الفصل الثامن و العشرون من رواية نبض قلبي لأجلك للكاتبةلولا نور

صمتت وهي تبتلع رمقها بصعوبه واضافت بغصه في قلبها : لكن هو لا ،لما سابني شهر معرفش عنه حاجه وفي اكتر وقت كنت محتجاه وملقتهوش جنبي ،ما قدرتش اقسي عليه وقعدت استناه وانا بخلق له الف عذر لغيابه!!!

لما رجع لي ومعاه واحده وبيقولي انها مراته ، فضلت اهدده بالطلاق وانا مش قادره اخد القرار ان امشي واسيبه واطلب الطلاق زي ما عملت مع ايمن.

بقيت ضعيفه قدامه ، مقاومتي ضعفت ، في حاجه موقفاني ومش عاوزاني ابعد ….

هتفت ملك تباغتها بحقيقه مشاعرها : علشان بتحبيه يا سوار ، ملهاش تفسير غير كده انك بتعشقيه مش بس بتحبيه.

اخفضت راسها بخزي من مشاعرها واجابتها : للاسف دي الحقيقه اللي مش قادره انكرها ولا اهرب منها وفي نفس الوقت بقيت كارهه نفسي بسببها.

بحبه لدرجه ان قلبي وجعني من كتر حبه ، واكتشفت اني معرفتش يعني ايه حب الا معاه وان اللي قبله كان اعجاب وعشره مش اكثر…

قدر يقتحمني ويفرض حبه عليا ، احتواني ، غرقني فيه ،وفي الاخر طلع كل ده كدب ووهم زي ما قال.

كادت ملك ان تجيبها الا ان صوت ايهاب الذي جاء من خلفها جعلت تصمت….

تقدم ايهاب للداخل وسحب مقعدا ً وجلس معهم داخل الشرفه وهتف ايهاب بتاكيد:وانا متفق معاكي في كل كلمه قلتيها ، فعلا انتي بقيتي ضعيفه قدامه وهروبك من البيت محاوله اخيره منك علشان ما تستسلميش للي عمله معاكي وترضي بيه…

نظرت له بتقدير لفهمه مشاعرها بالشكل الصحيح …

ثم تابع ايهاب يواصل حديثه كاشفاً الحقيقة كامله امامها ….

وعلشان كده رفضتي تروحي عند هشام اخوكي علشان كان هيقدر يوصل لك وساعتها كنتي هتضعفي اكثر علشان انتي بتعشقيه يا سوار مش بتحبيه وبس.

كنتي هتقبلي بوضع انتي مش عاوزاه وفي نفس الوقت انتي واثقه ومتاكده انه زمانه هتجنن وقالب الدنيا عليكي …

فانتي بكده ضربتي عصفورين بحجر واحد تقوي نفسك علشان تقدري تاخدي حقك منه وده مكانش هيحصل وانتي عايشه معاه ،وفي نفس الوقت تعاقبيه ببعدك عنه وتبوظي عليه مشروع جوازه لان مش هيبقي فايق لجواز ولا لغيره طول ما انتي بعيده عنه.

نظرت له ببلاهه وبفاه مفتوح يكاد يصل الي الارض من شده صدمتها !!!

كيف استطاع قراءتها بسهوله ومعرفه ما يدور داخل رأسها؟؟

ضحك علي منظرها وتحدث بثقه: ما تبصليش كده .

عارف دماغك بتفكر في ايه وبتسالي نفسك ازاي قدرت اعرف انتي بتفكري في ايه …