الفصل الثالث والعشرون من روايه طمس الهوية بقلم اسماء المصرى

الفصل الثالث والعشرون وقف مشدوها وهو يرى نزيف الدماء الذي تناثر حوله وسقطة ذلك المارد المفتول العضلات المصاحبة لصرخة ألمه هي ما جعلته ينتبه لما حدث فهرع محاولا سند رأسه قبل أن ترتطم بالأرض الصلبة فتتأذى ويتأذى معها حارسه الأمين. صرخ بأسمه وهو يتفقده بهلع: -زين! نظر له المعني وهو يجاهد ألمه فقد جاءت إصابته عميقة وغرق ببحر دمائه: -فارس باشا، كان نفسي آخد الرصاصة بدالك بس مش كده، مش كده. ردد كلمته الأخيرة كنوع من الرفض لطريقة إصابته تلك وهو يحاول نزع الس\لاح من مازن المتهور الذي أراد التخلص من عدوه اللدود. نظر فارس لرجاله المتفاجئين بما حدث وصرخ بهم: -اطلبوا الاسعاف بسرعه. ابتلع مازن ريقه وهو ينحنى مستندا على ركبتيه يحدثه بقلق: -المستشفي بتاعة بابا بعيده يا فارس ولو روحنا مستشفى تانيه هيكون فيها سين وجيم و... قاطعه فارس محتدا عليه بشراسة: -اسيبه يموت يعني عشان غبائك، اتصل بالاسعاف حالا يا بني آدم. ارتبك مازن وأومأ للرجال حتى ينفذوا أمر فارس الذي ظل يحدث زين حتى لا يذهب بغيبوبة قد تقضي عليه: -خليك معايا يا زين، بسيطة إن شاء الله. ارتعشت شفتي الآخر وهو يعقب على حديثه: -لو عدت على خير هقول في التحقيق إنها إصابه وأنا بتمرن، خلى مازن بيه ميقلقش. ابتسم فارس وهو يمزح معه: -أهو كده يبقى عدل، أنا وأنت ومازن أكلنا رصاصه ومحدش بقى أحسن من التاني، ما هو مش معقول ابقى أنا البوص وعمال أضرب كده لوحدي. حاول أن يمنع ضحكاته التي تؤلمه ولكن لم يستطع؛ فضحك على مزاح رب عمله ولكن النزيف لم يتوقف مما جعل فارس يضغط براحتيه بقوة على موقع الجرح كمحاولة فاشلة لوقف النزيف الغزير، ولكن الطلقة قد اخترقته وخرجت من الخلف مما جعل الإصابة عميقه والنزيف من أعلاه وأسفله. وصلت سيارة الإسعاف فصر فارس على أسنانه وهو يرمق مازن بنظرات رافضة لتصرفه الذي كان قديما يمكن أن يقبله لدوافعه الخاصة وقبل أن تتزن شخصيته ويصبح ما هو عليه الآن: -دخل شادي جوه قبل بتوع الإسعاف ما يشوفوه. التفت وأشار لرجاله بفعل أمر فارس وقبل أن يعود للخارج كان المسعفين قد دخلوا للمخزن واستند أحدهما بجوار جسد زين يحاول إسعافه ووقف النزيف وبعد أن استطاع فعلها وحتى إن كان بوضع مؤقت فقط ليصل للمشفى. حاول حمله هو ورفيقه وضعه على النقالة ولكن جسده الثقيل حال دون ذلك فساعدهما فارس بتحركيه وأصر على الذهاب برفقته للمشفى. وأثناء جلوسه بسيارة الاسعاف استقبل مكالمة من زوجته فأجابها بعد أن وجدها حاولت مهاتفته لأكثر من مرة ولم يستطع الرد عليها بسبب ما يحدث: -ايه يا روحي؟ ابتسمت من غزله الذي لم تكتف منه أبدا ولكنها استمعت لصافرة الإسعاف القوية وصوت المسعف وهو يؤكد على زميله: -اديلوا 5 ملجم بس احنا قربنا للمستشفى. تجهم وجهها بشدة وهي تسأله صارخة: -ايه الصوت ده؟ أنت تعبت تاني ولا ايه؟ نفى برأسه وأجابها: -لا يا حبيبتي متقلقيش أنا بخير. صاحت وهي تتوجه لجناحها لتستعد وترتدي ملابسها وربما اللحاق به تلك المرة: -أنت بتعمل فيا كده ليه بس؟ قولي أنت في الاسعاف ليه يا فارس ابوس.... قاطعها فورا: -يا حبيبتي أنا كويس والله ده زين اللي تعب شويه وهو في التدريب ورايحين المستشفى دلوقتي... قاطعته وقد بدأت بالفعل ارتداء ملابسها: -رايحين مستشفى الفهد مش كده؟ نفى وهو يسأل المسعف: -انتو رايحين انهي مستشفى؟ استمعت للمسعف وهو يخبره اسم المشفى فهمت على الفور بالتأكيد عليه: -أنا جايه يا فارس وأوعى تقولي متجيش. ضحك وهو يعقب: -جايه تتأكدي اني مش بضحك عليكي مش كده؟ عموما تعالي وأنا مستنيكي. أغلق معها ونظر لزين الذي فقد وعيه فتجهم وجهه وتحدث مع المسعف: -هو اغمى عليه ليه؟ رد الأخير موضحا: -الرصاصة جايه في مكان خطر وكويس أوي أنه فضل في وعيه كل الوقت ده، بس متقلقش حضرتك احنا عملنا الاسعافات اللازمة وإن شاء الله يكون كويس. أومأ له وأمسك هاتفه يتحدث مع صديقه الذي أصبح يهتم بكل كبيرة وصغيرة تخصه وكأنه حارسه الخاص: -لحقت اوحشك! عقب عليه سريعا موضحا بعض الأمور التي يمكن التحدث بها على الهاتف وأمام المسعفان: -زين الحارس بتاعي اتصاب إصابه جامده وحاليا رايحين المستشفى فانا هبعتلك اللوكيشن عشان تجيلي وتجيب معاك الملف الطبي بتاع زين انا مش عارف لا فصيلة دمه ولا لو عنده حساسية ﻷي أدويه، وسألوني في الاسعاف ومعرفتش اجاوب. وافقه عمر وهو يتحرك ممسكا مفاتيحه: -حاضر يا فارس هخلي معتز يبعتلي الملف بتاعه على الايميل مع إن زين بقاله 8 سنين مرجعش للشركة عندي. زفر فارس وهو يوبخه: -هو ده وقته يا عمر؟ خلص وتعالى عشان في حوارات كتيره لسه مخلصتش. قوس عمر فمه وهو يبتسم سخرية: -حاضر يا فارس والله أنا مبقتش الحق ارتاح. أغلق معه والآخر يتمتم متذمرا: -أومال أنا أعمل ايه بس! ❈-❈-❈ هرعت تستدعي حارسها ليقلها لمكان المشفى فتسائل الأخير قلقا: -حضرتك تعبانه ولا حاجه يا هانم؟ نفت وهي تحثه على التعجل: -ﻷ، بسرعه يا أمجد هات العربية. دلفت السيارة بعد أن أحضرها وأرسلت له موقع المشفى فظل فضوله يلوح أمام نظراته المرتكزة على الطريق فهو وإن كان يعمل لديهم إلا أنه يشعر أنهم عائلته: -طيب طمنيني بس حضرتك رايحه مستشفى بعيدة أوي كده ليه؟ ردت وهي تتفقد هاتفها: -زين تعب وهو في التدريب وفارس نقله المستشفى. تعجب أمجد واستطاعت هي لمح تعبيراته بالمرآة فسألته فورا: -مستغرب ليه؟ ابتلع ريقه وهو يرد متوترا: -أصل المستشفى دي بعيده أوي عن مركز التدريب بتاعنا ده غير إن ميعاد التدريب بتاع زين عدى عليه كذا يوم، الباشا أصلا مرضاش يخليه يرجع الشغل إلا لما يروح مركز التدريب. أيقنت هنا تلاعب زوجها بها وأنه حاول أن ينفي المرض عنه حتى لا يحزنها فبكت وهي تمتمت بصوت مسموع: -أنا كنت متأكده أنه بيضحك عليا وهو اللي تعبان. هاتفته ولكنها وجدت الهاتف خارج التغطية فنهجت بأنفاسها وهي تحث أمجد بصوت ملتاع وخائف: -بسرعه يا أمجد الله يخليك. ضغط أمجد على مكبس الوقود ليزيد من سرعته وأحكم قبضتيه على مقود السيارة حتى يلحق برب عمله الذي ظن هو الآخر أنه تلاعب بزوجته كعادته ورفضه اخبارها حقيقة مرضه فقاد مسرعا حتى وصل لوجهته. ترجلت بسرعة وقلق وبدأت بالبحث عنه حتى وصلت لمكتب الاستقبال وسألت الموظف الجالس: -معلش لو سمحت في حاله جت في الاسعاف من شوية! أومأ وسألها: -حالة الولادة ولا الحالة التانيه؟ بالطبع جوابها معلوم فنظر بشاشة حاسوبه وأجابها: -أظن الحالة لسه في العمليات. هرعت للمصعد وتبعها حارسها ونظرت أمامها وهي تنهج بخوف فهمس لها أمجد: -تعالي نطلع السلم يا هانم. وافقته وعادت متوجهة للدرج وصعدت حتى الطابق المنشود فوجدت فارس يجلس بمقاعد الانتظار مطرقا رأسه ورفعها سريعا عندما استمع لصوتها المنادي بإسمه: -فااارس. ترك مقعده ووقف أمامها يربت على ظهرها محاولا تهدأتها: -أهدي يا سلطانه أنا كويس. تسائلت بتعابير وجهها فنطق موضحا: -زين زي ما قولتلك اتصاب في التمرين و... قاطعته بلهفة: -اصابة ايه دي اللي تحتاج عمليات؟ هو كان بيدرب ايه بالظبط؟ لم تكمل استجوابها حتى لمحت الضابط يقترب منهم وبرفقته إحدى الممرضات التي تشير لفارس: -هو ده الاستاذ اللي مع الحالة. سأل الضابط وهو مادا ساعده لمصافحته: -مش حضرتك فارس الفهد برده؟ أومأ وهو يصافحه بدوره فتابع الأول: -طيب حضرتك حضرت الواقعه ولا ﻷ؟ أومأ وهو يؤكد: -زين واحد من الحرس بتوعي وكان في مركز التدريب بياخد التمرين الأسبوعي بتاعه والمس\دس ضرب طلقه بالغلط. سأله الضابط بعملية: -طبعا الس\لاح مترخص؟ أومأ فسأل: -والتمرين بيكون برصاص حي؟ رد وهو يظهر علامات الحيرة على معالمه: -الحقيقة مش عارف، بس أظن كده. بنفس اللحظه وصل عمر واستلم زمام التحقيق مبتسما للضابط: -كل اسئلة حضرتك أكيد هتتحط في التحقيق بس لما زين يخرج من العمليات عشان نعرف الحادثه دي حصلت ازاي؟ وافقه الضابط وغادر فوقف عمر يتسائل وهو ينظر لفارس نظرات مدهوشة: -آخر حاجه ممكن اتخيلها إن زين يتصاب وهو بيتمرن! استدار فارس عودة للمقاعد الحديدية وجلس مجهدا فتبعته زوجته تجلس بجواره مترقبة رده: -زين اتصاب وهو بيحاول يمنع مازن من قتل شادي. حدقت أمامها بشكل مندهش ولم تعقب عليه بل استمعت لعمر يسأله: -لأ واحده واحده بقى وفهمنى الحوار كله عشان اعرف للحكاية راس من رجلين. ❈-❈-❈ أنهت عملها بعد يوما شاق اكتظ بالإجتماعات حتى أنها لم تحظ باستراحة غداء وعلى الرغم من عرضه عليها بعد انتهاء العمل أن يقوم بإيصالها او دعوتها للغداء إلا أنها رفضت بلباقة متحججة: -كان ممكن اقبل دعوة حضرتك بس ماما عامله الاكل اللي بحبه انهارده فمعلش خليها فرصه تانيه. ابتسمت فشرد هو بملامحها التي اصبحت محفورة في ذاكرته وأومأ: -بالهنا والشفا مقدما، سلميلي على الحاج وعلى الاستاذ محمود. هزت رأسها وتركته متوجهة للمصعد فتابعتها نظراته التي أبت أن تحظى بلحظة الفراق تلك فضربت برأسه أن يخاطر معها من جديد فأسرع قبيل أن تدلف للمصعد وسألها: -نرمين، هي مامتك عامله اكل ايه؟ ارتبكت وحاولت اخفاء إرتباكها ببسمة رقيقة رسمتها على وجهها وهي حقا لا تعلم ما نوع الطعام الذي اعدته والدتها فأجابت كذبا: -محاشي ولحمه مشوية. بلل شفتيه بطرف لسانه نهما وأطلق أصوات مستمتعة: -اممم، الواحد بقاله كتير اوي مأكلش محشي، يا ترى محشي اي نوع؟ ابتلعت ريقها وقد ابتعدت عن المصعد حتى لا يظل معلقا: -مسألتش، أنا بحب كل الأنواع. هز رأسه وهو يبتسم منتظرا نجاح فكرته وظل يبتسم بوجهها حتى شعرت بالخجل من نظراته التي تصرخ متوسلة لها أن تقوم بدعوته: -انا ممكن أسألها وطبعا حضرتك مش محتاج عزومه. اتسعت بسمته ولم يعقب عليها حتى هتفت تسأله: -في نوع معين حضرتك نفسك فيه؟ نفى وهو يعقب: -لأ بصراحه نفسي في المحشي عموماً بس لو في ورق عنب هبقى مبسوط أوي. ارتباكها ظهر على معالمها واستطاع هو قرائتها ولكنه حقا لم يعد يستطيع أن يمنع نفسه من التفكير بها والتقرب منها وربما الخطوة القادمة هي البوح لها بما يعتري صدره: -لحظه أكلم ماما أسألها. انزوت بركن وهاتفت والدتها تسألها متوترة: -ماما، هو الغدا ايه انهارده؟ أجابتها هدى: -عامله ممبار وطرب وكفته مشوية وشيلالك نايبك متخافيش. ارتبكت بعد أن وجدته يقترب منها ويتحدث بصوت مسموع لوالدتها: -أنا حاسس إني فرضت نفسي عليكم. نظرت له وهي ترسم ابتسامة مصطنعة: -لأ ابدا بس المحشي طلع ممبار ومفيش ورق عنب للأسف. استمعت لوالدتها التي لمعت عينها فورا وهي تتضرع بسرها أن تكف ابنتها عن تصرفاتها الطاردة لفكرة الزواج: -عندي ورق عنب في التلاجه يا نرمو واتبقى حشو كتير هحشي حله بسرعة على ما تيجي. انزلت الهاتف تخبره بحديث والدتها فعقب وهو يتصنع الحرج: -والله كسفتوني بذوقكم. ردت نرمين وهي تعود للضغط على أزرار المصعد: -لا ابدا مفيش كسوف ولا حاجه احنا أهل. وقبل أن تغلق المكالمة طلبت من والدتها: -زودي لحمه وسلطه ولو عامله حلويات عشان يزن بيه بيحب الحلويات بتاعتك. عقب هو بسرعة: -لا لا مفيش داعي تتعبيها كفايه هتعمل ورق العنب. استمع لصوت هدى بعد أن ضغطت نرمين خطئا على مكبر الصوت: -قوليله عامله كيكه هتعجبه اوي وهاتيه وتعالوا يلا، وافردي وشك شويه وانتي بتتعاملي معاه ابوس ايدك. تضايقت نرمين من أسلوب والدتها وأغلقت المكالمة ودلفت المصعد برفقته فاعتذرت له موضحة: -متاخدش على كلام ماما، هي متخيله إن أي حد بيكلمني ويتعامل معايا انه عريس محتمل ومش قادرة ابدا تحط في دماغها فكرة أني رافضه الموضوع نهائي. وصل المصعد فخرجا وهي تكمل حديثها: -يعني لغيت من حياتي فكرة الارتباط عموما. وقفت بجواره وهو يشير لفرد الأمن حتى يحضر سيارته واستمعت له متحدثا بجدية: -رأيك طبعا يحترم، بس يمكن انتي مقرره ده دلوقتي عشان لسه تجربتك الأخيره مأثره عليكي، بس متعرفيش ربنا شايل لك ايه في المستقبل. دلفت بعد أن قام بفتح الباب لها كلفتة رقيقة منه دائما ما فعلها بحضرتها وعقبت عليه فور أن هم بالقيادة: -يمكن، بس انا حاليا الموضوع مرفوض بالنسبة لي نهائي وهي مش متقبله ده، فياريت وحضرتك بتتعامل معاها متاخدش على تصرفاتها. أومأ وهو ينظر للطريق أمامه فسألته وكأنها تذكرت أمرا: -صحيح خطيبتك عامله ايه؟ انعقد حاجبيه والتفت ناظرا لها وأجاب: -أنا مش خاطب. نسى للحظة أنه اضطر للكذب عليها بشأن ارتباطه سابقا ولم يتذكر حتى سألته متعجبة: -هو حضرتك مش كنت مرتبط وهتخطب؟ تذكر واتسعت حدقتيه وتدارك خطأه فورا: -ايوه بس معتبرش خاطب لسه والصراحه كده أنا وهي بينا مشاكل وتقريبا على وشك الإنفصال. تحاورت معه وكأن الأمر يخصها هي: -ليه بس؟ حاول تحط نفسك مكانها لما يبقى في مشاكل وهتلاقي مشاكلكم بتتحل من غير زعل. ركز بصره على الطريق وهو يحاول إيجاد مخرج لتلك الكذبة وبنفس الوقت لا تظهره شاب يتلاعب بمشاعر الفتيات: -صدقيني بعمل كده واكتر، بس هي سطحيه اوي وعايزه بس خروج وسهر وهدايا ومش بتفكر غير في كده وآخر مشكله جت بالصدفه اصلا. نظر لها بلمحة سريعة وعاد ينظر للطريق بعد أن وجدها منصتة باهتمام وتابع: -لما جبت سيرة الخطوبة والجواز والمسؤليات والأطفال لقيتها بتقولي انها مش عايزه تخلف عشان جسمها ميبوظش. التفت يسألها رأيها: -تفتكري اللي زيها تنفع تبقى زوجه أو على الأقل الزوجه اللي في بالي؟ فاجئته بسؤالها الذي قلب موازين المحادثة: -وشخصيتها اللي قاعد تنتقد فيها دلوقتي دي مكانتش باينه في الأول يعني؟ ولا كنت عارفها بس غيرت رأيك؟ عض على شفته وهي تحاصره بفكرها الناضج: -لو شخصيتها زي ما بتحكي فمستحيل تكون مستخبيه واتفاجئت بيها، أكيد كانت واضحه من الأول وكنت قابلها بدليل أنك فكرت تتجوزها، صح؟ وافقها ورد وهو يتنفس بعمق محاولا الخروج من هذا المأزق: -كانت باينه صح، بس كلنا قبل الجواز بنحب الفسح والسهر وحياة الشباب وبعد الجواز والاستقرار كل ده بيتغير، أنا اتفاجئت أنها عايزه تكمل حياتها بنفس النمط حتى بعد الجواز وده أنا مش ممكن أقبله ولما أصريت على رأيي لقيتها بتقولي نبعد شويه عن بعض عشان ناخد قرار صح من غير مؤثرات. تعجبت وسألته: -هي اللي طلبت الإنفصال؟ أومأ وبدل سرعة السيارة ليبطئها حتى يدلف الشارع الضيق المتواجد به منزلها: -فبصراحه كده أنا قررت انفصل عنها لاني متأكد انها مش هتوافق تكون أسره بشكل طبيعي زي باقي الناس. صعدا للطابق الذي تسكن به وطرقت الباب ففتح لها والدها الذي رحب برب عملها ترحيبا حارا بناء على توجيهات زوجته التي حثته على محاولة التقرب منه ليصبح المخرج لابنتهما من حالتها الحزينة. دلف يزن وهو يحمحم بحرج: -السلام عليكم، ازي حضرتك يا عمي. ابتسم محمود له وأجلسه بالصالة وفور أن جلس خرج السيد ليرحب به فوقف منتفضا ليصافحه باحترام: -أهلا يا حاج، ازيك وصحتك عامله ايه. ربت ذلك الكهل على كفه: -الحمد لله يا بني. تحدثت نرمين وهي تتحاشي التقاء عينيها بخاصتيه: -أنا هروح أساعد ماما وطبعا البيت بيتك يا يزن بيه. هز رأسه وتحدث فور مغادرتها: -مش قادر اتعود على الرسميات دي خالص والله يا حاج، بس واضح إن تأثير فارس قوي جدا. هز السيد رأسه موافقا على حديثه ونظر ﻷبنه: -روح يا محمود خليهم يعملولنا حاجه تتشرب على الأكل ما يخلص. فهم الأخير نظرات والده بتركهما بمفردهما ففعل على الفور وتحرك الجد ليقترب منه وربت على قدمه متحدثا له وهو يبتسم: -ازيك يا بني ونرمين عامله معاك ايه في الشغل؟ رد مطريا عليها: -ممتازه والله، شاطره جدا وبتتعلم بسرعه. أيده الجد وهو يهز رأسه بعد أن استند براحتيه على عصاه: -هم أحفادي الحمد لله ربنا فرحني بيهم كلهم، شاطرين في شغلهم وناجحين في حياتهم بس نرمين حاجه تانيه. التفت يركز بصره عليه وتابع: -نرمين كلنا دايما بنقول عليها أنها أشطر واحده في البنات وأجدع واحده وحتى أعقل واحده مش بتكلم بس عن شيرين وياسمين، دي أحسن واحده في أحفادي كلهم بس نصيبها كان وحش. ظل مستمعا له وهو يضيف: -موضوعها مع مازن أخدت القرار فيه لوحدها وكان المفروض مننا دعمها بس بدل ما ندعمها ضغطنا عليها بجوازها من مالك وده السبب في اللي حصل. عقب عليه يزن: -ﻷ يا حاج اسمحلي، ضغطكم عليها يمكن سرع الجواز بس مش هو السبب في النداله اللي حصلت منه ومن اخوه. تنهد السيد وهو يخبره: -ما احنا لو كنا اديناها الفرصه والخطوبه طولت شويه كانت هتعرف شخصية الشخص اللي قدامها لأنك مش هتعرف حقيقة الي قدامك إلا بالوقت. رد عليه الآخر: -اللي زي أنس ده بيعرف يمثل كويس أوي ومكانتش هتعرف حقيقته إلا بالشكل اللي حصل ومش معنى إن حظها كان وحش مره ولا اتنين حتى فتتعامل في حياتها إن ده مبدأ وترفض أي تجارب جديده. ابتسم السيد فورا وسأله: -وأظن مهمة تغيير رأيها ده هتبقى عليك لوحدك ولا ايه؟ غمز له بعينه اليمنى فشعر يزن بالخجل ولمعت عينه وقد فهمه هذا الكهل وصرح توا بقبوله فهمس متسائلا: -هو أنا باين عليا؟ ضحك الجد وهو يومئ له: -باين بس، ده أنت عنيك بتقول أذوب شوقا. ضحك الجد وبادله يزن الضحك عاليا ولكنه عاد لهدوءه وجديته وهو يهمس بالقرب من أذن الجد: -ساعدني يا حاج، أنا خايف أحاول وأفشل وهي وكأنها دايما بتأكد قدامي إنه مستحيل. ربت الجد على كتفه وهو يطمئنه: -أنت إنسان كويس وكفايه إنك قريب فارس أصل فارس عندي حاجه كبيره أوي يا بني وانا كمان ليا مكانه عنده غير كل الناس بس خد خطوات بطيئه كده عشان متهربش منك. ❈-❈-❈ خرج الطبيب ليطمئن ذلك الجالس قلقا فوقف فورا يستمع له: -الحمد لله قدرنا نوقف النزيف وأصلا الرصاصه خرجت من ظهره بس اضطرينا نستئصل جزء من الكبد. اتسعت حدقتي فارس وهو يستمع لوصفه الطبي: -أول ما يفوق هيحتاج رعايه جامده لحد جسمه ما يقدر يشتغل بكبد ناقص بس واحده واحده هيتحسن إن شاء الله. تركه الطبيب بعد أن أخبره بنقله للرعاية المشددة وظل فارس يقف متسمرا أمامه وهو يتخيل كم سيعاني حارسه الأمين بعد شفاءه وجسده لم يعد يعمل بكفاءته المعتادة. مسحت ياسمين براحتها على ظهره: -إن شاء الله هيبقى كويس يا فارس. أومأ وهو يصر على أسنانه يسب ويلعن: -غبي، بني آدم غبي ومعاشرته لچنى خلته متهور وتصرفاته عرضت حياته قبل كده للخطر وبرده متعلمش، ودلوقتي كمان بيخاطر بحياة الناس. لم تجد كلمات مناسبة لمواساته ولم يسعفها الوقت للبحث عن كلمات بعد أن قاطع تفكيرها تسائل عمر: -هو موضوع شادي ده هيخلص امتى وازاي ﻷن الموضوع كده فعلا بدأ يدخل مراحل الخطر. عض داخل فمه وهو يحرك رأسه يمينا ويسارا: -مش عارف. أطرق رأسه يسندها على راحتيها ليفكر فجاءه ذلك الصوت الذي يمقته: -فارس الفهد. انتفض من مجلسه وحاولت ياسمين منعه من الالتحام معه بمشاجرة حتمية ولكن حديث مالك المنكسر جعلته يهدأ نوعا: -أنا معنديش طاقه اتخانق معاك يا باشا. انتظره أن يكمل حديثه وهو يقترب منه: -أمي وماتت وأخويا وطلع أوس** نموذج أي حد ممكن يقابله ودخل غيبوبه بعد ما ورط اسم نرمين واسمك في الق\ضيه ومبقتش عايزه يفوق ويخف إلا عشان يسحب أقواله اللي ممكن تأذي نرمين. فرد فارس ظهره واقفا بشموخ وأظهرت وقفته عضلاته المصقلة بعناية وتكلم بصوته الأجش الذي أصبح نادرا ما يستخدمه: -مفيش أي حاجه عليا ولا على نرمين متقلقش، والموضوع هيخلص ببلاغ كيدي خصوصا بعد عيلتك ما عملت الصح ﻷول مره في حياتكم وشهدوا بنفس الكلام اللي قالوه السكان في منطقتك. أومأ وهو يبتلع بوجل وتلبك وهو يرجوه: -طيب أنا أول مره هطلب مساعدتك. انتبه فارس لنبرته وهو يضيف: -ساعدني أرجع لنرمين، أنا عرفت غلطي وعمري ما هزعلها تاني. همت ياسمين بالرد عليه ولكن نظرات فارس المحذرة لها أخرستها ورد هو بدبلوماسية: -بلاش تطرق على الحديد وهو ساخن ﻷن مش بينجح التصرف ده في كل حاجه، سيبها تهدا والق\ضيه تخلص وبعدها... قاطعه مالك بصياح متذمر: -أنت بتاخدني على أد عقلي، اسيبها تاخد وقتها وهي اتخطبت وهتتجوز؟ تفاجئ فارس من حديثه واستمع لياسمين تسأله: -مين دي اللي اتخطبت؟ ضحك بسخرية وهو يظن أنهما يخبئا عليه الأمر حتى الانتهاء من الق\ضية وتثبيت أقواله بالمحكمة: -مخطوبه لقريبك اللي شبهك ده. سأله بفضول: -يزن؟ أومأ وهو قد تذكر اسمه عندما نطق به فارس توا فهتف فارس وهو غير مدركا لسبب ظنه هذا: -يزن مديرها مش خطيبها يا مالك، زي ما قولتلك سيبها تهدا وربنا يقدم اللي فيه الخير. تركه وسحب زوجته وتبعهما عمر الذي أنهى إجراءات المشفى ومالك لا زال واقفا يتمتم بداخله: -كان بيضحك عليا ولا ده اللي بيشتغلني ولا فين الحقيقة؟! تحرك واقفا أمام الحائط الزجاجي الذي يظهر منه شقيقه الأكبر غائبا عن الوعي وصر على أسنانه بغل وهو يتمتم: -منك لله يا أنس، خربت بيتي واتسببت في موت أمي وسمعتنا بقت في الأرض وحتى الناس اللي كانوا بيضربولنا تعظيم سلام بقوا يتفوا علينا واحنا ماشين في الشارع ❈-❈-❈ وصلا لمسكنهما الذي يبدو هادئا من الخارج ولكنه مليئ بالمصائب التي تقسم الظهر فارتمى فارس على الأريكة الموضوعة بالبهو وهو يحاول ابتلاع غصته التي تؤلم حلقه فاستندت ياسمين أمامه على ركبتيها تحاول أن تخرجه مما يمر به: -الدكتور طمنا انه هيبقى كويس يا فارس. أومأ لها وزفر زفرة قوية فابتسمت وهي تجلس على فخذيه تقبله: -عمر بيقولي انه عزمك على عيد ميلاد بنته. أومأ لها من جديد فحاوطت عنقه وهي تخبره: -بس اليوم ده بتاعي لأني عملالك فيه احتفال صغنن خالص ليا أنا وأنت بس، منه احتفال بعيد الحب ومنه عيد ميلادك يا حبيبي. تنفس عميا ورد: -كنت عارف انك هترفضي، بس نروح نص ساعه نعمل الواجب ونرجع نحتفل سوا زي ما أنتي عايزه. وافقته فسألها: -جيبالي هديه؟ ابتسمت وقبلته وابتعدت تغمز له: -هديه هتعجبك أوي. وقف ليتبعها محاولا استخلاص المعلومات منها ولكن قطعتهما الخادمة التي اقتربت تتحدث بتلعثم وارتباك: -آسفه يا باشا بس في بوليس بره عايز حضرتك. زم شفتيه وهو يخبرها: -دخليه. تسائلت ياسمين بملامحها القلقة فأجابها وهو يتجه للباب: -أكيد التحقيق بتاع زين. هدأت وتبعته فوجدت الضابط يومئ له باحترام وهو يقول: -بعتذر عن الإزعاج بس في محضر معمول في حضرتك وفي مازن بيه وحضرة الظابط قالي أبلغ حضرتك بنفسي قبل الصحافة ما تاخد خبر. تعجب من هذا التحذير الأول من نوعه وعندما وجد الضابط تخبطه هكذا ابتسم وهو يوضح: -عمر الباشا يا فندم مبلغنا إن أي بلاغات نبلغ حضرتك بيها قبل ما تتحول للنيابه. زفر بقوة وشكره وعاد دالفا وهو يستمع لتذمر ياسمين: -معقول نتأزى بالشكل ده من اهلنا، احنا ليه بيحصل معانا كده؟ بكت وجلست بجواره بعد أن فقدت سيطرتها على نفسها: -ابن عمي وعمي ومامتك وعمك وبنت عمتك، أقرب الأقربون هم اللي عمالين يحاربونا. أمسكت هاتفها وضغطت على شاشته فسألها والإعياء يظهر على ملامحه: -بتكلمي مين؟ أجابته وقد وضعت الهاتف على أذنها: -بكلم جدي هو يتصرف بقى في الحكاية دي. أجابها جدها مرحبا: -حبيبتي يا بنتي، عامله ايه يا ياسمين؟ أجابته بتعجل: -الحمد لله يا جدو، شوفت عمايل عمي أحمد؟ ابتلع ريقه وهو يبتسم للضيف الجالس برفقته: -ده يزن ابن عم فارس عندي، ما تجيبي جوزك وتعالي اتعشوا معانا. زفرت بعصبية: -احنا في ايه ولا ايه يا جدو، المصايب ورانا مش عايزه تخلص وفارس هيموت كده من كتر التعب ده لسه عامل عمليه و... قاطعها فارس ساحبا الهاتف من يدها ونظر لها متضايقا من أخبارها لهم بمرضه وتكلم مرحبا بالجد: -ازيك يا حاج؟ رد السيد حزينا ومعتذرا: -الحمد لله يا بني، حقك عليا والله أنا مش عارف الواد ده طالع كده ليه! زفر وهو قد قاب قوسين من الإنهيار: -بص يا حاج عشان نخلص من الحكاية دي، شادي كل هدفه أنا وياسمين نسيب بعض وهو لازم يفهم إن ده مش هيحصل إلا بموتي فخليه يقصر على نفسه كل العمايل دي ولو يقدر يقتلني يتفضل، بس أنا مش هفضل في لعبة القط والفار دي كتير، للأسف هيضطرني أتصرف زي زمان وأذيه جامد وأنا مش عايز أعمل كده. حاول السيد الرد عليه ولكن فارس تابع: -شادي محبوس عندي، خلي ابوه يسحب المحضر اللي عمله ليا ولمازن وهسيبه بشرط ينهي كل الهرجله اللي عاملها دي ويتنازل عن كل القضايا وإلا محدش هيتوقعني بعد كده. سأله السيد وأطرافه ترتعش: -يعني أنت بتقولي شادي محبوس عندك؟ أكد عليه: -آه، ومعدوم العافيه ضرب وكان بينه وبين الموت شعره وزين اللي فداه وأخد الرصاصه بداله وده كان آخر صمام في صبري وتحكمي في نفسي. صمت يستمع لصوته الغاضب: -أظن الرسالة وصلت يا حاج ❈-❈-❈ عاد لمنزل والده بعد أن أكد على رجاله بمواصلة حبسه حتى يفكر بعقاب مناسب ﻷفعاله وها هو يستعد ﻷخبارها بحقيقة أنهما ليسا زوجين. دلف فوجدها ترضع الصغير بقنينة اللبن وﻷول مرة بمساعدة والدته التي ابتسمت له تومئ برأسها بفرحة فغمز لها لتغادر وچنى تهتف: -مازن كنت فين؟ جلس بجوارها وقبلها من أعلى رأسها ومسح على رأس صغيره: -كان عندي شغل. سألها وهو يبتسم: -فايقه نتكلم شويه ولا لسه تعبانه؟ أومأت له ووضعت الصغير على كتفها لتجشأه ووضعته بجوارهما على الفراش فاستهل حديثه قائلا: -مدحت ابننا حالته كده بسببي واحتمال كبير كل ولادنا يكونوا كده عشان أنا طلع عندي قصور بسبب ادوية الأورام. لم تعقب عليه وتركته يكمل: -فكره اننا نكرر تجربة الخلفه تاني مش متاحه ليا حاليا إلا لما أتأكد اني بقيت سليم ومش هخلف طفل يفضل يتعذب طول عمره بسببي. دمعت عينيها وهي تستمع له يتابع: -أنتي لسه صغيره والمستقبل قدامك كبير وأنا مش بس كبير عليكي وكمان مريض وفوق كده ممكن أحرمك من أنك تكوني أم لطفل سليم فهل بعد كل ده هتفضلي متمسكه بيا زي ما أنتي دلوقتي؟ تعلقت بعنقه وهي تؤكد: -أنا بحبك يا مازن، مش مهم الخلفه ولا أي حاجه بس تفضل معايا وابننا إن شاء الله نقف معاه زي طنط دينا ما قالت لي وهيبقى طبيعي. نفى برأسه وهو يؤكد لها: -ماما بتحاول تخليكي تقبلي الوضع بس لازم تعرفي الحقيقة كامله يا چنى، ابننا عمره ما هيبقى طبيعي حتى لو نوع الداون اللي عنده خفيف زي الدكاتره ما قالوا. ابتلع غصته بداخله وأكمل: -أنا اتفرجت على فديوهات كتير وقريت مقالات اكتر عن الحلات زي ابننا وعرفت أنهم أقل نوع في الإصابه بس برده داون وعايز تعامل خاص. ثبت نظراته على حدقتيها وسألها: -هتقدري على الحمل ده ومعاهم احتمال انك تشليني لو تعبت تاني؟ بكت وهي تسأله: -أنت ليه مش واثق في حبي ليك؟ أجابها وهو ممسكا براحتها بقوة: -متأكد من حبك بس تصرفاتك الفتره اللي فاتت خلتني عرفت أنك صغيره ومش أد الشيله دي، كبيرة عليكي يا چوچو عشان كده أنا بعفيكي منها ولو... قاطعته واضعة راحتها على فمه تمنعه من استكمال حديثه واقتربت تحاول تقبيله ولكنه ابتعد فبكت: -مبقتش عايز تقرب مني ولا حتى تبوسني، للدرجه دي زعلان مني! نفى وهو يخفي ألمه وتحدث وتلك الغصة المره ملئت فمه وحتى انفاسه: -طلاقك من شادي طلع باطل وبالتالي جوازنا كمان باطل فدلوقتي أنا أخدت توكيلك للمحامي ورفعنا خلع والحكم أخدناه انهارده والقاضي أكد اننا لازم نكتب كتابنا بعد ما تخلصي النفاس.