... كنت بأجل التفكير في أي حاجه ممكن تبعدني عنها وأقول لنفسي لما ييجي وقتها يبقى يحلها ربنا، لحد ما فارس باشا عرف؛ فوقت وعرفت اني هواجه رفض منه ومن عيلتها، بس الغريب إن الكل وافق ووقتها فرحت أوي وفكرت إن دي تساهيل ربنا، وفضل بس خوفي من رد فعل أخوها وكل اللي جه في بالي أنها تكون بتحبني لدرجة متسمعلوش لما يرفض. ابتلع غصته المؤلمة وأكمل بتعجب: -لكن فكرة أنه يوافق وبالسهوله دي! هو ده اللي يقلق. سأله أمجد بحيرة: -يعني أنت قلقان من ايه؟ مش يمكن خايف من الباشا لو قال السر اللي بينهم وعشان كده سكت ووافق؟ رفض تفسيره بحركة من رأسه: -مش شادي، شادي ده عامل زي الحمار المتهور بيناطح اللي أكبر منه وهو عارف ومتأكد انه مش أده، فما بالك بقى بواحد راسه براسه! سأله من جديد: -انت شاكك في ايه فهمني؟ رد وهو صاراً على أسنانه ليس غيظا وغضبا فحسب؛ بل ألماً أيضاً: -خايف يكون ظن الباشا في محله وتكون لعبه من دعاء وشادي عشان ينتقموا. نظر له أمجد بتعجب وسأله بحيرة: -يعني انت جاي دلوقتي تشك فيها!؟ طيب وافرض طلع ظنك في محله هتعمل ايه؟ نظر له بحزن وأجاب : -مش عارف هعمل إيه ساعتها، بجد خايف ومحتار وبدعي من ربنا إنه يخيب ظني وظن الباشا. ❈-❈-❈ دلفت تلك العيادة بتوتر وهي تنظر لأسفل فتكلم الطبيب بصوت هادئ: -اتفضلي، انتي قلقانه من ايه؟ ابتلعت ريقاً ليس بحلقها وردت بصوت مبحوح: -أصلي جايه من ورا جوزي ومش عارفه رد فعله هيكون إيه لو عرف اني حامل. أومأ لها بتفهم وأشار أمامه للسرير الطبي وقال: -طيب اتفضلي عشان أكشف عليكي. تحركت صوب السرير وتسطحت بجسـ ـدها ورفعت كنزتها لتكشف عن بطـ ـنها فاتسعت بسمة الطبيب وهو يمسك بزجاجة بها مادة لزجة زرقاء وغمز لها: -الچيل بارد شويه. وضع كم كاف منه وبدأ بتمر ير جهاز الأشعة التلفزيونية على بطـ ـنها ونظر أمامه على الشاشة وقال لها بعملية: -الجنين بدأ يتكون والنبض كمان ظهر. شهقت بخضة وقالت بحيرة: -طيب والعمل؟ التفت ينظر لها وقال بصوت حاد: -العمل في إيه؟ انتفضت بفزع وصاحت به: -هعمل ايه في المصيبه دي؟ انت لازم تخلصني منها وانت السبب. كمم فمها براحته الغليظة، وهمس وهو صاراً على أسنانه: -هتفضحينا يا مجنونه واحنا في العيادة. أبعدته عنها بدفعة قوية، ورمقته بنظرة مغتاظة وقالت بتحذير: -لو مش عايز فضايح يا أنس أتصرف ابوس ايدك، أنا كده هتفضح وجوزي ممكن يموتني. تنهد بهدوء وتحرك صوب مكتبه وجلس عليه ببرود، وكتب بعض الوصفات الطبية وناولها إياها وقال بعملية وعدم إكتراث: -اﻷدوية دي مهمه جداً في الشهور دي. ألقت الورقة بوجهه وصرخت به: -بقولك جوزي هيق*تلني يا أنس. وقف متحركا ناحيتها ودا عب أسفل ذقنها وقال بمشاكسة: -وهيعرف منين بس يا روحي انه مش ابنه؟ اتسعت عينها بذهول وسألته بعدم تصديق: -انت بتقول ايه؟ انت عايزني أكدب عليه وانسب الطفل ليه؟ حرك رأسه بلامبالاة وأومأ مؤكداً: -أومال عايزاني أروح أقوله خلي بالك أنا ومراتك كنا بنخونك وأنت مش دريان! هو ابنه وخلصنا ومش هيعرف أبداً. بكت واقتربت منه تتوسله: -لا يا أنس أوعى تتخلى عني، أنت وعدتني أنك هتساعدني اتطلق منه ونتجوز، وأنا معملتش كده إﻻ لما اطمنتلك واكدتلي أنك بتحبني. ضحك ضحكة عالية وزم شفتيه بغرور: -مش أنا اللي اتجوز واحده نمت معاها قبل الجواز، لأ وكمان بتخون جوزها، اديكي اﻷمان إزاي وانتي زي ما خونتيه معايا ممكن تخونيني مع أي حد؟ ارتمت أرضا وتمسكت بقدميه تتوسله: -ارجوك متعملش كده، ابوس رجلك بلاااش.. انا عارفه إن اللي عملته غلط واستاهل تعمل كده معايا دلوقتي، بس انت اللي غوتني وأنا... قاطعها وهو يدفع جسـ ـدها بقدمه بعيدا عنه: -أنا قولت اللي عندي، ولو عايزه ابعت اجيب جوزك من شغله ونقعد بقى نقول اللي حصل من أول ما جيتي عشان أساعدك تتطلقي منه ولحد اللحظه دي انا مستعد، بس انتي لوحدك اللي هتدفعي التمن. وقفت تنظر له بكره وغل، وصرت على أسنانها وقالت بتوعد: -ماشي يا أنس، أنا كان لازم أعرف أنك إنسان خسيس وجبان، وزي ما خونت صاحبك وغويت مراته ممكن تبقى ندل وترمي إبنك وتنسبه لغيرك، بس أنا مش هسكت عن حقي وبينا اﻷيام يا دكتور. تحركت من أمامه وهو يبتسم بانتصار واغلق وراءها الباب مبتسماً بمرار وتمتم: -أنا عايز ست تكون زي نرمين، جميله وبنت ناس وتصون بيتي، مش سهله بمجرد ما اغمز لها تيجي جري تترمي تحت رجليا. جلس ووضع رأسه على مسند مقعده الجلدي وتذكرها؛ فأغلق عينه متذكراً ملامحها وتمتم بداخله: -انتي غيرهم كلهم، عيبك الوحيد إنك مرات اخويا وبجد مش عارف أبطل تفكير فيكي وهرجعك بأي تمن. ❈-❈-❈ ذهب لمقابلته بمقر عمله بعد أن هاتفه لحل اﻷزمة التي يمر بها؛ فاستقبله اﻵخر بامتعاض بعد أن عرف مقتطفات مما أخبرتها لوالدها عن مشاكلهما، جلسا بالمقهى الملحق بالشركة واستهل ياسين الحديث متسائلا بحيرة: -ايه اللي حصل بينك وبين نرمين بس؟ بابا حكالي إنك مزعلها ووصلت إنها سابت البيت! صر مالك على أسنانه واغلق نصف عين وهو يرد بغيظ: -كلام فارغ، بتختلق مشاكل وزعل عشان اسيب بيت العيلة اللي بلغتكم من اﻷول اني هسكن فيه. رد عليه بحنكة: -ما هو لو بيت العيلة كان كويس عمر نرمين ما كانت هتشتكي، نرمين صبوره وكتومه ومش بالساهل تشتكي، وفكرة إن المشاكل بينكم وصلت لدرجة تسيب البيت يبقى أكيد الموضوع كبير. زفر أنفاسه الغاضبة وقال بضيق: -ولا أي حاجه، كل الحكاية إزاي أهلي هم اللي بيقضولها طلبات بيتها، عيزاني اسيب شغلي و... قاطعه ياسين محتداً: -مااالك..... نرمين لا تافهه ولا بتاعة حوارات عشان تتخانق على الكلام ده. علا صوته وهو يرد عليه: -هو أنا كل ما أكلم حد فيكم يقولي الكلمتين الحمضانين دول، لا يا سيدي أختك تافهه وأهبل ست أنا شوفتها في حياتي، وبتزعل من لا شيئ وكل مشكلتها إنها عايزه بيت لوحدها بعيد عن أهلي. قضم ياسين داخل فمه ورد بحدة: -لو ده طلبها يبقى نفذه يا مالك، أنا كمان محبتش لا أسكن مع أهلي ولا مع حماتي مع انها عايشه لوحدها، والست بتحب يبقى لها خصوصية و..... قاطعه مجدداً: -انت ليه محسسني إنها ساكنه في شقة واحده معاهم، وبعدين ده مش موضوعنا دلوقتي أنا مش جاي عشان كده. رفع ياسين حاجبه اﻷيسر بتعجب وسأله: -أومال جاي ليه؟ رد فورا دون تفكير: -أنا جاي عشان تشوف حل في اللي اسمه فارس الفهد ده اللي فاكر نفسه كبير على الكل، إزاي هي تروح عندهم من غير حتى ما تفكر تستأذن مني ولا من ابوها؟ وازاي تفضل هناك وهي بتشتكي من بيت العيله ورايحه قاعده عند واحد البشريه كلها ساكنه عنده. تفهم ياسين سبب غضبه قليلا ولكنه رد بتوضيح: -فارس الفهد كبير العيله وبموافقة جدي يا مالك، وهو كبير بمواقفه وأثبت انه كبير في كل مره أتدخل لحل أي مشكله، وانت من مصلحتك انه يحل مشكلتك لأنه هيكون عادل بينكم يعني مش هييجي على حد لحساب حد. ضحك ساخراً وعقب: -لحد نرمين اعز حد على قلب مرا ته وهيرجح كفتها لخاطر ياسمين، وبانت من أول لحظه لما روحت اتفاهم معاه وفي اﻵخر قالي اخوك بيتحرش بنرمين، هي وصلت لكده؟ تعجب ياسين مما ألقاه على مسامعه وسأله بتركيز: -انت قولت ايه؟ أخوك ايه؟ أكد حديثه مردداً: -بقولك متهمينه أنه بيتحرش بيها، عمرك شوفت جنان بالشكل ده قبل كده؟ جعد ياسين جبينه وأردف: -لو ده كلام نرمين يبقى انا فهمت المشكله كبيره اد ايه، وعرفت إن حلها فعلا عند فارس الفهد وبس. صر مالك على أسنانه وهدر به: -انت بتقول ايه أنت كمان؟ هو أنت صدقت التخريف ده؟ أجابه بيقين: -نرمين مستحيل تتبلى على أخوك، ولو هي فعلا قالت كده يبقى حصل. انتفض مالك واقفا بحدة وصاح مهللاً: -أنا الظاهر غلطت لما كبرتك وجيتلك عشان اتفاهم معاك، بس ملحوقه يا ياسين وأنا هعرف آخد حقي وحق اخويا منكم كويس. عاد لمنزله بعد أن ظل يدور بسيارته دون وجهة محددة؛ فاستقبلته والدته بلهفته وسألته: -عملت ايه؟ روحت لأخوها؟ أومأ لها والحزن يظهر بوجهه فربتت عليه باهتمام وقالت: -متزعلش نفسك يا حبيبي، أنت الف واحده تتمناك، ولو هي فضلت مصممه على اللي في دماغها يبقى طلقها وانا بكره أجو زك ست ستها. ابتلع غصته بحلقه ورد: -انا بحبها يا ماما، وبجد مش عارف إيه الحل في اللي بيحصل ده؟ استمع لصوت أخيه وهو يخبره بصوت أجش: -اللي حصل ده هيمس سمعتي وأنا مستحيل أقبل بده، انت قدامك حل من اتنين ملهومش تالت، يا تطلقها ونقفل الموضوع ده قبل ما تحصل شوشرة.... قاطعته والدته مؤيدة: -ايوه يا ابني معاك حق، ما هو العيار اللي ميصبش يدوش. أومأ أنس بغل وأكمل: -يا أما تنفذ كل اللي هقولك عليه من غير ما تراجعني ولا تعارض في حاجه. نظر له بحيرة فاقتربت منه والدته تمسح على ظهره بحنان وهي تقنعه بحديث أخيه: -اخوك اكتر حد هيخاف عليك يا ابني، اسمع كلامه وهو أدرى بمصلحتك. سحب شهيقا عميقا وزفره بحدة وسأله بتردد: -عايزني أعمل ايه طيب؟ حاول أنس إخفاء ابتسامته المنتصرة وقال: -تطلبها في بيت الطاعه. ❈-❈-❈ لا تعلم كيف مر يومان منذ زيارتها للطبيب، وها هي اﻵن تجلس بحضن زو جها تنتظر إنتهاء رضيعتها من تجهيزها لنقل الدم كحل أول لحالتها. اقترب مراد منهما وتحدث مع فارس الذي كان شارداً أمامه بحزن: -فارس، تعالى انا عايزك. تركها ونهض، ولكنها تعلقت بذراعه وهي تسأل بتوتر: -في ايه، مخبيين عني ايه؟ رد مراد وهو يرسم إبتسامة مزيفة على وجهه: -ولا حاجه يا بنتي، انا عايز فارس في موضوع كده يخص الشغل. لم تبتاع اﻷمر ولكن ليس بيدها غير الصمت واﻷنتظار؛ فسحبه عمه بعيداً وتحدث معه بجدية: -چاسمين محتاجه فصيلة نادرة يا فارس، وللأسف مش متوفر عندنا فأنا بعت أطلب من بنك الدم فصيلتها و.... قاطعه يسأله بحيرة؟ -هي فصيلتها هتكون B لان ياسمين B. توتر مراد وهو يشرح له: -ما المشكله مش بس في فصيلة الدم يا فارس، البنت عندها أجسام مضادة ومحتاجه تركيز نقل دم بصورة مستمرة ومتكرره لحد ما نعالج فقر الدم ومستويات كرات الدم الحمرا؛ لان اﻷجسام المضاده اللي عندها بتحارب كرات الدم وده في حد ذاته خطر و.... قاطعه بحدة وهو صاراً على أسنانه: -وليه استنينا كل الوقت ده؟ الدكتور قال إن العلاج هيكون كافي ومش هنحتاج لنقل دم! جاي دلوقتي تقولي كل ده؟ حاول تهدئته؛ فربت عليه محاولاً امتصاص غضبه: -كانت محاوله ومنجحتش، ودلوقتي محتاجين إننا نصبر على العلاج وإن شاء الله هتجيب نتيجه. مسح على وجهه ولحيته الكثيفة، وعاد جالساً بجوارها؛ فنظرت له بقلق فابتسم بوجهها واحتضنها بقوة وزفر بهدوء؛ فنزلت عبراتها على وجهها بصمت وهي تنتظر انتهاء جلسة ابنتها. تحركت برفقته للخارج بعد الإنتهاء؛ فتقابلت مع طبيبتها النسائية فالتفتت تنظر لفارس بتوتر وابتسمت قائلة: -هروح اسأل الدكتوره على حاجه على ما انت تركب العربية. تعجب من طريقتها ولكنها لم تهتم وهرعت صوبها ووقفت أمامها تحدثها بتلعثم: -دكتوره ازيك؟ أومأت لها باحترام وسألتها: -انتي اللي ازيك؟ الحمل عامل معاكي ايه؟ أجابتها مبتسمة: -زي الفل الحمد لله، المهم أنا كنت عيزاكي متقوليش لحد على الحمل لحد ما أنا أبلغ فارس بنفسي. وافقتها مؤكدة: -أنا مبطلعش أسرار مرضايا لحد ولا حتى لأصحاب المستشفى؛ فمن الناحية دي متقلقيش... بس برده أنا لسه عند كلمتي وأنك لازم تنزليه انهارده قبل بكره، وكل تأخير منك بيخلي الوضع أخطر من اليوم اللي قبله فلو سمحتي فكري تاني في قرارك ده. ابتعلت ريقها وابتسمت لها مؤكدة: -أنا بس محتاجه وقت عشان أقدر آخد قرار زي ده. ردت عليها موضحة: -أنا لسه قايله إن التأخير مش في صالحك، وصدقيني المضاعفات اللي ممكن تحصلك من الحمل ده أكبر بكتير من اللي ممكن نعالجها ...فارجوكي فكري تاني. تركتها وذهبت صوب السيارة؛ فنظر لها فارس بريبة وسألها باستنباط: -كنتي لسه عندها من كام يوم! بتسأليها عن ايه تاني؟ ابتسمت ودا عبت وجهه وغمزت له قائلة بكذب: -أصل عملالك مفاجأة. اندهش منها فهمس باذنها: -خير يا رب يكون اللي في بالي. وكأنه يحاول نسيان حالة رضيعته بمشاكسة زو جته حتى لا تشعر بذلك اﻷلم بداخله من معرفته لحالة الصغيرة؛ فأجابته بإدعاء هي الأخرى لتطمس على سرها: -هوووو.. أنا استخدمت وسيلة كانت قالت لي عنها، وانهارده سألتها إذا ينفع نوقف الوسيله بتاعتك ونكتفي بالوسيله الجديده. تحفز بجسـ ده ورمقها بنظرات متلهفة وسألها: -ها وقالت لك ايه؟ أومأت مبتسمة: -ينفع تبطلها يا حبيبي. اخرج زفرة ارتياح وهو يقول: -ياااه أخيرا، أنا كنت متضايق أوي من الوسيلة دي بصراحه. مسحت بكفها على وجهه وهي تومئ: -عارفه يا حبيبي، عشان كده خليتها تشوفلي حاجه تانيه. بالطبع هي لم تعد بحاجة لوسيلة منع حمل بعد الآن؛ فهي تحمل بداخلها جنين بالفعل؛ لذا استخدمت كرهه للوسيلة حتى تختلق عذراً للهفتها للتحدث مع طبيبتها، وبالفعل نجحت في تشويشه بتلك الكذبة فما كان منه إﻻ أنه همس بأذنها: -احنا نروح نحتفل بقى. أومأت له موافقة؛ فنظر لصغيرته وتمتم بدعاء: -ربنا يكملها على خير وچاسمين تخف هي كمان، أنا الحمد لله كده اطمنت علي جاسر وعليكي ومش فاضل غير چاسمين، ومش هعوز حاجه من الدنيا بعد كده. أراحت رأسها على كتفه فور نطقه بتلك الكلمات وردت بحب: -ربنا يخليك لينا يا حبيبي. وصلت السيارة لعشهما الذي يبدو هادئاً من الخارج؛ فترجلت هي أولا وحاولت أن تحمل الرضيعة بمقعدها الموصول بالسيارة، ولكنه أوقفها قائلاً بحب: -سبيها يا روحي أنا هشيلها. تحركا للداخل ليتفاجأ بوجود هذا الجمع داخل بيته؛ فوقف لحظه لاستيعاب الأمر فما كان منها إﻻ أنها هرعت لاحتضان عمها هاتفة بترحيب: -حبيبي يا عمو عامل ايه؟ وحشتني أوي. بادلها العناق ومسح براحته على ظهرها وردد: -وانتي كمان وحشاني أوي يا بنتي. ابتعدت عنه ونظرت لزو جة عمها؛ فرحبت بها هي اﻷخرى: -ازيك يا طنط؟ إيه النور ده؟ صافحتها بفتور كعادتها، فالتفتت لتجد زو جها يرحب بعائلتها وهو لا يزال يحمل مقعد الرضيعة بل وحقيبتها على كتفه، فتقدمت خطوات لترحب بابن عمها وصديقتها: -ياسين، ساندي! أنا مش مصدقه المفاجأة دي. جلس الجميع بالبهو؛ فنظر محمود لمازن المبتسم له بهدوء وعاد ينظر لابنته صاراً على أسنانه، وسحب نفسا عميقا ليجيب تسائل ابنة اخيه الراحل: -انتو هنا من امتى؟ رد وهو لا ينظر لها بل يركز بصره صوب ابنته: -مش من كتير، جيت اشوف نرمين وأعرف ناوين تحلوا مشكلتها ازاي! وقف فارس يهندم ملابسه وحمل رضيعته وقال بجدية: -ادوني لحظات اطلع اغير هدومي من ريحة المستشفى وأطمن على بنتي أنزل لكم نتكلم. حمل الرضيعة فلحقت به ياسمين وفور صعودهما سألته بحيرة: -مالك؟ انت اتضايقت انهم جم من غير.... قاطعها وهو يفتح باب غرفة طفليه دون ان يطرق الباب متحدثا وهو مطبق أسنانه: -مش مضايق من حاجه يا ياسمين، سبيني اغير هدومي انا مش بلحق ارتاح. نظر أمامه للمربية التي وجدها تاركة صغيره يبكي وتتحدث بالهاتف، ولكنها فور أن وقعت عينها عليه اغلقت فوراً؛ فرفع حاجبه اﻻيسر بغضب وحدثها بصيغة محذرة: -آخر مره اشوف المنظر ده تاني، ليكي وقت راحه تبقى تتكلمي فيه، لكن طول ما انتي قاعده مع ولادي اياكي اشوف منك اهمال في حقهم مرة تانيه. ابتلعت بخوف ورهبة من شكله المخيف وصوته اﻷجش؛ فحاولت ياسمين تدارك الموقف واقتربت تحمل صغيرها الباكي وقالت بهدوء: -جاسر زنان يا فارس ولو عودته إن العياط وسيلة ضغط مش هنعرف نسكته بعد كده. ابتسمت بوسي لها بامتنان، ولكن حديثها لم يجعله يصمت أو يوافقها فاعترض قائلا: -هي كل وظيفتها راحة الولاد، لو مش قادره تعمل ده تمشي وييجي غيرها. ربتت ياسمين على كتفه هامسة: -خلاص حاضر هنبه عليها، بس أهدى شوية. زفر بغضب لم تفهم