الفصل الثالث و العشرون من رواية ست الحسن الجزء الثاني للكاتبة امل نصر

الغضب .... كلمة قليلة عن اللى حاسس بيه دلوقتى.. من ساعة من بلغه "عاصم "بحسن نية انها نزلت المحافظة.. عشان تحضر محاضراتها وعرف هو من الدكتورة زميلته ان المحاضرة انتهت من نص ساعة تقريباً ..ساب اللى فى ايده وساق عربيته فوراً لجامعتها ينتظرها .. لكن المفاجأة كانت لما لمح طيفها من بعيد وهى ماشية بعيد عن جامعتها ...استنتج فوراً انها هاتاخد مواصلة عامة لتوصيلها البلد .. الغبية كان هاين عليه يشدها من شعرها يجرجرها قدام الركاب .. لدرجادى وصل بيها الاستخفاف بكرامته ورجولته .. وعلى سبب لايذكر .. لما نزل من عربيته وخبط بقبضة ايده على ازاز الشباك اللى كانت ساندة عليه بدماغها ومش دريانة بوجوده.. شاف وشها اللى اتخطف وجاب مية لون بمجرد رؤيته .. بكل هدوء شاور بعنيه عشان تنزل من سكات .. هى من الصدمة مقدرتش تقاوم ولا تعترض .. نزلت فوراً لقيته واقف قصادها بطوله المهيب .. وجهه متجهم وملامحه مش مقروءة نهائى. وعلى نفس السكوت فتح باب العربية يدخل مكانه ويدور المحرك.. نفخت بداخلها قبل ما تتحرك اَلياً وتلف الناحية التانية تركب جمبه فى الكرسي الامامي .. فوراً اتحرك بعربيته ومشي بيها .. بلعت ريقها قبل ماتتجرأ على الكلام : على فكرة بقى .. انت مش من حقك تزعل كده .. عشان انت اللى ماسألتش عليا .. فما تلومنيش على تصرفي دا ... اللتفت لها فجأة بنظرة نارية وقفت الكلام على لسانها . صدره كان طالع نازل قدامها بشكل يوضح قوي .. كمية الغضب اللى جواه منها ..بس كمان سكوته دا يقلق ويخوف . حاولت معاه مرة تانية : طب انت ساكت ليه ماتتكلم.. هو انا بكلم نفسي . برضوا فضل ساكت واستمر فى القيادة طول الطريق بشكل دمر اعصابها .. وجعلها بمجرد مافتح لها باب الشقة ودخلت .. انفجرت فوراً : هو في ايه بالظبط ؟ ماتتكلم وطلع اللى جواك .. بدل اسلوب التجاهل ده . رمى مفاتيح الشقة والعربية قدامها على الكنبة الى قصادها وهو بيقول بهدوء مايسبق العاصفة: عايزاني اقولك ايه بالظبط؟ قول اي حاجة بس بلاش الجو المريب ده . قال بأسلوب تهكمي: اه .. يعني انتي عايزاني اعاتبك مثلاً عدم احترامك ولا تقديرك ليا ؟ ولا اهنيكي على جرأتك .. اللى خلتك تيجي من البلد مخصوص عشان تحضر محاضرتك .. وبعدها عايزة تمشي من سكات ولا اكن ليكي بيت وراجل هنا .. ولا الأحسن أنى اصقفلك وانتي عايزة ترجعى لوحدك على البلد بالمواصلات العامة عشان توصلى هناك والدنيا بتليل ؟ غمضمت عيونها وهى بتاخد نفس طويل تشجع بيه نفسها للرد عليه : اولا انا عمرى ما جللت من احترامك .. وانت عارف ومتاكد. من كلامي اما بالنسبة لحكاية اني اروح لوحدى .. فدا شئ طبيعي بعد تجاهلك ليا طول اليومين اللى فاتوا .. وكأني معدتش ليا وجود فى حياتك ولا اهمك نهائي . مال برقبته ناحيتها وهو مضيق عيونه قبل ما يقول بابستامة جانبية غامضة : وعايزاني اكلمك ليا يابابا ؟ مش جولتي انك عايزة تهدى اعصابك ودا كان طلبك .. بتولوميني ليه بقى لما انفذ رغبتك ؟ دموعها غرقت وشها وهى بتهتف بصرخة: هو دا اللي فهمته ؟ اني عايزة ابعد وبس! .. مافهمتش اني تعبانة وعايزاك تطمن جلبي وتراضيني .. ماشوفتش فى عنيا رغبتي الشديدة انك تاخدني فى حضنك .. وتطبطب عليا زى كل مرة زعلنا انا و انت فيها مع بعض . قالت الاخيرة بصوت ضعيف طلع بحرقة.. جعلته يتفاجأ من رد فعلها وملامحها تلين فى الرد عليها : بس انا راضتيك يا"نهال " ساعة ما اتعصبت عليكى وجتها فى مكتبي ودا كان قبل ما نروح البلد .. ولا انتي نسيتي ؟ مسحت دموعها باطراف صوابعها وهي بتاخد شقيق وزفير قبل ما ترد بقوة : لا منسيتش .. بس انا ساعتها كنت منهارة بجد بعد ما وصلني كلام تاني ومعايا الدليل ! سألها بارتياب : دليل ايه اللى بتقولي عليه ؟ ........................ مش حاسكت ياجد ولا اسيب حقي ولو في فيها موتي . -شايف يابوي .. شايف الواد وجنانه.. هايطين الدنيا الله يخرب بيت سنينه قالها محسن بلوعة وهو بيخاطب " ياسين ".. رداً على كلام حربي وإصراره على المواجهة. قال " ياسين " بهدوء : اهدى شوية يا" حربي " وخلى كلامك موزون .. الاندفاع والتهور ماهيجيبش نتيجة. قال حربى بعصبية : امال ايه هو اللى هاجيب نتيجة ؟ اننا نسكت ولانطاطي لواحد حرامي زي ده .. عايز ياكل تعبنا وشقانا . رائف كمان : حربي عنده حج ياجد .. انا اسمع عن الراجل ده بلاوي .. مستغل سلطته وحصانته فى ان ماحدش يمسك عليه حاجة.. يعني لما يهدد بالفجر ده يبقى عامل حسابه ..واحنا لايمكن نسكت على حقنا. صرخ محسن فى الاتنين: انتوا الاتنين باينكم مش هاتجيبوها لبر .. ماتهمدوا شوية بدل ماتودونا فى داهية احنا مش كدها .. المصيبة دى تخص" زاهر " يبقى هو اللى يواجهه .. وربنا يقدره لكن احنا مالناش دعوة . صرخ " حربي " بعصبية : مالناش دعوة كيف ؟ دا انا دافع ل" زاهر " خمسين ألف جنيه وغير الفلوس اللى دفعتها فى الزرعة والتقاوي .. هي كانت فلوس حرام .. وزرعتي اللي تعبت وشقيت فيها .. وبعد دا كله تقولي مالناش دعوة . ولدك عنده حق يا" محسن " .. المشكلة دى كبيرة قوى على زاهر يشيلها لوحده.. دا مسكين بقالوا خمس سنين وهو بيصلح فى الارض ودفع فيها دم قلبه .. والبلد كلها تشهد ان الارض دى بتاعة زاهر واللى يقول غير كده باطل خرج صوت " محسن " برجفة: كلامك يابوي كله صح .. بس احنا مش كد الراجل الباطل ده ..ولا كد خناقات كبيرة مع بدنته.. دول واخدين راحتهم فى المشاكل على حسه .. عشان بيعرف يتصرف ومابيخليش حد فى عيالهم يقعد فى السجن . رائف بعصبية: بس احنا بلدنا مااختفتش فيها الرجالة .. ولو سكتنا على حق زاهر دلوك .. بكره هايكُلنا كلنا . ياسين بقوة وهو بيوجه كلامه لمحسن : العيال عندهم حق ياولدى .. البلد كلها لازم تقف مع زاهر ضد سراج فتوح.. حرام عليه ياكل شقا الواض المسكين ده .. وشجا ولدك فى ارض استأجرها ودفع فيها التمن من ماله وصحته. اقتنع محسن رغم الخوف اللى مالى قلبه فسال بتردد : طب وهو زاهر هايعمل ايه دلوقت؟عشان يعرف يواجه الراجل ده . جاوبه حربي : زاهر دلوك بيحاول يحرك الإجراءات قانوني عشان يثبت حقه ..دا مقدم على طلب تمليك من الحكومة .. اديلوا مده طويلة .. ............................ بملامح متجهمة كان قاعد عالكنبة قصادها يقلب فى الفون بتاعها .. ويتفرج على الصور اللى بتوصلها اديلها مدة : رقم مين ده؟ هزت كتفها ترد على سؤاله : معرفش؟ زعق فيها بصوت عالي : متعرفيش ازاي؟ امال بتتفرجي على الصور اللى بتجيلك كده من حد غريب .. من غير ماتساليه انت مين ؟ قالت بتوتر : واسال ليه؟ هو انا هاتعرف بيه ؟ انا كل اللى يهمني الصور وبس . كل اللى يهمك الصور وبس ؟! واحد بيفتن مابيني وبينك ويجيبلي صور جديمة على صور جديدة .. يسمم بيها عقلك من ناحية جوزك .. وفى الاخر تقولي مايهمنييش .. مش يمكن تكون الصور دى متفبركة ؟ وشها اتخطف وهي بتسأله بخوف: طب قولي انت .. الصور دى صح ولا لأ.؟ طب لو قولتلك مفبركة هاتصدقي ولا هاتكدبيني ؟ سؤاله لجمها ومعرفتش ترد بأيه.. وهو لقط جمودها ده وكمل ؟ مش عارفة تردي .. طب انا هاقولك يا" نهال " واكدلك ان الصور دى حقيقية ..سواء القديمة اللى كانت ايام الجامعة ولا الجديدة وانا دكتور دلوك .. ها ايه رايك بجى ؟ قالت بصدمة : يعني انت رجعت تحبها من تاني يامدحت ؟ انا جولت دلوك اني رجعت احبها من تاني؟!! صرخت بانهيار: امال لازقين لبعض طول الوقت ليه ؟ ايه ما بينكم اكتر من الزمالة عشان تبقوا قريبين من بعض كده ؟ عايزاني اجولك واجاوبك بصدق ؟ يبقي تقوليلى مين اللي زرع الفكرة دى فى دماغك من الاول .. من ساعة مادخلتي هجم على غرفتها وانا موجود معاها فى المستشفى؟ باغتها بسؤاله .. سهمت قصاده ومابقتش عارفة تجاوبه بأيه ..دى لو قالت اسم يونس قدامه .. دا كفيل لوحده انه يشعل الامور مابينهم اكتر بمراحل.. ظلت على ترددها دا لحظات .. قبل ما تقول اخيراً : الموضوع دا عدى يامدحت .. وانا ما ينفعش اتكلم وازود المشاكل . قام فجأة من امامها ينهى الحوار بحسم: زي ما تحبي يانهال ..مدام اخترت تدارى عني حاجة مهمة زي دى .. يبقى ماتسالنيش فى حوار" مها "دا تاني نهائي .. انا خارج اكمل شغلي فى العيادة ..وبعدها هارجع المستشفى تاني اطمن على مريض عملت له عملية .. عن اذنك بقى . قالها وهو بيمسك مفاتيحه من تاني وقبل ما يفتح الباب .. التفت يقول بكل هدوء: وعلى فكرة .. مافيش مرواح البلد تاني غير لما انا افضى واخدك معايا .. عشان تتابعي محاضراتك يادكتورة من غير شحططة فى المواصلات .. سلام بجى . خرج وسابها مبرقه عيونها بذهول من تصرفه الغريب معاها ........................... كانت خارجة من غرفة نومها ورايحة على مطبخها .. اتفجأت بصوت ضحكته المجلجة فى قلب الصالة .. وهو قاعد على كنبته بارتياح .. ماقدرتش تمنع نفسها انها تقرب وتشوف المنظر الغريب ده .. معتصم بيضحك ومبسوط اوى كمان ؟! جدع ياحسين.. عرفت تتصرف صح .. دا سراج بيه هاينبسط منك جوي على كده . .................... ايوه امال ايه؟ احنا اللي يمشى معانا ياكل الشهد.. واديك شوفت بنفسك . -.................. لا ماتشيلش هم انت ولا تجلج .. احنا راجلنا فى المحافظة.. ظبط الدنيا صح هناك .. شغل مايخرش المية . ................... اييييوه ياسيدى هو نفسه "نوفل معروف " .. اطمن بقى . نهى المكالمة وتفاجأ ب" نورا" وهى واقفه قدامه .. متسمرة . نعم .. عايزة ايه يابرنسيسة ومخليكي واقفة كده متنحة ؟! عوجت شفتها ترد ببساطة: ويعني هاعوز ايه منك ؟ دا انا بس كنت داخلة المطبخ.. اشربلى بق مية من التلاجة.. وتفاجأت بيك وانت بتضحك بصوت عالي .. ودي بصراحة اول مرة تحصل ولا اشوفها انا بعيني . قام من مطرحه .. يلعب بسلسلة مفاتيحه وهو بينظر لها بغموض .. قبل ما يتنازل ويقول لها اَخيراً : بقولك ايه يا" نورا " عايزك تجهزي نفسك كده .. وتشدى حيلك ..عشان انا عامل عزومة عليوي بكرة .. وا يحضرها باشا كبير جوي هنا .. سألته بتعجب : باشا مين ؟ ......................... واقفة وهى مكتفة ايديها الاتنين بتنظر بدهشة للكائن اللى واقف قصادها .. يسرح فى شعره اللى صبغه جديد من يومين.. ويرش فى الريحة على قميصه الجديد بسفه .. وكأنها شايفة واحد تاني ماتعرفوش .. جوزها القديم ..كانت متحملة كل عيوبه عشان الولاد وتربيتهم.. لكن دا اللى قصادها غريب عنها .. وكأن الفلوس اللى هبطت عليه فجأة ومن غير حساب .. طلعت عيوب جديدة كانت تايهة عنها . واقفة عندك ومتمسمره كده ليه يامحروسة؟ يكونش عايزة تصوريني ياختي؟ قالت بابتسامة باهتة : ومالوا ياسيدي ما اصورك .. وانت لابس اللى على الحبل كده ومتشيك .. دا غير الشعر الأبيض اللى داريته وصبغته.. حاجة تفرح!. ومالك ياختي بتقوليها كده واكنك قرفانة ؟ هو عيب الواحد يهتم بنفسه ولا هو عيب اني اشوف نفسي شوية وادلعها . بشبه ابتسامة: دلع نفسك يا" سامح " وعيش حياتك كمان .. هو انا من امتى ليا كلمة ولا شورة عندك .. عن اذنك بقى .. ارد على تليفوني اللى مرمى على الكنبة بره .. اصله بيرن بقالوا فترة اتفضلي ياختي . قالها بتكشيرة وهو بينظر لضهرها وهى خارجة .. وبعدها تمتم مع نفسه : ولية وش فقر .. نكد بصحيح .. فتح بسرعة درج التسريحة .. خرج رزمتين من الفلوس حطهم في جيوب قبل ما يسحب جزمته ويلبسها بسرعة .. بعد ما خرج من الغرفة وصله صوتها وهى بتكلم بنتها : سراج فتوح ! ودا من عيلة مين فى البلد؟ اتحفزت خلاياه وبسرعة قعد جمبها .. يركز معاها فى المكالمة .. استغربت قوى هى تطفله ولكنها كملت المكالمة: طيب هو انتي هاتقدري برضوا تشيلى عزومة كبيرة زي دى لوحدك؟ .. ماتخليه يجيب واحدة من اخواته البنات يساعدوكى شدها فجأة من ايدها يسألها : يساعدوها في ايه بالظبط؟ جاوبت مخضوضة ونسيت بنتها اللى معاها فى الفون : بتقولي ان جوزها " معتصم " .. عامل عزومة كبيرة لنايب الدايرة بتاعهم. خطف الفون بسرعة منها يرد على بنته : ماتخليهوش يجيب حد يابت يا" نورا " .. انا هاجيبلك امك من اول الصبحية بكرة تساعدك فى العزومة .. هو انا عندي اغلى منك ياعين ابوكى تمتمت نجلاء بذهول : هو في ايه بالظبط؟ ............................. حربي كان بيتكلم فى الفون مع " نيرة " اللى كانت بتحاول بكلامها تهديه : ما تزعلش يا"حربي "وتاخد فى نفسك .. اكيد في حل . نفخ بصوت عالي : حل ايه بس يا" نيرة"؟ انا حاسس ان الموضوع كبير قوى .. زاهر انهاردة كان بيصرخ بحرقة وهو بيدافع عن حقه فى الارض.. قدام الراجل اللى اسمه حسين .. عضو المجلس المحلي . وصله صوتها بتذمر: ماتزعلش مني ياحربي .. بس يعنى لو حصل يعني والراجل النايب ده خد الارض من اللى اسمه زاهر.. هاتاخد فلوسك ازاي منه بعد كده . رد عليها بقوة : ماتقوليش كده يا" نيره " عشان مازعلش منك فاهمة .. دى ارض زاهر وحقه وانا أجرتها منه على اساس انه بعد ما يملكها من الحكومة هاشتريها منه .. وحكاية ان نايب الغبرة ده ياخد الارض منه يبقى على جثتنا احسن. وصله صوتها بلوعة : حن عليك ماتقول كده تاني ياحربي .. ماتخلنيش ازعل منك .. ومتنساش ان احنا فرحنا فاضل عليه اقل من شهر .. ماتوجعش جلبى ياواض عمي . اتنهد بصوت عالي يهدى اعصابه: خلاص يا" نيره " ماتخافيش .. انا بس نار جايدة فى قلبي من الصبح وهاتجنن من ساعة ماشوفت اللى حصل. لما انت نار جايدة فى قلبك .. امال زاهر صاحب البلوة نفسها يعمل ايه ياحربي ؟ الله يكون فى عونه بقى .. بالك يابت يانيرة .. انا لو شوفت الراجل اللى اسمه سراج ده جدامي دلوك .. مش بعيد اطبق فى زمارة رقبته . ضحكت بخفة ترد عليه : طب الحمد لله بقى انه ساكن فى المحافظة وبعيد عنينا .. احسن انا عارفاك مجنون وتعملها ! .......................... كان بيضغط بطرف صوابعه على جبهته من الم الصداع والارهاق وهو بيرد على ابن عمه .. اللى بيستفسر منه عن المشكلة وبيحاول ايجاد حل لها . والله يا عاصم زي ما بقولك كده؟ بس بت عمك هى اللي مجنونة. معلش يامدحت ماتلومش عليها .. انت شوفت بنفسك الصور اللى وصلالها.. دى ناس عايزة الخراب ما بينكم رد بعصبية رغم تعبه . -ولما مالومش عليها هى فى حاجة زي دى؟ الوم على مين بس؟ رخت ودانها لناس تفتن مابينا .. واما اسألها عنهم مش عايزة تقولي مين ؟ يبجى انا هاعرف احل المشكله دى ازاي بجى قولى ؟ كان خرج من غرفة مكتبه فى المستشفى وماشى فى الطرقة وهو بيسمع ل" عاصم " . طب اسمع مني يا" مدحت " .. مش يمكن تكون اللى اسمها مها دى هى اللى مرتبة الموضوع ده كله .. عشان ترجعلها . قال بثقة : اسمع انت ياعاصم .. انا اكتر واحد عارف مها .. هى فيها كل العيوب .. لكن اللعب الزبالة ده .. اخر واحدة هى تعمله ..عشان دى مناخيرها فى السما وعمرها ماتنزل للأسلوب ده . امال مين بس دا اللى يقدر يعملها .. وكمان معاه صورك القديمة. وصله صوت عاصم بحيرة فى الوقت اللى انتبهت فيها كل حواس مدحت وهو شايف غريمه قدامه وسط مجموعة من الزملة بيضحك ويهرج ..