الفصل السابع والثلاثون من رواية طمس الهوية بقلم اسماء المصرى
الفصل السابع والثلاثون طمس الهوية
خجلت وأطرقت رأسها فابتسم لنقائها ورقتها:
-كملي وصلتوا ﻷيه؟
تكلمت بخجل وهي لا تنظر لعينيه:
-شيرين هتعمل انها انا و…
قاطعها ضاحكا:
-هتتكشف ﻷنكم مش شبه بعض اوي.
علقت تخبره:
-ﻷ ما احنا بنعرف نعمل ميك اب يخلينا نسخه من بعض وهتلبس حجاب وتروح…
قاطعها رافضا بحنق:
-انا مش موافق.
حاولت التحدث، ولكنه عاد لغضبه المؤجج:
-فكرة انه يتكلم معاكي أو مع توأمك على إنها انتي وابقى عارف انه هيواجه ويفضفض ويقول اللي جواه حتى لو لأختك مش ليكي بس هو بيكلم نرمين وبيحب نرمين وبيواجه نرمين، انتوا فاهمين بتعملوا ايه في العيلة؟ عشان كده فارس رفض لانكم بتعملوا قنبلة موقوته بيني وبينه هتنتهي بموت واحد فينا.
لمعت عينها وحاولت التحدث ولكن غضبه جعله يصرخ بها:
-انا كلامي نهائي ومش عايز نقاش في الموضوع ده.
وقبل أن يضيف أي أمر آخر أو حتى يستمع لوجهة نظرها جاءه اتصال على هاتفه:
-انت فين يا بني أنا عندكم؟
رد عليه وهو يقف مخرجا حفنة نقود ووضعها على الطاولة أمامه:
-جاي يا فارس استناني لحظات.
سحبها من يدها بدون مقدمات:
-تعالي اوصلك عشان فارس عندي في البيت.
لم تجد داع لسؤاله عن سبب زيارة فارس له، ولكنها أختارت الصمت حتى وصل لباب قصر ابن عمه وصف سيارته وقبيل أن تترجل التفت ينظر لها بتأكيد:
-مش عايز أعيد كلامي تاني يا نرمين، الموضوع ده مرفوض تماما فاهمة؟
أومأت وترجلت فقاد هو سيارته لڤيلته ودلف ليجد صياح والدته الرافضة حديث فارس:
-انا قولت ﻷ يعني ﻷ، ابني مش هيتجوز واحده مطلقه وده آخر كلام عندي، ولو راح بكره لوحده ينساني خالص.
صر فارس على أسنانه وهو يقف بمنتصف البهو ناظرا لها بغضب وحنق:
-انتي ملاحظة طريقتك معايا وصوتك العالي أزاي؟
تلجلجت وهي تعقب عليه:
-ما انت كل حاجه أنا رفضاها بتيجي وتنزل فرمان من فرمانتك وانا عليا السمع والطاعه، بس مش كل موضوع ممكن أقبل بالطريقه دي.
اقترب منها وتكلم صارا على أسنانه:
-موضوع الورث مشيتلك اللي انتي عيزاه.
نفت توضح:
-ﻷ أنا مكنتش عايزه حتى ترجع الفلوس من البنت اللي كان متجوزها، لكن أنت صممت ترجعها وقال ايه نبقى نوزعها على دور الأيتام ونتصدق بيهم، الله طيب يحب الطيب يا فارس يعني الفلوس الحرام مش مجال للتصدق.
قوس فمه ممتعضا وهتف:
-طيب بلاش ندخل في مواضيع متفرعه، دلوقتي ابنك بيحبها وعايزها وواخد ميعاد من أهلها فأنتي بقى عايزه تطلعيه عيل قدامهم ومتروحيش معاه بكره؟
