الفصل السادس و العشرون من رواية ست الحسن الجزء الثاني للكاتبة امل نصر

خرجت نورا من باب البيت وهي لابسة عباية خروج سودة ملفتة بضيقها عالخصر وتحديدها لتفاصيلها رغم حشمتها .. كانت لافة حجاب قصير ومزينة وجهها كالعادة بمكياج واضح .. طالعة فين ياسنيورة كده عالصبح ؟ التفتت لصاحب الصوت المعروف اللى كان جالس على كنبة صغيرة امام مدخل البيت .. تجاوبه وهي واضعة ايدها على وسطها : نعم بقى بتسأل ليه ؟ هو انا مش قايلالك من امبارح اني رايحة بيت جدي اشوف والدتي وبالمرة اروح معاها نزور رائف بعد ما خرج بالسلامة من المستشفى على بيتهم نعمل الواجب. قال بتهكم : لا وانتي بتفهمي بالواجب جوي..طالعة كده من وش الصبح ؟ طب استنى على ما الناس يفطروا حتى ؟ كتفت ايديها ترد بضيق : لا ملكش دعوة انت اخرج بدري ولا متأخر.. مش كفاية منعتني اروح ازور رائف والدكتور مدحت فى المستشفى .. دا كان واجب عليك تروح معايا مش تمنعني . عض على شفته بغيظ منها يقول : وانا مايهمنيش اعمل واجب معاهم ياستي ..حد فيهم له حاجة عندي ؟ اما انتي عايزة تغوري انتي غوري ياللا متصدعنيش . فكت تشبيك ايديها بعنف تصرخ فيه : استغفر الله.. مش انت اللى وقفتني ياجدع انت ..اوووف قالتها واتحركت خطوتين وبعدها وقفت تستدير من تاني.. لفتت نظره فسألها : وقفتي ليه تاني ؟ رفعت دقنها تقول باستعلاء : ماينفعش اروح عندهم مشي.. تعالى وصلنى بعربيتك . نهض عن كنبته بتأفف : ما انا عارف ان فيها تعب.. تعالي ورايا يابرنسيسة. عوجت شفتها تقول بتناكة : ما انت لو علمتني السواقة كنت أخدت الرخصة وسوقت عربيتي لوحدي بدل المماطلة بتاعتك دى .. أكيد ساعتها مش هحتاج اتعبك . لاحت على شفته ابتسامة بسخرية من غير مايرد عليها وهو عطيها ضهره .. ماخدتش بالها منها هي . .......................... وعند عبد الحميد.. البيت كان ممتلئ على اَخره بناس داخلة وناس خارجة من العيلة واهل البلد ..يهنوا بسلامة رائف ويطمنوا على حالة الدكتور مدحت اللى فضل يكمل فترة علاجه فى شقته فى البندر مع زوجته نهال بنت عمه .. وعلى ادان الضهر كان الحركة خفت من الزيارات ..فاستغل اهل البيت اللحظة دي عشان يأكلوا رائف.. اللى ماكنش قادر يكسف حد من الزوار رغم تأخر فطاره.. قال ياسين بمداعبة : يعني نفسك انفتحت فى بيت ابوك ..هو انت كنت قرفان من وكل المستشفى؟ ابتسم رائف وهو بيتناول قطعة من فرخة مسلوقة ..فردت والدته راضية بالنيابة عنه : سيبه ياعم ياسين ..اصله فرحان وعايز يقوم على رجليه بسرعة.. بعد ما خد الموافقة من ابوه على خطوبة نوها من ابوها . هلل ياسين بضحك : وه وه..وانا اقول الواض ماشاء الله عليه ماله الدموية ردت فى وشه ليه ؟ اتاري .. هنيالك ياهم البت زينة وابوها ولد حلال. دخل فجأة عليهم حربي يلوح بكف ايده امامهم بتحية: سلام عليكم . رددوا خلفه التحية بينما رائف قال بتريقة : يااهلا بالصاحب الجدع.. اللى ساب صاحبه فى المستشفى وكان ياجي يطل زي الغريب ويمشي تاني على طول . ضحك حربي وهو بيقرب يقعد بجواره على طرف السرير : هو انت زعلت مني ياباشا؟ لا انا كده ماتحملش زعلك ولا بعدك عني . قال رائف بتكشيرة عتاب : بعد عني ياض مش عايز اشوف خلقتك ولا طايجك . ماتشوفش خلقته ليه بس؟ دا انت حقك تبوس على راسه ياراجل ! رفع رائف راسه لجده ينظرله باستفسار ..فكمل ياسين : واض عمك ده كان طول الفترة اللى فاتت دي قاعد بره بيته يراقب عيال الزمقان..فتحي واسماعيل اللى قدروا يصطادوه هو وعاصم واخدوا منه معلومات تودي سراج فتوح فى داهية. رائف وهو بينقل نظره مابين الاتنين : انتوا بيتكلموا جد ولا بيتهزروا ؟ قال حربي بثقة : نهزر دا ايه ياض ؟ دا احنا سجلنا لاسماعيل وبعدها سلمناه لحضرة الظابط ياسر فهمي يشوف صرفته معاه واديلوا محبوس بقالوا يومين .. يعني صاحبك نهايتك قربت . رائف بقى يضحك من قبله : ايوه كده ما يجيبها الا رجالها.. فرحتوني والله بكلامكم ده . حربي وعيونه بتنظر لخارج باب الغرفة : امال انا مش شايف البت نيره ولا عمى عبد الحميد ..هما راحوا فين ؟ جاوبت راضية : عمك عبد الحميد راح يطل على شغله بعد غيابه الايام اللى فاتت عنه .. ونيره اكيد هاتدخل دلوك تجيبلك حاجة تشربها.. دي طالعان عينها من امبارح من ساعة ماوصل اخوها بالسلامة .. عشان الناس اللى داخلة وطالعة عليه تزور قال حربي متصنع الغضب: ايوة انتوا كده طلعولي عين البت وخلوها تنشف اكتر ماهي نشفانة وانا فرحي عليها يدوبك سبوعين. زعق عليه ياسين بضحك : هو احنا بتنا كده ودا عودها.. عاجبك بقى ولا مش عاجبك؟ قال باستسلام: عاجبني ياعم طبعا ..هو انا اقدر التفت فجأة على خبطة خفيفة منها وهي واقفة على الباب بتضحك .. بعد ما وصلت بالصدفة خلال كلامه عنها: اجيب العصير ولا نجيب غدا احسن. رد عليها بابتسامة جميلة : هاتي العصير وبعديها هاتي الغدا .. اصل انا لابد النهاردة هنا عنديكم. ........................... محبوس ازاي يعني ؟ ومن امتى ؟ سألها سراج بدهشة فجاوب عليه فتحي : انا نفسي هاتجنن ياسراج بيه .. اسماعيل كان معايا اول امبارح واحنا سهرانين عند جماعة صحابنا لقريب الساعة ١٢ بالليل .. امتى بقى الشرطة قبضت عليه مش عارف؟ .. كل اللى عارفه انه اتصل بيا تاني يوم العصر يبلغني ان الشرطة مسكته بتهمة حيازته لسلام غير مرخص وبعدها لبسوه شوية قضايا تانية فى القسم نهض سراج عن مقعد مكتبه بغضب: يعني ايه لبسوه تهم تانية كمان ؟ هما مش عارفين انه من طرف النائب؟.. دا انا هقلب عليهم الدنيا لو مخرجهوش . قال فتحي وهو مبتسم بتفاخر : ماهو دا العشم ياواض عمي..امال ايه ؟ دا احنا معانا النائب.. يعني ماحدش يرفع عينه فينا ! ......................... رجعت نورا مع والدتها على البيت الكبير..بعد زيارتهم لرائف والاطمئنان عليه..اتلقتهم صباح كالعادة بترحاب وفرحة بلمتهم قربها .. حمد الله على السلامة.. جيتوا بدري يعني وماعوجتوش يعنى؟ جاوبت عليها نورا وهي بتقعد جمبها على كنبتها: اعمل ايه بس ياستي فى القرد اللى مستنيني فى البيت وقالي ماتتأخريش لاتشوفي حسابك معايا ؟ ضحكت نجلاء وصباح كمان اللى رددت خلفها : -الله يخرب مطنك يانورا ..هو انتي خليته قرد؟ مايصحش يابتي ..عيب دا جوزك. ردت باستهجان : جوزي!! دا زفت وعايز بس يتحكم فيا . طبطبت على كفها نجلاء بحنان تقول : برضوا ياحبيبتى لازم تقدريه وتسمعي كلامه .. مدام مش بيمنعك نهائى عن زيارتنا .. دا ابوكي طلع عيني وانا بعيدة ووحيدة عن امي وانت شاهدة.. غيرش بس دلوقتي ربنا هداه .. وبيوافق على طول ان اَجي عند امي وقت ماانا عايزة..ولو قولت عايزة ابات بيقولي براحتك قالت نورا بشك : وايه اللي حصل بقى عشان يبقى جميل كده؟ اكيد فيه حاجة؟ ردت على كلامها والدتها بقلق : -حاجة ايه يابنتي ؟ انتي هاتدخلي الشك فى قلبي ليه ؟ سكتت نورا بنظرات معبرة جدا عن اللى جواها..سألتها صباح بتوجس : هو انتي عارفة حاجة يانورا ؟ لو عارفة قولي ..بلاش رمي الكلام كده عالفاضي . ماشي ياستي انا هاقول اللى اعرفه ..معتصم كذا مرة يلمح والدي وهو سهران مع بت اسمها سهر فى كازينوا سياحي. نهضت نجلاء واقفة تقول بصدمة : انتي اذاي تقولي عن والدك يانورا ؟ اكيد جوزك بيكدب ! مطت شفايفها تقول ببساطة: والله انا قولت اللى اعرفه وانتي بقى حرة .. تصدقي او ماتصدقيش ؟ بلعت نجلاء ريقها وهى بتفكر فى كلام بنتها .. طب هي هاتكدبها ازاي؟ وكل الشواهد بتاكد صحة كلامها.. واللى ياما شافت اثرها على هدومه وهي كانت بتكدب نفسها وتزيح الشك عن عقلها..