الفصل الحادى والعشرون من رواية طمس الهوية بقلم اسماء المصرى

تنهد ماهر وهو يعقب على والده:

-وفي الآخر حضرتك كتبت كل حاجه باسمك يا بابا، مجهودي وتعبي بقى باسم حضرتك وبعد عمر طويل هيبقى لاخواتي.

أومأ له مؤكدا:

-لأن في الاساس الفلوس دي ورثي من ابويا، اخويا جه يديني جزء بسيط من ورثي وأنا عملت كده عشان احفظلكم حقوقكم كلكم وميحصلش مع حد فيكم اللي حصل معايا.

تجهم وجه ماهر ووالده يضيف:

-الظلم اللي حصل معايا أكبر بكتير من مجرد ورث وانت عارف ده وبلاش تفتح كلام في الموضوع ده تاني.

صمت الأخير وتابع والده:

-لما أجبرتك تدخل الصنايع عشان انت الكبير اللي هتقف في ظهري وتكمل من بعدي، ودلوقتي انا مش بجبرك على الجواز من فريدة بالعكس ده أنا بكافئك مره واحده في حياتك لأني عارف انك بتحبها حتى لو بتخبي من صغرك بس انا أبوك وحاسس بيك.

خانته دمعة نزلت على وجنته ووالده يكمل:

-ولو على مدحت فهو لسه صغير ووراه سنتين جيش ولما يخلص لسه هيشتغل ويكون نفسه وعلى ده ما يحصل هيكون نسى ومش بعيد يحب غيرها ويتجوز كمان.

ربت على كتفه وهو يستطرد بحديثه:

-شرف اختارك انت بالذات من بين ولادي عشان بنته عشان عارف انت مين كويس، وهو راجل عاقل وعارف هو بيختار ايه ومين بالظبط فبلاش تصغرني قدامه يا بني، ما هو مش معقول هو قدر على بنته وانا مش هقدر على ابني.

لم يعقب عليه وظل بحالة شروده حتى مرت أيام واقترب وقت الخطبة فحضرت إليه مجددا تتوسله باكية:

-يا ماهر أعمل حاجه، أنا بعت جواب لمدحت ومش عارفه وصل له ولا لأ!

ابتلع ريقه ورد وهو يشعر بغصة تألم معدته:

-أنا بجد مش لاقي صرفه يا فريدة، الحل عندك مش عندي لأن أنا قولت لبابا فعلا اني مش عايز أتجوزك وعرفته بمشاعركم بس هو رفض وقالي إن والدك هو اللي اختارني من بين اخواتي كلهم.

بكت وانهارت فسحها بحضنه مربتا عليها وهو يؤكد لها:

-صدقيني أنا مقدرش أرفضك بإصرار أكتر من كده عشان سمعتك، حاولي أنتي تتفاهمي مع باباكي يمكن يسمعلك.

ضحكت ساخرة من حديثه وهي تمتعض بوجهها:

-قولتله يا ماهر، ما أنت عارف شرف العامري، لا بيهمه حب ولا مشاعر ولا أي حاجه وكل اللي عمله انه هددني لو صغرته قدام الناس هيقتلني وأخواتي الرجاله مساعدينه على جبروته ده وعايزين يخلصوا مني بأي شكل عشان الأرض والورث، ما أنت عارف الصعايدة اللي زي بابا لا بيورثوا البنات ولا حتى لينا حق نختار الراجل اللي هنكمل حياتنا معاه وأسهل حاجه يهددوني بالقتل عشان العار.