الفصل الثامن من رواية جراح الروح للكاتبة روز امين

كانت سميحة تجلس بصحبة شقيقتها غادة التي أتت لإصطحاب سميحه للذهاب معاً لزيارة شقيقتهما الثالثة مني التي أتت أمس من دبي هي وزوجها وأبنائها ليستقروا بوطنهم الحبيب

تحدثت غادة بإستعجال٠٠٠٠ما تقومي يا أبله تغيري هدومك ،،كدة هنتأخر علي مٌني ،،وبصراحه بقا هي وحشاني جداً وهتجنن وأشوفها !!

إبتسمت سميحه وأجابتها بوجهٍ بشوش ٠٠٠٠والله وحشتني أنا كمان ياغادة،،بس أصبري شويه نشرب القهوة وهقوم بعدها أغير هدومي علي طول ،،وبعدين يكونوا حتي صحيوا من النوم،، ماتنسيش إنهم وصلوا من المطار متأخر وأكيد كانوا راجعين تعبانين وناموا ،،

وأكملت بتفسير٠٠٠٠٠ده هادي وحازم مجوش غير بعد أذان الفجر يا حبايبي،،علي ما وصلوهم وطلعوا معاهم الشنط لفوق !!

تحدثت غادة ٠٠٠٠٠أه مأنا كلمتها علي فون حازم لما وصلوا،،كانت مبسوطه جداً علشان نظفنالها الشقه !!

وأكملت بتساؤل٠٠٠٠عرفتي إن لٌبني فركشت خطوبتها ؟؟

تنهدت سميحة وأردفت بأسي٠٠٠٠٠أه عرفت،،،مٌني قالت لي من كام يوم لما كانت بتبلغني بميعاد وصولهم

وأكملت بضيق٠٠٠٠٠أنا مش فاهمه البنت دي عاوزة أيه،،دي تاني خطوبة تفركشها ،،الأول الشاب الإماراتي اللي أتخطبت له من تلات سنين أول ما سافرت مع مامتها علشان يعيشوا مع كمال في دبي،،،وده كدة تاني واحد،،

مع إن مٌني كانت بتشكر فيه جداً وأهو علي الأقل كان مصري وهيقدر يفهم تفكيرها كويس ،،لكن نقول أيه في دماغها اللي زي الحجر

ردت عليها غادة بحرصٍ وترقب٠٠٠٠٠أقول لك ولا تزعليش يا أبله،،،لٌبني لسه بتحب هشام ومش عارفه تنساه ،،وهو ده سبب توهت مشاعرها

أجابتها بوجةٍ مكشعر يكسوهٌ ملامح الضيق والأسي٠٠٠٠وكان لازمته أيه من الأول يا غادة،،مش هي إللي سابته وسافرت دبي ؟؟

وأكملت بتذكر٠٠٠٠٠٠مع أنه وقتها خيرها ما بينه وبين سفرها ،،وهي أختارت سفرها وقالت له إحنا أصلاً زي الأخوات ومننفعش لبعض،،

وأكملت بحده ٠٠٠٠جايه تظهر دالوقتِ بعد ما أبني لقي بنت الحلال إللي تستاهله بجد وحبها وبقت هي كل حياته ؟؟

جايه تخرب علي أبني حياته يا غادة ؟؟

تنهدت غادة وأردفت بحزن٠٠٠٠٠إهدي يا أبله وريحي نفسك،،هي راجعه وعارفه كل الكلام دة كويس ،،هي بنفسها قالت لي إن هشام مكلمهاش من وقت ما سافرت من أربع سنين ولا مرة،،وقالت لي إنها عارفه إنه بيحب خطيبته ومعندهاش أي أمل إنه ممكن حتي يكون لسه فاكر أي حاجه من إللي كانت بينهم زمان !!!