الفصل الرابع عشر من رواية نبض قلبي لأجلك للكاتبةلولا نور

تحدث الحج سليم الي هشام الناجي: تعالي يا هشام يا ولدي نشربوا الشاي في المضيفه وبعدها اخدك تتفرج شويه علي البلد وتشوف اتغيرت ازاي…

اللي تشوفه يا حج … قالها هشام وهو ينهض من مكانه متوجهاً للخارج برفقته..

رمق الحج سليم شقيقه سالم بغير رضي وساله : وانت يا حج سالم جاي معانا ولا هتروح علي دارك انت وعيالك….

تنحنح الحج سالم وقال باحراج : لاااه اني هروح يا خوي انت عارف بحب انعس شويه بعد الغذاء .

بالاذن احنا بقي ..سفره دايمه يا خوي تسلم يدك يا حاجه دهب ..

همي بينا يا ام زاهر يالله زاهر يالله يا سميه … قالها وهو يهرول الي الخارج تتبعه اسرته وسط نظراتهم الساخطه من افعال الحيه ابنته ومن ضعف شخصيته….!!!

………

وصلت سميه واسرتها الي منزلهم وهي تستشيط غضياً …اخذت تزرع صاله منزلهم ذهاباً واياباً وهي تصرخ بغل وحقد : هموووت عقلي هيشت مني ..شوفتوا بيدافع عنيها ازاي جدام الكل ولا هموا حد لا وكمان خدها معاه وخرج وعمي ساكت وموافج …اقطع دراعي ان ما كان عاصم عينه منيها وفي حاجه بيناتهم!!!!

صرخ بها والدها هادراً: بزيداكي عاد الحديت ده يا محروجه انتي مكفاكيش اللي حوصل وخاليتي رجبتي كد السمسمه من عمايلك واخوي طردني بالمحسوس…

صرخت فيه هادره: وهو من ميتي عمي بيعملك حساب ولا بيخاف علي زعلك منيه ده كانه ما صدج!!!

اجابها صارخاً: ما هو كله بسببك وبسبب عمايلك الوسخه هي اللي وصلت الامور بينا لكده لولا ان اخويا كبير وعاقل ومقاطعنيش بسببك ولا خد اختك بسببك وخرب بيتها ..لكن انتي برضك معاوزاش تتهدي وتقفلي خشمك اللي بيحدف طوب …

وبقولك ايه شيلي عاصم من دماغك انتي بالنسبه لعاصم انتيهتي من زمان وعمره ما هيفكر فيكي ولا هيرجعك لانه لوكان عاوز كان رجعك من زمان وانت عارفه انه كان مغصوب عليكي فبلاش تدخلينا في مشاكل معاه احنا مش قدها ومش هيجي منها غير الخراب احنا مش قد عاصم …..

صرخت بغل: هرجعه عاصم ليا انا وبس وبكره كلكم هتشوفوا هيجي راكع تحت رجليا علشان ارضي ارجعله ….

قال والدها محذراً: انا حذرتك وانتي حره لو عملتي مصيبه زي عوايدك ما تلوميش الا نفسك لان وقتها مش هقدر اقف معاكي واساعدك زي المره اللي فاتت…

تدخل زاهر في الحوار: مالكش صالح انت يا بوي بالحديت ده انا هتصرف فيه …

رد والده ساخراً: مابقاش غيرك انت يا جوز التلاته اللي هيتكلم بكره تخربها وتقعد علي تلها!!!