اتحركت فجأة تقول بعجل: هو ميدو راح فين ياماما ؟انا هامشي حالاً دلوقتي وراجعة بيتي . قالت ولدتها بدهشة: وترجعي ليه بس يابتي وانت واخدة اذن بالبيات عندي ؟ هو انتي هاتعومي على كلام بتك ؟ قالت بتوتر : ياأمي الجيات كتير .. انا بس لازم امشى دلوقتي عشان قلبي اتقبض . قالت والدتها باستسلام : سلامة جلبك يابتي .. على العموم ميدو جاعد بيتفرج على كارتون فى اوضة جده .. تحبي اخلي حد من عيال اخواتي يوصلك؟ ............................... نجلاء ماكدبتش خبر .. جهزت نفسها بسرعة ولبست ابنها الصغير هدومه. . وعشان تختصر الوقت وافقت على اقتراح والدتها وجعلت عاصم هو اللى يوصلها بعربيته ..كلام نورا فتح عيونها اللى كانت سادة النور عنها بايديها .. رغبةً فى الحفاظ على بيتها رغم كل المرار اللى شافته فيه..لكن تظل عقدتها القديمة في الوحدة واليتم..هى المحفز الرئيسي فى تحملها قسوة جوزها وظلمه! وقفت العربية قدام العمارة كان الوقت داخل على الساعة سابعة .. خرجت منها وهي بتشكر عاصم : معلش ياعاصم على تعبك معايا .. ماتنزل من العربية بقى وتيجي تتفضل . جاوبها بابتسامة ودودة: متشكرين جوي ياام وائل ..بس انا معايا شوية مشاوير كده عايز اخلصها..مرة تانية ان شاء الله . قالت بالحاح: ياعاصم اعقل وانزل معايا بلاش تكسفني . معلش انتي والنبي..سيبني دلوك واكيد لينا جاية تاني عندك . قالت بضحك : خلاص بقى المرة الجاية تبقى عزومة كبيرة مع مراتك ..وعد ياسيدي حرك راسه بموافقة وقال: وعد ياستي بعد مامشي عاصم وطلعت شقتها فتحت الباب بمفتاحها وهي بتدخل ومعاها الولد ولسة هتقفل الباب سمعت ضحكة خليعة من واحدة ست جعلتها تتسمر مكانها مصدومة .. الضحكة اتكررت تاني ومعاها صوت ضحكة رجالي هي حفظاها كويس .. عيونها انتقلت على ابنها بخضة .. شددت بايديها على كتفه تقول بحزم رغم ان صوتها خارج بارتجاف : اقعد هنا جمب الباب وماتتحركش من مكانك .. وانا رجعالك حالاً فاهم ؟ هز الولد راسه يقول بخوف منها : حاضر .. اتحركت بخطواتها لداخل الشقة وعند مصدر الصوت فتحت باب غرفة نومها ..فلقت المشهد كالاَتى جوزها وعشقيته على سريرها..الصدمة لجمتها هي وخضت الاتنين..البنت قامت تعدل فى لبسها بأحراج.. وسامح وقف يسألها ببجاحة يداري بيها ارتباكه : انت ايه اللى جابك؟ مش كنتي قايلة انك هاتباتي عند امك ؟ كان في امكانها تهزقه وترد على بجاحته باللى يستاهله لكنها قدرت تتماسك نفسها وهي بترتد للخلف عشان تخرج فقالت بهدوء وتماسك: انا خارجة وراجعة تاني لوالدتي.. ياريت تبعتلي ورقة طلاقي ..عن اذنك. نده عليها بصوت عالي : انتي رايحة فين ياولية انت اقعدي مكانك لاحسن.... قاطعته بحدة وهى بتشاور بكفها : وطي صوتك الولد قاعد بره الغرفة ..بلاش يشوفك بهيئتك دي ويكرهك بعدها العمر كله انصدم من كلامها ونبرة الاحتقار فى صوتها..لسانه اتعقد عن الرد عليها ومبقاش قادر يخرج خلفها ويوفقها عشان الولد.. سمع صوت صفق الباب الخارجي بقوة قبل مايفوق على رنة الموبايل.. رد بالعافية . الوو ... مين معايا ؟ وصله صوت الشيخ مدبولي وهو بيهلل : الامانة انفتحت ياعم سامح والخير كتير .. لم نفسك وتعالى بسرعة قبل ما اكلم معتصم بيه ويحضر هو كمان ............................. فتحت نهال باب غرفة النوم بهدوء وجدته لسه نايم على سريره من ساعة ماسابته وراحت تذاكر خارج الغرفة .. قربت منه تصحيه بحنان : مدحت ..اصحى يامدحت ..اصحى ياحبيبى عشان تتعشى وتاخد علاجك .مدحت..... شهقت فجأة لما لقته شدها من دراعها يوقعها على صدره : بتعمل ايه يامجنون ؟ انت لسه تعبان .. كده هاتضر نفسك . قال بجدية رغم العبث الظاهر قوي فى عيونه : كنتي فين وسيبانى الوقت دا كله لوحدي؟ رفعت نفسها عنه تجاوب بابتسامة: يعني هاكون فين بس ياغلس؟ كنت بذاكر طبعا.. ياللا جوم ياللا عشان تاخد علاجك .. رفع نفسه عن المخدة واتعدل بجزعه: وانا مش عايز علاج ياستي..انا حاسس نفسي كويس والحمد لله . ضحكت بجمال وهى بتتناول العلاج ترد عليه : لا ما انا واخدة بالي .. ماشاء الله عليك .بس احنا لازم نمشي على التعليمات ياحبيبى.. عشان قلبك مايتعبش تاني ولا انت نسيت يادكتور. قرب راسه من شعرها يقول بصوت كالهمس بجوار ودنها: لا مانستش .. بس علاجي فى قربك مني واني اشم ريحتك اللى بتنعش حياتي كلها . غمضت عيونها وهي حاسة بقشعرة مع استمتاع بعشقه وقربه المهلك .. بكف ايدها زاحته بخفة وصوتها خارج بصعوبة : لا بجولك ايه ؟ فوق الاول واشرب علاجك.. مش وقت دلع خالص . ردد خلفها بعبث : ومش وقت دلع ليه بجى ؟ انا راجل تعبان ومحتاج للدلع بشدة .. ان ماكنتش هلاقيه مع مراتي الاقيه فين؟ادور يعني ؟ قالت بشراسة : دا انا كنت ارتكب جريمة.. خاف على عمرك احسن . شدها من وسطها فجأة يقربها منه: ولما انتي شرسة ومجرمة كده.. بتبعدي ليه بجى ها جوليلي؟ ضحكت بجنون : هههههه بطلع دلع يامدحت وخد علاجك الاول . ................................ عاصم كان سايق العربية وبيتنفس بخشونة من الغضب المشتعل جواه وهو بيراقب نجلاء بنت عمته فى المراية الامامية للعربية ..وهي جالسة فى المقعد الخلفي واضعة على حجرها ابنها النايم وهي حضناه رغم كبر حجمه وعمره اللى تعدى الست سنوات .. وكأنها بتسمتد منه الصبر والسلوان .. عيونها شاردة وجهها شاحب بشدة .. هو متأكد ان في مصيبة كبيرة حصلت معاها هى والزفت اللى اسمه سامح جوزها..بدليل انها اتصلت بيه تطلب مساعدته فى عودتها للبلد بعد اقل من ربع ساعة من خروجها منها .. قال بسخط : بس لو تقوليلى الراجل الزفت ده عمل معاكي ايه وتريحينى .. جولي يابت عمتي وانا اخدلك حقك . التفتت ترد عليه وهى بتمسح دموعها: خلاص ياعاصم كل حاجة انتهت.. انا حقى وعمري كله عند ربنا .. كفاية ذل بقى لحد كده ! زفر بصوت عالي : ماتزعليش مني يابت عمتي بس انا بصراحة مستعجب عليكي ..كيف استحملتي راجل زي ده ؟ رغم القسوة والذل اللى ذكرتيها بنفسك وانتي عيلتك مرحبة بيكى وبتحبك ؟ اتنهدت بأسى وقالت : اصلك صغير ياعاصم ومحضرتش الشقا اللى شوفته وانا صغيرة ..بعد ماوالدي طلق والدتي.. خناق معاها وبهدلة فى المحاكم عشان ياخدني منها .. انا اخترت امي وعشت معاها لكن هو ماصدق واكنه اخدها حجة عشان مايسالش فيا تاني ..كنت بغير اوى من البنات اللى بيتكلموا عن اباهاتهم .. دا غير الناس فى الشارع عندنا لما كانوا يندهوا عليا .. كانوا يقولوا نجلاء بنت صباح.. وكأن ماليش والد اتنادى بيه .. حلفت مااخلي ولادي يشعروا بالاحساس ده .. وادي النتيجة . عاصم قال بشدة : كل حاجة نصيب يابت عمتي .. عيبك انك اتنازلتي كتير معاه .. يمكن لو شديتي عليه من الاول كان اتعدل بدل مايسوق فيها ..يابت عمتي .. عمر الخضوع والتنازل ماكان حل . قالت باقتناع متأخر عن تجربة: عندك حق ياعاصم .. انا لو اتربقت الدنيا على دماغه تاني مش رجعاله .. هو مشي فى طريقه وخليه بقى يتحمل لوحده . كان واقف مداري فى مكان قريب من البيت القديم .. يراقب بعيون زي الصقر .. بعد ما اتحجج لمدبولي بانه تعبان ومش هايقدر يحضر فتح المقبرة.. ودا لانه كان مصمم يعرف مصير الكنوز اللى في المقبرة بيروح فين؟ بعد ما ضحك عليه معتصم فى المرة اللى فاتت بمبلغ تافه .. ومرضاش يعرفه طريق المخزن اللى بيخزونوا فيه الاَثار..واديلوا على الوقفة دى اكتر من ساعة فى الأنتظار... ظهرت البشاره لما اضائت المنطقة المهجورة بكشافات لعدة سيارات حديثة خلف بعض ..