الفصل التاسع والثلاثون من رواية طمس الهوية بقلم اسماء المصرى

أخرجت ضحكة ساخرة:
-وهو كل ده متعرفتوش على بعض؟

نفى مؤكدا:
-نرمين بنت محترمة جدا ومسمحتش أبدا بأي حاجه تحصل بينا، ولو بتتكلمي عن الفترة اللي اشتغلنا فيها مع بعض فاحنا فعلا عرفنا طباع بعض بس في الشغل مش في الحياة يا أمي.

انهى حديثه وهو ينظر لها بتدقيق وتوسلها بنبرة بائسة:
-أمي، عشان خاطري أوعي تعملي أي حاجه فوق تزعلها.

تجهم وجهها وردت تدافع عن نفسها:
-وأنا لو ناوية أعمل ده كنت هوافق ليه يا بني، أخص عليك يا يزن.

انحنى مقبلا راحتها:
-حقك عليا، أنا متوتر بس.

ربتت على رأسه وهو منحنى يقبل راحتها فنظرت چنى لهما ولعلاقتهما بغصة حقيقة وهي تحاول استرجاع ماضيها مع والدتها قبل أن تتركها وتعيش برفقة أخيها الأكبر ومتى احتضنتها أو حتى تحدثت معها كما تفعل زوجة عمها مع ابنها الذكر والذي قد لا يحتاج لتوجيه واهتمام كما تحتاج الفتاة من أمها.

سمعت طرقات خفيفة على زجاج السيارة فنظرت للجانب لتجده والد نرمين وابنه ففتح يزن الباب ونزل يصافحهما فرحب بهم محمود ترحيبا حار:
-اهلا يا بني أهلا بيك.

انحنى لسحر التي لم تخرج من السيارة:
-اهلا يا هانم نورتي والله، واقفين ليا ومطلعتوش؟

أجاب يزن مبتسما:
-مستنيين فارس بناء على أوامره.

ضحكا معا وعقب الآخر:
-بس ميصحش كده تستنوه فوق أفضل.

فتح باب والدة يزن وهو يحدثها بلباقة:
-اتفضلي يا هانم.

نزلت مرغمة ووقفت تنظر ليزن وهو يشير ﻷخيه وخطيبته ليتبعوهم لاعلى، ولكن سريعا ما وجدوا سيارة فارس تتبعها سيارات الحرس ولحظات وصعد الجميع وسط نظرات الدهشة من محمود وياسين لتواجد دعاء وزين برفقة فارس.

جلس الجميع بالبهو الصغير الخاص بشقة السيد غزال ورحبت بهم هدى ترحيبا حارا فاستهل فارس حديثه فورا بعد أن ارتشفوا المشروبات التي قدمتها لهم:
-طيب يا جماعة احنا ندخل في الموضوع على طول بما إن كل الاطراف موافقة على النسب ده.

ابتسم السيد وأومأ لفارس فأكمل:
-احنا بأمر الله طالبين ايد نرمين لابننا يزن، قولت ايه يا حاج؟

ضحك السيد ورد فورا:
-موافق يا بني طبعا وكفايه انه من طرف الغاليين.

ربت فارس على صدره ممتنا لإطراءه وأكمل حديثه بتفاصيل الزواج:
-طيب احنا هنقدم مهر نص مليون جنيه وده المبلغ اللي حدده يزن، والمؤخر مليون.

أومأ كل من السيد ومحمود دون تعقيب، ولكن عندما تطرق فارس ﻷمر السكن:
-بالنسبة للبيت اللي هيسكونوا فيه فيزن هيجيب ڤيلا جنبنا برده عشان يبقى زي باقي العيلة.