الفصل الحادي عشر من رواية دلال و الشيخ للكاتبة شيماء سعيد

ثم ولجت دلال على استحياء وعندما رأتها همت اعجبت بها وبجمالها فقالت:

_اللهم صلى على النبى، الله أكبر عليكِ يا بنتى زى القمر ربنا يحفظك .

دلال بخجل: الله يعزك يا حجة .

ويارب أكون ضيفة خفيفة عليكِ وترتاحى معايا .

فلمعت عين همت بالدموع وقالت:

_يارب أنتِ اللى ترتاحى معايا يا بنتى، عشان أنا اللى متعبة وهتتعبى معايا، فيارب متزهقيش منى واعتبرينى زى والدتك .

فلمعت عين دلال بالدموع عندما تذكرت والدتها التى أمرضها السجن مرة أخرى وأصبحت طريحة الفراش فى مستشفى السجن .

فانحنت دلال وقبلت جبهتها بحنو وقالت: لا متقوليش كده، أنتِ ياما تعبتى ومن حقك دلوقتى تشالى على الرأس .

فتعجب آدم من كلماتها التى اجتاحت قلبه على الفور وأدرك أنها إنسانة جميلة ذات قلب أبيض وطيب وسيترك لها والدته وهو مطمئن .

لذا قال: طيب أسيبكم دلوقتى تتعرفوا على بعض وأنا أروح الشغل عشان أتأخرت .

ثم أشار إلى دلال: عندك يا آنسة دلال على الكومدينو، علاج ماما وفيه ورقة عندك مكتوب فيها اسم العلاج والمقدار والوقت بتاعه عشان تاخدى بالك .

ده اهم شىء عندى، وتانى حاجة تساعديها على النضافة والوضوء كل صلاة .

غير كده متعمليش اى حاجة .

فيه وحدة بتيجى تنضف البيت كل أسبوع، وكمان فيه واحدة بتعمل أكل بيتى بتبعت لينا الأكل كل يوم .

عشان تتغدى مع ماما على الساعة خمسة كده باذن الله.

وأنا فطرتها قبل ما تيجى، بس لو حضرتك مفطرتيش، تقدرى تدخلى المطبخ هتلاقى كل حاجة عندك فى التلاجة .

ياريت تعتبرى البيت بيتك من النهاردة وتتصرفى فيه على طبيعتك .

أثلجت كلماته قلب دلال وتنهدت بإريحية بعد أن أطمئنت لوجودها فى ذلك البيت مع أم مريضة وابن صالح على خلق مثل آدم .

أومئت دلال برأسها: تمام حضرتك ومتقلقش أنا هنا عشان أراعى ماما الحجة فى كل حاجة تطلبها .

فابتسم آدم وقال: تسلمى، ودلوقتى يلا فى أمان الله.

دلال: مع السلامة .

…….

تعالت شهقات أسماء بعد أن أدركت أن كل أحلامها تبخرت فى الهواء بعد أن قضى شفيق على عفتها .

فأشفق عليها شفيق وحاول أن يهدئها قليلا بقوله:

_كفاية يا أسماء قطعتى قلبى يا حبيبتي، قولتلك متشليش هم وان كان على أشجان خلاص مبقتش تلزمنى، هطلقها واتجوزك .