ابتسم سامح بانتصار لما لمح الشخص اللى خرج من السيارة الأولى بمرافقة معتصم وحراسه الشخصين وعدة افراد من عيلته.. اتأكد ساعتها من صدق تخمينه ..وفرح قوي بذكائه اللي هايمكنه بتعويض اللى فاتت بنصيبه الجديد !! ........................ رفع عيونه عن شاشة التليفزيون وانتقلت نظراته ناحية مراته اللي قفلت باب الغرفة قدامه وهي بتتقدم نحوه بخطوات خفيفة ..اتنصب في جلسته على كنبة الصالون يسألها: ايه الاخبار؟ جلست بجواره تجاوب بصوت واطي : وطي صوتك عشان هي دلوك نايمة مع ولدها هز براسه قبل مايسألها بفصول : طب انتي ماعرفتيش ايه سبب زعلها مع المخفي جوزها؟ حركت راسها بالنفي : لا ياعاصم .. هي مردتيش تقولي على سبب زعلها معاه.. بس انا حاسة انها حاجة واعرة جوي .. وهي عشان بت اصول مش راضيه تفضحه. قال مابين سنانه: الاصول ماتنفعش مع واحد زي ده.. هي بس لو كانت ادتني الامان واتكلمت .. كنت عرفتوا مقامه وفشيت غليلي فيه . بابتسامة جميلة طبطبت بأيدها على دراعه : هون على نفسك ياعاصم ..مدام هي صاحبة الشأن رافضة تتكلم..يبجى احنا مالناش سلطة عليها.. بس انا مبسوطة جوي منك عشان جبتها على هنا.. حكم عمتي صباح جلبها خفيف ومكانتش هاتتحمل تشوف بتها منهارة كده . بكف ايده قربه راسها ناحيته يبوسها على جبينها وهو بينظر لها باعجاب .. لابسة عباية بنص كم طويلة ..بطنها المستديرة بقت ظاهرة بوضوح.. شعرها اللي بتفرده دايماً على ضهرها كسلاسل الدهب ..المرة دي لمته دايرة فوق راسها مراعاةً لشعور بنت عمتها ..وجهها ازدادت استدارته بفعل الحمل واصبح اكتر اشراقاً .. عيونها الجميلة بتلمع قصاده بشكل ساحر.. كانت كلها على بعضها قبلة للنظر والتأمل . سألها بصوت اجش : انتي من امتى كبرتي وعجلتي كده ؟ قربت منه تدخل فى حضنه وهى بتقول بشقاوة : البركة فيك ياحبيبي.. ماهي اللى تاخد عاصم سيد الرجالة لازم تبقى عاقلة. ضحك من قلبه وهو بيضمها عليها اكتر بأديه الاتنين . وبجيتي عفريتة كمان يابدور وبتعرفي تاكلي بعجلي حلاوة .......................... صعد معتصم خلف سراج على سلم خشب بداخل الحفرة العميقة .. بعد ما اطمنوا وشافوا بنفسهم كمية الاثار والخيرات من دهب وخلافه فى المقبرة .. قبل مايشوفوا شغلهم فى تهريبها.. حاجة اَخر حلاوة ياسراج بيه والا انت ايه رأيك ؟ قالها معتصم وهو خارج من الحفرة .. لكنه اندهش بوجه سراج اللى اتغير وهو بينظر امامه.. فاتفاجأ بسامح وهو واقف امامهم بابتسامة سمجة : انت ايه اللى جابك ؟ مش قولت انك تعبان وانا قولتلك هاجيبلك نصيبك لحد عندك ! طلع صوت ضحكة غريبة : هه هه وتضحك عليا زي المرة اللى فاتت وتاكل حقي .. لا ياحبيبي دا كان الاول..قبل ما اكشفكم انت والباشا النائب . هتف عليه سراج بعضب : لم نفسك ياراجل انت واعرف كويس انت بتكلم مين؟ هي هبت منك عشان تيجي تبجح فى كبير البلد وتتبلى عليه كمان ؟ ذهب عن سامح البرود ورد على سراج بغضب: لا ياسعادة الباشا .. انا ما بجحتش ولا قليت ادبي .. انا بس عايز حق تعبى فى المقبرة .. اللى بتجيب ملايين وانتوا بتوزعوهم على نفسكم بكل افترى .. لا وصاحبنا اللى هو جوز بنتي .. يقولي البهوات بتوع مصر هما اللى بياخدوها ويرمولوا الفتافيت هه. جز معتصم على اسنانه وهو بيخاطب سامح حماه : يعني انت عايز ايه دلوك ؟ جيب من الاَخر . سامح بكل ثقة : اللي عايزه ان المقبرة تتقسم بالعدل مابينا .. ماهو انا مش شغال بأجري عندكم . هتف عليه معتصم بصوت عالي قصاد سكوت سراج اللى كان بينظر لسامح بتوعد : انت اتجنيت ياراجل انت وعايز تبقى شريك مع الباشا ؟ دا انا لحد دلوك مااتجرات وعملتها . اه ياحبيبى انا جريئ واعملها ..واعمل حاجات كتير كمان انتوا فى غنا عنها .. تحبوا اثبت لكم . تثبت لنا ازاي يعني ؟ تبلغ البوليس مثلاً : قالها سراج بسخرية قبل مايسمع اصوات وحركة غريبة في الخارج .. وفجأة اتفاجأوا بدخول الظابط ياسر فهمي ومجموعة من افراد الامن حوطت المكان . سلموا نفسكم يابهوات.. انتوا مقبوض عليكم بتهمة تهريب لاثار الدولة : التلاتة تنحوا بذهول قبل مايتدارك سراج نفسه ويهتف على الظابط بتعجرف: انت مش عارفني انا مين ياسعادة الظابط ؟ ولا عارف انا اقدر اعمل فيك ايه بتصرفك الغبي ده ؟ رد عليه الظابط ياسر بثبات: لا يا سعادة الباشا انا عارف مركزك طبعاً كويس .. ودا اللى خلاني اتأخر فى القبض عليك بعد ماخد اجراءاتي من السلطات عليا .. بعد ما اعترف اسماعيل بكمية البلاوي اللي عملها بامرك .. بس كل تأخيره وفيها خيرة .. اديني هاقبض عليك متلبس انت ومعتصم.. شوفت بقى الرزق لما يجي بعد تعب .. حطوا الكلبشات فى ايديهم يارجالة. قال الاخيرة بصوت عالي وحازم ..جعل سامح يصرخ بمقاومة: انا مليش دعوة ياسعادة الباشا .. انا جاي هنا ازور جوز بنتي وأسأله عنها وبس .. ماعرفش اي حاجة عن نشاطه ولا جرايمه . كداب دا يبقى شريك معانا . قالها سراج بصوت قوي اربك سامح اللى صرخ بعصبية حرام عليك ياراجل يامفتري .. هو انت عايز تلبسني مصيبة وخلاص! ابتسم معتصم يقول بتشفي وهو بينشد من راجل الامن للخروج من المنزل ليه ياحبيبي؟ مش دا كان غرضك من الاول؟ انك تبقى شريكنا .. شيل بجى ههه سامح بقى يصرخ بصوت عالي : منكم لله يابعدي منكم لله ياظلمة. ....................... فى اليوم التالى الخبر نزل كالصاعقة على رؤس كل اللى سمعوه ..بعد ما انتشر فى جميع أنحاء القرية ..القبض على النائب المحترم ومعتصم ابن العمدة وانكسار شوكة اولاد الزمقان بالقبض على بعض افرادها واهمهم فتحي واسماعيل .. اما سامح المجهول فاتعرف قدام الناس بحما معتصم ..اللى اتضح انه شريك الاتنين .. صباح بعد ماسمعت الخبر بالصدفة من جيرانها .. دخلت بوجه مخطوف على والدها اللى كان مجتمع باحفاده .. عاصم وحربي : قربت عليهم وهي بتضرب على صدرها : شوفت اللى حصل يابوي ؟ جوز نجلاء وبتها الاتنين اتحبسوا يابوي.. ياخراب بيتك يانجلاء انتي وبتك .. ياحزنك يابتي على جوزك وجوز بتك .. هتف عليها والدها يوقفها: حيلك حيلك..ماتخفي يابت ندب واجعدي افهمي الاول . . فتحت كفوفها الاتنين فى الهوا تقول بقلة حيلة : ولما مااندبش في حاجة كبيرة زي دي ؟ هاندم امتى يابوي ..ونجلاء اللي روحت امبارح ..ياترى ايه حالتها دلوك وهي وحدها ؟ جيبولي بتي دلوك حالاً ياروح انا اجيبها بنفسي... قاطعها عاصم بحدة : بتك جاعدة فى بيتي ماتجلجيش عليها ياعمتي . برقت تسأله بدهشة: كيف يعني بتي جاعدة عندك ؟ هو انت مروحتهاش امبارح..وهي تقعد عندك اساساَ ليه ؟ نفخ ياسين بفراغ الصبر: مااحنا بنقولك من الصبح اجعدي معانا ليه ؟ مش عشان نفهمك.. اجعدي يابتى ربنا يهديكي. اتحركت بدهشة تنفذ كلام والدها وتسمع منهم الحكاية. ................................... يانهار ابيض يامدحت..دا الخبر مالي الدنيا . قفل شنطته بعد ما اتأكد من محتوياتها كويس قبل مايقرب ناحيتها ويمسك الفون يشوف الخبر اللي تقصده . هاتي كده خليني اشوف.. ايه ده ؟ دول كاتبين عن سامح جوز نجلاء انه شريكهم قامت عن مقعدها تعدل في طقم الخروج اللى لابساه استعداداً للذهاب للجامعة..تقول بحزن : ياعيني عليكي يانجلاء ..المسكينة دايماً حظها ناقص. نظر لها بعتاب وقال : بلاش الكلام دا يانهال .. كل واحد بياخد نصيبه . يامدحت انا معترضتش .. بس بصراحة زعلانة على نجلاء اصلها طيبة جداً وزي النسمة..ولا نورا دي كمان ..على كد ما انا بتخنق منها على كد ماهي صعبانة عليا عشان ورطتها بجوازها بمعتصم اللى جرجر ابوها كمان فى سكته العفشة . بكف ايده داعبها على خدودها يقول بحزم وحنية : طاب خلاص فكي كده واصحي..