فقال بابتسامة باهتة : اللى قدر يعملها .. واحد عارفني كويس يا"عاصم "وعارف تاريخي مع مها .. لا دا مش،عارف تاريخي وبس .. دا كان طرف اساسي فى جميع الصور القديمة بتاعة الجامعة .. السافل وقليل الاصل .. انا هاعرف اربيه كويس !! صوت المنبه المزعج .. جعلها تصحى وتفوق من نومتها غصب .. اتعدلت فى فرشتها بتأفف تطفيه وتخلص من زنه .. فانتبهت لنفسها وهى نايمة على السرير وحدها .. تمتمت بتوهان : هو امتى صحي ده ؟ ولا هو مانمش جمبي اساساً ؟ اتعدلت ترفع نفسها وتنزل من على السرير ..خرجت من غرفتها تدور عليه .. وجدته فى غرفة المكتب .. واقف قدام الشباك ومج القهوة فى ايده.. بينظر بعيونه للشارع المزدحم بالعربيات والناس اللى رايحة جاية فيه على شغلها ومصالحها . هو انت امتى صحيت بالظبط ؟ولا انت منمتش جمبى اساساً ؟ اللتفت يرد عليها بملامح مش مقروءة نهائى : كويس انك صحيتي يادكتورة.. البسي يالا ولا افطري الاول عشان اوصلك على جامعتك . قدمت بخطواتها لداخل الغرفة تسأله باندهاش: هو انت لسة زعلان مني يامدحت ؟ دا انت مجاوبتش على سؤالي حتى . رفع المج يشرب منه بهدوء قبل مايجاوب بنفس الهدوء : يهمك جوي تعرفي انا كنت نايم فين يعني ؟ عيونها لمعت وصوتها طلع بحزن : على فكرة يا" مدحت " .. انا ممكن استحمل اي حاجة منك ، إلا جفاك او بعدك عني . نفخ بضيق واستغفر فى سره لما شاف ضعفها .. كان هاين عليه ياخدها فى حضنه زي كل مرة اتخانقوا فيها مع بعض .. لكن الغضب جوا قلبه مكنه ان يجمح رغبته.. ولكنه رد وهو بيخفف حدة لهجته معاها . انا جيت اساساً وش الصبح . خطفت ساعتين نوم على الكنبة هنا .. عشان لو نمت عالسرير عندك مكنتش هاقدر اصحى قبل الضهر . مسحت دمعتها بسرعة وقربت منه تمسك ايديه و تقول بحنان: بس انت كده بتضر بصحتك .. جسمك لازم يرتاح وياخد كفايته من النوم .. ولا انت مش دكتور وعارف بكل كلامي ده ؟ من مستوى طوله كان بينظر لها بشوق جارف.. بيلتهم تفاصيلها وكل لمحة خارجة منها.. وهى بتكلمه عن صحته وتترجاه بالاهتمام ..اتحمحم يجلى ريقه قبل ما يقول بتماسك زائف : بعدين .. بعدين هاهتم بنفسي وانام كويس.. بس اخلص الاول من شوية مواضيع كده شغلاني.. استعجلي انتي على لبسك وفطارك .. عشان اللحج اوصلك على جامعتك معايا. موضيع ايه دي اللى شغالاك جوى كده ؟ ياستي ماتشغليش بالك .. اهتمي بس انتي بدراستك كويس .. وياللا بجى عشان مانتأخرش. هزت بدماغها تراضيه وعيونها فيها الف سؤال.. قبل ما تخرج وتنفذ طلبه ..ضرب بقبضته على حافة المكتب بغيظ .. ينفس عن غضبه والحريق اللى جواه. .......................... كانت بتسرح فى شعرها قدام المراية.. لما اقتحم معتصم عليها الغرفة بيهتف عليها بغضب : حد قالك تعزمي ابوكى وامك على بيتي من غير اذنى ياست هانم انتي ؟ اللتفت ترد عليه مستغربة: ومين قالك بقى ان عزمتهم؟ دى بس ماما اللى قولتلها على عزومة النهاردة.. وبابا قالي هاجيبها تساعدك ..هما وصلوا ؟ قرب منها وهو بنفخ دخان من الغيظ : اه ياختي وصلوا وطبوا عليا زي القدر المستعجل .. وانا قاعد فى الجنينة وبوجه جبيصي .. على اللى الترتيبات اللى هانعملها النهاردة بالليل . طب كويس اروح اسلم عليهم بقى . شدها من دراعها قبل ماتتخطاه وهو بيجز على اسنانه : هو انتي غبية وكمان مابتحسيش ؟ ماتخلى عندك دم وقدرى الراجل اللى بيكلمك . قالت بألم : اه .. سيب دراعى يابني ادم انت ؟ هو ايه اللى حصل بالظبط عشان دا كله ؟ ضغط بغيظ اكبر : اللى حصل اني ماكنتش عايز ابوكي يحضر وسطينا انا والراجل الكبارة ده .. بغلاسته ودمه التجيل ..دا انا متحمله بالعافية .. اجبر الراجل كمان يتحمله معايا ليه ؟ ردت وهو بتحاول تفلت ايدها: يااخى ماانا بقولك ماعزمتوش .. انا بس قولت لماما عشان تساعدنى وهو اتطوع من نفسه يجيبها. زعق بصوت مكتوم : ايوه يعني تساعدك فى ايه ؟ اذا كنت انا جايب الاكل جاهز من افخم المطاعم فى المحافظة .. عشان عارفك خايبة وماتعرفيش تطبخي.. يبقى لازمتكم في ايه انتوا الاتنين .. غير فى الترتيب ودى حاجة اعملها لوحدى . خلاص يامعتصم مشيهم . سابها فجاة وهو بيقول بغيظ : وامشيهم ليه يانورا ؟ هما مش وصلوا عشان يساعدوا.. يبقى خلي امك بجى تعمل اصناف حلويات زينة نحلى بيها وساعدى انتي معاها.. عشان عايز السفرة النهاردة تشرف على حق .. وابوكى هالقيلوا شغلانة من تحت الارض عشان يساعدك برضك .. وخليه يتحمل بقى . خرج وسابها تدلك فى دراعها وتمتم مع نفسها : جاتك ضربة فى ايدك ياشيخ .. قال خير تعمل شر تلقى . ............................ ماانا قولتلك يانهال .. الموضوع هايكبر وجوزك الدكتور هايزعل .. بس انتي ماسمعتيش كلامي . .................... شاف الصور كلها وجالك انهم صدق .. يعنى حتى ماريحيكيش بأي تبرير . ...................... هه .. ما يبجاش الدكتور مدحت واض عمى .. لو ماعملش كده . -......................... حقه يانهال ماتزعليش منه .. انتي عارفة جوزك كويس .. طبعه صعب وعنَدي .. مش هايسكت غير لما يعرف . ................. لدرجادى انتي خايفة عليه يانهال ؟ خلاص ياحبيبتى انتى قربي منه اليومين دول .. وان شاء الله يكون خير . ............... ماشي ياحبيبتى.. سلام وشوفي محاضرتك انتي . نهت بدور المكالمة مع اختها.. وسرحت شوية .. قبل ما ترفع راسها.. للى واقف قصادها على باب غرفة الجلوس.. اللى قاعدة فيها . انت من امتى واجف هنا على الباب ياعاصم ؟ جاوبها ببساطة وهو بيقرب يقعد جمبها: تقريباً سمعت معظم المكالمة وانتي مندمجة فى الحديث مع اختك المجنونة .. قوليلها تريح نفسها وتهدى الفكر عندها شوية .. واض عمك ماعندوش اى نية يبص لواحدة غيرها .. سالته بتوجس: طيب ولما هو كده صح زي انت مابتقول .. مش راضى يريحها ليه ويطمن جلبها دي زعلانة جوي عاصم؟ مش لما تريحه هى الاول وتقول على اللى نفخ فى ودنها بالكلام العفش ده من الاول .. ولا انتي كمان مش عارفة ؟ تنحت وسكتت قدامه..وهو نظر لها لحظات قبل ما ينهض عن الكنبة جمبها وهو بيقول : براحتكم .. بس واض عمك مش هايسكت غير لما يعرف . ندهت عليه قبل ما يخرج ويسيبها : طب انت رايح فين دلوك . انا رايح عند جدك اشوفه .. بقالي فترة ماشوفتوش. ........................ جالس على مقعد كبير من الخشب.. مريح ضهره ومكتف ايديه .. فارد رجليه الاتنين للأمام وساند براسه على حرف المقعد ...مغمض عيونه ومستسلم لنسمة الهوا اللى بتلامس اوراق الشجر وتداعب وجهه .. علٌه يريح عقله ولو ثواني عن التفكير .. ولا الاجهاد اللى بقى مسيطر على جسده بشكل رهيب .. لاهو عارف يزعل منها عشان ادت فرصة للشيطان للدخول مابينهم ولا هو قادر يديها الحق ان دا رد فعل طبيعى منها .. لما تشوف بعيونها صور زى دى مع كلام الرسايل المسمومة ناحيته .. بس هى هاتعرف باللى جواه ولا تعرف باللى تاعبه ازاي ؟ عشان يلوم عليها ! اتعدل فى قعدته مع سماعه لصوت الفون .. يرد عليها رقمها بنغمة مميزة لها وحدها . الوو ... ايوة يانهال . وصله صوتها بتردد : انا كنت عايزة اقولك اني خلصت محاضراتي يامدحت .. اروح مع اصحابي ولا هاتيجي ..... . بابتسامة باهتة رد عليها : اجي ايه يانهال ؟ انتي مكسوفة ماتقولى تعالى وصلني او روحني ؟ لا اطمني ياحبيبتى .. احنا لسة ماوصلناش للمرحلة دي من الجفا ولا البعد. قالت بحزن : يامدحت ماتقولش كده .. انا مقصدتش خالص على فكرة. ولو تقصدي حتى يانهال ؟ استنينى عندك هاغير يونيفورم المستشفى وهاجيلك حالاً . لما ماسمعش ردها ولا اي كلمة تانية.. نهى المكالمة بالسلام .. وبعدها نهض عن مقعده بالعافية وهو بيجر فى رجله من التعب .. ومن ناحية تانية من الخلف.. كان في واحد مبسوط قوى بسماعه للمكالمة .. بما تحمله من معنى لنجاح اللى بيعمله ويخططله! .............................. عاصم كان جالس مع الحج ياسين فى مكانهم المعتاد تحت شجرة العنب .. لما دخل عليهم حربي فجأة وهو بيهتف على جده: شوفت ياجد .. الراجل الباطل عمل ايه ؟ سأله عاصم وهو مخضوض : راجل مين الباطل ياحربى ؟ واللى مخليك متعصب كده ؟ جاوب رائف واللى كان واصل خلف حربى : سراج فتوح ياعاصم .. نائب الدايرة المحترم واللى واكلها والعة هو وبدنته كلها . ردد خلفه ياسين : مالوا سراج فتوح ياواض ؟ عمل ايه تاني ؟ قال حربى بعصبية: زي ما اتوقعنا ياجدي .. ظبط اموره فى الحكومة وسرق ارض الغلبان زاهر .. المسكين راح النهاردة يسأل فى المجلس على إجراءات التمليك وصلت لفين؟ .. لقى الورق بتاعه اختفى نهائى ومالوش وجود ولا اكنه قدم فى الحكومة من الأساس . قال ياسين باندهاش : وه .. كيف دا يابوي ؟ هى الحاجات تحصل كيف كمان في ورق الحكومة ؟ قال رائف بتأكيد: تحصل ياجدي .. لما يبقى في موظف فاسد وواصل فى الجهاز الحكومي .. يعمل كده واكتر من كده كمان . رداً على كلامهم قال عاصم : بس دا مش يبقى موظف فاسد .. دا يبقى موظف فاجر .. اللى يقدر يعمل كده . هو كده فعلا ياعاصم .. موظف فاجر ومعاه اللى دفعله بالالفات عشان ياكل تعب واحد غلبان زي زاهر.. بس والنعمة انا ماهاسكت على حقي ولا حق زاهر . طب وانت مالك ياحربي بارض زاهر ولا حقه ؟ مالي ان انا كمان مشترك فيها ياعاصم .. ولا انت ماتعرفش ان الارض اللى أجرتها فى الجبل وزرعتها تبقى من زاهر.. او هى نفسها الارض اللى بنتكلم عليها؟ . لا ياحربى .. والنعمة مااعرف .. طب وبعدين انتوا هاتعملوا ايه دلوك ؟ حربى بقوة : طبعاً مش هانسكت على الباطل ولا على اي حد ياكل حقنا . رائف كمان : وانا معاكم ياحربى ويدي فى يدكم . براحة انتوا الاتنين.. الحاجات دي مالهاش الغشم .. عايزين توقفوا وتراعوا حقكم.. يبقى بالعقل والحكمة .فاهمينى ولا لاه . عقل ايه بس ياجدى ؟ بقولك ارضى اللى تعبت فيها وسهرت الليل فى رويها فى عز البرد والعرضة للخطر من الديابة ...بعد مازهرت جدامي وخيرها قرب .. يجي واحد عايز ياخدها مني غصب وافترا .. يبقى فين العقل ؟ عاصم برزانة : اسمع كلام جدك ياحربى .. اكيد في حل.. بلاش تتغاشم عشان ماتضرش نفسك . يووه .. انت كمان بتقولي اتغاشم.. انا سايبهالكم وماشى .. ماحدش حاسس بالنار اللى فى قلبي . هتف ياسين على رائف: خليك معاه ياولدى وعقله .. ماتسيبهوش لوحده ليعمل حاجة غلط . حاضر ياجدى . قالها وهو بينهض ويمشي بسرعة خلف ابن عمه .. ضرب ياسين كف على كف وهو بيقول : لا حول ولا قوه الا بالله.. ربنا يعديها على خير ويجيبها سلامات. ............................ وعند " معتصم " وبعد الراجل ما اكل مالذ وطاب من افخم مطعم فى المحافظة.. كان بياكل فى الحلويات اللى فى الطبق اللى قصاده بشراهة ودون وعي : اممم .. طعم الحلويات حاجة تهبل يامعتصم. قال معتصم بسعادة: بالهنا والشفا ياسراج بيه .. تحب احطلك طبق تانى. هات يامعتصم هات .. انا بحب الحلويات قوي .. خصوصاً لما تبقى بالطعامة دي .. هو انت اشتريتها من فين ؟ سامح بسرعة وصوت عالي واكنه تلميذ وماصدق يلاقي اجابة يقولها عشان يلفت نظر المستر : دي صناعة بيتى مش محلات ياسعادة الباشا .. حكم انا مراتي ست بيت بريموا واحلى حاحة تعملها الحلويات. نظرله الراجل واكنه اول مرة ياخد باله منه .. على الرغم انه كان موجود معاه من اول القعدة وعلى نفس السفرة كمان وهما بياكلوا من دقايق : مراتك !! هو انت مين بصحيح ؟ انا سامح حما " معتصم " ومراتى بقى هي اللى عملت الحلويات دى . حرك دماغه وهو بيمسح بكفه على شعر راسه: ااااه .. افتكرتك .. انت اللى عرفتني بنفسك اول مادخلت .. تشرفنا يااستاذ سامح . الشرف لينا ياسراج بيه .. دا النهارده يوم عيد عندنا بجد . تجاهلوا الراجل واللتفت لمعتصم ..