الفصل الثالث رواية حارة الدخاخني للكاتبة أسماء المصري
الفصل الثالث حارة الدخاخني
ابتلعت ريقها عندما صاح أخيها مجددا ولكن الآخر أمر أحد رجاله بتكميم فمه:
-عاملي صداع من امبارح يرضيكي كده.
ضحك ضحكة سمجة فهتفت بصوت يهتز رعبا:
-طلباتك ايه يا معلم؟
رد يبتسم لها بسمة واسعة:
-انا عرضت عليه يشتغل معايا ويبقى الراجل بتاعي بس هو رافض مش عارف ليه مع انه شغال في التهريب، فرقت ايه بقى دخان عن حشيش عن بودره؟
ردت وقد قاربت قدميها على خيانتها والسقوط معها أرضا:
-الفرق إن المخدرات مفيهاش هزار وحكمها اعدام انما التهريب…
قاطعتها ضحكاته العالية والتفت له يرمقه بنظرة جامدة:
-الاستاذ ده وقت ما كان مع بنتي انا كنت بقابل كبارات البلد بالبدلة الرسمي، ناس تقيلة اوي في البلد وهم اللي بيسهلو الشغل ده وبيطلع لهم حسنتهم برده ومش من مصلحتهم إن التجارة دي تتضرب خصوصا وفي بينا نسب، ما انتي عارفه اخوات ورد وشقايقها متجوزين ابن رجل الاعمال كامل السيوفي وبناتي من مراتي التانية متجوزين ولاد اللوا هاشم الصواف ولولا بقية البنات سنهم لسه مجاش كان زماني مجوزهم لابن قاضي وابن محامي عام وابن حد في مجلس الرياسه وده عشان مركزي يفضل زي ما هو وأفضل أنا نمرة واحد في الشغلانه.
اقترب منها ونظر لها بنظرات تفحصية:
-أنا بعد كل ده ومليش راجل اتسند عليه، بناتي متجوزين جوازات كل الناس بتحسدني عليها ومع ذلك مش حاسس بأي واحد فيهم انه ينفع يحل محل ابني عشان كده انا عرضت عليه يشتغل معايا وهو رفض.
تكلمت بعد أن استجمعت شجاعة زائفة لا تناسب عمرها:
-وبعدين؟ هتق/تله؟
نفى بحركة من رأسه:
-ﻷ، عرضت عليه احل رقبته واتجوزك أهو يمكن انتي اللي تجبيلي العيل اللي نفسي فيه!
تسلحت بشجاعة زائفة وهتفت معترضة:
-بس أنت متجوز 3 يا معلم.
ضحك غير مهتم لحديثها:
-ومطلق زيهم وعندي بدل البنت 7 بنات ونفسي في ولد يشيل اسمي قولتي ايه؟
استمعت لصراخات أخيها المكتومة والتي فهمت معضهما وهو يطلب منها عدم الموافقة بل والمغادرة بعيدا ففهمه رشوان هو الآخر وهتف يحفزها:
-آه صحيح لو حاطه أملك على المعلم ابراهيم أبو شامة تبقى بتضيعي وقتك، الفلوس والبضاعة والمكسب بتاعها معايا.
ضحك ضحكة عاليه وهو يضيف:
-اصل إبراهيم ده صبي من صبياني وميقدرش يعمل حاجه من ورايا وبموافقتي وإلا نهايته تبقى وحشه اوي، ولما اخوكي افتكر انه ذكي وراح يعمل معاه شغل من ورايا جه وقالي وأنا اللي سمحت له يشتغل معاه، قولت في عقل بالي وماله يا معلم لما الواد يكبر يمكن لما القرش يجري في ايده يفهم إن ملوش غيري، بس طلع خاين وبيعمل القرش ده عشان يلعب على بنتي.