عايزين نتحرك ونمشي ..عشان اوصلك على جامعتك معايا ولا انتي عايزة تريحي السنة دي ؟ شهقت باستنكار : اريح دا يابابا ؟ ثواني اجيب البالطوا وراجعة هوا . ابتسم بسعادة.. مندهش من خفتها وهي بتدخل الاوضة بسرعة تجيب البالطوا .. فى خلال دقيقة خرجت ولكنها وقفت فجأة تسأله بتذكر : تفتكر يامدحت بعد المصايب اللى حصلت دي ..عبد الرحيم هايرضى يجوز وائل ابن سامح اللى محبوس وعليه قضايا لاخته هدير ؟ ........................... بعدها بيومين. وائل كان جالس بوجه متجهم امام المكتب بغرفة الظابط المناوب .. وهو بيستمع لوالده اللي بيشتكي افترا سراج ومعتصم عليه بالزور : ربنا يوريني فيهم يوم البعدا.. دول كأنهم اتفقوا عليا ومصممين اشيل معاهم الليلة.. ربنا على الظالم ربنا على الظالم.. انت ساكت ليه ماترد عليا ؟ قال بفتور : عايزني اقول ايه ؟ سامح بانفعال : هو انا اللي هاعرفك تقولي ايه ؟ اتصرف ..اعمل اي حاجة..ان شالله حتى تكسر الدنيا عشان تظهر براءة ابوك .. وانت بريئ ؟! قالها بحدة اربكت سامح عن الرد فتابع : كون اني اقف معاك فدا واجب عليا .. لكن بقى عايزني اظهر برائتك ازاي؟ وانت متورط معاهم وممسكوك متلبس .عايزني ادافع عنك ازاي ؟وانت بقالك شهور بتحضر سهراتك فى افخم كازينوا سياحي ومرافق بنت من اياهم ..يعنى بتصرف فى الليلة الواحدة مايعادل مرتبك عشر مرات .. الفلوس الكتيرة بقى كنت بتصرفها منين؟ بوجه شاحب وصوت خارج بصعوبة قال : انت عرفت الكلام دا كله منين ؟ وائل بمرارة: اطمن ياولدي ..امي الست الطيبة واللى اتحملت الذل معاك طول السنين اللى فاتت.. مردتيش تطلع سرك ولا تفضحك ..فضلت تقولي انا بس ابنها عشان ابقى على نور فى بحثي عن مساعدتك . اتنحنح بخشونة يسأل : ولما هي بنت اصول اوي كده ..ماجتش معاك ليه بقى ؟ ولا هاتيجي ياولدي .. امي خلاص اخدت قرارها ومش راجعالك تاني ولو انطبقت السما على الارض . قال بتهكم كعادته : ودي برضوا اصول ..تتحملني العمر كله وتيجي فى الشدة وتسيبني .. بقى دا يرضيك ياوائل ؟ قال بقوة: ايوة طبعاً يرضيني..مش كده وبس ؟ لا دا انا هاقف معاها ولما اتجوز هاخدها معايا اسكندرية لو هي وافقت وساعتها مش هامنعها عن زيارة أهلها نهائي .. انت ظلمت امي كتير اوي وهي صبرت .. كفاية عليها اوي كده بقى ..خليها تعيش اللى باقى من عمرها وتنساك.. وزي ما قولتلك في الاول .. انا مش هاسيبك وهاقف معاك .. ماانت والدي ودا واجب عليا . صمت سيطر على الجلسة بعد كلمات وائل الشديدة.. قطعها بس صوت العسكرى اللى بينده بانتهاء الزيارة .. دخل العسكري عشان يسحب سامح للحجز لكنه استاذن فى دقيقة يقوى كلامه الاَخير بندم انا مش زعلان منك ياوائل..عشان انت طلعت راجل يابني مع امك وهي فعلاً عندها حق وتستاهل تعيش فى ضل ابنها بدل جوزها اللى داقت معاه المرار . صمت مرة تانية قبل مايكمل : قبل ما اخرج في حاجة عايزك تبلغها لجدك ! ........................... ردد ياسين الاسم بتركيز : نوفل معروف! ودا من انه بلد الواض ده ؟ والدي قال انه مش من هنا ياجدي.. بس بيأكد ان الراجل ده شريك اساسي فى اعمال الفساد مع سراج فتوح ومعتصم لانه شاغل منصب كبير فى المحافظة..واكيد ان له يد في تزوير ملكية الارض لسراج بدل زاهر. هلل حربي بفرح : يادين النبي .. يعني احنا كده لو بلغنا ياسر بيه هايعرف يوجعه وساعتها الارض ترجع لزاهر ويرجعلي انا فدان القمح بتاعي . قال ياسين بفرح : اكيد ان شاء الله ياحربي ..حتى لو الموضوع هاياخد وقت كفاية اننا هانتقي شر ولاد الزمقان . صباح اللى كانت قاعدة قصادهم مع بنتها فى الناحية التانية على كنبتها الخشب. عشان تحضر فرحك بقلب مليان ياحربي ..