الفصل الثاني عشر من رواية ست الحسن الجزء الثاني للكاتبة امل نصر

خليها مفاجأة بقى ياعين ابوكى .. وانتى ياولية ادخلى اعمليلنا اى حاجة من التلاجة اللى جوه دى .

نجلاء وعيونها وسع وشها :

وكمان التلاجة فيها اكل ؟ دا انت كنت عامل حسابك بقى .. والله ومفاجأتك كترت اوى يا” سامح ” .

قالتها بصوت واطى وهى بتتحرك بخطواتها ناحية المطبخ وتطيع اومره

…………………………

وبداخل الغرفة الموجوده فيها ” بدور ” بالوحده الصحية ” نيره ” فضلت جمبها تسليها وتهزر معاها بعد مااطمنت عليها…

ايه يا” بدور ” يابت عمى معرفتيش نوع الجنين ايه ؟

بدور وهى بتضحك بضعف :

يامجنونة هاعرف ازاى بس دا لسه يدوبك شهرين؟

نعمات بمناغشة :

سيبيها ” بدور ” دى حربى لحس عجلها وجننها اكتر ماهى مجنونة .

نيرة بتمثيل :

انا مجنونة يامرة عمى الله يسامحك .. بس اقولك بصراحة هو ” حربى ” يجنن بلد .. دا مرة تلاجيه هادى وزى العسل ومرة يبقى زى المجنون ويتخانق معايا على اتفه الأسباب.. والله ماانا عارف دا وارثه من مين فيهم .. عمى” محسن “ولا ” هدية ” مرته !

بدور من كتر الضحك بقت بتمسك بطنها و” نعمات كمان ماكنتش قادرة توقف وهى بتكلمها :

الله يخرب مطنك يا” نيره “.. والله لو سمعتك “هدية” لتجلب الدنيا .. دى عجلها صغير اكتر من ولدها .

نيره وهى بتنفخ فى نفسها :

ولا تقدر تعملى حاجة .. دا انا لو سلطت عليها امى بس لتوريها النجوم فى عز الضهر .. هى معارفاش امى ياك!

نعمات بغمزه :

وانتى مالك بامك ولا امه يابت .. انتى اهم حاجة عندك الواض.. ضمناه فى يدك ولا

نيره وشها ورد من تلميح ” نعمات ” وقبل ماترد عليها اتفاجأت بتعليق ” بدور ” الى خرج بصوت مجروح:

ماحدش فى الدنيا دى مضمون ياما .. والرجالة بالذات ملهمش امان !!

عقدت ” نيره ” حواجبها من نبرتها و” نعمات ” راح من صوتها الهزل وهى بتسألها :

طب ماتتكلمى يابتى وطلعى اللى فى جلبك .. خلينا حتى نفهم بدال ما انتى كاتمة كده فى نفسك.

اتنهدت بأسى ومرديتش ترد على والدتها .. وبعد ما كان ضحكهم واصل لخارج الغرفة اصبح الصمت هو اللى مسيطر .. لكن دخول الدكتورة هو خرجهم من سكوتهم.

مساء الخير ياجماعة.. عاملة ايه دلوقتى ياقمر؟

نعمات فى ردها للدكتورة

تعالى يادكتورة شوفيها وطمنينا عليها .. عشان ناخدها بجى ونروح .