الفصل السادس والثلاثون من رواية طمس الهوية بقلم اسماء المصرى
الفصل السادس والثلاثون طمس الهوية
عادت لتهربها:
-طيب أنا هلبس عشان كنت عايزه انزل اشتري شويه هدايا وكمان الحق الم الشنط.
علم انه حالك لا محالة من دلالها الذي يقتله رويدا رويدا فوافق:
-ماشي يا نرمين أنا عارفك طالما قررتي تهربي مش هعرف اتلم عليكي، المهم متفطريش عشان هعدي عليكي نفطر سوا ونلف نشتري الهدايا اللي انتي عيزاها.
وبالفعل انتهيا من شراء الكثير والكثير من الهدايا للجميع وعادت لفندقها وهو بانتظارها حتى تحضر حقائبها ففعلت ودلفت تجلس بجواره متسائلة:
-هنروح الفندق عندك نجيب الشنط؟
نفى وهو يخبرها:
-شنطي ورا في الشنطه.
نظرت شاردة من النافذة تودع تلك المدينة الساحرة ولكنها شهقت بخضة تسأله:
-العربية دي مش كنت مأجرها؟ هتسلمها ازاي؟
غمز لها مبتسما:
-مأجرها من المكتب اللي في المطار عشان ابقى قريب.
مدحت ذكائه وتحركت برفقته لداخل المطار ومنه للطائرة وظلا معا يتحدثان تاره ويشردان بعضهما ببعض تارة أخرى حتى وصلا لميناء الأسكندرية الجوي فساعدها بحمل حقابها حتى وصل لمكان صف سيارته ووقف ينظر لها بتيه:
-مين يصدق اننا نفضل مع بعض كل الوقت ده، 11 ساعه انا وانتي في السما ولسه هنقضي 3 ساعات تانيين لحد ما نوصل، أنا أول ما أشوف جدك هبوسه على الجِميل اللي عمله فيا بجد.
ركبت بجواره وامتعض وجهها قليلا وهي تسأله:
-أنا عايزه أعرف ازاي قدرت توصل لجدو وتخليه كمان يقولك على مكاني؟
غمز لها كعادته وهو يبتسم:
-جدك قفشني من أول يوم دخلت فيه بيتكم ووقتها قالي خد خطوات بطيئة عشان متهربش منك ولما السكك كلها اتقفلت في وشي كلمته وقولت له ساعدني.
وجدها تعقد حاجبيها بالضيق فتابع:
-جدك قالي لو أنا شايف انها مش عيزاك مكنتش ساعدتك.
لمعت عينيها تصيح باعتراض:
-نعم نعم نعم؟ مين اللي عيزاك ومش عيزاك؟ جدو قالك كده؟
أومأ لها والبسمة تزين وجهه:
-ما هو زي ما كشفني كشفك يا نرمين.
التفت ينظر لها بعد أن توقفت السيارة بإشارة مرور:
-بلاش تكابري بقى أنا تعبت، وعارف انك مش هتقبلي بالساهل بس خليني احس بفتفوتة أمل.
قوست فمها تجيبه:
-كل ده مش فتفوته؟
أومأ وهو يؤكد:
-ايوه بس الفتفوته دي لازم تكمل بالخطوبة عشان أنا مش هعرف أكلمك واتعامل معاكي ومفيش بينا صفة رسمية.
ارتبكت وأشاحت وجهها عنه ولم يسعه هو الوقت لينظر لها بعد أن فتحت الإشارة فأضطر للقيادة مرة أخرى، ولكنه لم يتوقف عن محادثتها:
-عارف أنك هتقولي خطوة الخطوبة لسه بدري عليها بس أنا ليا وجهة نظر في الموضوع ده.
