الفصل الخامس و العشرون من رواية قيد حب للكاتبة شيماء سعيد

هي والله هي، لف وجهه ناحية الباب ليجدها تأتي على أطراف أصابعها فقال بعدم تصديق:

_ متقوليش إنك خوفتي عليا وجاية تزوريني.. .

إجابته بسخرية:

_ جاية أزورك فين هو أنت في السجن؟!.. بطل أوفر يا ياسر أنا وأنت عارفين كويس أوي أنك لو عايز تفك الحبل وتمشي هتعمل كده..

بهيام قال:

_ هو أنا عبيط عشان أفك نفسي وأمشي وأسيبك لوحدك يا قمر ده أنا مصدق اتجمعنا أنا وأنتِ تحت سقف واحد..

حديثه معسول وعينيه صادقة فتنهدت قائلة:

_ هو انت بتحبني بجد يا ياسر؟!..

بجدية رجل وقور صادق قال:

_ ولا عمري حبيت ست غيرك، علياء أنا عارف كويس أوي ان عمي خيري الله يرحمه رباكي تربية مقفولة وإنه كان كل حياتك ومن وقت ما قالك إنه مش عايزني وأنتِ حاطة ده قدام عينك، بس صدقيني هو قالك كدة مش عشان أنا وحش عشان هو عايزك لمصطفى اديني فرصة واحدة اثبت لك إني الراجل اللي يليق بيكي..

أومأت إليه بهدوء قائلة:

_ مش هنتكلم في أي حاجة دلوقتي ومش هديك ردي غير لما تقفل موضوع سما وتخليها هي ومصطفى يعيشوا مع بعض بهدوء بعدها ممكن أفكر أديك فرصة..

فك قيوده بأقل من ثانية ثم اندفع إليها بغضب مردفاً:

_ مش هطلقها ولا هخليه يتهنى بيها طول ما هو معلقك في رقبته ومش موافق اتهنى بيكي..

وعدت مصطفي بعدم الحديث عن طلقهما ولكن الأمر الآن خرج عن السيطرة فقالت بهدوء:

_ مصطفى مطلقني من اكتر من تلات أسابيع يا ريت بقى توقف المهزلة اللي أنت عاملها دي وتخلي اللي بيني وبينك بعيد عن الناس وتعرف ان قرار جوازي منك بايدي أنا بس ومحدش له علاقة بالموضوع…

______ شيماء سعيد عبده _____

بالشالية ..

ظل هاتف سما يرن مراراً وتكراراً فاغلقته حتى ذهب مصطفى الى مشوار مهم ففتحت الهاتف وقامت بالاتصال على ياسر مردفة بغضب:

_ في إيه شغال رن رن رن..

قال ياسر بمرح:

_ جرى إيه يا مرات الغالي هو مش بيني وبينك خطة المفروض نعرف وصلت لفين..

أخذت سما نفسها بتوتر قائلة:

_ ياسر لو في حاجة أنا ندمت عليها هتبقى الخطة دي؟!..

شعر ياسر بخوفها فقال:

_ متخافيش مش هقوله إنك معايا في الخطة ولا هقوله إنك عارفة إني مش متجوزك ولا حاجة وكل ده رسم مننا… سما صدقيني أنا مش عايز أذيكي بالعكس أنتِ بالنسبة لي غلاوتك من غلاوة مصطفى وهو غالي أوي عندي كل الموضوع إني كنت عايز أتجوز علياء مش اكتر من كده..