الفصل الثالث رواية حارة الدخاخني للكاتبة أسماء المصري
الفصل الثالث حارة الدخاخني
رفض بحركة رأسه:
-جوازه مربوط بشغله يا ملك بس كل شروطك نافده إلا ده، اشرطي وشوفي بنفسك.
لم تجد ما تساومه به سوى دلالها الذي تستخدمه ﻷول مرة:
-انا وورد أصحاب وبعد جوازنا هبقى ضرة امها وعلاقتنا ببعض هتبوظ وأنا مليش غيرها، لكن لما تبقى مرات اخويا ساعتها هنفضل زي ما احنا، عشان خاطري وافق.
ضحك بانهيار وداعب انفها:
-برده لأ يا يبقى دراعي اليمين وجوز بنتي يا يرجع عامل عندي وملوش غير مرتبه وده عشان خاطرك بس.
أومأت وتكلمت بقوة وثقة:
-طبعا أمي واخويا هيعيشوا معايا في البيت اللي هتجبهولي وأنت كده كده هتقسم الايام زي ما أنت عامل دلوقتي ففي غيابك مش عايزه اعيش لوحدي.
رد متنهدا وكأنه عدى لألف ميل:
-موافق يا ملك، كل طلباتك أوامر ولو افتكرتي اي طلبات تانيه بعدين بلغيني بيها ونافذه في الحال.
تنفست الصعداء ووقفت قبالته ترجوه بملامحها الرقيقة:
-طيب فكه بقى.
أخرج مديته من جيب جلبابه ونطرها ففتحت على الفور وانحنى ليقطع الحبال وابتعد، فوقف يوسف بغضب ولكنها اقتربت منه تحتضنه بلهفة ولم تمهله الفرصة للاعتراض وكتمت فمه تؤكد له:
-كل حاجه هتبقى تمام، بس يلا بينا دلوقتي أحسن امي قلقانه عليك أوي.
هما بالخروج فهتف رشوان يسألها:
-طيب مش ممكن نقرو فاتحه حتى ونربطو الكلام مع امك!
التفتت وأومأت له:
-حاضر هبلغها بس فوت بكره عشان كتب كتاب حسن وسهر وامي هتبقى مشغوله مع ام حسن في التجهيزات ويوم الجمعه هستناك بعد الصلاه تيجي وتطلني من امي.
❈-❈-❈
جلس بجوار أخيه يراجع الحسابات بعد انتهائهما من العمل الكثيف لليوم، تنهد حسن وهو يقوم بتقسيم النقود التي أمامه:
-خد دول فلوس نقلة بكره ومعاهم فلوس البضاعة وحاول تنزل قبل الفجر بشويه عشان تلحق تخلص وترجعلي في السريع انا مش هبقى فاضي بكره.
ربت حسين على ظهره:
-ماشي يا عريس مع انك المفروض تاخد أجازه بكره ونقفلو المحل وأهل الحاره كلهم عارفين إنه كتب كتابك ومحدش هيزعل.
ضحك بخفة معقبا:
-يا بني بكره الكل هيبقى مشغول وأغلب الناس بتاكل سمك يوم الخميس والجمعه فأنت بقى عايز تقفل الرزق بتاعنا، طيب والسمك اللي هنجيبوه ده نعملو بيه ايه؟ نبيتوه في التلاجات لما يبوظ!
لم يعقب عليه أخيه فأكمل الأول:
-دول أجرة العمال بتاعة انهارده وبكره وأبقى روق عليهم شويه عشان يسلمو الطلبات بدري يعني آخركم 3 العصر عشان نلحقوا نجهزو.
