الفصل الاربعون من رواية طمس الهوية بقلم اسماء المصرى

الفصل الاربعون #روضتني2 #طمس_الهوية #أسماء_المصري #زعيمة_مافيا_الروايات امتدت ذراعاه لتحتضن جسدها الصغير القابع بداخله وقبل عنقها باشتياق وحب ففتحت عينيها بخمول تحاول استعادة تركيزها ونظرت لوجهه المبتسم والذي أشرقت به شمس صباحها فهمست بصوتها المبحوح إثر استيقاظها توا: -صباح الخير يا حبيبي. اتسعت بسمته وقبلها قبلة سطحية على شفتيها ورد بنفس الهمس: -صباح النور يا نور عيوني. رمشت بأهدابها تحسس براحتها على وجهه فنطق هو عندما استمع لغمغمات صغيره: -الباشا الصغير صحي ومش هحلق أعمل اللي كنت ناوي عليه. ضحكت وتحررت من حضنه لتحمل صغيرها من فراشه وعادت للجلوس بجوار مازن على الفراش تنظر لساعة الحائط وتسائلت: -صاحي بدري أوي ليه كده؟ ظل يرسم تلك البسمة على وجهه وهو يجيبها: -عندي كذا مشوار قبل الشركة. وقبل أن تكمل أسئلتها استمع لرنين هاتفه وما كان إلا من ابن عمه ورفيق دربه الذي هاتفه: -صباح الخير يا مازن. رد وقد اعتدل بجسده هاماً بالتحرك من على الفراش: -صباح النور يا بوص، أنا 10 دقايق وأجهز. أومأ فارس متنهدا بقلق: -إن شاء الله نطمن وكله خير من عند ربنا. أكد عليه بعد أن ابتعد عن چنى دالفا المرحاض: -ونعم بالله. استمع فارس لصوت المياه فعلق عليه يرجوه: -اتوضى بالمرة يا مازن وصلي عشان ربنا يوفقنا، أنا صليت الفجر في الجامع ودعيت كتير أوي، ربنا يتقبل دعايا يا رب. ابتسم مازن بسمة صفراء وهو يعقب: -تفتكر ربنا ممكن يقبل صلاتي ولا دعائي؟ أكد عليه فارس فورا: -طبعا يا بني، باب التوبه مفتوح وأنت الحمد لله بقيت غير زمان، هو أنت بس محتاج تلتزم شويه في الفروض وإن شاء الله ربنا يقف معانا. أغلق معه فارس والتفت لزوجته التي استيقظت للتو تسأله بملامحها فأجابها والغصة تتسع بداخل حلقه: -رايح مع مازن المستشفى عشان نشوف الوضع عامل ايه؟ حركت رأسها وتركت الفراش تقترب منه واحتضنته تربت عليه بحنان وحب: -إن شاء الله ربنا يطمنا عليه. دمعت عين فارس رغما عنه فمسحتها له بابهاميها وهي تكوب وجهه ونزلت عبراتها هي الأخرى تؤكد له: -بلاش كده يا فارس عشان خاطري، مازن قوي وهيعدي منها زي المرة اللي فاتت إن شاء الله. هز رأسه وتحدث بحزن: -المهم زي ما فهمتك، مش عايز جنس مخلوق يعرف حاجه عن تعبه وخصوصا چنى. نزل الدرج بعد أن قبّل صغيريه ودلف سيارته وحارسه يفتح له بابها فتفاجئ بزين يقترب من السيارة وانحنى ينظر لرب عمله من النافذة: -صباح الخير يا باشا. رد متجهما: -صباح النور يا زين، ايه اللي جايبك؟ ابتلع زين ريقه وبلل شفتيه متوترا فأضاف فارس: -أنت لسه تعبان، روح ارتاح ومرتبك ماشي زي ما هو ومترجعش إلا لما صحتك تبقى أحسن من الأول. نفى برأسه موضحا: -ﻷ يا باشا مش حكاية مرتب، أنا زهقت من الرقده دي وعايز أرجع الشغل. أشار له فارس للركوب بجواره ففعل جالسا ينظر له والآخر يحدثه: -مينفعش وأنت تعبان تبقى مرافق ليا وبنفس الوقت مينفعش بوجودك اسيبك هنا وآخد أمجد فأنت كده بتحطني في موقف وحش، ارجع بيتك وارتاح اسبوع كمان وابقى تعالى بعد كده. هز رأسه موافقا باستسلام وقبل أن يفتح باب السيارة أوقفه متسائلا: -عامل ايه مع دعاء؟ التفت له زين مبتسما: -الحمد لله زي الفل. سأله مركزا بصره عليه: -والدخله؟ ارتبك زين قليلا فرفع فارس حاجبه ضاحكا: -مكسوف ولا ايه؟ أنا عايز اطمن عليك. ابتسم بخجل وهز رأسه: -كله تمام يا باشا متقلقش. صدحت ضحكات فارس عاليا وهز رأسه وتكلم بسخرية: -طيب الحمد لله، أنا كنت قلقان لتطلع سوسن. لمعت عين زين ناظرا له بتعجب وذهول والأول يضيف: -ما هو مفيش واحد طبيعي يعيش مع مراته كل الشهور دي زي الأخوات بحجة موافقة أهلها، أصل القانون المصري مش بيلزم البنت أنها تتجوز بولي شرعي يعني قانونا هي مراتك من وقتها. أومأ زين معقبا عليه: -الفكرة مش الشرع والقانون بس يا باشا، لكن هي كانت حاسه انها لوحدها وأنا لو كنت تممت الدخله بالشكل ده كان هيفضل في شرخ بينا لكن دلوقتي هي مبسوطه وراضيه ﻷن جدها وعمها موافقين على جوازنا ويمكن الأيام تغير رأي وفكر أبوها وأمها. زفر فارس زفيرا عميقا وهو يعقب: -مظنش، انت زوقك زفت بصراحه. اشاه له بيده وهو يتابع: -يلا اهو نصيب، أنزل روح وارتاح واعمل اللي قولتلك عليه ومترجعش إلا وأنت أحسن من الأول. ❈-❈-❈ استيقظت على صوت مؤقتها وتوجهت للمرحاض لتغتسل وخرجت لتجد هاتفها يصدح برنينه فأجابته وهي لا زالت غير معتادة على الأمر: -صباح الخير. أجابها بنبرة شبقة ومثيرة: -صباح النور يا روحي، برن عليكي كتير مردتيش، فينك نايمه ولا ايه؟ أجابته بعد أن انتهت من لف حجاب رأسها: -ﻷ ابدا كنت بتوضى، هصلي وأنزل أروح الشغل. حرك رأسه مرات متتالية وكأنها تراه وظل صامتا بوجه ممتعض فسألته وهي تعلم ما به: -أنت ساكت ليه؟ لم يجب بل استمعت لصوت تنفسه العالي فتكلمت فوراً محاولة إقناعه برأيها: -يا يزن بلاش نزعل من بعض عشان موضوع الشغل، أنا قولت لك مش عايزه أرجع للشغل في العالمية وأنا مرتاحه في الشركة دي و... قاطعها بحدة لم يستطع إخفائها: -خلاص يا نرمين، أنا لازم أوافق على كل حاجه انتي عيزاها حتى لو مضيقاني. جلست على طرف فراشها تكمل ارتدائها لملابسها: -أنا مقولتش كده، بس موضوع الشغل هنفضل نتكلم فيه لحد امتى والمفروض اني قولتلك رأيي في الموضوع ده وأنت قبلته. رد نافياً: -انا مقبلتوش، أنا أُجبرت عليه عشان انتي منشفه دماغك. صر على أسنانه وتابع: -أنا مش عايزك تبقى في مكان وأنا في مكن تاني حتى لو كانت مديرتك واحده ست فبرده الشركه مليانه ناس وهفضل طول اليوم بالي مشغول عليكي. ضحكت رغما عنها معقبة: -أنت محسسني إني في مكان كله متحرشين، يا حبيبي الموظفين هنا كلهم ناس محترمه وأنت اتقابلت مع أغلبهم. لم تجد رد على حديثها فظنت انه لا زال مستاء ولكنها حقا لا تعلم ماذا تفعل به تلك الكلمة التي تزعزع كيانه وتدخله لعالم الشرود والاحلام، نادته بصوتها الرقيق عندما لم تجد رد منه: -يزن. رد وهو لا يزال على حالته المنتشية: -نعم. تكلمت ترجوه: -متزعلش بقى، أنا بحبك. لمعت عينيه ببريق العشق وعلق عليها: -يعني أنا لسه مفوقتش من أثر كلمة حبيبي تقومي مكملاها بكملة أكبر. أطرقت رأسها خجلا وكأنه يراها واتسعت بسمتها لأذنيها وهو يتغزل بها: -كلمة حبيبي كفيله تخليني أعملك اي حاجه انتي عيزاها من غير نقاش ما بالك بقى بكلمة بحبك. ابتلعت ريقها وردت: -هتعود على كده خد بالك. رد متغزلا بها: -اتعودي يا ست الحسن والجمال، اتعودي زي ما انتي عايزه لاني مش هبطل أحبك أبدا. شردت بغزله لحظات ولكنها عادت تنتفض فورا بلهفة: -هتأخر بسببك، الله يسامحك. ضحك عاليا وسألها بنبرة لحوحة: -اعدي عليكي في بريك الغدا انهاردة؟ رفضت وهي تعلم أن رفضها هذا لن يزيده إلا إصراراً: -مش كل يوم بقى، خليها بكره. وكما توقعت صاح معاندا: -هعدي عليكي الساعة 3، يا ريت متلطعنيش تحت بدل ما اطلعلك مكتبك ومديرتك شكلها زهقت مني. ** جالسا بمكتب عمه منتظرا خروجه بعد أن طال الوقت به وكم شعر بمرار حلقه يكبر ويتسع كلما مرت الدقائق والساعات فهو لا زال بالداخل يكمل فحوصاته ﻷكثر من ساعتين. وقف يلف حول نفسه زافرا أنفاسه بقلق واتخذ قراره وخرج يبحث عن عمه أو زوجته حتى يتقصى منهما الأمر، ولكنه بحث طويلا فلم يجد أي منهما فتوجه للاستقبال محاولا معرفة أين مكان تواجدهما: -الدكتور مراد أو الدكتورة دينا فين دلوقتي؟ أجابته موظفة الاستقبال: -طلعوا الدور الرابع مع مازن بيه. هو يعلم أن هذا الطابق مخصص لمرضى الأورام ولكنهم كانوا فقط يفحصونه للتأكد من فحوصاته التي أتمها خارج المشفى. هرع بقلق ولهفة للطابق المنشود ولم يحتج للبحث كثيرا فوجده جالسا على أحد المقاعد المخصصة لجرعات العلاج الكيميائي وتلك الإبرة مغروزة بذراعه ومسندا رأسه على ظهر المقعد وكأنه غافيا ولكنه ما كان إلا محاولا تحمل الألم من إثر الجرعة الدوائية المؤلمة. اقترب منه فارس مبتلعا ريقه وبحث حوله عن والديه فم يجدهما بجواره فهتف يناديه: -مازن. فتح الأخير عينيه ناظرا له بألم فسأله فارس فوراً: -كيماوي؟ أومأ له موضحا بصوته المتألم: -جرعة عالية أوي لحد العملية. لمعت عين فارس متسائلا: -انتوا حددتوا عمليه كمان؟ أومال أنا تحت بعمل ايه وانا مش عارف حاجه؟ استمع لصوت مراد الذي دلف لتوه: -معلش يا فارس النتايج ظهرت وقولنا منضيعش وقت. اقترب منه يسأله بلهفة: -ايوه عرفتوا ايه نوعه؟ أومأ مؤكدا: -نفس نتايج التحاليل اللي مازن عملها بره، بس فاضل الكتلة الصغيرة اللي جنب الورم مكناش عارفين نحددها بس الحمد لله ظهرت انهاردة في المسح الذري. ظل ينظر له بانتباه منتظرا أن يخبره: -طلع ورم تاني لسه صغير جدا اد حبه الملح وهيتشال مع اللي جنبه. أومأ له وسحبه بعيدا عن رفيق دربه وسأله هامسا: -كده بدأ يظهر أورام متعدده يا عمي! هو ده طبيبعي؟ نفى مراد وقد تخلى عن تلك البسمة الكاذبة التي يرسمها على وجهه: -الورم الكبير حميد فعلا بس الصغير ﻷ. اختنق فارس فوراً بعبراته المكتومة وسأله فوراً: -نسبة نجاح العملية أد ايه؟ حرك مراد رأسه وهو يجاهد دموعه وعبراته: -مش عارف، أنا مش جراح أورام عشان أحدد والدكاتره هنا عمالين يطمنوني بس أنا عارف أنه طالما بدأ يظهر النوع ده يبقى هنفضل في الموال ده كتير. بكى رغما عنه وهو يحتضنه: -نفس حالة أبوك الله يرحمه يا فارس، أنا مش هقدر أشوف ابني بيعاني نفس اللي أخويا عاشه ومش عارف ايه الحل؟ ابعده فارس عن حضنه ونظر له بقوة: -الطب اتطور، من 30 سنه بابا علاجه مجبش نتيجة بس دلوقتي بقى في حالات كتير بتخف، فلو أنت شايف إن امكانيات الدكاتره عندك مش قدها يبقى بلاش تضييع وقت وهاخده وأسافر بيه انشالله انهارده. وافقه هازا رأسه: -انا كمان شايف كده وبدأت فعلا أعمل اتصالاتي عشان نشوف هيسافر فين ويتابع مع مين، ودينا روحت البيت تجهز باسبورها وهدومها عشان هتسافر معاه. ربت عليه فارس: -وانا كمان هسافر معاه مش هسيبه لوحده. عاد له وقد انتهى من جرعة الدواء وبدأت الممرضة بإخراج الأسلاك الموصولة به وتساعده على النهوض للجلوس على المقعد المدولب فأبعدها عنه وساعده هو وبدأ بدفعه بعد أن علم مكان غرفته وتحرك يدفع مقعده والآخر يتألم بصمت. ثبت أرجل المقعد حتى يستطيع مساعدته على الوقوف والاستلقاء على السرير الطبي ودثره بالغطاء فنظر له مازن يحاول رسم البسمة على وجهه وهو يسأله: -شكله أخطر من المرة اللي فاتت يا صاحبي. جلس فارس بجواره على طرف الفراش وأومأ له فتجهم وجه مازن ولمعت عينيه وبدأ يهزي بحديثه: -مش محتاج أوصيك على مراتي وابني، أنا عارف انك مش هتسيبهم لو جرالي حاجه. ركز فارس بصره عليه وعض جانب فمه من الداخل معلقاً عليه: -انت هتخف إن شاء الله، بلاش التشاؤم ده. دلف مراد راسما نفس البسمة الكاذبة ومتحدثا بمرح مصطنع: -لقيتلك بقى سفرية حلوه أوي لأمريكا منها علاج ومنها استجمام ايه رأيك؟ هز رأسه متسائلا بحيرة: -هو ورم خطر أوي لدرجة السربعة دي ولا ايه؟ نفى مراد مقتربا منه: -لا خالص ده... قاطعه فارس معقبا: -انا قولتله يا عمي، مش فاهم ليه نخبي عليه حالته؟ جحظت عين مراد الغاضبة: -ده مش قرارك يا فارس عشان تتخطاني أنا وأمه وتعمل كده، احنا عايزينه يبقى مرتاح نفسيا و... قاطعه فارس بحدة: -يبقى مرتاح نفسيا لما يعرف حالته وخطورتها عشان يتعامل على أساسها مش تخبوا عليه فيهمل هو في نفسه، مازن هيخف إن شاء الله بس لازم يعرف عشان يتحمل مسؤولية تعبه وميهملش في نفسه لا دلوقتي ولا بعدين. أكد مازن على حديث فارس: -فارس معاه حق يا بابا، انا مش عيل صغير تخبوا عليا ولازم أعرف عشان آخد قراري وأعمل حسابي على حياتي ومراتي وابني. سحب شهيقا عميقا وطرده بتمهل والتفت يحدث فارس: -المهم بلاش چنى تعرف حاجه دلوقتي وشوفلنا حجه تبع الشغل للسفرية دي. قوس فارس فمه حائرا: -مش عارف ممكن نقول لها ايه وأنا وأنت والدكتورة دينا هنسافر انهارده أو بكره بالكتير. رفض حديثه ناظرا لوالده: -ماما هتيجي معايا تعمل ايه؟ خليها يا بابا عشان تاخد بالها من مودي وچنى. جلس مراد بالمقعد المجاور لسريره معقبا: -امك هتتجنن ومش هترضى تسيبك يا مازن. التفت مازن بنظره لفارس يسترجي منه العون فأومأ له مؤكدا: -سيبها عليا، المهم نعرف ميعاد السفر بما إننا عرفنا البلد خلاص؟ بس انت قررت أمريكا على أي أساس؟ أجابه مراد موضحا: -انا هسفره يتحجز في مايو كلينيك أكبر مركز لعلاج الأورام في العالم. تسائل فارس وهو ينظر لمازن: -لو قريب من فلوريدا ممكن نقول لچنى إن مركز من مراكز البيع عندنا هناك فيه مشكلة عشان لو فتحت لوكيشن معاها تبقى الكدبة محبوكه. أكد مراد هاتفا: -في كذا فرع هناك في ولاية مينيسوتا وفلوريدا وأريزونا فعادي ممكن أخلي الحجز في فرع فلوريدا. هز فارس رأسه مستحسنا حديثه وعلق: -كده فاضل ميعاد السفر ونبقى تمام اوي. عقب مراد: -أنا حجزت طيارة خاصة هتنزلكم ترانزيت في المغرب وهناك في حجز طيران لواشنطن ومن هناك فارس يأجر أي طيارة خاصة لفوريدا وانا هكلم المستشفى ائكد عليهم يبعتولكم هليكوبتر توصلكم عندها. أومأ فارس بالرغم من تجهم وجه مازن الذي تمتم: -ده الموضوع كبير أوي. ربت فارس على كتفه: -انا معاك ومش هسيبك لحظه، فاكر لما تعبت اول مرة قولتلي ايه؟ نفى فابتسم فارس يردد كلماته: -قولتلي أنا قوي وهحضر عزا عيلة الفهد كلها قبل ما أفكر أموت، انت لسه عند وعدك مش كده؟ ابتسم بسمة باهته وأومأ له فالتفت فارس يسأل عمه: -حجز الطيارة الخاصة دي امتى؟ رد مراد وهو ينظر بساعته: -هتكون جاهزه على الـ Runway في المطار كمان 4 ساعات يعني يا دوب لو هتروحوا تجهزوا شنطكم أنت وهو وتظبطوا أموركم. ❈-❈-❈ صف سيارته أسفل تلك البناية الشاهقة والمتواجد بها العديد من المؤسسات التجارية وهاتفها وانتظر أن تجيبه وفور أن أجابت هتف: -انا تحت يلا أنزلي. وافقت بهمهمة بسيطة وردت: -حالا. أغلق معها وظل بمكانه منتظرا إياها فاستمع لرنين هاتفه؛ فنظر لشاشته متعجبا من ذلك الإتصال من ابن عمه فأجابه: -ازيك يا فارس. أجاب الأخير بصوت حزين: -الحمد لله، اسمعني عشان عايزك ضروري. هز يزن رأسه وانتظره أن يبدأ حديثه: -أنا مسافر كمان 4 ساعات مع مازن ومش عارف هنرجع امتى وطبعا الفهد متنفعش تشتغل لوحدها ف... قاطعه يسأله بحيرة وفضول: -استنى بس، مسافر فين وايه الموضوع بالظبط؟ هدر به بغضب: -ما تتنيل تسكت وتسمع، ما أنا بقولك أهو مسافر مع مازن وهتأخر وعايزك تكون مكاني في الفهد وسيب ساجد وآسر يشغلوا العالمية. التفت ينظر لنرمين التي فتحت باب سيارته وجلست بجواره وقبل أن تتحدث بأي أمر لاحظت انعقاد جبينه فصمتت تنظر له بانتظاره أن ينهي تلك المكالمة التي لم تعرف مع من يتحدث بذلك التجهم: -طيب أنت عايزيني مكانك في الفهد ودي فهمتها، انما لحد امتى ومين هيعرفني نظام الشغل لما انت ومازن مسافرين؟ رد فارس بعد أن زفر زفرة قوية: -ياسمين هتنزل معاك اسبوع ولا 10 أيام لحد ما تتعود على الشغل بس بعد كده هتكمل لوحدك عشان تفضل هي مع الولاد. أومأ منتهدا: -ماشي يا فارس مع أني مش فاهم حاجه وواضح إن سفريتك مطوله ومع ذلك مش فاهم سبب سفرك انت ومازن مع بعض وكان المفروض واحد منكم يفضل عشان الشغل يمشي. لم يجد تعقيب على حديثه بل استمع لصوت أنفاس فارس العالية فتأكد أن هناك أمرا هاماً يعكر صفوه فسأله باهتمام: -في ايه يا فارس ما تقولي، سفر على سهوة ومش محدد المده وشكلكم كده مطولين! ** أخرج فارس زفرة قوية وبنفس الوقت ترك يزن الهاتف من يده ووضعه على مكبر الصوت حتى يتسنى له القيادة بعد أن ابتسم لنرمين الجالسة هادئة بجواره وبدأ بالقيادة لوجهتهما واستمع لفارس يخبره: -مازن تعب تاني وهنسافر عشان يعمل عملية بره ﻷن المرة دي الموضوع أكبر من المره اللي فاتت. انتبه كل منهما لحديثه فلمعت عين نرمين رغما عنها وفارس يضيف: -أنت مكنتش معانا المرة اللي فاتت وشوفت تعبه، بس المرة دي للأسف الورم مش حميد ومش عارف اتماسك ولا أركز في شغل يا يزن عشان كده عايزك تقف معايا وتحاول متشغلش دماغي بأي حاجه مهما كانت كبيرة ﻷن اللي أنا فيه أكبر من أي حاجه ممكن تكون مهمه من وجهة نظرك. أنهى حديثه وأغلق المكالمة فورا فالتفت يزن ينظر لتعبيرات وجه نرمين الحزينة، ولكنه حاول أن لا يتأثر بما يراه من ردة فعلها وصف سيارته أمام المطعم وفور أن جلسا سألها بوجوم: -عينك فيها دموع محبوسه ليه؟ ابتعلت ريقها وردت: -بغض النظر عن نبرة الغيرة اللي في كلامك فمازن ده ابن عمك وأخو ساجد واقرب حد لفارس وأظن أنت عارف فارس وساجد بالنسبة لي ايه، هما مش مجرد جوز اختى وجوز بنت عمي دول اغلى من كده بكتير وليهم معزة في قلبي جامده ده غير چنى فعلا صعبانه عليا مش بتلحق تفوق وتتبسط. رمقها بنظرة متشككة وسألها: -يعني زعلك على دول وبس؟ صرت على أسنانها وأجابت: -ﻷ، وزعلانه على مازن يا يزن عشان مازن إنسان طيب ولو كان حد غريب أو معرفة سطحية كنت هتأثر وازعل فما بالك بواحد قريبي وقرابته جايه من أكتر من جهه. أنزل نظراته التي تفحصتها وتفحصت ملامحها ونظر لقائمة الطعام بيده وسألها بهدوء: -هتاكلي ايه؟ ظلت على حالتها الغاضبة وعلقت: -متغيريش الموضوع، أنا كنت عارفه إن الصدام ده هيحصل في يوم من الأيام وغيرتك دي هتبوظ كل حاجه حلوه بنحاول نبنيها أنا وأنت بس مكنتش متصورة انه يظهر بسرعة كده. أدارت وجهها عنه فترك مقعده وجلس بالمقعد المجاور لها وأمسك راحتها التي حاولت سحبها منه ولكنه أحكم قبضته عليها وانحنى يقبل داخل راحتها ونظر لها بحب لم يستطع إخفائه بل لم يود إخفائه من الأساس وهمس لها بنبرة عاشقة: -بحبك وبغير عليكي مش مازن وبس وانتي عارفه كده، بغير من زمايلك في الشركة ومن قرايبك ومن أخويا وحتى من هدومك اللي لامسه جسمك وأنا محروم من اللمسه دي. اتسعت حدقيتها بذهول فهي المرة الأولى التي يتجاوز معها بالحديث ويتطرق لذلك ولم يثنه ذهولها من استكمال حديثه الوقح: -نفسي فيكي أوي لدرجة عايز نتجوز انهارده قبل بكره. سحبت يدها منه بقوة وهتفت موبخة: -ميصحش كده. تعجب رافعا حاجبا وهو يضحك: -انتي مراتي، ولا عندك رأي تاني؟ لم تعقب عليه فأسترسل أكثر: -عارفه! لما صارحتك دلوقتي باللي نفسي فيه حسيت اني ارتاحت بدل ما بحلم بيكي كل يوم أحلام مش كويسه. جحظت عينيها ببريق الدهشة والخجل معا وهمست تسترجيه: -بلاش كده عشان خاطري. أمسك راحتيها معا وقبلهما قبل كثيرة وهو يتغزل بها: -بحبك وبموت فيكي ونفسي الأيام تعدي بسرعة عشان نبقى سوا واصحى الاقيكي جنبي على السرير. لم تستطع الرد عليه من خجلها الذي اكتسح وجهها وجاء رنين هاتفه ليقطع عليهما تلك اللحظة العفوية والرومانسية ليجده ابن عمه من جديد فتخوف من أن يكون حدث أمراً جديداً فرد فورا: -ايوه يا فارس! صاح به فارس غاضبا: -أنت فين يا بني؟ تعالالي بسرعه عشان الحق اعملك صلاحيات توقيع وأعرفك على رؤساء الأقسام عشان الشغل يمشي في غيابي. وافقه وهو ينهض ممسكا براحتها مخللا أصابعه بخاصتها: -حاضر أنا جايلك ع الفهد بسرعة. جعد فارس جبينه وأخبره بفروغ صبر: -أنا في مستشفى الفهد يا يزن مع مازن، تعالى ع البيت أنا رايح كمان شويه عشان آخد شنطتي. وافقه فأكد عليه قبل أن يغلق المكالمة: -المهم متقولش لحد على تعب مازن، محدش يعرف غيري انا وياسمين وباباه ومامته طبعا حتى اخوه ميعرفش. سأله متعجبا: -چنى متعرفش؟ أومأ مؤكدا: -دي أكتر واحده مازن مش عايزها تعرف يا يزن فمن فضلك ركز ومتقولش لحد خالص. ❈-❈-❈ دلف قصره الفخم فنظر لحوائطه وجدرانه متجهما وتمتم بداخله: -كل الفلوس اللي عندك دي ومعرفتش تبعد الأذى عن اكتر الناس قرب لقلبك، ولا هتعرف تحمي اللي بتحبهم من قضاء ربنا وقدره. دمعت عينيه وقبل أن يتسنى له الوقت ليمسحها وجد راحتها الرقيقة تمسح له دموعه التي غزت وجه فزاد نزولها فاحتضنته مربته على ظهره تواسيه: -ربنا هيقف معاه يا حبيبي إن شاء الله. استمعت لصوت سحبه لأنفاسه واستنشاقه لماء أنفه فلم تصدق أن ذلك المارد والقوى شعر بهذا الضعف لخوفه من فقد أعز إنسان لقلبه. قبلته من تجويف عنقه واحتضنته بكل ما أوتيت من قوة فاستمعت لصوته الباهت: -انا مسافر مع مازن ومش عارف هرجع امتى وعايزك تباشري الشغل مع يزن لحد ما يتعلم وبعدها سبيه هو يتعامل. أومأت فانحنى مقبلا إياها قبلة عميقة وابتعد ينظر لها بحب وهمس بجوار أذنها: -هتوحشيني. ابتسمت بسمة حزينه ورددت: -وأنت كمان هتوحشني أوي. حملها فوراً وصعد جناحهما وهو يقبلها قبل عميقة أججت مشاعرهما على حد سواء ووضعها على الفراش واعتلاها ينظر لها بعشق خالص وابتسم يهمس: -لازم اودعك بطريقة فارس الفهد المعهودة. بادلته البسمة وتعلقت بعنقه شابكة أصابعها بعضها البعض وسحبت وجهه ناحيتها فأصبحا وكأنهما جسدا واحدا وروحا واحدة فقط منقسمين بجسدين. ❈-❈-❈ دلف بغير موعده فنظرت له متفاجئة من حضوره المبكر وسألته بحيرة: -جاي بدري ليه كده؟ رسم ضحكة كاذبة على محياه وهو يرد: -يعني أتأخر مش عاجب ولما آجي بدري برده مش عاجب! اقتربت منه بعد أن تركت صغيرها بمكانه المخصص على الأرض بين ألعابه وحاولت الوصول لطوله لتعانقه فلم تستطع حتى انحنى هو ليتيح لها فرصة التعلق بعنقه وهو يضحك هاتفا: -اوزعتي. حاوط خصرها بذراعيه ورفعها لمستوى طوله بعد أن أستقام بظهره فأصبحت قدميها لا تلامسان الأرض؛ فحركتهما بشكل طفولي جعله يقهقه ضاحكا وهو يشعر أنه يحمل طفلة صغيرة، ولكن تعب جسده فاجئه بلحظة فهو لتوه انتهى من جرعة عالية من هذا العلاج الكيميائي الذي أنهكه فدارت الدنيا به فأنزلها فورا قبل أن تشعر بما اعتراه والتفت يوليها ظهره متصنعا النظر لصغيره وسألها: -مفيش حد يقعد بيه شويه عشان عايزك في موضوع ملح. ابتسمت واقتربت منه مجددا تحتضن خصره من الخلف واسندت رأسها على ظهره: -خليها بالليل يا حبيبي انت عارف مرتاحتش مع الناني الأخيره وشكلي مش هرتاح مع أي ناني نهائي. وضع راحته على يدها المحاوطة لبطنه وربت عليها وهو يقول: -مش هينفع بالليل أنا مسافر كمان 3 ساعات وكنت عايزك قبل ما أمشي. دارت لتقف أمامه ورفعت وجهها عاليا لمستوى طوله وسألته بوجل: -مسافر فين وليه؟ أخبرها بنفس الكذبة التي اتفق مع رفيق دربه على إخبار الجميع بها: -في حريق حصل في مكتب التوريد بتاعنا في أميركا والسلطات هناك فاتحه تحقيق والموضوع شكله كبير. لمعت عينيها وسألته: -تفتكر حد من المنظمة اللي كانت خاطفه يزن وآسر؟ لم يرد اقلاقها فنفى فورا: -ﻷ خالص، الحريق حصل بسبب ماس كهربي بس طبعا احنا المسؤولين عنه والتحقيق عشان المكتب في بلد اجنبيه فلازم نسافر عشان نعرف نحلها قبل ما توصل للمحكمه. انتبهت لصيغة الجمع فسألته: -نسافرّ؟ مين مسافر معاك؟ أجابها فورا: -فارس طبعا. سالته بفضول: -فارس كمان نسافر! ده الموضوع كبير بقى؟ وجد نفسه سينساق لتحقيق قد تكون نهايته وخيمة فانحنى ليحملها وتحرك بها صوب الدرج وهو يهمس لها: -وبعدين معاكي، هنضيع الوقت كده وأنا لسه عايزك تحضريلي الشنطه. نظرت لصغيرها الجالس بين ألعابه وردت: -هنسيب مودي لوحدة؟ أومأ مبتسما: -آه كلها 10 دقايق أنا مش ناوي أطول أصلا. غمزت له تعض على شفتها السفلى: -هتكروتني يعني. ضحك عاليا وهو يومئ برأسه: -بصراحه آه، عشان مفيش وقت. ❈-❈-❈ وصل أمام باب القصر ونظر بجواره فوجدها مرتبكة فسألها مهتما لما يبدو عليه حالها: -مالك قلقانه من ايه؟ أخرجت تنهيدة عميقه وأجابت بصدق: -اولا فارس ميعرفش اني كنت معاك وسمعت الكلام وممكن يتضايق اني عرفت، وثانيا خايفه مازن يطلع جوه ومش عايزه أي صدام بينك وبينه وخصوصا وهو داخل على عملية صعبه وكبيره زي دي ولا عيزاك تزعل ولا تغير ﻷن... قاطعها مسكا بيدها بقوة: -متخافيش، أنا واثق في حبك ليا ولما بغير فده عشان مش واثق فيه هو بس مظنش حاجه تحصل في التوقيت ده أصلا لان مش وقته. رمقته بنظرات متشككة وهتفت: -يزن، انت لازم تتعود على الوضع وقدام لما نتجوز هيبقى صعب اوي تمنع اننا نتقابل ولو صدفه لان القرابه بينا كبيره أوي فلازم تتعود وتتأكد اني مش بحب ولا عايزه غيرك وعمري ما كنت هوافق على السرعة اللي اتكتب بيها كتابنا إلا عشان أنا متأكده منك ومن مشاعري ناحيتك. ابتسم لحديثها وهي تتابع: -لا في خطوبتي معاه ولا جوازي اللي فات كنت متأكده من قراري ولا مرتاحه زي دلوقتي فأنا الحمد لله ﻷول مره أكون متاكده من قراري وفرحانه بيه فعشان خاطري بلاش تتصرف تصرفات تعكر علينا حياتنا. اومأ مبتسما وهي تؤكد عليه: -اتعامل عادي من غير لا حساسية ولا غيره والدنيا هتمشي عادي. هز رأسه موافقا وقبل راحتها ونزلا متجهان للداخل فقادتهما الخادمة لغرفة استقبال الضيوف وصعدت لجناح فارس لتخبره بوجودهما فطرقت طرقات خفيفة على الباب فرد فارس ناهجا بأنفاسه وهو لا زال يعلتي زوجته: -في ايه؟ أجابته سنية بارتباك: -يزن بيه ونرمين هانم تحت. رد بحدة خرجت رغما عنه: -شويه ونازل. عضت ياسمين على طرف شفتها السفلى بحرج: -فارس، خلص بسرعه. انحنى يقبل بل يلتهم عنقها وارتفع رافضا طلبها: -ﻷ، عايز اشبع منك وأنا مش عارف هغيب عنك اد ايه. مسحت براحتها على وجهه ولحيته التي تعشقها وهمست برقة: -عيب ميصحش، يلا وليك عليا أجيلك زيارة ولو ترانزيت اقعد معاك يوم ولا اتنين وأرجع تاني. هز رأسه موافقا على حديثها واعتدل بجسده ووقف متجها للمرحاض: -حضريلي هدومي وبعدها جهزيلي شنطة السفر. انهى اغتساله سريعاً وكانت هي كادت أن تنتهي من تجهيز حقيبته فتركها ونزل ليستقبل ابن عمه وسحبه معه ناحية غرفة المكتب بعد أن أخبر نرمين: -اطلعي لياسمين فوق في الجناح بتاعنا بتجهزلي شنطتي. تحركت هي صوب الدرج فأوقفها صوته: -نرمين. التفتت منتظره سماع ما يود قوله فحذرها بنبرته الصارمة التي اعتادت عليها: -محدش يعرف باللي عرفتيه ولا حتى شيرين. هزن رأسها مؤكدة: -متخافش. دلف مكتبه وتبعه يزن جالسا أمامه فأخرج فارس الأوراق ووضعها أمامه ليوقع عليها وناولها ليزن ليفعل المثل وهو يؤكد عليه: -أي حاجه هتحتاجها ياسمين هتساعدك فيها ولو زنقت أوي معاك كلمني أنا هشغل خاصية التجوال وهكون متاح 24/7 يعني أي وقت متشغلش بالك بفرق التوقيت. أومأ له وهو متجهم الوجه فسأله فارس: -في حاجه مضيقاك؟ نفى فوراً، ولكنه رفع وجهه ناحيته متسائلا: -مازن عارف حالته ولا مخبيين عليه؟ أخبره والعبرات قد تجمعت بحدقتيه: -عارف طبعا، مينفعش نخبي عليه حاجه زي دي. صمته جعل فارس يسأله: -مالك طيب؟ قوس فمه وهو يجيب: -علاقتي بيه يمكن تكون مش أحسن حاجه بس فكرة انه ممكن يسافر المرة دي ومشوف.... قاطعه فارس بعد أن نهض بعصبية هادرة بنفس توقيت دخول كل من ياسمين ونرمين: -يا اخي خليك متفائل ولو مش عارف تبقى كده يبقى تكتم وبلاش تقدر البلى قبل وقوعه. زفر يزن باختناق فصر فارس على أسنانه ونظر لنرمين يخبرها وكأنه أمراً عسكرياً: -من بكره تروحي الفهد مع يزن عشان تساعديه لأن ياسمين مش هينفع تبقى متواجده معاه طول الوقت عشان الولاد. ابتلعت ريقها وسحبت نفساً عميقاً تحاول إيجاد رد مناسب لما أمرها به ونطقت: -مش هينفع يا فارس أنا عندي شغلي و... قاطعها هادرا بغضب: -يتحرق شغلك، هو المفروض لما أحتاج مساعدة عيلتي في الظروف اللي أنا فيها دي تبقى الأولوية لمين؟ لشغلك ولا لعيلتك يا نرمين؟ امسكت ياسمين راحتها تضغط عليها وهي تحاول أن تخبرها بأن تمرر غضبه الجحيمي ذلك لما يعانيه الآن من ألم بصدره تعلمه جيداً ففهمت نرمين الرسالة وأومأت بهدوء: -حاضر يا فارس، المفروض اني في بريك غدا دلوقتي وكده كده وقت البريك خلص وأنا لسه مردجعتش، فخلص هنا وارجع اقدم استقاله. ترك الملف بحوزة يزن ومسح على وجهه وقد خانته دمعة نزلت على وجهه رآها ثلاثتهم فأدركوا جميعا أنه يتظاهر بالقوة فقط ولكن بداخله طفل خائف ومرتعد من خوض تلك التجربة مرة أخرى بعد أن خاضها مع والده الراحل، ولكن هل تلك المرة يمكن أن تكون التجربة أصعب بل ومؤلمة أكثر. لم يمر كثير من الوقت ما بين توديع صغيريه ومحاولة إقناع دينا بعدم المجيئ حتى ترعى حفيدها وهو يعلم تماماً أن خبر مرض مازن لن يتأخر بالظهور للجميع وخاصة أخته الصغرى التي قد ترتاب بالأمر إن علمت بسفر دينا برفقتهما، وحتى بعد أن أجبرها بالبقاء جل ما يتمناه أن يتأخر معرفتها للأمر حتى يبدأ مازن بالتعافي فغيابه بالرد عليها بعد إجرائه لتلك الجراحة الدقيقة هو أمر حتمي وما يتبعه من قلق بالغ وربما حالة حزن قد تتملك تلك الصغيرة هو ما يخافه ويخاف معه أن تفقد اهتمامها بصغيرها الذي يحتاج اهتمام ومعاملة خاصة ~~** بعد مرور اسبوع انتهى من اجتماعه الثاني لهذا اليوم فطوت نرمين الملف الذي أمامها ونظرت لياسمين التي تلملم الأوراق هي الأخرى ترصها بشكل منظم بداخل الملف وسألتها بصوت مجهد: -هتروحي دلوقتي ولا قاعدة شوية؟ أجابتها فوراً دون الحاجه للتفكير: -ده أنا هطير ع البيت، كفايه اوي كده ع الولاد. همت بالخروج ولكنها التفتت تستأذنه بلباقة: -بعد إذنك يا فندم. رفع وجهه عن الأوراق التي أمامه مبتسما: -سمعت من فارس كتير أوي أنك بروفيشنال يا ياسمين بس بجد الأسبوع ده اتفاجئت بيكي، فعلا بروفيشنال ومفيش منك اتنين في الشغل. رمقته حبيبته بنظرات ممتعضة ورافضة فعلت ضحكاته وهو يمسك راحتها: -طبعا متجيش فيكي حاجه يا روحي. امتعض وجهها وسحبت راحتها منه بالقوة وهي تتصنع الغضب: -بعد ايه بقى؟ مش مفيش منها اتنين يبقى انا من بكره هرجع شغلي و... قاطعها يسحبها بسرعه فكادت أن ترتطم به ولكن المقعد حال دون ذلك: -مقدرش، أموت فيها يا حبيبتي. شعرت ياسمين أنها بغير مكانها فهمت بفتح الباب وتكلمت بسرعة قبل أن تخرج وتغلق الباب ورائها: -تعالي باتي معايا انهارده عشان تبقي قريبه بدل المسافه دي كلها. هزت رأسها موافقه ويبدو أن ياسمين لم تستطع رؤية انطباعها فقد ألقت بكلماتها وخرجت بالتو واللحظة فابتسم يزن لتفهمها ومراعاتها للخصوصية بينهما ولتلك اللحظة الرومانسية التي أراد اقتناصها والتمتع بها رفقة حبيبته، فأبعد ذلك المقعد الذي يحول بينهما وسحبها أكثر حتى باتت قريبة منه حد الألتصاق ولكنها رفضت هذا التقارب فحاولت الابتعاد: -عيب كده يا يزن. ابعدته براحتها فأمسكها ومنعها من دفعه بعيدا وتكلم بإصرار: -كل ما أحاول أقرب منك تقوليلي عيب، هو انتي مش مراتي برده ولا أنا فاهم غلط؟ أومأت تبتلع ريقها بخجل: -مراتك ومش مراتك. رفع حاجبه متعجبا: -ده لغز؟ ابتسمت وهي توضح: -مراتك في إننا نقدر نقعد لوحنا زي دلوقتي كده، نقدر نمسك ايد بعض، نقدر نخرج ونروح ونيجي من غير مِحرم يا يزن بيه لكن مش مراتك في التجاوزات. جحظت حدقتيه وردد متعجبا: -تجاوزات! قربي منك بتسميه تجاوزات؟ ارتبكت وابتعدت عنه فلم يقترب منها بل ابتعد هو الآخر مديرا ظهره لها فتافجئ بها تنطق: -أنا مطلقه يا يزن وأي حد بياخد الفكرة دي عن المطلقات انهم سهلين و.... التفت فوراً بحدة وحدقها بنظرات غاضبة واقترب منها بسرعه لم تمكنها من الابتعاد ولا الهروب من غضبه الذي تجلى بحدقتيه وهدر بغضب: -ناس مين يا نرمين؟ أنا جوزك، فأنتي بتقولي عني ناس ممكن تفكرك واحده سهله! أنا بجد مش مصدقك. سحبها فأصبحت مقابلته وأفضى لها بما يعتمره: -أنا نفسي ألمسك، نفسي أقرب منك، نفسي أبوسك وبجد مش فاهم انتي ليه عامله كل الحواجز دي بينا؟ ردت موضحة وهي تحاول إخفاء حزنها: -عشان العرف بيقول مينفعش عقب عليها محتدا: -بس الشرع أهم من العرف، لأن العرف أحيانا بيحرم الحلال. سعلت لتزيل تلك الغصة التي علقت بحلقها عندما أضاف: -كل ما احاول أعيش معاكي لحظة رومانسية احس بحبك وأحسسك بحبي تقفليني بالشكل ده، بجد براڤو عليكي. ولاها ظهره ولم ينطق بعدها ببنت شفه حتى علقت هي بعد أن مر بعض الوقت: -أنا مش عايزه نزعل من بعض ولا عيزاك تحس اني بقفلك مني بس صدقني يا يزن أنا مش هعرف اعمل الحاجات اللي أنت عايزها دي وأروح ابص في وش بابا اللي عطيني الثقة والأمان وعارف إنه رباني صح، حتى لو جوزي فالشرع بيسمح بس بالحدود اللي بينا دلوقتي لكن أكتر من كده لازم بموافقة ولي الأمر وده مش هيحصل إلا وقت الفرح. تنهد والتفت يرمقها بنظرات هادئة وأومأ: -أنا مش ضليع بأمور الشرع بالشكل الكبير ده واللي أعرفه إن كتب الكتاب مباح فيه شوية تجاوزات على حد قولك بس بحدود واللي أعرفه إن الدخله بس اللي متنفعش وحتى لو حصلت فهو مش حرام بس عيب، عيب عشان العادات والتقاليد. حاولت أن تصحح له معلوماته ولكنه أوقفها: -خلاص يا نرمين، أنا قولتلك أنا مش ضليع بأمور الدين عشان كده مش هجادلك وهسيبك على راحتك بس لو انتي شايفه إن فرحنا قرب زي ما حددناه كمان شهرين، فأحبك أبشرك إن تعب مازن ممكن يأجل الفرح شويه حلوين وساعتها بقى ابقى عرفيني حدودي فين عشان أنا واحد داخل ال 33 سنه ومحتاج التجاوزات دي. ❈-❈-❈ جالسا يتصفح هاتفه اللوحي والآخر يغط بنوم عميق حتى دلفت الممرضة فأشار لها لتخفض من صوتها فأومأت وهمست بالانجليزية: -لقد ظهرت النتائج والطبيب يود محادثتك بمكتبه. وافقها وترك جهازه اللوحي وتحرك للخارج حيث مكتب الطبيب الذي يتابع حالة رفيق دربة وفور أن دلف سأله بلهفة: -أخبرني ما الأمر؟ أبتسم له الطبيب وأشار له بالجلوس فألقى بجسده بعنف وهو يشعر بالتوتر وردد: -هيا أخبرني ما الأمر؟ مد الطبيب ساعده بتلك الأوراق والتي بها النتائج الخاصة بمازن وبدأ يشرح كل ما توصل له بالأسبوع المنصرم: -لقد جربنا حظنا ببعض الأدوية والعلاجات الكيميائية لمنع انتشار الورم وربما لتحجيمه حتى يظل صغير الحجم فلا يتكاثر بعد استئصاله، وبالفعل نجحنا تماماً بذلك. تنفس فارس الصعداء وعقب: -آه وأخيرا، إذا هل حان الوقت لإجراء تلك الجراحة؟ نفى الطبيب موضحاً: -ليس بعد سيد فارس، لا زال أمامنا وقتاً حتى نتأكد خلو جسده من أي مسببات قد تجعل الورم يتحول لنوع شرس قد يفتك به إن وجد المشرط طريقه له. لم يفهم مقصده فشرح له الأمر: -هناك بعض الأنواع التي تكون ساكنه وربما لا يشعر بها المريض بتاتا حتى يبدأ الجراح عمله وقطعه بالمشرط وهنا يتحول ذلك النوع من الخمول إلى النشاط وينتشر بشكل سريع وعنيف لذلك لا بد لنا من التأن حتى لا نخسر مريضنا. زفر فارس زفرة قوية دليلا على قلقه وضيقة فتابع الطبيب: -الجراحه لا يمكن أن تقام قبل أسبوعا من الآن إن ظهرت النتائج كلتك أو أفضل قليلاً. صافحة وخرج عائدا لغرفة مازن الذي تفاجئ به مستيقظا فسأله مبتسما: -صحيت امتى؟ أجابه بتعب: -من شوية، المفروض اكلم چنى كمان ساعه بس الجرعة بتاعة الكيماوي كانت صعبه أوي وحاسس إن التعب باين عليا فبفكر اطنش انهاردة وأعمل نفسي راحت عليا نومه ولا حاجه. رفض فارس وقد سحب مقعدة ليجلس بجواره: -حاول متتأخرش عليها عشان وقت العملية نلاقي حجج كفايه نقولهالها، متخلصش الحجج بدري بدري، ويا سيدي استخدم فلتر ولا اعملك ميك اب زي ما خلتني حولت أوضة المستشفى لاوضة فندق عشان متكشفكش. ابتسم مغلقا عينيه ففتح فارس هاتفه وناوله إياه وهو يجرب تلك الفلاتر: -شوف انهي أحسن واحد وباين طبيعي. قوس مازن فمه متسائلا: -طيب الفلتر هيخفي شكل وشي التعبان، هعرف اخبي عنها صوتي اللي بيتكلم بالعافيه ولا شعري اللي وقع إزاي؟ ضيق فارس حدقتيه متلاعبا بشعره: -كل ده ووقع، ده أنت شعرك ده معقد عيلة الفهد كلها يا باشا. أدار وجهه متحركا صوب خزانة الملابس ومد يده ليسحب قبعته ووقف قليلاً يتصنع البحث عن شيئ ولكنه بحقيقة الأمر يحاول استرجاع أنفاسه وقوة تماسكه وعاد ليضع القبعة على رأس مازن: -حلو الكاب ده وأنت اصلا بتحب تلبسهم كتير وهي مش هتاخد بالها، وصوتك كويس مفيهوش حاجه ولو سألتك ابقى قول لها انك مجهد شوية من الشغل. هز رأسه مرات متتالية وأمسك هاتفه متصلا بها فأجابته والبسمة تعلو وجهها: -حبيبي، ميزو. غمز لها عبر الشاشة: -عيون وقلب ميزو. نظر له فارس ممتعضا وهتف بصوت مسموع لها: -انا هخرج على ما الفيضان العاطفي ده يخلص، أنتوا بتنسوا انها اختي يا جدعان. هم بفتح الباب ولكنه استمع لصوتها المنادي: -فارس استنى. ترك الباب مفتوحا وعاد يقف بجواره ونظرا لها عبر شاشة الهاتف فابتلعت ريقها تحاول نطق أحرف تلك الكلمات التي بداخلها فتلعثمت: -أناااا عايزة أقولكم حاجه مهمة. انتظرا أن تكمل فتنحنحت لتجلي صوتها وهتف: -أنا حامل.