نيرة وشها سعيد عليك ياواض . قال وائل بابتسامة: ربنا يتمملك بخير ياحربي .. انت تستاهل كل خير . تشكر ياوائل عقبال فرحك انت كمان على هدير . قالت نجلاء بتوتر : صحيح ياوائل ماقولتليش .. هو عبد الرحيم كان عايزك فى ايه النهاردة الصبح ؟ ابتسم لوالدته بسعادة يقول : اطمني ياست الكل وما تقلقيش ..عبد الرحيم كان عايزني اتغدا عندهم بكرة فى عزومة عاملها لخواته البنات واجوازهم الحمد لله عشان امك كانت خايفة قالتها صباح بارتياح وكملت : عقبال كمان مايحل مشكلة نورا ذهب المرح عن وجه وائل وهو بيقول مابين سنانه : نورا دي ربنا يهديها ..ورثت عن ابويا اسوء صفاته فى الطمع وحب الفلوس . ..................... فيكي الخير يانورا انك جيتي وزورتينى . قالها بابتسامة ماكرة .. قالت هي بدون مجاملة: بلاش ملاوعة فى كلامك معايا يامعتصم .. انت عارف كويس انا جاية ليه ؟ ضحك بصوت عالي : ايوة صح افتكرت يانورا .. لما بعتي المحامي عشان يطالبني بمستحقاتك وحقوقك بعد ماتطلجي وتسيبني .. طب اهون عليكي طيب . نفخت بضيق : اووف ..ياساتر يااخي على اسلوبك المستفز .. ممكن بقى تكلمني جد وتقولي على السبب الرئيسي اللى خلاك تصر اني اَجي بنفسي واسمع منك . بحركة تمثيلية للحزن قال : اصل انا اتكسفت مااقول للمحامي ان مالكيش اي حقوق عندي .. ولو حابة تتطلجي دلوك انا مستعد ..بس هاتطلعي من بيتك بالجلبية اللى انتي لابساها. نهضت عن مقعدها تهتف بغضب : نعم ياعنيا .. والعربية والشقة اللى مكتوبين بأسمى والمؤخر والمتعة.. وكل حقوقي الزوجية فى القانون قال ببرود : للأسف يانورا انتي كل حقوقك اتنازلتي عنيهم ..وبتوقيع يدك كمان . قالت باستنكار : انت بتقول؟ ايه وامتى دا حصل ؟ انتي فاكريني مغفلة وهاتضحك عليا ؟ وقف قصادها يقول بابتسامة سمجة: لا يانورا انتي مش مغفلة .. بس انتي بتحبي الفلوس زي عنيكي ودا السبب الوحيد اللى مخليكي عايشة معايا .. وانا عشان حبيتك ومش مستغنى عنك .. مضيتك على ورقة التنازل من غير ماتدري .. وسط فرحتك بشرى العربية..عشان كنت متاكد ان اليوم دا هايجي وهاتبعينى فى اول فرصة . بايديها الاتنين مسكت فى قماش القميص وهى نفسها تطول رقبته وتغرز ضوافرها فيهم . انت بتقول ايه ياحيوان انت ؟ انت اكيد بتهرج وبتكدب عليا .اكيد بتكدب عليا . شد على ايدها بين كفوفه يهزها بقوة : لا مش ..بكدب يانورا وبكره تتأكدي من المحامي بتاعي لما تشوفي الورقة بنفسك .. وبرضك مش بكدب لما قولت اني بحبك..انا فعلا حبيتك عشان انتي زيي ونسختي .. ومعنديش استعداد ابداً اني اخسرك ولا تروحي لحد غيري .. انا وانتي بنكمل بعض .. انتي ديتك الفلوس وانا مش هاحرمك منها .. طول مانتي على ذمتي. قالت بانهيار : انت بتعمل معايا كده ليه ؟ يااخي حرام عليك ..سيبنى واعتقنى . مد بدماغه ناحيتها يقول بهدوء: انا قولتلك يانورا .. لو عايزة طلاق انا مستعد .. بس مش هاتطولي مني ولا مليم .. لكن بجى لو جعدتي في بيتي تستنيني معززة مكرمة..هاتبقى ملكة وكل اللى تحتاجيه تحت امرك.. وان كان على سجني.. فاوعدك ياستى اني مطولش.. انا داخل السجن مع سراج فتوح .. يعني اكيد هلاقي طريقة واطلع بيها بسرعة .. وساعتها هاعوضك بزيادة .. بس تحت جناحي.. سمعتينى كويس يابت سامح ؟ فلت ايديها اللى ارتخت وهي بتنظرله بصدمة وانهيار.. فكمل : فكري زين فى كلامي يانورا .. ياتعيشى ملكة فى مملكتي ..ياترجعي لامك .. تنتظري الاحسان من جدك ياسين .. بعد ابوكي مايطلق امك.. هه ضحك باستمتاع بعد ماافقدها كل اسلحتها وعراها قدام نفسها ..لما اكتشفت انه فاهمها كويس قوي وعرف نقطة ضعفها اللى داس عليها بكل شراسة ..فى سيبل السيطرة عليها وعلى جموحها امل_نصر بنت_الجنوب