وكملوا حديثهم مع بعض . احنا خلاص يامعتصم.. كلها كام يوم وهاندخل فى الجد ونعمل مشروعنا .. عملت حسابك فى الفلوس ؟ معتصم وعيونه على سامح اللى مطرطق ودانه : ماتقوم ياعم سامح .. هاتلنا صنيه بسبوسة تانية من المطبخ بدل اللى هاتخلص دي . رد عليه بتناحة : واجيب انا ليه وجبيصى موجود .. ماتنده عليه خليه يجيب الصنية . عض على شفته وهو بيتلفت للراجل ولكنه غير الكلام: بس انت ماقوتليش برضك ياسراج بيه .. هاتعمل ايه مع اللى اسمه زاهر ده بعد ماخدت ارضه وضاميتها لزمامك ؟ بابتسامة شيطانية : ولا حاجة ياسيدى.. الارض كانت بتاعتي من الاول .. بس انا كنت تاركها مع الزمن .. ودلوقتي بقى جه الوقت اللى استغلها فى مشروع يفيد البلد ويرفع شانها .. غلطان انا بقى كده ؟ هههههه لا طبعاً ياباشا.. دا انت السلطة نفسها .. في حد يعادي السلطة؟ ههه بالظبط كده .. برافوا عليك يامعتصم.. بتفهم بسرعة .. المهم بقى عملتلي ايه فى الارض القبلية .. فضيت البيوت الباقية فيها من سكانها؟ معتصم وشه اتخطف لما لاحظ وش سامح اللى فهمها لوحده : ارض قبلية مين ؟ هو انت تقصد بيت ابويا والبيوت المهجورة حواليه؟ رد عليه معتصم بحزم : احنا بنشتريها من الناس بفلوس .. ولا انت نسيت انك واخد تمن البيت مضاعف . سامح بصدمة : تمن ايه اللى مضاعف ؟ انت خدت البيت بنص التمن واكنك بتجبي عليا .. بعد البيت مابقى خرابة بفعل الحفر والردم فيه . اتدخل الراجل بأسلوب التعالب: ايه ياعم سامح ؟ انت مش بتقول ان انت حمى معتصم.. يعني كل اللى الخير اللى هايهل عليه هايبقى فى عبك وعب بنتك.. ثم ماتنساش انك هاينوبك من الحب جانب انت كمان ..لما تبقى تبعنا . هز دماغه سامح وهو بيحاول يقنع نفسه .. استغل الراجل حيرته : ممكن بقى ياباشا تنده الست مراتك .. عشان اشكرها بنفسي قبل ماامشي .. على شوية الحلويات دى اللى كنت هاكل صوابعى وراها . نهض من مكانه كالمغيب ينفذ الامر .. وبمجرد ماخرج .. اللتفت الراجل لمعتصم : اديني طرقته قولي بقى .. جهزت الفلوس . جهزت ياباشا .. وتحت امرك في اي وقت ....................... يعني امك مش موجودة ؟ هى لحقت تغور وتمشى امتى ؟ ردت عليه نورا وهى بترتب فى مطبخها بضيق : حرام عليك يابابا .. دي طلع عينها معايا النهاردة.. وماصدقت تفضى شوية عشان تزور جدى ياسين وجدتي صباح. حبكت يعني تطلع دلوقتى .. بعد ماالراجل طلب انه يقابلها عشان يشكرها بنفسه على صنع ايديها .. والنعمة لاسود عشيتها. قالها وهو بيمسك الفون عشان يتصل بيها: قالت نورا بدهشة : يشكرها على صنع ايديها!! ليه بقى ؟ ماكان يكفى انه يبلغها على لسانك انت وخلاص. ترك الفون يسألها بتوجس : تقصدي يانورا ؟ ابتسمت بسخرية تقول : اقصد ان الباشا بتاعك .. مش مستنى يشكر زوجتك.. لانه خارج وماشي على طول اهو . نظر لناحية مابتشاور بايدها من باب المطبخ .. عيونه وسعت على اَخرها وهو شايف سراج ومعاه معتصم..خارجين على ناحية الباب وماشين من غير مايعبروه : ياولاد الذين . .......................... وخارج البيت وامام عربيته بالظبط.. اتفاجأ سراج ومعاه معتصم .. باللى واقفين قدامهم بشموخ وتحفز وكل واحد فيهم ماسك نبوت كبير ومريح كف ايديه عليه: معتصم بلهجة شديدة : انتوا واقفين عندى وفى منطقتى وجمب بيتى بتعملوا ايه؟ احنا مش جايلنك انت يا.....معتصم ...احنا جاين للبيه اللى واقف جمبك . سراج بابتسامة مرتابه: وانتوا مين بقى ياشباب ؟ يشرفني طبعاً اتعرف بيكم وافرح بشباب بلدى . ههههه .. تفرح بشباب بلدك ؟ طب انا ابجى رائف ابن عبد الحميد حفيد الحج ياسين.. وانا حربى ابن محسن حفيد الحج ياسين.. واللى عايز تاكل حجى فى ارض زاهر ..اللى ضميتها لحيازتك.. بالبهتان والزور . . امل_نصر بنت_الجنوب