الفصل الرابع والثلاثون رواية طمس الهوية الجزء الرابع من أحببت طريدتي للكاتبة أسماء المصري
الفصل الرابع والثلاثون طمس الهوية
ضحكت فشرد بها ولم يع لحالته إلا عندما تحدثت:
-سرحت في ايه؟
أجابها دون وعي:
-في ضحكتك.
اتسعت حدقتيها وهمت بالوقوف استعدادا للرحيل فأمسكها بقوة ومنعها من المغادرة وهو يتوسلها:
-استني يا نرمين بلاش تقفشي كده.
تنفست بحدة فلم يمنعه شكلها من البوح بما يحمله بداخله:
-أنا بحبك ودي حقيقة محدش مننا يقدر ينكرها حتى لو حاولنا، ﻷني حاولت بس أول ما سمعت صوتك عرفت إن محاولتي فشلت.
سحبها ليجلسها مكانها من جديد وهو يمزح:
-اقعدي قبل ما حد ياخد المكان.
لم تضحك بل جلست متجهمة الوجه فتابع:
-عارف انك مضايقه من مشاعري دي بس أنا مبحاولش أفرضها عليكي وعارف أنك رفضاها جملة وتفصيلا، وأنا معنديش استعداد أبدا أجري ورا واحده مش عيزاني بس.
صمت مطرقا رأسه بأسى:
-محتاج وقت مش أكتر عشان أقدر اخرجك من قلبي ﻷني نجحت الفترة اللي فاتت دي كلها اني اخرجك من تفكيري، بس مع أول لقاء بينا كل نجاحي ده راح ورا الشمس فأنا مش طالب منك حاجه بس مش منطقي أبدا اننا نكون في بلد غريبة احنا الاتنين ونعمل نفسنا منعرفش بعض، يا ستي اعتبريها صداقة سفر تخلص اول ما نرجع مصر.
أومأت وهي تصر على أسنانها:
-معاك حق بس يكون من غير تجاوزات.
تعجب من حديثها فرمقها بنظرة متحيرة:
-تجاوزات؟ أنا تجاوزت معاكي في ايه فهميني؟
ردت بعد أن حاولت أن تزيل خجلها:
-كلامك وغزلك ده ميعتبرش تجاوزات من وجهة نظرك؟ أنت بتقول صداقة سفر، فاهم معنى كلمة صداقة؟
بلل شفتيه وأومأ مؤكدا حديثها ومعتذرا:
-معاكي حق، أنا بعتذرلك ومش هتتكرر تاني بس.
صمت ليستجمع شجاعته وهتف:
-لو لقتيني سرحان فيكي متسألنيش سرحان في ايه وأظن من حقي اسرح بالشكل اللي انا عايزه.
ضحكت رغما عنها من طريقته بالحديث فحركت رأسها معترضة عليه ومستسلمة لما ألقاه على مسامعها فابتسم هو بسمة جاذبية جعلتها تذدرد ريقها بصعوبة وبسبب تحديقه بها فهتفت بحدة:
-تمام بس متزودهاش.
أومأ وبسمته تكاد تتسع ﻷذنيه شاعرا بنفسه وقد حلق بالسماء لمجرد ابتسامتها الرقيقة بوجهه، وفكرت هي بداخلها فما الضرر الذي قد يحدث إن استمعت بوقتها قليلا.
انتهت أخيرا من تناول الشطيرة فهتف ساخرا:
-أخيرا، ده انتي بطيئة أوي في الأكل، تحبي اجيبلك قهوة؟
رفضت ووقفت تخبره:
-أنا لازم أرجع الفندق عشان بعيد عن المعرض ولسه جايه بكره تاني.
