الفصل السابع والعشرون من رواية طمس الهوية بقلم اسماء المصرى

الفصل السابع والعشرون #روضتني2 #أسماء_المصري #زعيمة_ماڤيا_الروايات عاد منزله والشمس تسطع بالسماء وهو لم يذق طعم النوم ولا الراحة منذ ليلة أمس بعد ما مر به وعاصره مع رفيقه الذي أصبح مقربا له كثيرا. فتحت له زوجته ذراعيها تحتضنه وتسأله باهتمام: -حبيبي، عملت ايه طمني؟ حرك رأسه وهو يتوجه للداخل بتعب: -حصل حاجات كتير أوي يا ديچا، فارس ده غلبان أوي هو وعيلته بصراحة. جلست بجواره تدلك له عنقه عندما وجدته يضغط عليه متألما وتسائلت عما يقصده فقص لها أحداث خطف ياسمين وصغيرتها وإيداعهما للمشفى حتى تلك اللحظة فاتسعت حدقيتها تسأله والحزن قد اعترى وجهها: -يعني ياسمين في غيبوبة؟ أومأ وعقب على حديثها: -فوبيتها أخطر من فوبيتك بكتير على الأقل انتي بتقدري تنزلي الميه لكن هي مجرد حبسها في شنطة العربية كان كفيل يوصلها للحالة دي. تنهدت ومسحت على كتفه: -أحضرلك تاكل؟ تلاقيك مأكلتش حاجه من ساعة العيد ميلاد أمبارح. قبلها قبلة رقيقة وابتعد يسند رأسه على مسند الأريكة متعبا: -أنا جعان نوم وكنت مخطط لسهره امبارح معاكي اشحن فيها شوية بس جه تليفون فارس بوظ كل خططي. ابتسمت وهي تربت على ظهره: -أدخل خد شاور على ما اسخنلك الأكل وأنا موجودة مش ههرب يعني. غمز لها وهو يسحبها معه لداخل غرفتهما: -ﻷ الأكل بيتقل ويخليني عايز أنام، أشحن الأول. سحبها بنهاية حديثه فسقطت على جسده وسقط كلاهما على الفراش وهي تضحك فكمم فمها وهو يتوعدها: -عارفه لو بنتك صحت من صوتك هعمل فيكي وفيها ايه؟ لم تعقب عليه بل بادرت هي بالخطوة الأولى وقبلته ولكنها شعرت بالخجل كعادتها وعادت للوراء قبل أن تتعمق بالقبلة فزفر هو ممتعضا وهو يحكم ذراعيه حولها وهسهس بصوت منخفض ومثار: -ﻷ متبعديش، كملي. لحظات واندمجا قلبا وكيانا وارتاح يتنفس بحرارة متأثرا بلحظاتهما معا وقبّل أعلى رأسها ممتنا: -ربنا يخليكي ليا. نهض فورا ودلف المرحاض وهو يرجوها: -سخنيلي الأكل بقى أحسن لو سبت نفسي هروح في النوم وأنا ورايا مشاوير كتير أوي. زمت شفتيها للامام رفضا على حديثه: -حرام عليك نفسك، أنا لولا بحب ياسمين ومقدره اللي فارس فيه كنت قولتلك ابعد عن الشغل ده. تبعته لداخل المرحاض لتترك له منشفة نظيفة وهو لا زال يعدل من حرارة المياة فرد عليها وهو يحرك رأسه يمينا ويسارا حزينا على ما آلت له أمور صديقه: -وضعهم صعب أوي ومع كل ده هو بيحاول يتماسك بس أنا لو مكانه كان زماني انهارت من زمان. أخرجت تنهيدة حارة وخرجت وهي تخبره: -هروح أسخنلك الأكل على ما تخلص. خرجت وقف أمام الموقد وبدأت بتجهيز الطعام فاستمعت لغمغمة صغيرتها فتحركت لداخل الغرفة لتحملها وعادت للمطبخ لوضع الأطباق على المائدة المستديرة الموجوده به فخرج هو بعد أن انتهى من اغتساله وارتدى ملابسه وحمل عنها الصغيرة وهو يبتسم: -شوفتي بقى، كويس أننا خلصنا قبل ما تصحى. جلس لتناول طعامه والصغيره بحضنه يناولها القليل من الطعام فاستمع لرنين هاتفه فتركت خديجة ما بيدها وهي تشير له: -خليك كمل أكلك أنا هجيبهولك. أحضرته بعد أن توقف عن رنينه فسألها: -مين اللي اتصل؟ رمقته بنظرة متضايقة وهي تخبره: -مازن الفهد. حاول الوصول للهاتف ولكنها ابعدته عن متناول يده وهي تصر عليه: -والله ابدا، كل الأول وبعدين ابقى كلمه. ❈-❈-❈ نظر لشاشة الهاتف زاما شفتيه والصراخ من حوله قد صم أذنيه فهدر بالجميع: -بس، مش عايز أسمع صوت حد فيكم. التفت يرمق أخيه بنظرات حائرة والأخر يهز رأسه مستنكرا ما يحدث ودينا لا تزل تحاول اسعاف تلك التي سقطت دون إظهار أي مظاهر للحياة. وقفت دينا أخيرا بعد أن فقدت قدرتها على التحكم بنفسها فبكت بانهيار وهي تخبر نجلها: -ماتت يا مازن، ماتت. ترقرقت عينيه بالعبرات والتفت يرمق فريدة بنظرات حادة وهو يصر على أسنانه وتسائل بتلعثم: -أنتي متأكده يا ماما؟ أومأت تؤكد: -ايوه يا بني، نبضها كان شغال بس وقف خلاص والنزيف اللي ورا دماغها كمان بيأكد أنه مستحيل تعيش. شرد لحظة ولم يفق إلا عندما سأله ساجد: -هنعمل ايه يا مازن؟ لم يجبه وظلت كل من شيرين وچنى تبكيان بحرقة وهو يمسك هاتفه: -هحاول أكلم عمر يلحقنا، أنا مش عايز ابلغ فارس دلوقتي هو مش ناقص. هاتفه من جديد ولكنه لم يجب للمرة الثانية فأكد ساجد ظنه: -أكيد نايم يا مازن لانه منامش من امبارح. صر مازن على أسنانه وهو يردد: -محدش فينا نام من امبارح. عقب عليه أخيه الأصغر: -بس هو مش من عيلة الفهد ومع ذلك كان موجود من اللحظة الأولى وأكيد روح يرتاح. التفت بحدة يسأله: -طيب والعمل؟ وجد والدته وقد أحضرت ملاءة بيضاء وقامت بوضعها على جسد حنان تغطيه فشعر بألم قاسي ينحر بداخله: -لازم تقول لفارس يا مازن ملهاش حل، من ناحية داده حنان غاليه عليه أوي ومن ناحية اللي عملت كده امه فيمكن يكون له رأي انه مبيلغش مثلا وكده كده داده كبيره وموتها مش هيكون غريب ولا مثير للشبهات. بنفس اللحظة كانت فريدة جالسة بجوار الدرج على الأرضية الرخامية تحيط جسدها بذراعيها وهى بحالة من الذهول والشرود وترديد الكلمات الخارجة من فمهما مرارا وتكرارا: -مكانش قصدي كده، مكانش قصدي كده. يأس مازن من التواصل مع عمر فاتخذ قراره بالنهاية وحرك سبابته على شاشة الهاتف بعد أن قرر اخبار ذلك المسؤول عن تلك العائلة بأكلمها وليكن ما يكون فأجاب الآخر ساخرا: -ايه يا مازن، داده حنان وفريدة هانم قتلوا بعض ولا لسه؟ أجابه وهو ينظر لجسد تلك التي فارقت الحياة بحزن: -للأسف حصل. انتبه فارس لحديثه فتجهم وجهه وهو يترك عمه والطبيب الواقف بجواره ويسأل مازن بحدة: -هو ايه اللي حصل؟ تلبك كثيرا قبل اخباره وهو متأكد أن خبر كهذا كفيل بانهاءه تماسكه الزائف وجعله ينهار فورا، فنهره عقله لتسرعه باخباره دون احتساب ﻷي عواقب قد تصيب اخيه الروحي ورفيق دربه الذي عاني الأمرين ولم يهنأ بحياته حتى الآن ولكن سبق السيف العزل وتسرب القلق لقب ذلك الذي صرخ به: -ما تنطق يا بني آدم. ابتلع ريقه ورد: -البقاء لله يا فارس. استقام فارس بوقفته ونظر لانعكاس صورته بنافذة الممر الذي يقف به وتسائل: -في مين؟ زفر مختنقا وأجابه: -داده حنان. هل تعلم ذلك الألم المصاحب ﻷختراق روحك كيف يبدو؟ بالطبع لن يستطع أحد على تلك الأرض التي نتشاركها جميعا بوصف ذلك الشعور سوى من عاصره سابقا، ولكن إن حاول أحد شرحه فقد يشبهه بألم الإصابة بطلق ناري حطم معه كل الأجهزة الداخلية بجسد المرء، أو ذلك الألم المصاحب للتوقف عن الحياة لحظة اختراق القلب بنصل حاد أو بذلك الألم المصاحب للغرق. وكما يبدو فقد شعر ذلك المارد بتلك الآلام التي هتكت بفؤاده فاختل توازنه واستند على الحائط براحته الحرة ولاحظه عمه الذي لم يبتعد عنه كثيرا وكان لازال بانتظار رده وموافقته على تبرع دعاء لحارسه. هرع مراد يسنده ونظر لعينيه الدامعتين وتسائل: -في ايه يا فارس؟ اعتدل بوقفته ونظر لعمه ورسم الجمود ورد: -داده حنان اتوفت. تركه وهو لا يزال لم يستعب حديثه وتحرك صوب مدخل المشفى ولكن وقبل أن يغادر التفت يضيف: -قصدي اتقتلت. نزل درجات السلم سريعا فلحق به مراد وسحبه من ذراع فالتف وهو يستمع لسؤاله: -أنت بتقول ايه؟ مين اللي قتلها؟ يكون الزفت شادي بعت حد هناك بس مازن لا يمكن يسمح لحد... قاطعه فارس بعد أن سحب ذراعه منه: -فريدة هانم اللي قتلتها. ~~~~~~~ لم يصدق عندما وصل ووجد الشرطة تحاوط المكان وصديقه يجلس على الدرج الخارجي لمنزله وبجواره يجلس مازن يربت عليه فاقترب منهما وابتلع ريقه وهو لا يستعب ما سمعه بتلك المكالمة التي ردها لمازن بعد أن انتهى من تناول طعامه. تكلم بصوت مبحبوح متسائلا: -مين اللي كلم البوليس؟ رفع فارس رأسه ورد بصوت خشن وغاضب: -أنا. جلس بجواره فأصبح فارس يجلس بالمنتصف بين عمر ومازن وحرك الأول رأسه للجانب قليلا لينظر له وهو يحدثه: -كنت استنيت لما آجي عشان نقدر نحل الموضوع. أغلق فارس عينيه ونظر لقدميه ورد: -أنا بلغت البوليس عشان القانون ياخد مجراه وكده كده الڤيلا كلها متراقبه بالكاميرات فسهل يفرغوها ويعرفوا الحوار اللي حصل. مسح مازن على ظهره يواسيه: -ربنا يصبرك. تركهما ووقف بعد أن استدعاه رئيس المباحث للداخل فوجدهم قد أحاطوا المكان بشريط أصفر ورسموا موضع جثة حنان بالطبشور الأبيض ورقموا الأدلة على الأرض بأرقام متتالية؛ فشرد بنظره لتلك البقعة الحمراء من الدماء وتذكر لحظة تلقيه الخبر ولحظة رؤيته لمربيته الحنون على تلك الحالة. التفت على صراخ والدته به موبخة إياه بصوت جهوري صدم الجميع: -بتبلغ عني يا فارس عشان حته خدامه، أنا أمك تعمل فيا كده!؟ لم يعقب عليها والتفت يسأل رئيس المباحث: -ايه الإجراءات الجايه يا حضرة الظابط؟ أجابه بعملية شديدة: -الڤيلا باللي فيها بقوا مسرح جريمة ومش هينفع تفضلوا هنا على الأقل لحد التحقيقات ما تخلص، وطبعا كلكم مطلوبين للتحقيق بس عشان الظروف اللي عندك واحنا عارفينها كويس هنشتغل احنا الأول في تفريغ الكاميرات بتاعة المراقبة للقضيتين قضية خطف المدام وقضية القتل. حرك رأسه يستمع للضابط وهو يضيف: -المسروقات اللي كانت مع مربية ولادك تم ضبطها واتحطت كحرز في القضية وبعد إثباتها في التحقيقات تقدر تستلمها طبعا، بس الڤيلا وﻷنها مسرح جريمة فمش هينفع خالص تفضلوا فيها. سأله مازن والحيرة تعلو وجهه: -لحد امتى يعني؟ حرك الضابط كتفيه وهو يشير لفارس: -ياريت تتفضل تلم أي مقتنيات ممكن تحتاجها لكن من الدور اللي فوق بس وياريت تسلمنا غرفة التحكم في الكاميرات عشان الناس بتوعي تعرف تشتغل. استعاد فارس تركيزه للحظة ورد عليه وهو يتوجه لمكتبه: -حضرتك ليك هاردات الريسيبشن واوضة المربية والجنينه، دول اللي حصل فيهم الحدثتين لكن غير كده ملكش. حاول الضابط أن يحتد لعله يرجعه عن موقفه: -مش حضرتك يا فارس بيه اللي تحدد لنا ايه المهم وايه اللي مش مهم، في معمل جنائي وفريق عمل كله هيشتغل عشان... صاح فارس يقاطعه: -الحدثتين مفيهومش الغاز يعني، والمشاهد اللي هتوضح الحقايق أنا هسلمالكم، لكن أنا مش هكشف أهل بيتي ليكم حتى لو على حساب الأدله. تركه ودلف غرفة مكتبه صافقا الباب خلفه فرفع رئيس المباحث حاجبه متعجبا من طريقته الفجة في التعامل مع رجال الأمن والذين يجدون المهابة في التعامل مع كل المجتمعات التي يتعاملون معها ولكن تسقط هيبتهم هكذا أمام هذا النموذج الذي لم يجدوا له سبيلا للفهم. ❈-❈-❈ جلس على مكتبه وبدأ بتفحص المشاهد التي قد يحتاجها البوليس في تحقيقه فرأي وسمع كل ما حدث من مشادة كلامية بين مربيته الحنون وبين من تفترض أنها والدته فزاده حزنا على حزن وهو يجدها ترد وﻷول مرة تدافع بها عن نفسها أمام فريدة فتسبب حديثها بقتلها بتلك الطريقة التي رآها وحشية وعلم أنها دليل قاطع على القتل العمد والذي ربما يفضي للسجن المؤبد. وضع كل من مشاهد اختطاف صغيرته وزوجته من قِبل شادي ومشاهد قتل والدته لمربيته على جهاز تخزين المعلومات الرقمية وخرج من مكتبه ومد راحته للضابط يعطيه التسجيلات المصوره: -المشاهد كلها بتاعة القضيتين على الفلاشه. أومأ الضابط بعد أن زفر مستسلما وتركه وتوجه لمكان تجمع الخدم حتى يأخذ أقوالهم الواحد تلو الآخر، أما فارس فقد خارت قواه وصعد الدرج رويدا رويدا بعد أن لاحظ تشوش وضبابية نظره ولاحظه مازن الذي تبعه وصعد خلفه يسنده ووقف يساعده بجمع متعلقاته الشخصية وآثر فارس على جمع متعلقات زوجته لخصوصية الأمر فسأله مازن بحيرة: -هدوم الولاد هنجيبها ازاي والأوضه واقف عليها اتنين عساكر؟ رد بصوت مختنق بالبكاء: -مش مهم هشتريلهم جديد. غص حلقه وهو يتحدث ولم يستطع كتم عبراته أكثر من ذلك فانهار باكيا وجلس على حافة الفراش وظل يبكي ومازن يجلس بجواره صامتا وكأنه يدعه حتى يخرج ما بداخله وقد حدث فبعد مدة من الوقت استعاد فارس رباطة جأشه ووقف بعد أن نجح بجمع المتعلقات التي قد تحتاجها زوجته ولم يفكر حتى بتفحص حقيبته التي أعدها مازن ونزل برفقة الأخير ليجد ذلك المشهد الذي زعزعه وكل من چنى وميار وساهر يبكون ويحتضنون والدتهم المقيدة بأصفاد حديدية ويقودها الضابط خارج الڤيلا بعد أن جمعوا كافة المعلمومات التي يحتاجونها لحل تلك القضية. صرخت فريدة وهي تقاد للخارج وابنتيها يحتنضاها بقوة: -ارتحت كده يا فارس لما سجنت مدحت وسجنتني أنا كمان؟ سجنت أمك وابوك يا فارس! هتروح من ربنا فين وأنت عاق بأمك وابوك. لم يعقب على حديثها بل تحرك ليسحب اخوته بعيدا عنها ولكن حديثها قد أثار دهشة وفضول الجميع عندما ركزت بحديثها عن والده وكيف له أن يسجن من مات؟ أم هل كانت تقصد مدحت بحديثها هذا؟ أيعقل أن يكون حقيقة؟ كان هذا ما دار بخلد الجميع وأولهم دينا التي ابتلعت ريقها بوجل خصوصا عندما لم يعلق عليها فارس لا بالنفي ولا بالإيجاب، ولكن هل الوقت الآن يسمح لفتح حديث عن هذا الأمر؟ بالطبع لا؛ فآثرت الصمت وتحين الفرصة المناسبة بالوقت المناسب. تجمع من تبقى من العائلة أمامه فبلل شفتيه وتكلم يخبرهم ما يريدهم أن يفعلوه والجميع يعلم أنه بتلك الحالة لا يريد لا نقاش ولا اعتراض: -خدهم كلهم يا مازن عند عمي مراد ومحدش يروح هنا ولا هنا لحد ما اظبط أموري وأعرف هعمل ايه؟ هزة بسيطة من رأس مازن كانت بمثابه تأكيد ﻷوامره فانحنى يحمل صغيره من يد زوجة عمه يقبله فوجده يرتعش بشكل أثار خوفه بالرغم من نومه فالتفت يسأل دينا والخوف قد تملك منه: -الولد ماله بريتعش كده ليه؟ هو شاف اللي حصل؟ توترت وابتلعت ريقها فرد ساجد عنها: -هو مبطلش عياط من امبارح يا فارس وداده الله يرحمها معرفتش تسكته ولا حد مننا عرف، ونام بعد لما... صمت ففهم فارس أنه قد مر بما يصعب على طفل مثله تحمله فصر على أسنانه وهو يتوعد: -كل اللي أذى عيلتي هياخد جزاؤه ومش هكتفي بعقاب القانون. *** بعد مرور يومين متعجبا من حاله، اعتدل بجلسته بعد أن غفى رغما عنه على ذلك المقعد الغير مريح والملحق بغرفة زوجته؛ فأخرج تنهيدة متعبة وهل يمكن أن يشعر بهكذا تعب بحياته أو أن يمر بما مر به حتى في أحلامه وها هو قد عاصر ما لا يمكن ﻷي بشر كان أن يصدقه. دفن عزيزة قلبه وغاليته التي قضى معها طفولته وشرب من عذب أمومتها التي لم يجدها ممن حملته بداخلها تسعة أشهر وللآن حقا لا يجد سببا واحدا مقنعا لقلبه المعذب لذلك النبذ والكره الذي تكنه له والدته الذي نُشئ بداخلها. ترك المقعد وتحرك كعادته ليتفقد قطعة روحه القابعة أمامه دون حراك ببشرتها الباردة وتلك الأسلاك التي تدخل أنفها وفمها وذلك الطنين المزعج والشيئ الوحيد الذي يدل على أنها على قيد الحياة. قبل جبينها وخرج لتفقد صغيريه فصغيره قد دخل هو الآخر بحالة صدمة وارتعاش مع انخفاض درجة حرارته بشكل أثار قلقه وها هو يقبع بالمشفى بجوار أخته الصغرى كل منهما يمر بحال مغايرة للآخر ولكن يجتمعا على شيئ واحد أنهما ليسا بخير. نظر لهما من خلف الزجاج الذي يظهرهما داخل تلك الحجرة المعقمة لهما خصيصاً ودمعت عينيه وقد سمح لعبراته أن تنزل غير مهتم لمن يراها من العاملين، فهل يوجد من هو أغلى من نطفة الإنسان ليشعر بتلك الغصة المؤلمة من أجلهم؟ وجد يد تربت على ظهره وما كانت إلا لعمه الذي ابتسم له بسمة مقتضبة وهو يكلمه بهدوء: -كله هيعدي يا بني، وحد الله. أومأ وهو يمسح عبراته بظهر يده: -ونعم بالله. سحبه ليجلس بجواره وتكلم معه بنفس النبرة الهادئة خوفا من إزعاجه وإثارة غضبه مجددا فقد عانى الجميع وحتى هو نفسه من نوبة غضبة الجحيمية التي طالت الجميع باليومين المنصرمين، ولكنه جاء لتوه من مراسم دفن مربيته ولعله هدأ قليلا فقد كان ثائرا حزينا على تأخير دفنها بسبب إجراءات الشرطة التي وجدها لا داع لها: -مازن حجز القاعة عشان العزا بالليل وكله تمام. هز رأسه موافقا على حديثه فربت الأول على كتفه: -طيب ايه رأيك تروح تاخد شاور وترتاح شويه لحد بالليل! رفض وهو يعض داخل فمه: -مش هينفع اسيب عيلتي لوحدها، كفايه هسيبهم بالليل. حاول إقناعه بالعقل والمنطق ربما، ولكنه يعلم أن ما يمر به ابن أخيه لا يمط لا للعقل ولا للمنطق بصلة: -ما أنت عشان تاخد بالك منهم لازم ترتاح، أنت مش شايف شكلك عامل ازاي؟ صمت قليلا وأضاف: -من امتى فارس الفهد بيقع في النوم على كرسي في مستشفى ولا تركيزه زيرو بالشكل ده؟ ده كله من قلة الراحه فلازم ترتاح عشان تقدر تكمل ومن هنا لبليل مفيش حاجه هتتغير. نظر له وابتسم بمرار علق بحلقه مرددا: -مفيش حاجه هتتغير، لا مراتي هتفوق ولا ولادي هيرجعوا زي الأول مش كده؟ مفيش حاجه هتتغير عشان لو كان في أمل كان زمان ياسمين فاقت وزمان وولادي بيلعبوا حواليا. دمعت عينيه وشاطره عمه العبرات رغما عنه ولكنه تماسك قليلا وداعما له: -أنا هنا مش هحضر العزا وهفضل جنبهم، والدكاتره محدش فيهم روح بيته من يومها ومش هسمح لحد يروح إلا ما عيلتك تبقى أحسن من الأول يا فارس. احتضنه فارتمى فارس متمسكا به بقوه وأطلق العنان لحزنه وبكائه أن يخرج طواعية منه دون قيد أو احتساب لهيبته ومكانته وبكي، نعم بكى كما بكى والده وهو صغير على نفس الحالة بحضن عمه الذي احتضنه قديما أيضا ولم يجد أحدا غيره يواسيه. واساه كما فعل دائما منذ أن كان بالثامنة من عمره ومسح على ظهره وتركه يخرج ما بداخله حتى ارتاح قليلا واعتدل بجلسته فتشجع مراد قليلا لمفاتحته بأمر من مائة أمر يود الحديث عنه ولكن ينتظر الوقت المناسب لهذا: -فارس، أهل ياسمين قلقانيين عليها أوي وعايزين يزوروها. احتدت نظراته له ولم يرد ولكنه أشاح وجهه عنه فكان رده واضح وضوح الشمس، ولكن لم يمنع الأول من التحدث: -خليهم يزوروها وبالمره يفضلوا معاها لحد ما تروح ترتاح