الفصل التاسع والثلاثون من رواية طمس الهوية بقلم اسماء المصرى

هتفت بحدة وغضب:
-لا غلطانه ولا حاجه يا شيري، محدش غلطان غيري خلاص كده بس مكانش يعاقبني بأختي يعني، كان عاقبني بأي حاجه تانية بس هو عارف ايه اللي بيوجعني وبيعمله.

سألتها بتوجس:
-طيب أنتي هتعملي ايه؟ أنا لو منك ألبس وانزل وهو لما يشوفك عند بابا هيضطر يسكت و…

قاطعتها بعد أن صدحت ضحكتها الساخرة:
-مين ده اللي هيسكت وعشان مين؟ فارس هيسكت لو كسرت كلمته وروحت الخطوبة؟ أنتي مجنونه يا شيري وعيزاه يموتني خالص؟ ﻷ طبعا أنا مش هعمل كده، أولا عشان مش عايزه نكد وزعل بينا أكتر من كده وكمان كده هبقى فعلا بتحداه ولو في مجال للصلح بينا هيضيع خالص.

ضحكت شيرين ساخرة:
-بعد اللي عمله معاكي وأنتي اللي بتفكري في الصلح؟

أومأت مؤكدة:
-منا بحبه وعارفه اني غلطانه بس كانت نيتي خير ولو كان هو شايف إن السبب في ده اني بفكر في سعادة چنى فالحقيقة والسبب الأهم عندي كان هو وزعله على أخته وموقفه من مازن والحزن اللي كان متقل كتافه وهو مش عارف يحلها، بس هو مشافش كل ده وشاف بس اني كسرت كلامه، فارس الفهد عمره ما هيتغير.
❈-❈-❈

وقف خلف الباب يستمع لها باهتمام وكأنه ينتظر أن يرى ردة فعلها على أوامره وتحكماته التي لا يستطيع الاستغناء عنها، ولكنه شعر بغصة قوية تضرب قلبه فور أن وجدها أغلقت الهاتف وارتمت على فراشها تبكي بحرقة.

شعر باهتزاز هاتفه الجوال الذي وضعه على الوضع الصامت فور مغادرة مازن؛ فابتعد قليلا عن مرمى الباب حتى لا تستمع له وأجاب ذلك المتصل اللحوح مخفضا صوته:
-خير؟

رد يزن رافعا نبرته بلهفة:
-أنت فين يا فارس كل ده؟ وباعت چنى على هنا ليه فهمني؟

أجابه موضحا:
-خدها معاك عشان مازن مينفعش يوصلها وهي عايزه تحضر.

تنفس يزن عاليا وتحدث بنبرة غاضبة:
-ومازن موقفه ايه يا ترى من خطوبتي أنا ونرمين؟

تنهد مخرجا زفيرا معبئا بالكثير من التعب والإجهاد:
-يا بني مفيش حاجه، موضوع نرمين ومازن خلص من زمان وملوش لازمه كل شويه تتكلموا فيه وهو خلاص عرف غلطه وانتهى.

هز يزن رأسه وتصنع التفهم وهو بعيدا كل البعد عن ذلك بعد أن علم من نرمين تصريحه بحقيقة مشاعره تجاهها، سأله قبل أن يغلق معه الآخر:
-طيب انت جاي امتى؟ مش عايز أتأخر اكتر من كده احنا لسه رايحين عابدين والطريق طويل.

هتف فارس محتدا ولكن بنبرة منخفضة:
-يا بني أكلت دماغي برغيك، نص ساعه وهتحرك ونتقابل هناك تحت البيت عندهم.