الفصل الثاني عشر رواية طمس الهوية الجزء الرابع من أحببت طريدتي للكاتبة أسماء المصري

أطرق رأسه فابتسم فارس وهو يمزح معه:
-بنات عيلة غزال حلوين مفيش كلام، كلهم الصراحه بس دعاء بالذات عليها علامات استفهام كتير وحتى لو صارحتك بالخطه بتاعة اخوها ده المفروض يكون دافع ليك تبعد، بس الغريب انك قربت أكتر وبعد رجوع شادي ولسه شايف إن الموضوع ينفع يكمل وأنا عشان مش عايز ازعلك موافق على اللي انت تقوله بس بنبه عليك، لا سري ولا سر بيتي ولا سر شغلي تكبه معاها في لحظة صفا لأني متأكد إن ده السبب الوحيد للجوازه دي.

أومأ وهو مطرقا رأسه فنظر له فارس بتعجب وصاح بصوت حاد:
-ايه يا بني، هي عملالك عمل على ورك نمله مكسحه ولا ايه؟ انشف كده.

ابتسم فارس عندما نجح برسم تلك الابتسامة على وجهه المقتضب وأضاف:
-خلاص طيب، هو عايزني أروح لحد بيتهم وأخطبلك أخته منه، فاكر بكده هيرد على اللي حصل معاه، وبالرغم اني مش طايق اسمع اسمه مشاشوفه بس هعمل كده عشانك يا زين، بلغهم بزيارتي بكره.

تركه وذهب لمكان جلوس عائلته فوقفت ياسمين على الفور تسأله باهتمام:
-خير يا حبيبي؟

مسح على ظهرها وهو يوضح:
-زن زين المعتاد على الجواز.

ضحكت وهي تمسد ذراعه:
-حقه يا فارس، أتأخرت عليهم أوي بصراحه.

رمقها بنظرة متضايقة وسألها:
-انتي عارفه إن شادي رجع؟

أومأت وهي تؤكد:
-خبر مش مهم بالنسبة لي، بس عرفت من نرمو.

خلل أصابعه بخاصتها بعد أن حمل الصغيرة منها والتفت لحارسه الممسك بجاسر ليتبعه حتى الاستقبال ووقف يحدث الموظفة:
-عايز سويت ليلة واحده.

ابتسمت وهي تطبع بعض الحروف على لوحة المفاتيح الخاصة بالحاسوب الذي أمامها وأخبرته:
-في الجناح الملكي وجناح شهر العسل، حضرتك تحب احجز ايه فيهم؟

التفت يرمق زوجته بنظرة مبتسمة ورد:
-هاتي بتاع شهر العسل ده.

ضحكت ياسمين ولكنها توقفت عن الضحك عندما طلبت الموظفة:
-هحتاج بطاقة حضرتك وبطاقة المدام.

أخرج خاصته من حافظته وأنتظرها أن تفعل المثل فعضت على جانب شفتها وهي تخبره:
-أنا مش معايا البطاقة يا فارس.

رفع حاجبه متعجباً وحدث الموظفة:
-اعملي الحجز باسمي وخلاص.

رفضت الموظفة بلباقة واحترام:
-آسفه يا فندم، مش هقدر إلا ببطاقة المدام دي رولز

طرق بإصبعه على هويته الموضوعة أمامها وهتف بصوت جاد:
-شوفي كده انتي بتعمل الحجز لمين؟

نظرت بهويته فارتبكت وهي ترحب به:
-أهلا وسهلا يا فندم، نورت الفندق والله بس أنا مش هقدر اعمل حاجه وإلا ممكن اتأذى في شغلي و…