الفصل الثالث رواية حارة الدخاخني للكاتبة أسماء المصري
الفصل الثالث حارة الدخاخني
دفعها عندما وجدها شاردة بهذا الشكل وفور دلوفها وجدت أخيها يجلس على مقعد خشبي مربوط بالعديد من الحبال فرصخت فورا:
-يووووسف.
هرعت ناحيته واحتضنته وهو بمكانه فصاح بها فورا:
-انتي ايه اللي جابك؟ أنا مش مفهمك هتعملي ايه كويس؟ ايه اللي جابك؟
وقفت تحرك رأسها وآثار البكاء لا تزال على وجهها:
-انا كنت هموت من قلقي عليك واللي حسيته في الساعه اللي فاتت وافتكرت انك موت.
بكت بانهيار وهي تتابع:
-أنا مليش غيرك وكنت هموت من القهر والحمد لله أنك بخير.
صر على أسنانه ونظر لرشوان بنظرات نارية فضحك الأخير:
-بلاش البصات دي يا يوسف أنت مش ادها.
صرخ به الأول:
-انت عايز ايه مني؟ مشيها من هنا وأعمل فيا اللي أنت عايزه.
رفع رشوان كتفيه رافضا:
-والله أنا عامل حساب العشرة واني مربيك على ايدي ومحبتش اوجع امك واخواتك عليك بس أنت مش راضي تلايمها معايا.
هنا تدخلت ملك:
-أنت عايز منه ايه يا معلم؟
رد غير عابئ بصراخ يوسف:
-انا قدمت له حلين عشان يحل بيهم رقبته بس هو منشف دماغه وإلا ليموت شهيد الغرام وأنا مش هاين عليا اموته بصراحه، فآدي الجمل وآدي الجمال وانتي اللي جيتيلي برجلك.
اتسعت حدقتي يوسف وصرخ به:
-اللي معرفتش تعمله زمان مش هنولهولك دلوقتي يا معلم، بقى بعد ما كنت عايز تتجوز امي جاي دلوقتي وتحط عينك على اختي اللي من دور عيالك؟ مين فينا بقى اللي خان الأمانه وحط عينه على اللي مش من حقه؟
جلس رشوان أمامه بأريحية واستأنف حديثه:
-أنا طالب شرع ربنا يا يوسف وأنا راجل مقتدر و…
صرخت ملك بعدم فهم:
-انتو بتتكلمو عن ايه؟ مين ده اللي كان طالب ايد امي وهي اصلا على ذمة بابا متطلقتش منه، ولا عشان ماهو سابنا يبقى…
قاطعها رشوان واقفا أمامها ومفسرا:
-أبوكي مات يا ملك من زمن الزمن وأمك واخوكي خبو عليكم عشان كنتو لسه عيال صغيره، بس أنا عندي تعرفي إنه مات وهو بيجري على لقمة عيشه عشانكم أحسن ما تفكريه ندل وسابكم.
ترقرقت عينيها بالعبرات وهو يتابع:
-أنا ياما قولت لأمك تعرفكم الحقيقة على الأقل تقدر تقدم ع معاش ولا تتجوز بس…
صرخ يوسف يسبه سبة نابية:
-أنت يا *** عايزها تتجوز واحد شبهك عنده بدل الحرمه 3؟
اتسعت حدقتي ملك ورشوان يضحك بهيسترية:
-اخوكي ده عامل شبه الفار السكران اللي راح شربله كاسين وفضل يقف قدام الأسد ويقول في واحد هيطلع م** أمه انهارده، بس لما الأسد وقفله عملها على نفسه.
