الفصل السادس و العشرون من رواية قيد حب للكاتبة شيماء سعيد

ضحك بمرح مردفاً:

_ طبعا أنتِ في الكام شهر اللي قعدتيهم هنا عشرتي بنفسك سيادة اللوا طلعنا كلنا معقدين، انا والواد مصطفى حتى أنتِ والبنت سما وأمي، إحنا كدة مش محتاجين دكتور إحنا كدة محتاجين مستشفى تأخدنا دفعة واحدة.. .

نسيت كل شيء وضحكت معه ليقول بحب:

_ أيوة كدة خلي ضحكتك على طول منورة وشك وأعرفي حاجة واحدة بس اني مش عايز من الدنيا غيرك، عايز أشوفك مبسوطة وعشان ده يحصل يبقى لأزم تنسي كل اللي فات وترميه ورا ضهرك..

مريح، حنون، خير رجل وخير الزوج، ابتسمت قائلة:

_ هتفضل معايا..

_ العمر كله..

_ مش هتزهق؟!..

_ محدش بيزهق من نفسه..

_ بس أنا خايفة وفي نفس الوقت مش عايزة أتكلم في اللي فات لما بتكلم بتعب أكتر عايزة أنسى مش افتكر..

قرص خدها الناعم مردفاً:

_ نحضر جلسة أو اتنين وأنا أوعدك لو مش حابة تكملي مش هنكمل..

لأجله ستفعل المستحيل فهو يستحق، إبتسمت بتوتر مردفة:

_ ماشي موافقة هعمل أي حاجة عشانك..

وضع قبلة حنونة فوق خدها وقال:

_ عشاني أنا ؟!..

أومأت إليه عدة مرات بصدق شديد وقالت:

_ أيوة عشانك أنت عشان أكون ست كاملة تليق بيك وتفرح معاها مش عايزاك تبص لغيري في يوم ولا تحس إنك زهقت مني..

بحنان الدنيا رد عليها:

_ أنتِ مش بس ست كاملة أنتِ ست الستات كلهم يا ليلى ويا بختي بيكي..

______ شيماء سعيد عبده _____

بسيارة علياء…

أمام لجنة أوقفت علياء السيارة، أشار إليها العسكري بفتح الشباك ففعلت ليقترب منها مردفاً:

_ انزلي هنفتش..

نظرت إليه بتعجب مردفة:

_ تفتش إيه مش فاهمة ؟!..

_ العربية هنكون هنفتش إيه يعني..

أخذت نفسها بهدوء وقالت:

_ حضرتك كل العربيات اللي قبلي عدت حتى من غير ما تطلب الرخص عايز تفتشني أنا؟!..

أومأ إليها ببرود قائلا:

_ العربية دي بالذات اللي مطلوب تفتيشها فيها مخدرات..

أتسعت عينيها برعب قائلة:

_ مخدرات إيه اللي بتتكلم عنها بني ادم أنت.. .

على بعد مسافة خرج الضابط من غرفته، سمعت صوت تعلم صاحبه يقول:

_ ما هو الجدل الكتير ده اكبر اثبات إن فيه في العربية مخدرات انزليلي يا حلوة…