الفصل الخامس و العشرون من رواية قيد حب للكاتبة شيماء سعيد

نظر إليه ياسر بضيق مردفاً:

_ يعني الباشا بتاعك لما يربطني في أوضة الجنايني فاكر إني مش هعرف أطلع من هنا وأعلم عليه تاني؟!..

أجابه الحارس بلا مبالاة:

_ لما تعرف تطلع من هنا أبقى علم عليه وكفاية كلام بقى أنا تعبت دماغي وجعتني..

أومأ إليه ياسر بغيظ مردفاً:

_ ماشي يا كلب أنت طول عمرك كلب مصطفى، نسيت إني كنت بدافع عنك قصاده قبل كدة، أطلع من هنا وهعلم عليك أنت كمان…

شعر الحارس ان الآخر معه حق فهو وقف معه كثيراً من قبل فقال بتانيب ضمير:

_ عندك حق أنت وقفت معايا كتير قبل زمان، بص أنا هبعت أجيبلك غدا وفنجان قهوة مع إن الباشا أمر إن لا تاكل ولا تشرب بس أنا هعمل ده جدعنة معاك ومتحلمش بأكتر من كده..

أبتسم إليه ياسر مردفاً:

_ أصيل طول عمري بقول عنك أصيل استعجل الغدا الله يكرمك..

______ شيماء سعيد عبده ______

على الارجوحة بالحديقة كانت علياء جالسة تقرأ بأحد الكتب، أقتربت منها السيدة سميرة بحزن قائلة:

_ ممكن أقعد معاكي شوية يا علياء يا بنتي لو مش هيضايقك..

أعتدلت علياء بجلستها مردفة:

_ طبعاً يا طنط اتفضلي..

أخذت السيدة سميرة نفس عميق ثم قالت:

_ من غير لف ولا دوران أنا مش عايزاكي لو عمك فكر يلعب في دماغك عشان ترجعي لمصطفى توافقي.

أومات إليها علياء بهدوء قائلة:

_ مش عايزاكي تقلقي من الناحية دي يا طنط أنا ومصطفى أخوات هو هيفرحلي في فرحي وأنا هفرحله في فرحه..

طبطبت السيدة سميرة على فخذها قائلة بصدق:

_ أوعي تكوني فاكرة إني بقولك كدة عشان خاطر ابني وعشان خاطر سعادته، أنا بقولك كدة عشان خاطرك.. أنتِ بنتي اللي ربيتها مع أمها خطوة خطوة وعايزة أشوفك مع راجل بيحبك…

بالبداية كانت متخلية إنها تفعل ذلك فقط من أجل مصطفي وسعادتها وقالت حقها فهو ابنها، حديثها الآن ادخل الامان بقلبها فقالت بتوتر:

_ طيب وحضرتك رأيك إيه في ياسر يا طنط؟!.

ابتسمت لها وقالت:

_ مربياه زيكم.. عقله طاير منه بس طول عمره عينه عليكي وبيحبك في الأول مكنتش حابة كدة عشان عارفة ان مهما حصل أنتِ بتاعت مصطفى ومكتوبين لبعض ومش عايزة الصحاب يخسروا بعض، لكن دلوقتي لو أنتِ عايزاه أنا هقف معاكي قدام أي حد يقول لأ..