الفصل السادس و العشرون من رواية قيد حب للكاتبة شيماء سعيد

_ الكلام العبيط ده هعمل نفسي مسمعتوش أنتِ بتحبيني، أنا عملت كل ده عشان العيلة دي تفضل زي ما إحنا عايزين، عشان خايف على إبني من واحدة ملهاش لا اصلع ولا فصل طمعانة في فلوسه، عشان عايز له واحده تليق بيه ولما صمم عليها قبلت بيها وأنا اول مرة في حياتي أعمل حاجه غصب عني…

ردت عليه بسخرية:

_ أنت قبلت بيها عشان عارف انه برضاك أو غصب عنك مش هيسيبها فقولت تجيبها بالحب عشان متخسرهوش، متخسرش الولد اللي شايل كل حاجة فوق دماغه وبيحط في حجرك، مش عشان خاطر انك بتحبه… بقيت مكشوف أوي يا حسام مكشوف وبايخ، أنا هطلع اوضتي وأنت من النهاردة تشوفلك أوضة تانية تنام فيها ده لو عايزني أفضل في البيت ده…

ذهبت من أمامه بخطوات سريعة ليقول بعدم تصديق:

_ سميرة عايزة تبعد عني؟!.. ده مستحيل..

_____ شيماء سعيد عبده _____

بغرفة ليلي القديمة اندفع عز إلي الداخل، وجدها تجلس فوق الفراش وعينيها متعلقة بتركيز على الهاتف فقال بغضب:

_ مين سمحلك تسيبي اوضتك وتيجي هنا؟!..

تركت الهاتف من يدها ورفعت عينيها إليه بحزن مردفة:

_ قولت اسيبها بكرامتي بدل ما أنت اللي تطلب مني اسيبها..

أتسعت عينيه قائلا بلهفة:

_ أطلب منك تسيبيها ليه؟!..

بكت بقهر مردفة:

_ عشان مجنونة وأنت أكيد مش هتأمن على نفسك مع ست مجنونة وعندها عقد نفسية وبتكره الرجاله مش ده بقى تفكيرك فيا يا عز؟!..

ماذا تقول حقا ماذا تقول ؟!.. تنهد بتعب ثم جلس بجوارها على الفراش مردفاً:

_ إيه اللي أنتِ بتقوليه ده يا ليلى؟!.. يا ليلى أنا بحبك وخايف عليكي وعايز نبدأ حياتنا صح مش زي ما عقلك مفهمك ..

بعتاب واضح قالت:

_ لما تبقى عايز تاخدني لدكتور نفسي تبقى مش شايفني مجنونة ؟!..

نفي بصبر وقال:

_ لما واحدة متعلمة زيك تقول جملةزي دي سيبتي إيه للناس الجاهلة؟!.. يا حبيبتي من أمتى الدكتور النفسي بيبقى دكتور مجانين كل واحد فينا عنده مشكلة محتاج يحكيها لحد من غير ما يبقى مكسوف بيبقى عايز يسمع حلول من غير عتاب هي دي مهمه الدكتور النفسي، وعلى فكره أنتِ مش هتروحي لوحدك انا كمان هروح معاكي…

رمشت بعينيها عدة مرات وقالت:

_ هتروح معايا ليه؟!..