الفصل الحادي عشر من رواية ست الحسن للكاتبة امل نصر

بنتى خطفهم العمده يابوى .. عشان انت خاطف عاصم .. زى مابيجولوا .

ياسين بتحفز : مين هما اللى بيجولوا ؟!

راجح : جماعه اتصلوا بيا جبل الفجر و جالولى انهم خطفوا ” نهال ” و” بدور ” ..حن عليك يابوى .. دولا عيالى . يعنى انا عندى ادفن حى ولا حد يمسهم .

ياسين : ومين اللى هايجدر يمسهم اساساً ؟! .. المهم انت اتاكدت من الكلام ده .

راجح بصوت ملتاع على بناته : ايوه يابوى .. البت امبارح اتصلت وجالت انهم نازلين البلد فى الجطر .. ولحد دلوك ماوصلوش وبرن عالتلفون بيدينى مغلق .. يبجى حصل يابوى والكلام صح اللى جالهولى واد الفرطوس .

ياسين وعينه بترمى شرار

ااه يا” هاشم ” ال…… هى وصلت كمان للحريم …دا انا هاشربك المر كاسات كاسات

راجح وهو بيرجف : احب على يدك يابوى .. رجع ” معتصم ” لابوه … دولا عرضى يابوى

ياسين : اصلب طولك ياض .. محدش يجدر يمس عرضك .. والعمده اكتر واحد ..عارف بالعواقب .. لو بس لمسهم .

راجح بصوت خارج بصرخه : يابوى اسمعنى .. دا اللى بلغنى جالى جول على بناتك يارحمن يارحيم .. حن عليكم بعدونى انا وبناتى من الحسبه . وان شالله اهج واسيب البلد حتى .

شده من دراعه “ياسين” وخده فى حضنه يطبطب عليه هو حاس اوى بلوعة ابنه على بناته .. وراجح كأنه لقاها فرصه وغصب عنه دموعه نزلت على كتف ” ياسين ” اللى حس بيها وكأنها نار بتحرقه .

خلاص اهدى .. كل اللى انت عايزه هايحصل .. وهارجع ” معتصم ” لابوه وارجعلك انت بنتتك منه .

راجح وهو بيمسح دموعه بطرف كمه

ارجوك بسرعه يابوى .. انا سايب امهم شايله الطين فى البيت ولولا انى حلفت اليمين عليها لكانت جاتلك صارخه من بيتى .

طبطب على كتفه وهو بيحاول يهديه .. وبيفكر فى الواطى .. اللى قدر يعمل احط عمل فى عرف البشر كلها .. مش عرفهم هما بس

……………. …………… .

بتفتح عنيها لقت المكان غريب عليها .. حاولت تصحصح فى نفسها وتقوم تتاكد .. لقت اختها نايمه جمبها على السرير فى اؤضه غريبه بنقوشها وتصميمها اللى يشبهوا بيوت العز والباشوات القديمه .. حاولت تفتكر ايه اللى جابهم هنا .. اشتغلت تعصر فى مخها . لحد اما افتكرت الراجل الغريب اللى وقفهم هى واختها فجأه وهما داخلين البلد .. يسألهم عن دكتور يعرفوه .. عشان مراته تعبانه ومحتاس بيها .. وهما مندمجين وبيشرحلوه .. عن مكان عياده قريبه .. فجأه حست ايد بتكتم بوقها بمنديل . عينها راحت على اختها لقتها نفس الوضع .. مع اختلاف انها شافت الراجل اللى بيخدر اختها