الفصل الخامس من رواية قيد حب للكاتبة شيماء سعيد

حديثها قاسي قدرت على اهانه كرامته بكلمات بسيطة، ليخلع عنه ثوب الحنان وقال بجبروت:

_ اللي مانعني ادوس عليكي بجزمتي انك لسه تلزميني والاحسن انك تفضلي تلزميني، لان اليوم اللي هشبع منك فيه هدفنك مكانك ومحدش هيدور عليكي..

أنتفض جسدها وقامت من فوق الفراش رغم تعبها صارخة بغضب:

_ محدش هيدور عليا لما تكون جايبني من الشارع لكن أنت جايبني من بيت وليا اهل..

رد عليها بوقاحة:

_ مين أهلك دول يا روح امك أخوكي العيل اللي في ثانوي والله امك اللي اول ما شافت الفلوس مفكرتش حتي تسأل على العريس وقالت مبروك؟!..

قهرها، كلما نظرت إليه تشعر كم كانت حمقاء عندما وقعت بغرامه، بكت ثم أشارت إليه بضياع:

_ أنت مين وفين مصطفى اللي كان بيجري ورايا في كل مكان عشان يسمع مني كلمة حلوة؟!.. فين مصطفى اللي كان بيحبني وخلاني أحبه راح فين وسابني مع بني ادم زيك؟!.

تألم مع رؤيته إليها بتلك الحالة، جذبها لتبقي بين أحضانه وقال بحنان:

_ مصطفى اللي أنتِ عايزاه موجود وعايز يعيش معاكي كل حاجه حلوة وعدك بيها، لكن أنتِ اللي مصمم توجعي قلبك وتشوفي الوحش وبس..

بتوهان قالت:

_ أنت اللي كدبت عليا، أنت اللي وجعتني وطردتني من بيتي في يوم صباحيتنا، عايزني ارجع لك تاني إزاي بعد اللي حصل ده؟!..

أجابها ببساطة وهدوء:

_ ترجعي عادي يا سما وتنسي كل اللي حصل، تنسي ان أبويا عايش وانك شوفتيه صدقيني ده الاحسن ليكي، نعيش زي ما كنا عايزين نعيش تنامي دلوقتي وتصحي كمان شوية على انها صباحيتنا ونفرح احنا الاتنين مع بعض..

دفعته من صدره عدة مرات بعيداً عنها إلا أنه أحكم قبضته عليها فقالت بجنون:

_ أنت أكيد مش طبيعي… إيه اللي بتقوله ده عايز تعايشني جوه كذبة وتخليني اصدقها واعيش حاجات مش موجودة؟!.. طيب إزاي أنا مش فاهمه أنت عايز مني إيه بالظبط، لما أنت عندك أهل وحياة مجبتش أهلك وجيت طلبتني ليه؟!.. كدبت عليا ليه لما أنت عايزني وبتحبني ومتمسك بيا… طيب بلاش كل ده تقدر تقولي الحياة اللي أنت عايز تعيشها معايا دي من غير ما اهلك يعرفوا هتبقى لحد امتى وهتخلص ازاي؟!..

بيد طوق خصرها وبالاخري ضم كفها إلي بعض لعلها تهدأ وقال: