الفصل الثالث عشر من رواية عطر سارة للكاتبة شيماء سعيد

_ أفتحي الباب يا سارة عيب كدة..

لم يجد منها رد ليقول بحنق :

_ منك لله يا شيحة روحي ربنا يعمل فيكي اللي بتعمليه فيا…

خلف باب الغرفة كانت تقف الجميلة وهي تكتم ضحكتها السعيدة، ثواني وقالت ببعض الحدة :

_ روح نام بدل ما أدعي عليك ربنا يعمل فيك أنت كل اللي عملته فيا ووقتها هتمشي في الشارع عبيط…

أبتعد عن باب الغرفة وقال بتعجب وبراءة جديدة عليه :

_ أمشي في الشارع عبيط ليه هو أنا كنت عملت فيها إيه الظالمة دي؟!..

_____ شيما سعيد _____

بصباح اليوم التالي..

فتح محمود عينيه بكسل على رنين هاتفه المزعج، فرك عينه بظهر يده وألقى نظرة سعيدة على سارة النائمة على الفراش المقابل للاريكة النائم عليها، زفر بضيق مع رؤيته لرقم الفت على الشاشة، أخذ الهاتف وقام بفتح الخط مردفا :

_ هو في إيه نازلة زن زن مش عارف أنام..

_ البنت فين يا محمود هاتي تعالي بدل ما أرفع عليك قضية خطف..

رفع حاجبه بسخرية وقال :

_ خطف مرة واحدة وده ازاي؟!.. دي مراتي يا ألفت اصحي من النوم كدة وركزي معايا..

جزت على أسنانها من شدة الغضب وقالت :

_ طليقتك مش مراتك شكل أنت اللي محتاج تفوق..

مسح على خصلاته بكسل وقال وهو يقوم من فوق الاريكة متجه للفراش النائم عليه جميلته :

_ أثبتي..

_ أنت بتقول إيه يا إبن طاهر؟!..

_ بقولك أثبتي إني مطلقها لو معاكي قسيمة قدميها للبوليس في قضية الخطف..

_ أنت بتلعب بالبنت يا محمود عشان مالهاش ضهر ولا حد يقف قدامك؟!..

وضع قبلة حنونة على خصلاتها المهلكة لقلبه، ابتسم على رمشة عينيها حبيبته مستيقظة فيكفي على الفت إلى هنا، قال بقوة :

_ أنا ضهرها وأبوها وأمها كمان لو حبت أطلعي منها أنتِ وكفاية عليكي كدة بقى عشان طبق البسبوسة بتاعي فتح عينه..

أغلق الهاتف بوجه جدته بوقاحة جديدة عليه، يبدو انه عاد معها لسن المراهقة الذي لم يعيش به، فتحت عينيها سريعاً على أثر لمسة أصابعه على طول ذراعها الأبيض الظاهر أمامه بوضوح رفع حرارته للمليون، اعتدلت على الفراش بسرعة ثم قالت بحدة :

_ أنت دخلت هنا إزاي أنا مش قافلة الباب بالمفتاح؟!..

_ مهو ده مفتاح أوضة نومي أكيد معايا نسخة تانية، بصي يا قلبي لما تحبي تقفلي الباب بالمفتاح وتضمني اني مدخلش خلي المفتاح في الباب زي ما هو..