وتخلص العزا وتيجي أنت تبات معاها زي كل يوم. رد بكلمتين فقط: -أنا أهلها. لم يضف المزيد وتركه عائدا لغرفة زوجته وانحنى يقبل أعلى رأسها وحدثها وكأنها تستمع له: -سلطانه. مسح براحته على شعرها وأكمل: -هسيبك شويه لوحدك انهارده معلش، ومش هتأخر. قبلها من وجنتها الشاحبة وهو يؤكد لها: -وعد، ساعه واحده هغير هدومي عشان اجهز للعزا بتاع بالليل وهرجعلك. استمع لصوت مازن الذي دلف لتوه: -لأ يا فارس انت هتروح البيت عند بابا تاكل وتستحمى وتنام لحد بالليل وبعد ما تحضر العزا ابقى ارجع لها. حاول الإعتراض والرفض ولكن أصر مازن عليه: -زي ما مراتك محتجاك فأخواتك كمان حالهم زي الزفت وماما مش ملاحقه عليهم ولا حد قادر يسد مكانك يا فارس. اقترب منه واحتضنه يربت على ظهره بقوة: -حملك تقيل يا حبيبي. ابتعد عنه وهو لا زال ممسكا بكتفيه: -بس محدش هيقدر ولا يعرف يشيله مكانك. ❈-❈-❈ دلف والدها متعبا ومنهكا من الذهاب هنا وهناك رفقة أخيه الذي لم يستطع أن يتركه وحده بالرغم مما حدث فوقفت أمامه وﻷول مرة تحدثه بحدة غير مراعية لصفة الأبوة التي يحملها: -روحت وقفت معاه يا بابا؟ الله يسامحك. تجهم وجهه وانعقد جبينه وسألها: -كنتي عيزاني اسيب أخويا الكبير لوحده في المصايب دي يعني؟ صوت صرير أسنانها جعله يحتد هو الآخر عليها ﻷول مرة: -جرى ايه يا نرمين؟ أنتي نسيتي نفسك وأنتي بتكلمي أبوكي! بكت وهي تحرك رأسها رافضة: -لأ يا بابا منستش، حضرتك اللي نسيت عملة شادي وحالة ياسمين اللي لحد دلوقتي لسه مفاقتش ولا عارفين نطمن عليها بسبب عمايل شادي اللي حضرتك رايح تدافع عنه. زفر باخنتاق وهو يوضح: -يا بنتي أنا لا دافعت ولا حاجه، بس شادي متوجه له تهم كتير أوي هتوديه في داهيه وكل اللي عملته أني وقفت جنب أخويا عشان ميبقاش لوحده، لكن ولا جيش محامين هيقدر يخرجه من القضايا اللي هو فيها. خرج السيد على صوتهما العالي فضرب بعصاه الأرض ليعم الصمت ونظرا له وهو يصيح بهما: -كفايه، أنا قاعد جوه وسامع كلامكم اللي يحرق الدم. سألته نرمين باكية: -أنا قولت ايه غلط يا جدي؟ تحرك ليجلس بعد أن خارت قواه: -ربنا اختبرني زمان في ابني، ودلوقتي بيختبرني في احفادي وولادي ومش عايز منكم غير تقدير للي أنا فيه ومش قادر ابوح بيه لحد. رنين هاتفها ما جعلها تتركهما وتتحرك داخل غرفتها لتجيب اتصاله بتلهف: -دكتور مراد! طمني على ياسمين والولاد. رد متنهدا بعمق: -حالتهم زي ما هي يا بنتي، أنا بكلمك عشان وعدي ليكي. لمعت عينيها وقد وجدت بصيص أمل أن يوافق فارس على طلبها لزيارة توأم روحها ولكن جاءت الرياح بما لا تشتهي السفن عندما أضاف: -فارس رفض مع الأسف يا بنتي، حقك عليا. بكت وانتحبت فسمعتها هدى التي دلفت غرفتها تربت عليها بحنان: -ربنا يقومها بالسلامه يارب. شعر مراد بالضيق فحاول أن يساعدها وهو يخبرها: -أنا بس مش عايز فارس يشيل منكم أكتر ما هو شايل، هو راح البيت عندي يرتاح لحد العزا بتاع الحاجه حنان الله يرحمها بالليل. زاد بكاءها فهي تحبها هي الأخرى بالرغم من عدم تقاربهما ولكنها كانت حنون كأسمها: -حتى الدفن والعزا منعنا نحضره يا دكتور، قولي أعمل ايه؟ زفر زفرة قويه واتخذ قراره: -بصي، تعالي اطمني عليها قبل ما العزا يخلص وربنا يستر. همت بالوقوف: -حالا. رفض وهو يفكر قليلا: -ﻷ مش دلوقتي، احسن يعدي ع المستشفى قبل ما يروح العزا، الأكيد أنه هيحضر العزا من أوله آخره وساعتها تقدري تزوري ياسمين واحنا متطمنين انه مش هيطب علينا. شكرته ممتنة: -بجد شكرا يا دكتور، مش عارفه من غيرك كنت هعمل ايه. رفض اطرائها مبتسما: -أنا معملتش حاجه أنتي زي بنتي، ربنا يشفيها هي وولادها يارب. ~~~ خرج من المرحاض بعد أن حاول يزيل عن جسده الإرهاق البادي عليه وجلس على حافة الفراش مطرقا رأسه يحاول تصفية ذهنه ولو قليلا حتى يستريح من عناء الأيام الماضية وما مر بها. استمع لصوت طرقات على بابه فأذن لها فابتسمت وجلست بجواره تحتضنه: -فارس. مسح على ظهرها ولم يتحدث ببنت شفه فابتلعت ريقها وحاولت أن لا تثير حفيظته ولكنها عزمت على التحدث معه اليوم قبل الغد: -ممكن تسمعني لحظه. رد وهو يبتعد عن حضنها ناظرا لها بترقب: -خير يا چنى! سعلت لتزيل حشرجة صوتها: -أنا عارفه انك هتتنرفز عليا بس مينفعش اسيب مامي يتحقق معاها من غير وجود محامي وأنت رفضت توكل لها محامي يا فارس و... نظراته لها جعلتها تبتلع