الفصل العاشر من رواية دلال و الشيخ للكاتبة شيماء سعيد

……..

قامت إبتهال بالنداء على أسماء لتساعدها فى قليلا فى ترتيب المنزل .

_يا أسماء، أنتِ يا آخرة صبرى.

فجاءت أسماء مسرعة قائلة: نعم يا ماما .

إبتهال: بقولك يا سمسمة، ادخلى يا بنتى نضفى أوضة أحمد.

فرصة وهو فى الشغل، عشان مش قادرة ضهرى وجعنى ولما تخلصى تعالى ساعدينى فى الطبيخ .

عقدت أسماء حاجبيها وقالت بتذمر:

_وأنا مالى بأوضة حضرته ما ينضفها بنفسه، مش كفاية قاعد شارب واكل عندنا .

ذمت إبتهال شفتيها وعاتبتها :

_ عيب يا بنتى، ده ابن عمك وراجل شقيان وتعبان طول النهار وكمان عنده عزة نفس مفيش زيها.

تصورى صمم يدفع جزء من مهيته نظير الأكل والشرب معانا .

أسماء بإستهزاء: لا نزيه اوى .

رفعت إبتهال حاجبيها بتعجب وسئلتها:

_ فيه إيه يا اسماء، مالك مش طيقاه كده..!!

مش ده أحمد اللى كنتى هتموتى عليه وكسفتى ابن عمتك اللى كان بيحبك بسببه .

رفعت أسماء أنفها وقالت بتكبر: ده كان زمان، دلوقتى خلاص، مبقاش يلزمنى

أخرجت إبتهال زفيرا حارا وتابعت:

_ ليه كده يا بنتى،مرة تميم ومرة أحمد اللى لو لفيتى الدنيا كلها مش هتلاقى زيهم.

يا بنتى البطران آخره قطران، خديها منى نصيحة .

تأففت أسماء وقالت بإستياء: يووه وأنا ايه ذنبى أخد حد أقل منى.

واحد ميكانيكى وواحد بعد ما كان دكتور بقا صبى فى محل .

فسخرت منها إبتهال : وانتِ يعنى يا شملولة ايه..!

ده أنتِ دى تالت سنة ليكِ فى الثانوية العامة ومش بينلها برده نجاح السنادى عشان مخك جزمة .

عقدت أسماء حاجبيها وضربت الأرض بقدميها قائلة:

كده يا ماما، لا أنا هنجح السنادى وهدخل الكلية وبكرة تقولى أسماء قالت .

إبتهال: لما نشوف، بس خشى انجرى يلا نضفى الاوضة زى ما قولتلك .

فسارت أسماء رغما عنها الى الغرفة وفتحتها، لتجدها تنبعث منها رائحة جميل وكل شىء مرتب فى مكانه ونظيفة.

فتعجبت وقامت بالنداء على والدتها التى ابتسمت حين رؤية الغرفة هكذا وقالت:

_ ماشاء الله عليك يا أحمد، إنسان جميل فى كل حاجة ونضيف حتى عنك، ده أوضتك أنتِ مقلب زبالة .

…….

ولج شفيق الى والدته فاستدات بوجهها عنه، فتقدم منها قائلا:

_ الحاجة زعلانة منى ولا ايه ؟