الفصل العاشر من رواية روضتني للكاتبة أسماء المصري
الفصل العاشر من رواية روضتني
-ده حتى لو كان فعلاً وبجد عيزاني فأنتي اختارتي الوقت الغلط لده، عيلة الفهد كلها واقعه في مصيبه غير الناس اللي ماتت وسامي اللي عزاه الصبح وبجد مشوفتش أغبى من كده تصرف.
تركها ودلف غرفة الملابس ليرتدي ملابسه فشعرت بنفسها تحترق وتمتمت بداخلها:
-هو ده رده لما عرضتي نفسك عليه، بجد مش قادره استوعب.
❈-❈-❈
استيقظ من نومه ليجدها جالسة بجواره تداعب شعره بأناملها فنظر لها متسائلا:
-صحيتي أمتى؟
أجابته بوجه بشوش:
-من شويه، روحت بصيت على الولاد ورجعت.
اعتدل على الفراش وتعجب من نفسه فهو معروف بخفة نومه واستيقاظه لأقل حركة بجواره، ومعروف عنها هي بثقل نومها فهتف متعجبا:
-معقول محستش بيكي! أول مره أنام كده!
ردت موضحة:
-عشان كنت مجهد أوي امبارح فطبيعي تنام كده.
سحب نفسا عميقا ووقف من مكانه وتوجه لغرفة ملابسه وخرج بعد ارتداءه لبدلته السوداء اﻻنيقة ذات القميص اﻻسود، وعاد ليرتدي ساعته الباهظة ونظر لها مشيرا إليها لتأتي له بسبابته؛ فابتسمت وهرعت صوبه فسحبها داخل حضنه مقبلا اياها قبلة عميقة وابتعد ليقول:
-طبعا مش محتاج انبه عليكي انهارده على اليوم هيمشي ازاي!
نفت برأسها لتؤكد له مطنبة:
-هجهز نفسي واتمم على البيت ومش هخرج من غير حراسه، وهكون موجوده في العزا من أوله وهستحمل فريده هانم مهما قالت وحاولت تستفزني، وهأكد على الناني تسمع كلام داده حنان وتاخد بالها من الولاد لحد ما آجي وهستناك تأكد عليا أخرج امتى وارجع امتى… في حاجه تانيه نسيتها؟
ابتسم ووضع راحته على وجنتها وخلف اذنها ونفى برأسه مبتسما لها بحب، وانحنى يقبلها من تجويف عنقها وهمس باذنها:
-براڤو عليكي، بحبك يا سلطانه.
احتضنته مرددة:
-وأنا بحبك يا فارس، خد بالك من نفسك عشان خاطري.
تأهب ونزل الدرج برفقتها فوجد ساهر وحنان بانتظاره على مائدة اﻻفطار فجلس وبدأ تناول افطاره بدون شهية؛ فاصرت هي على اطاعمه بيدها فابتسم لها وتناوله منها وسألها بحيرة:
-أومال فين الناني؟
أجابته فورا وهي تنظر لأعلى:
-فوق مع الولاد، تحب اناديها عشان تتعرف عليها؟
نفى بحركة من رأسه وهو يعقب:
