الفصل الثالث عشر من رواية قيد حب للكاتبة شيماء سعيد

صمت وهو يعلم كم معها حق بكل كلام تخرج منها، يخشي أن يقول ما كان بعقله وقتها ليخسرها لتقول هي بحذر:

_ هو أنا لو سالتك سؤال هتقولي الحقيقة يا مصطفى؟!..

_ قولي الف سؤال .

أخذت نفسها بالكثير والكثير من الخوف ثم قالت بنبرة مرتجفة:

_ لما أنت عايز تخلف مني لما حملت كنت مصمم تنزله ليه؟!..

سؤال يتمني عدم الإجابة عليه بحياته، وعدها بقول الصدق وسيقوله، تحرك بالمقعد ليبقي بجوارها ضم جسدها إليه ثم رفع وجهها بوضع أحد أصابعه أسفل ذقنها مردفاً بنبرة صوت دافية:

_ وقتها أنا كنت وحش أوي مش شايف غير نفسي وبس وأنتِ من خوفك مني كنتي بتأخدي حبوب منع الحمل بس الحمل كان حصل قبل ما تأخدي الحبوب…

تغيرت معالم وجهها بخوف وكأنها علمت الآن باقي القصة، قبل أن تتحدث أكمل حديثه بجدية:

_ أثرت على الجنين شوهته، باين التشوية في التحاليل والأشعة مكانش في أي حلول غير ان هو ينزل لو كنت قولتلك الحقيقة وقتها كنتي حملتي نفسك المسؤولية…

صمت قليلاً ثم قال بتعب:

_ بس لو في حد السبب في كل اللي احنا فيه دلوقتي ده هيبقى أنا مش أنتِ، اياكي تعيطي دموعك غالية وغالية أوي كمان..

أومأت إليه بحزن طفلة صغيرة، علقت عينيها به وقالت برجاء خائف:

_ هينفع أخلف غيره صح الدكتور قالك إيه قول لي الحقيقة ؟!..

أبتسم إليها مردفاً:

_ هنخلف غيره 10 عايز أجيب منك كل سنة عيل..

شعرت براحة شديدة من حديثه الدافئ وقالت:

_ ماشي نجيب عشرة موافقة..

يا الله شعر وكأن ثقل العالم سقط من فوق رأسه، أخيراً حصل منها كل كلمات بسيطة تثبت وجودها معه إلي الأبد، قام من مكانه ثم مد يده إليها مردفاً:

_ ترقصي معايا ؟!..

مشاعر لذيذ تعيشها معه ومستمتعة بها، مدت يدها إليه وقامت معه ثم قالت بنعومة:

_ أرقص..

بدأ يتمايل بها بخفة وكأن العالم كله بين يديه، سعيد يود لو يأخذ إلي فراشه إلا إنه لن يفعلها، سيشبعها حبا وحنانا كما تريد وبعدها يشبع روحه منها حبا كما يريد..

همس:

_ هنطلع من هنا على بيتي مش على بيتك يا سما..

حاولت الابتعاد ليتحكم بها أكثر فقالت بعتاب:

_ أرجع معاك بيتك ليه؟!.. هعيش في بيتك بصفتي مين أصلا… بعدين أنت مش اتفقت معايا أنك هتعمل اللي يريحني؟!.. بلاش ترجع في كلامك لو سمحت أنا ما صدقت أكون مبسوطه معاك..