الفصل السادس و العشرون من رواية روضتنى بقلم أسماء المصري
الفصل السادس و العشرون روضتنى
-جاوبيني يا دعاء لو سمحتي، لسه بتحبيني؟
اجابته وهي تقضم داخل فمها بتوتر:
-وكان ايه اللي مصبرني كل ده على تصرفاتك غير اني بحبك يا زين، حتى بعد ما اعترفت لي باللي عملته بشادي فضلت أحبك، حتى بعد ما شكيت فيا اني بنقل اخبارك واخبار الباشا بتاعك جيت اقابلك من أول رنه منك.
ابتسم بسعادة وبدل مقعدة لذلك المجاور لها ساحبا راحتها الاخرى فأصبح يمسك كلتا راحتيها بكفيه ونظر بعمق عينها وسالها من جديد:
-عندك استعداد تكوني صريحه معايا زي ما انا هكون صريح معاكي؟
أومأت له مبتسمة فاستطرد:
-انا هنا من ورا الباشا، ولو وجودي معاكي هيمنعني من الشغل عنده أو عند غيره فانا مستعد لده حتى لو هنسافر برا لاي بلد ونبدأ هناك من جديد.
اتسعت بسمتها وهي تصرخ بسعادة:
-بجد؟ انت مستعد تعمل كده عشاني يا زين؟
أومأ لها وهو يشعر ببركان ثائر يحرق داخله فتكلمت هي بغزل:
-ياختي على القمر ده، انت بتحبني يا زين؟
أومأ لها مجيبا:
-بحبك بس، انا مش عارف ازاي قدرتي تخليني مفكرش غير فيكي بالشكل ده؟ وأنا اللي طول عمري مفكرتش لا في الجواز ولا الحب.
ابتسمت وهي تعض على شفتها السفلى هامسة بغزل:
-حبيبي أول مره يحب، وربنا اختارني انا عشان اكون حبيبته.
قبل راحتها وعاد ينظر لها متسائلا:
-طيب جه دورك.
رفعت حاجبها متعجبة من حديثة فأضاف بتوضيح:
-اتقفنا نكون صرحا مع بعض، انا عايز اعرف كل حاجه وكل الحقايق عشان بعدها نرمي كل حاجه ورا ظهرنا ونعيش من غير ما نخاف إن تظهر لنا حاجه تبوظ علينا حياتنا.
رمقته بنظرة عاشقة وسألته:
-يعني هتسامح وتنسى؟
أومأ لها بتاكيد مرددا:
-زي ما انتي هتسامحي وتنسي.
سحبت نفسا عميقا وطردته خارجها وقالت وهي تبتلع ريقها:
-شادي مخطوف بره واللي خطفوه تواصلوا معايا عشان يهددوني بيه.
اعتدل زين على مقعده ينظر لها بتاكيد:
-على فكره أول مره اتقابلنا فيها انا حقيقي مكنتش اعرف حاجه، وحتى بعدها لما اتكررت مقابلاتنا انا فعلا كنت بدأت أحبك ولحد ما شادي قالنا على موضوع سفره ده ومكانش في ايه مشاكل.
ظلت تقص عليه الأحداث التي مرت عليها منذ سفرة اخيها وحتى تلك اللحظة:
-بعد ما سافر كان بيتواصل معانا على فترات لحد ما انقطعت اخباره فتره وبابا قال دي عادته، بس انا كنت قلقانه وفضلت ادور على الشركه اللي بيشتغل فيها في دبي وعرفت انه سابها وإن جاله عقد تاني في شركه تانيه.
