الفصل الرابع عشر من روايه روضتنى بقلم اسماء المصرى
الفصل الرابع عشر روضتنى
-ايوه منا واخد بالي ان ده شغل اليوتيوب، يا ترى ده بقى كان انهي جزء بالظبط في الوصفة؟
ضحك بنهاية حديثه فدفعته لخارج المطبخ وهي تقول بتذمر:
-طيب يلا اطلع بره ومنتاش واكل منه، ها.
صدحت ضحكاته وهي تدفعه للخارج براحتيها الصغيريتن وقال متوسلا ومعتذرا:
-لا خلاص أنا غلطان، ارجوكي متحرمنيش من اﻷكل.
رق قلبها له فتركته ونظرت له ببسمة حب؛ فعاد لمشاكستها:
-ايه بقى الكاهن الغريب اللي في الحله ده يا حبيبتي؟
وضعت ما بداخل الاناء بطبق التقديم وهي تقول:
-فراخ بالخضار وصوص الليمون والتوم.
اشارت للاناء اﻵخر وقالت:
-وده رز بالبهارات الشرقية، ها إيه رأيك؟
تفحص محتويات اﻵطباق فوجد الخضار اقرب ليكون مهروسا أما الطائر فحدث ولا حرج فسخر قائلا:
-وهي الفرخة مالها نايمه على جنبها ليه كده؟ تعبانه ولا ايه؟ وبعدين فين باقيتها؟
ابتلعت ريقها وقالت بتوتر:
– ما انا نسيتهم على النار لما طلعنا فوق وتقريبا استوت شوية زياده بس.
لم يتمالك نفسه من الضحك وهو يمسك بالشوكه ويحرك الطائر بالطبق فتفتت لأشلاء فقال بنبرة تساؤلية:
-تقريبا استوت زياده؟ دي اتهرت يا حبيبتي.
اطرقت نظرها لاسفل وهو يسأل:
-والخضار راح فين ده بقى معجون خضار.
وجد تجهمها فقال وهو يسحبها داخل حضنه:
-حلو يا روحي أهو بدل ما نفضل ننضدغ، نبلع على طول.
ابتسمت بخجل فرفع الغطاء عن اﻵرز وهو يقول:
-أهو اﻻمل كله في الحلة دي، وأظن الرز البسمتي صعب يبوظ يعني ولا ايه؟
فور أن فتح الغطاء وجد ما يشبه طعام اﻻطفال المهروس والمياه تغمره فسألها وهو يحاول أن يكتم ضحكاته:
-انتي قولتي ايه ده؟
نزلت عبراتها على وجنتها وقالت بحزن:
-حطيت الميه وبعد نص ساعه لقيته ني، فدخلت ادور على معيار الميه ولقيتهم قالو انه بيحتاج ميه كتير…
قاطعها وهو ينظر للأناء:
-روحتي مغرقاه كده يا عين امه، لا حول ولا قوة إلا بالله، الرز مات غرقان يا روحي ده يعتبر شهيد.
ضربته بقبضتها على صدره فاحكم ذراعيه واحتضنها بحب وهمس باذنها:
-تسلم ايدك يا روحي وكفايه انك بتحاولي، بس عشان خاطري كفاية محاولات كده انا جالي تلبك معوي.
شهقت باكية فقبلها من أعلى رأسها وقال بشكل متوار:
-طيب انتي طالما مصرة انك تتعلمي الطبخ، عندك شيرين أكلها رهيب وشاطره جدا ما تيجي نروح نقعد معاهم كام يوم عشان تتعلمي منها.