باقي حديثها بداخلها وأطرقت رأسها رهبة من شكله الذي أخافها وأدخل الرهبة لقلبها وبالرغم من اعتيادها على أسلوبه الجاف والشرس وتوبيخه لها في بعض الأحيان عندما تخطئ وعقابه القاسي الذي مرت به من قبل من صفع وحرمان ظنت أنه أقصي أنواع العقاب، إلا أن تلك المرة مختلفة فنظرته المخيفة تلك تنذر بطوفان قد يحرقها ويحرق أي من يحاول التدخل بقراراته التي ألقاها على الجميع بعدم التدخل بسير القضية أو محاولة مد يد المساعدة لقاتلة مربيته. هكذا أسماها فلم يعد يطلق عليها اسمها حتى كما اعتاد أن يفعل قديما بعد أن جردها من صفة الأمومة ولكنه أصبح يطلق عليها القاتلة كلما جاءت سيرتها بأي حديث. بكت وتركته دالفة الشرفة التي تطل على الحديقة وبها مقاعد مريحة فجلست على إحداها فتبعها للخارج وجلس بجوارها وتحدث أخيرا: -عارف انها أمك ومهما عملت مش هتقدري تكرهيها، بس اللي عايز يشتري عداوتي يتفضل أنا مش همنع حد. تركت مقعدها وجلست أمامه تستند على فخذيه براحتيها وكأنها تتوسله بنظراتها: -أنا عارفه إن اللي حصل كبير أوي وإنها... قاطعها وقد فقد سيطرته على عبراته فبكى بقهر: -الست دي اللي عمرها ما خدتني في حضنها ولا حسستني أنها أمي قتلت الانسانه الوحيدة اللي كانت بتعوضني حنانها اللي اختارت تحرمني منه بارادتها، وانتي جايه عيزاني أوكل لها محامي يدافع عنها؟ مسحت عبراته بأناملها الرقيقة وهمست من بين بكائها: -كده كده مامي هتاخد حكم وده كلنا عارفينه بس على الأقل يكون في محامي يخفف عليها الحكم شويه، وعلى فكره أنا بكلمك بالنيابه عن ميار وساهر بس هما خايفين يكلموك وأنا قولت لهم أنا اللي هفتح معاك الموضوع. قوس فمه يرمقها بنظرات غاضبة: -آه، أنتي الفهد اللي فيهم يعني وبتكلميني بقلب جامد. تركت موضعها وعادت تجلس على المقعد المجاور تنفي حديثة بحركة رأسها: -ولا حد يقدر يقف قصادك ولا يعاديك يا فارس، كل اللي طالبينه منك أنك تسمحلنا نوكل لها محامي مش اكتر. رد بجمود وتعابير وجهه لا تبشر بخير: -أنا قولت اللي عندي، عايزين توكلوا لها محامي اتفضلوا بس ساعتها هتشتروا عداوتي من أوسع الأبواب والاختيار ليكم. غادر جلستها ملتفا من الحديقة المرافقة لغرفته حتى الحديقة الكبرى التي تتقدم منزل عمه فوجد حارسه يقف برفقة زملائه فاقترب منه وسأله: -حد منكم كلم زين انهاردة؟ أومأ موضحا: -المفروض هيدخل عمليات كمان ساعتين. هز رأسه عدة مرات ولكن اضطر حارسه لاخباره بما وصل لمسامعه حتى لا يطاله غضبه الأكيد: -والد الآنسه دعاء راح الڤيلا وطبعا العسكري اللي ع الباب منعه يدخل بس هو فضل يهلل انه عايز بنته وهدد انه مش هيسكت وعمل غاغه يا باشا لحد ما العساكر والحرس اللي هناك خرجوه بره الكومباوند وأنا بلغت البوابه تمنعه من الدخول مرة تانيه. ربت فارس بقوة ساعده على كتفه مستحسنا تصرفه: -عفارم عليك يا أمجد، ولو اي حاجه حصلت بلغني بيها على طول. ابتلع ريقه وهو يتردد بأخباره فأشار له فارس بيده بمعنى هات ما عندك: -الاستاذ أحمد مكانش لوحده يا باشا، كان معاه الأستاذ محمود والد شيرين هانم. نهج فارس بعصبية واصكاك أسنانه أصبح عاليا وتكلم وهو مطبقا على أسنانه: -الزفته اللي مسافره مع زين ترجع مصر بمجرد ما تخلص مهمتها، مفهوم؟ انحنى له باحترام فأمره بحركة من رأسه: -استعجل العيله عشان العزا. لم ينتظر كثيرا وتوجه لسيارته ليقودها بنفسه متوجها لمكان إقامة سرادق العزاء وجلس بالمقدمة لاستقبال الحضور وحوله رجال عائلته وحرسه الخاص، وكان العزاء مزدحما بالصحافة ورجال الأعمال والشخصيات العامة الذين جاءوا لتعزيته ولوضع أيديهم على سبق صحفي أو منفعة قد يخرجوا منها بعد تأديتهم لواجب العزاء. ❈-❈-❈ دلفوا تباعا بلهفة فاستقبلهم مراد وهو متخوفا من ردة فعل ابن اخيه إن ما علم أنه خالف تعليماته وأوامره الصارمة فنظر لنرمين مستنكرا: -أنا قولتلك أنتي بس يا بنتي بدل ما فارس يوصل له انكم جيتوا. أضاف بتأكيد وهو ممتعضا: -وهيوصله. جمعت راحتيها معا تتوسله: -معلش يا دكتور والله مش هنتأخر جوه معاها، جدي وبابا بس يطنموا عليها وهيمشوا على طول. نظر للبقية المتملثين بوالدتها واخيها وزوجته وعمتها وابنائها فحك رأسه وهو يخرج تنهيدة مستسلمة: -الأمر لله، ادخلو اتنين اتنين ومتطولوش كده كده هي لسه مفاقتش. بالفعل دخلت عائلتها تباعا حتى لم يتبق سوى نرمين وجدها دخلوا بالأخير وفور أن وقعت عين جدها على شحوب وجهها بكي وخارت قواه ولم تستطع عصاه أن تتحمل ثقل جسده وضعف قدميه فاختل توازنه ولحقت به نرمين تسنده: -جدو. لهفتها عليه جعلته يتدارك نفسه ووقف منتصبا يجبر نفسه على تلك الوضعية التي آلمته كثيرا فقط حتى لا تقلق حفيدته عليه ويكهل عاتقها بألم مضاعف لما تشعر به الآن. مسح على وجه ياسمين بيده المجعدة وتحدث بصوته الحزين: -حبيبتي يا بنتي، ربنا يشفيكي يارب. اقتربت نرمين منها وقبلتها من وجنتها ولم تتمالك نفسها من منظرها ونحافتها التي زادت عن الحد واسمرار ما تحت جفنيها فتمتمت باكية: -كده يا سو؟ أهون عليكي تعملي فيا كده؟ فوقي عشان خاطري. وجدت جدها يتجه للجلوس على أحد المقاعد فنبهته: -مش هينفع نفضل هنا يا جدو عشان فارس ممكن يرجع في اي وقت. أومأ لها هامسا: -هصلي العشا وادعيلها يا بنتي قبل ما امشي. وافقته فرفع راحتيه مواجها القِبلة هاتفا: -الله أكبر. استندت بجوار توأمها الروحي تمسح وجهها بالمحارم المبللة وتمسح على شعرها المشعث وفعلت بالمثل لراحتها فشعرت بتحرك أناملها ببطئ فانتبهت لها ونظرت لعينيها فلم تجد أي حركة تذكر فظنت أنها تتخيل وعادت تمسح لها يدها الأخرى فضغطت ياسمين على راحتها التي تمسك بها فصرخت فورا بعد أن شعرت بها: -ياسمين. انتهى الجد من صلاته ووقف يستند على عصاه متحركا صوبها يسألها باهتمام وقلق: -في ايه يا نرمين؟ أجابته وهي فرحة: -حركت ايديها يا جدو، ياسمين اتحركت والله. هرعت للخارج لتستدع مراد الذي ههرع بسرعة وتبعه عدد لا بأس به من الأطباء وظلت نرمين تقف بجوارها وهم يفحصوها فرمشت ياسمين عدة مرات عندما فتح مراد عينها وسلط ضوء كشافه على بؤبؤتها فأخبر الطاقم الطبي الواقف معه: -بسرعة شيلو الخراطيم دي وقيسولي مؤشراتها. ~~~ ذهب الجميع وظل هو جالسا مكانه حتى اقترب منه يزن وجلس بجواره مربتا على كتفه: -وحد الله. رد بعد تنهيدة عميقة: -لا إله إلا الله. نظر له من بين حدقيته المحتقنتين فابتسم له يزن وهو يؤكد له: -كل حاجه بتتولد صغيره وتكبر ما عدا الحزن بيتولد كبير وبيصغر مع الوقت، ربنا يصبرك. بلل شفتيه وانحنى يرتشف ما تبقى من قهوته المرة فاقترب مازن بعد أن تلقى تلك المكالمة من والده ووقف أمامه مبتسما فتعجب فارس من منظره وسأله مندهشا من تعابيره فأجابه الآخر دون مماطلة: -ياسمين فاقت. نهض مسرعا وركض صوب سيارته ولكنه وجدها تصطف خلف عدد من السيارات التي ما زالت بموقع العزاء وحاوطه الكثير من رجال الصحافة يسألوه العديد من الأسئلة عن ملابسات الأمر فتحرك يزن سريعا ناحيته وسحبه بعيدا عنهم وأدخله سيارته وركب هو خلف المقود وقاد باتجاه المشفى وهو يبتسم له: -حمد الله على سلامتها يا فارس. كانا أول الواصلين للمشفى فتقابل مع عائلتها وهم يغادرون فتجهم وجهه ونظر لهم بحنق وكره وقبل أن يتفوه بأي كلمه أمسكه يزن من ذراعه هامسا له: -مش وقته، اطمن على مراتك الأول. ابتلع غضبه بداخله وأكمل صعود درجات المشفى مسرعا نحو غرفتها فتقابل مع جدها وابنة عمها عند مدخل الغرفة والجد سعيد وبسمته تتسع لأذنيه وهو يفتح له ذراعيه مطالبا بعناقه: -الحمد لله يا بني ياسمين فاقت. تجمد جسده عندما اقترب منه الجد وعانقه هكذا بدون مقدمات فابعده ببطئ دون أن دفعه ودلف للداخل فتحركت نرمين تسند جدها ليستريح بالمقاعد المتراصة أمام غرفتها وجلست بجواره وهي تعاتبه: -ليه اتكلمت مع فارس يا جدو؟ افرض كان اتهور عليك وزقك زي ما عمل يوم قراية فاتحة دعاء وزين؟ ربت على فخذها: -فارس كويس يا بنتي ومحترم وبيحبني واللي حصل منه وقتها كان لحظة غضب معاه فيها كل الحق ومحدش يقدر يغلطه. دلف مازن بنفس اللحظة برفقة كل من ساجد وشيرين التي هرعت تحتضن توأمتها وتسألها بلهفة: -بجد ياسمين فاقت؟ أومأت لها مبتسمة وعادت للجلوس بجوار جدها تنتظره أن يتمالك نفسه حتى يغادرا فقد خارت قواه ولم يعد قادرا على الوقوف على قدميه. اقترب يزن وانحنى يهمس لها: -نرمين ممكن لحظه؟ استأذنت من جدها وتحركت معه بعيدا عنهم قليلا ولكنهما ظلا على مرأى من الجميع ولكن يزن لم يهتم وسألها: -عامله ايه انهاردة؟ أجابته وهي تصر على أسنانها: -الحمد لله، ولو حضرتك بتسأل عن غيابي عن الشغل اليومين اللي فاتوا فأكيد حضرتك عارف السبب واللي احنا فيه بس إن شاء الله هرجع من بكره عشان أقدم استقالتي وهفضل بس المهلة اللي في العقد تكون حضرتك جبت حد مكاني. ألقت بكلماتها على دفعة واحدة لم تعطه الفرصة لمقاطعتها ولا للرد عليها فأومأ وهو يتحدث بصوت حزين: -أنا لا كنت هسأل عن الشغل ولا هاممني الغياب. حدقته بنظرة جامدة وسألته: -أومأل ايه المطلوب بالظبط؟ زفر باستسلام: -تمام يا نرمين أنا عرفت اني غلطت لما صارحتك بمشاعري بس الشغل ملوش دعوه. ضحكت ساخرة: -لا والله، اوعى تكن عايزني أفضل في الشركة؟ أومأ وقد حاول كتم غيظه من طريقتها وأسلوبها الحاد: -أيوه وانسي أي كلام قولته، والمعامله بينا هتبقى رسمي من انهاردة. رفضت وهي تصر على أسنانها: -ﻷ، أنا مش هبله عشان أصدق الكلام ده ومبحبش بصراحه نظام أنا بعرف افصل بين الشغل وبين حياتي الشخصية ﻷن مبيحصلش ف... قاطعها محتدا: -فكرتك عن الاستقالة اننا نبطل نشوف بعض مش كده؟ أومأت فسخر منها: -لو بطلنا نشوف بعض في الشغل تقدري تقوليلي هنبطل نشوف بعض في الإطار العائلي إزاي؟ قوست فمها ونطقت بأسلوب حاد: -عادي هتجنبك زي ما بعمل مع مازن بالظبط. رغما عنه دارت رأسه تجاه مازن فوجده مركزا بصره نحوهما وكأنه يراقبهما فشعر يزن بنيران تحرقه من غيرته عليها وتأكده أن الأمر لم ينته بداخل مازن، فكما حذره سابقا من التقرب منها بحجج واهية ولكنه ها هو أمامه يكاد يقترب منهما ليسترق السمع أو حتى ليجبرهما عن الابتعاد عن بعضهما البعض. انتبه لحدتها عندما هتفت: -وأصلا يا عالم فارس ناوي يتعامل معانا كجزء من العيلة ولا خلاص زي ما قال بقينا بره حساباته. أدار وجهه ناحيتها ورد على آخر حديثها: -فارس هيعمل اللي يرضي ياسمين، متقلقيش من النقطه دي. أطرق رأسه وتمتم بصوت مسموع: -لو كنت أعرف إنك هترفضيني بالشكل الصعب ده وإن لسه في بقايا من مازن متعلقه جواكي مكنتش سبت مشاعري تغلبني بالشكل ده بس... قاطعته غاضبة: -مازن! انت سامع نفسك؟ بترمي سبب رفضي لكلامك على مازن وأصلا أنا موضوعه انتهى من زمان، من زمان أوي يا يزن. ابتسم رغما عنه بعد أن نطقت اسمه بعفوية وانتبهت هي لذلة لسانها فصححت حديثها: -أقصد يزن بيه. سحب شهقيها محملا بالكثير من المشاعر وزفره بتمهل وهو يقول: -أنا مش طالب أكتر من انك تعرفي مشاعري ولا طلبت منك ارتباط ولا رد وكان ممكن أفضل مخبيها بس حسيت اني بكدب عليكي وعلى نفسي، وطالما انتي مش قبلاها فخلاص اعتبريني مقولتش حاجه بس بلاش تسيبي الشغل أنا لسه مش مستعد مشوفيكش كل يوم زي ما اتعودت. نظر بعمق عينيها وهو يضيف: -سبيني واحده واحده يا نرمين لحد ما اتعود على بعدك. تزامن حديثه مرور دينا من جوراهما فاستمعت ﻷخر كلمات خرجت من فم يزن فابتسمت بداخلها وهي تقول لنفسها: -دعيت عليكي إن بالك ميرتحش بعد ما سبتي ابني وهو تعبان وأهو راجل واتنين وتلاته وعمرك ما هترتاحي ابدا يا نرمين عشان دعوة الأم لا ترد. ❈-❈-❈ ظل يقبلها من وجنتها وفمها بحضور عمه وجمع الأطباء وهو يهتف بلهفة: -حمدالله ع السلامه يا روحي، الحمد لله يارب. اقترب منه مراد وهمس له بحذر: -بالراحه عليها يا فارس، لسه مش عارفه تاخد نفسها بشكل منتظم. أومأ له وقبل راحتها بدلا من ثغرها وجلس بجوارها فهتف مراد: -اتفضلوا يا دكاتره وسيبوهم شويه. عاد يحذره مجددا: -متنساش، واحده واحده عليها. فور خروج الجميع ابتسم وانحنى يقبلها من تجويف عنقها وراحتها وكل ما طاله من وجهها: -حبيبتي، اوعى تعملي فيا كده تاني. خللت أناملها بخاصته وابتسمت تتحدث بصوت مبحوح: -الحمد لله عدت على خير. اعتدلت بجلستها فساعدها واضعا المزيد من الوسائد خلفها وسألته بقلق: -ولادي عاملين ايه؟ ابتسم وقبلها من فمها وهو يرد: -زي الفل الحمد لله. نفت متأثرة وهي تسأله: -هم فين؟ ليه كل ما اسأل عليهم تتهربوا؟ هاتهوملي هنا يا فارس. وافقها ومسح على رأسها: -حاضر، ارتاحي و10 دقايق وهيكونوا عندك بس ارتاحي شويه. نظرت لبدلته السوداء وقميصه الأسود وهي تعلم أنه لا يرتدي مثل تلك الملابس إلا وقت العزاء فسألته والفضول والذعر قد تملك منها: -أنت كنت في عزا؟ مين اللي مات؟ سعل قليلا ليبحث عن كذبة ورد: -ده عزا واحد من رجال الأعمال روحت حضرته بسرعه ورجعت. لم تبتاع حديثه وفسرت له: -شكلك وعينك بتقول غير كده، بتقول حد مهم أوي في العيلة جراله حاجه. دمعت عينيه رغما عنه فتوسلته باكية: -مين يا فارس؟ قلبي هيقف من الخوف، عشان خاطري قولي الحقيقة. أجابها بعد أن مسح عبراته بظهر يده: -داده حنان يا ياسمين.