الفصل الواحد و عشرون من رواية عطر سارة للكاتبة شيماء سعيد

_ هو حضرتك من امتى بتدخلي حد هنا غير محمود بيه وانا يا ست هانم؟!..

_ عشان محمود يرجع يدخل الاوضه دي تاني لأزم معتز يبقى تحت ايدي، هخليه يحب البنت اللي إسمها سارة دي ووقتها محمود مش هيرضى على نفسه انه ينام مع ست إبنه نفسه فيها وهيطلقها ويرجع لي..

شهقت الخادمة بذهول:

_ يا لهوي يا ست هانم ما ينفعش يحب مرات أبوه، وبعدين الاستاذ معتز لسه صغير موضوع زي ده ممكن يقهره..

بجبروت قالت:

_ أنتِ مالك؟!.. أنتِ حتة خدامه تنفذي اللي أنا بطلبه منك وبس هتخافي على ابني اكتر مني، معتز لسه صغير هيحبها يومين وبعد كده هيحب غيرها المهم ان جوزي يرجع لي..

فتح فيديو أخر وسمعها تقول ما قهره:

_ معتز لأزم يقرب مني اكتر ويحبني اكتر من محمود عشان يبقى تحت ايدي وينفذ اللي انا عايزاه..

حديث آخر:

_ الأستاذ معتز قلبه اتكسر يا ست هانم قولت لك من الاول بلاش..

_ بكره ينسى المهم ان محمود طلقها، انا عارفة ان معتز زعلان جدا دلوقتي لكن لما البنت دي تغور وتبقى كل حاجه ليا انا وهو هنعيش كلنا مرتاحين..

رأي فيديو طلاق أبيه منها، رأي فيديو ضغطها على محمود به حتى يقول إنه ردها، رأي كل شئ أغلق محمود اللاب توب قال بصوت يحمل الكثير من الخذلان:

_ لما ماتت عايدة كنت شايف كرهك لسارة واختك ومع ذلك فضلت محتفظ بالحاجات دي بعيد عن عينك، كنت عايزك تترحم عليها وتفتكر لها الحلو بس، كنت عايزك تحس أنك غالي علينا عشان ما تطلعش بني ادم معقد، لكن أنا بعترف قدامك دلوقتي يا معتز اني اول مرة في حياتي ابقى غبي قدام عيل زيك…

بكي معتز بقهر، للمرة المليون والدته تضعه بخانه الخذلان، كان مجرد لعبة تحركها كما تشاء حتى بعد ما أبتلع التراب جسدها، كره والده من أجلها، رفض الإقتراب من شقيقته، دمر حياة الفتاة الوحيدة التي نالت قلبه ودق من أجلها، أنهار قلبه وحياته أصبحت رماد بعدما قررت حرقه بيدها يوماً بعد يوم، تحدث بضياع:

_ يعني إيه؟!.. يعني انا كنت عند امي كوبري؟!.. عاشت حياتها كلها بعيد عني ويوم ما قربت زرعت جوايا الكره، خلتني بني ادم زبالة بضرب أبويا في ضهره، انا اللي أعلنت خبر جوازك من سارة بالطريقة القذرة اللي نزل بيها للناس، أنا كسرت البنت الوحيدة اللي حبيتها!!!.. كسرت قلبي بايدي عشان هي تنام مرتاحه في تربتها، لما بدأت ألعب على سمية قولت هي دي فرصه العمر، بنت راجل أعمال يعني مصيبه زي دي هتخلي ابوك يتجوزها ما هي مش غلبانة هتأخد قرشين وتسكت، علقتها بيا عشان تطمن وانا موجود وانا بعلقها بيا عشقتها كذبت على نفسي بدل المره 1000، قولت ده مجرد وهم أنا ضيعتها أنا ضيعت ضعت يا بابا ضعت..