الفصل الثلاثون من رواية طـ.ـمس الهـ.ـوية بقلم اسماء المصرى

دمعت عينيه فمسحها بظهر يده وأكمل:
-أوعي تفتكري أني هبطل أزورك ابدا، بس متزعليش مني لو اتأخرت عليكي عشان مشاغل الدنيا بس مهما اتأخرت هجيلك.

التفت ينظر لياسمين ببسمة حزينة ومد راحته لها فأمسكتها واقتربت منه تنحني بجواره جالسة نصف جلسة:
-ياسمين كمان هجيبها معايا دايما.

التفت يحدث زوجته متسائلا:
-مش كده يا ياسمين؟

أومأت مؤكدة:
-أيوه طبعا.

وضعت باقة الزهور التي تحملها على القبر واستمعت له يضيف:
-وحقك هاخده من اللي حرموني منك، متقلقيش ابدا حقك مش هيضيع.

وقف مستندا على زوجته وأخرج محرمة بدلته لينظف راحته المتربة وهندم نفسه قليلا واحتضنتها وهو يودع عزيزة قلبه:
-كنت عاملك مفاجأة وهاخدك معايا الحج بس ملكيش نصيب السنه دي، إن شاء الله السنه الجايه أطع الحج ليكي، سلام يا أحن أم.

تحرك وهو يخلل أنامله بخاصة زوجته فسألته وهما متجهان للسيارة:
-هنروح فين تاني؟

ابتسم ناظرا لها بعيون باكية:
-الدار اللي كانت عايشه فيها قبل ما آلاقيها.

وافقته دون تعقيب فوصلا بعد مدة ونزل من سيارته برفقتها دالفا لغرفة مديرة الدار التي رحبت به فهو شخصية عامة ومعروفة للجميع:
-يا أهلا يا فارس بيه نورت والله.

صافحها مبتسما وجلس أمامها يتحدث دون إضاعة وقت:
-الست حنان صبحي كانت عايشه هنا من كذا سنه قبل ما…

قاطعته تعقب:
-قبل ما تعيش مع حضرتك، عارفه يا فندم ﻷنها كانت دايما بتبعت لنا التبرعات والشيكات باسم حضرتك وحتى كانت سايبه مع مسؤلة الخزنه الكريدت كارت بتاعها عشان نسحب منه الراتب بتاعها اللي بينزل كل شهر.

تعجب من ذلك الحديث الذي يسمعه ﻷول مرة فهل كانت ترسل راتبها الشهري دون أن تأخذ منه قرشا واحدا لنفسها:
-حضرتك عرفتي انها توفت؟

لمعت عين مديرة الدار بالحزن وبكت فورا وهي تردد:
-لا حول ولا قوة إلا بالله، لا حول ولا قوة إلا بالله، الله يرحمك يا حاجه حنان.

حاول أن يتماسك أمامها حتى لا ينهار باكيا وهي تترحم عليها وتسأله:
-من امتى الكلام ده؟

أجابها مجاهدا نفسه:
-أقل من اسبوع، وأنا جاي انهارده عشان أشوف لو في أي حاجه أقدر أقدمها للدار اللي كانت بيتها التاني ومكنتش عارف انها بالأصل بتبعت لكم كل التبرعات دي غير اللي كنت ببعتها أنا عن طريقها، وعشان كده عايزك تطمني إن راتبها هيفضل يوصل لكم بشكل شهري زي ما كانت بتعمل بالظبط بس طبعا مش هينفع يكون على حساب البنك بتاعها لأنه هيتقفل، هشوف المحامي والأجراءات كلها هتخلص قبل أول الشهر إن شاء الله.