سببه! فترك الرضيعة وخرج متوجهاً لجناحه فتبعته وهي تتسائل بداخلها عن سبب غضبه، فقد كان يبتسم ويمزح منذ لحظات بالسيارة، ولكنها آثرت الصمت حتى لا تثير حفيظته فهي اصبحت تحفظه عن ظهر قلب. ساعدته بتغيير ملابسه لأخرى رياضية مريحة وتكلمت معه بنبرة خافتة: -انا عارفه إن الحِمل كله عليك يا حبيبي، بس الكل بيثق فيك و... قاطعها مربتاً على رأسها: -يا سلطانه أنا مش مضايق بس تعبان، طبيعي المجهود اللي ببذله بيهلكني حرفيا. عا نقته بقوة وقبـ ـلته قبـ ـلة عاصفة وقالت بحب: -حبيبي انت. انزل ذراعيها من حول عنقه وابتسم باقتضاب؛ فتفاجئت من ردة فعله فعادت تسأل: -لأ بقى بجد مالك في ايه؟ رمقها بنظرة متضايقة وقال بحدة: -مش معقول مش واخده بالك من نظرات عمك لمازن! هدر بضيق وحدة: -فكريني كده تاني مين فيهم اللي ساب التاني؟ صمتت ولم تجب فأضاف: -هي اللي قررت ومع ذلك كل نظرات اهلك لمازن ولأختي كأنها سرقته، او كأنه عمل جريمة بجوازه منها. تنهدت قليلاً وقالت بهدوء مغاير لما بداخلها: -محدش منهم بيتكلم في الموضوع من اﻷساس، أنت بس اللي حساس زياده بخصوص الموضوع ده، ولو مضايق انهم بيدخلوك في مشاكلهم فأنا هبلغهم بلاش يشغلوك وكفايه المشاكل اللي انت فيها. صر على اسنانه وقال بضيق: -انا مش معترض على حل مشاكلهم ولا مضايق وقولت لك الكلام ده قبل كده ميت مره، بس مش عايزهم يتعاملوا مع مازن وچنى بالشكل ده، واوعي تكوني فاكراني مش واخد بالي من تصرفان نرمين مع اختي. لم تجد ما تدافع أو ترد به عليه فشاغلها الشاغل بتلك اللحظة هو اﻷطمئنان على رضيعتها وعلى حملها بنفس الوقت، واﻵكثر هو كيفية اخباره بحملها دون مواجهة نوبة غضبه التي تعلمها جيداً. صمتها جعله يؤنب نفسه على الصياح بوجهها؛ فاقترب منها وقبـ ـلها من أعلى راسها وقال: -متزعليش مني يا سلطانه، انا مضغوط أوي اليومين دول. ابتسمت بسمة مصطنعة وقالت بحب: -ربنا يقويك يا حبيبي. نزلا للجمع الجالس باﻷسفل؛ فوجدا أن مازن وچنى قد صعدا غرفتهما فجلس وفتح الحديث قائلا: -بالنسبة لموضوع نرمين أنا مستني اعرف قرارها إذا عايزة تكمل معاه ولا ﻷ، لأن مش هعرف اتحرك خطوة واحدة قبل ما اعرف هي عايزه ايه اﻷول. تحدث محمود بضيق: -بس مينفعش تفضل قاعده هنا لحد ما مشكلتها تتحل، وخصوصا في وجود مازن. لم يراجعه وقال بتأكيد: -من الناحية دي معاك حق، اكيد مش هفرح لو حد اتكلم وقال إن بيت فارس الفهد بيحصل فيه تجاوزات زي دي. انتبهت لكلامه وقالت بحدة: -تجاوزات ايه يا فارس؟ انا حتى مبرفعش عيني في وش مازن والقصه بينا انتهت... قاطعها واقفا بغضب: -الصح مفيهوش كلام يا نرمين، واذا أنا هحاسب جوزك على اللي بيعمله، وعلى تساهله في حقوق وخصوصيات بيته ..فميتفعش أبدا اعمل ده وانا مقعدك في نفس البيت مع خطيبك القديم. زفرت بتوتر فأضاف: -وبرده عايز اعرف إذا هتكملي ولا لأ؟ واظن اخدتي وقت كفايه للتفكير. اطرقت رأسها لاسفل وعادت ترفعه وسألته بحيرة: -انت رأيك ايه؟ اقترب منها بخطوات واثقة وسألها: -هتاخدي برأيي يعني؟ أومأت له بتأكيد فقال بحزم: -تتطلقي. يتبع...