الفصل الخامس من رواية ست الحسن الجزء الثاني للكاتبة امل نصر
الفصل الخامس من رواية ست الحسن الجزء الثاني
وقفت العربيه قصاد بيت ” عبد الرحيم ” جوز بنتها وهى نزلت بسرعه تجيب نسمه .. ماقدرش يستنى ياسين فى العربيه ونزل منها يخبط بعصايته على الارض بقلق وخوف على البنت .. وائل كمان ماقدرش يتحمل وخرج من العربيه يشم هوا ويشرب سيجاره يطلع فيها غلُه .. شويه كده وخرجت البنت و امها بتساندها هى واخت ” عبد الرحيم ”
الف سلامه عليكى يابتى .. خير ان شاء الله خير .
قالها ” ياسين ” وهو بيتقدم منهم ويسند البنت .. انتبه وائل على صوت ” ياسين” فالتفت بدماغه .. برق بعينه وهو مش مصدق اللى شايفه .. اخيراً لاقاها وهى بتسند البنت التعبانه وباينها قريبتها .. وقف متسمر وكأن الكون صفصف عليهم .. عينه عليها بتركيز وهى بتسند قريبتها ومش دريانه .. فاق على صوت ” ياسين ” وهو بيزعق فيه :
افتح باب العربية ياوائل .. واجف متنح كده ليه؟
هااا…. حاضر ياجدى .. اتفضلوا ياجماعة اتفضلوا .
قالها وهو بيفتح لهم باب العربيه .. دخلت ” رضوانه” وبنتها التعبانه .. فالتفت هو للبنت يسألها:
انتى هاتركبى معاها يا انسه ؟
رفعت عينها هى ليه عشان ترد .. لكنها اتبرجلت لما شافته عن قرب وافتكرته .. خصوصاً لما شافت ابتسامته ليها .
لا انتى خليكى يا”هدير” يابتى .
سمعتها من ” رضوانه ” فزاحت عينها عنه ترد عليها
خلاص روحوا انتوا وانا جايه وراكم ..
اتكلم هو بسرعه
ليه بس ياانسه” هدير “ماتركبى معانا .. دى العربيه واسعه وتشيل
ردد ياسين الاسم مستغرب والبنت ردت بخجل
مالوش لزووم .. اناممكن اروح مشوار الوحده مشى !
وائل بلهفه
تمشى عالارض والعربية موجوده ..لا طبعاً مايصحش.
اتدخل ياسين بزهق
حن عليكى يابتى اطلعى .. خلينا نلحج البت التعبانه ماتتكسفيش منينا .
دخلت البنت مع رضوانه وبنتها فى الخلف وركب ” ياسين ” قدام مع وائل اللى الفرحه ماكنتش سايعاه .
………………………………..
-ها يابنتى .. رأيك ايه تعبتينى ؟
قالتها ” نهال” بزهق من صحبتها اللى ماريحتهاش بجواب على سؤالها .
نوها بتردد
مش عارفه يا” نهال” .. ارد واجولك ايه ؟
نهال بانفعال
تجولى موافجه ولا لأ .
سكتت شويه وعنيها رايحه جايه
يا” نهال” انا خايفه ليكون لعب عيال .. وانا مش عايزه حاجه تشغلنى عن مذاكراتى .
