الفصل التاسع و العشرون من رواية لاجلك نبض قلبي للكاتبة اسماء المصري

صرخ سعيد بابن اخته بانكسار ” يعنى انت كمان عارف ان اخوك هتك شرفى؟ انتو ازاى قللات الاصل كده؟”

اجابه عدى على الفور و دون تفكير ” عيب كده يا خالى….بلاش انا، انت طول عمرك عارف عمر كويس، تفتكر انه ممكن يعمل كده؟”

اضاف عمر ” انا على ذمتى اتنين يا خالى، تفتكر حسيبهم و اروح لواحده بعتبرها اختى….طيب ليه؟”

تشتت سعيد و اخذ يتنفس بعمق فامسك به عدى ليجلسه رغما عنه و نظر لخديجه الواقفه تضع يدها على فمها لتمنع شهقاتها و اردف ” هاتى ميه لخالى يا ديچا ”

تناول من يدها كوب الماء و هو ينظر لها و ردد “متضايقيش منى يا بنتى انا مشكلتى مش معاكى ”

اومأت بادب براسها و نظرت له بتفهم و رددت بحذر ” انا اسفه انى حتدخل يا استاذ سعيد، بس انا شايفه ان تصرفات لوچين غير سويه و رأى انك توديها لدكتور ”

صرخ بها بحده ” افندم؟ انتو عايزين تطلعو بنتى مجنونه؟ و لا عمايلكم هى السبب؟!”

هتف عدى ” لوچين عملت كده عشان كانت بتحاول تخلينى اساعدها نبوظ جوازه عمر و لما منجحتش اعترفت بالحقيقه ان محدش لمسها يا خالى ”

تحدث من بين اصطكاك اسنانه ” امال مرات اخوك بتكلمنى كده ليه و كانها مجنونه ”

اضافت خديجه بحذر “لان لوچين حاولت تقتلنى قبل كده…و مجرد انها تتهم عمر بانه لمسها و توصم نفسها بالشكل الرهيب ده من غير ما تحسب نتايج اللى بتقوله او بتعمله، ده معناه ان مخها مش بيفكر بشكل سليم”

ساد الصمت بعد ان تحدثت لتنظر فى اوجه الجميع المسلطه عليها ليقترب عمر منها بخطوات بطيئه و امسكها من كتفيها و نظر لها بتدقيق و ردد بتساؤل “حاولت تقتلك ازاى؟”

اذدرت لعابها بتوتر و رددت تحسم الامر ” لوچين هى اللى زقتنى فى البيسين و فضلت واقفه شيفانى و انا بغرق ”

ازداد عمر حنقا و اخذ يضغط على اسنانه من الغضب حتى صرخ بها سعيد ” كدابه…انتى بتتبلى على بنتى عشان تطلعى جوزك انه برئ ”

اجابت بهدوء ” اسأل امير يا استاذ سعيد، هو كمان عارف و هو اللى خلاها تعتذر لى و انا محبتش اقول لحد عشان مكونش السبب فى مشاكل بين العيله ”

ظل عدى متسمرا مكانه ينظر بوجل فردد عمر بسخريه ” حتشهدى مين بس؟ ما امير ضمن تحالف الشر اللى حالف يبوظ حياتنا “