الفصل الثامن و العشرون من رواية لاجلك نبض قلبي للكاتبة اسماء المصري

دمعت عيناها و رددت بحزن دفين ” انا كنت طول الوقت بزق نهى عشان تقرب منك لانى مش حطمن على حفيدى غير معاك، لكن انت…..”

صمتت لتكفف عبراتها وعادت تستطرد ” تقدر تقولى انت ناوى على ايه من ناحيه نهى؟ ”

اطرق راسه بخزى فهتفت ” عايز تطلقها…طيب و بعدين؟”

اجابها ” انا عايزها تشوف حياتها بدل ما هى واقفه قصاد حيطه سد ”

اذدرت لعابها و هتفت بالم ” طيب ده كان ينفع الاول و مع ذلك كنا خايفين من اللى حيتجوزها انه ازاى يقبل بوجودك فى حياتها و حياه حفيدى؟ انما دلوقتى لما تبقى طليقتك؟ تفتكر اللى حيتجوزها حيوافق بوجودك، و لا تبقى بكده بتقطع كل صله بيهم؟!”

تحير و ظل يفكر و هو لا يعلم كيف وقع فى هذا الامر المحير لتردد هى ” انا داخله العمليات و مش عارفه حخرج منها و لا لا، و عايزه اطمن عليهم ”

شهامته كانت و ما زالت توقعه فى عقبات لا حصر لها اولها عندما اصر على انقاذ رفيقه حتى بعد ان فارق الحياه فطالته رصاصه غادره، و عندما حاول انقاذ ابنة الامير و عاد اليها بعد ان كان قاب قوسين من الهرب و تسبب بقتلها و تسبب لنفسه بتلك الاعاقه التى لازمته طوال حياته و بعدها عندما وافق على زيجته من نهى حتى يرضى صغيره…. و الآن ماذا بفاعل؟

تنهد بضيق و اردف ” مش حقدر يا جماعه ارجوكم متضغطوش عليا بالشكل ده….انا كده حخلف بكل الوعود اللى فى حياتى و انا مستحيل اعمل كده، حخلف بوعدى لاحمد الله يرحمه و حخلف بوعدى لنفسى و حخلف بوعدى ليكم و لخديجه ”

و قبل ان يكمل حديثه دلفت الممرضه حتى تاخذها لغرفه العمليات فنظرت له بحزن و الم و هم يريحوا جسدها على السرير النقال الخاص بالعمليات و فور ان اقتربت من دخول العمليات نظرت خلفها لتهتف بصوتها المتعب ” نهى و عمر امانه فى رقبتك، اوعى تفرط فيهم….اوعى يا بنى، دول من ريحه احمد و اخر حاجه ليه فى الدنيا من بعدى ”

لتدلف للداخل فترتمى نهى عليه تحتضنه باكيه و هو يربت على ظهرها بحنو و يطمأنها برقه “متلقلقيش، حتقوم منها بامر الله”

ليجلسا على تلك المقاعد الموضوعه باستراحه المشفى فى انتظار خروجها و نهى تبكى بحرقه واضعه راسها على صدر عمر اما هو فباله مشغول باخر كلماتها و التى يمكن ان تكون وصيتها الاخيره و كيف عليه تنفيذها دون المساس بمباءئه او المساس باى شئ قد يضر علاقته بحبيبته