الفصل التاسع والعشرون رواية طمس الهوية الجزء الرابع من أحببت طريدتي للكاتبة أسماء المصري
الفصل التاسع والعشرون طمس الهوية
أغلق الهاتف ودلف المرحاض ليغتسل وخرج يغطي نصفه الأسفل بمنشفة ووقف يرتدي ملابسه في حين توجهت ياسمين للصغيرين تحاول إسكاتهما وربما عودتهما للنوم فلم تحاول التحدث معه وهو بتلك الحالة، ولكن قادها فضولها لتسأله:
-ممكن أفهم في ايه؟
أجابها وهو يصر على أسنانه:
-مفيش يا ياسمين، نيمي الولاد وارجعي نامي.
تضايقت منه فتركت الصغير جاسر بفراشه واقتربت منه تتعلق بعنقه وابتسمت له لتخفف عنه ما بداخله وسألته:
-مالك بس يا حبيبي؟ كنا كويسين من شويه ايه اللي حصل فجأة؟
اختفت شفتيه بداخل فمه من كثرة عضه عليهما ورد محاولا إخفاء نبرته الغاضبة:
-سي مازن مصمم يكتب انهارده واتعصبت عشان صحاني بس.
بالطبع شعر بالخجل من إخبارها فعلة أخته ورفيق دربه المحرمة؛ فآثر على الكذب علها تصدقه فابتسمت له وأومأت لتعود لحمل الصغير الذي ظل يناديها:
-ممام ماما.
عادت تقف أمامه وجاسر بيدها يمد ذراعيه نحو والده يريده أن يحمله هو:
-بابا، بابا اوبح.
ضحكت وحاولت المزاح معه:
-ما تاخد جاسر شاهد معاك على عقد الجواز، ده بقى راجل خلاص.
نجحت أخيراً باضحاكه فاقترب منها وقبلها من وجنتها فعاد الصغير لدفعه بعيدا عنها مظهرا غيرته على والدته فصر فارس على أسنانه ووبخه:
-يا بني ابعد عني يا بني، دي مراتي متخلنيش اعملها معاك.
قبلته ووضعته بفراشه وتسائلت:
-أنت مش عايزني معاك؟
رفض محركا رأسه وهو يفسر كذبا:
-هنكتب تحت مش بره البيت اصلا وبلاش عشان أنا نازل بعد محايله مازن ليا وأنتي عارفه اني زعلان من چنى
ربتت على كتفه وتكلمت برقة:
-معلش يا فارس أعذرها، چنى صغيره وكانت عايشه متدلعه من باباها ومامتها وفجأة خسرت الأتنين وهي مش عارفه أنك اللي فاضل لها وبتحاول تضغط عليك عشان تعمل اللي هي عيزاه.
لم يعقب على حديثها ولكنه اختار الابتسام ومسح براحته على ظهرها:
-نامي انتي وأنا هخلص واطلعلك بسرعه.
❈-❈-❈
وصل منزله بعد يوم شاق وطويل بين الإجتماعات والأوراق وكل ما شغل باله هي التي أنهت معه الأعمال بحرفية دون التطرق ﻷي أمور حدثت بينهما وكأنها تناست تماما حديثه معها قبل حادث ابنة عمها.
ارتمى على فراشه مجهدا فدلفت والدته تبتسم له وتربت على كتفه:
-مموت نفسك في الشغل ليه كده؟
رد وهو يعتدل بجسده على الفراش:
-بحاول ابين نفسي قدام العيله عشان محدش يفتكر اننا مش بتوع شغل.
