الفصل الحادي عشر من رواية عطر سارة للكاتبة شيماء سعيد

_ مش عارفه أشكر حضرتك إزاي مكنتش أحلم بفرصة الشغل دي، وشكر كمان على الشقة أوعد حضرتك هدفع إيجارها في الميعاد..

_ براحتك يا ضحى اعملي اللي يريحك، أعرفك مدام سارة صاحبة المصنع وو..

قطعته سارة سريعاً مردفة :

_ أنسه سارة..

_ نعم..

_ أنسة سارة يا أبيه حضرتك اتلغبطت وقولت مدام..

رفع حاجبه بمعنى حقا، ظهرت إبتسامة على شفتيه اخفاها وقال :

_ ادخلي اتفرجي على مكتبك يا سارة هانم عشان أعرفك على باقي الموظفين ونخلص..

_____ شيما سعيد _____

بشرم الشيخ..

دقت أروى على باب غرفة علي عدة مرات بقلق فموعد الاجتماع متبقي عليه أقل من ساعة، رفعت هاتفها للمرة العاشرة وقامت بالاتصال عليه ولم يرد، توترت وقالت :

_ هو في إيه بالظبط معقولة يكون سابني ومشي بعد العلقة؟!.. لأ ده بارد ميعملهاش..

عادت للدق حتى قررت النزول بالاستقبال تسأل عليه فقال لها الموظف :

_ من وقت ما طلع مع حضرتك منزلش يا هانم ثواني أرن لك عليه..

أومات إليه ثم بللت شفتيها بطرف لسانها عندما قال :

_ مش بيرد يا هانم..

_ طيب ممكن المفتاح أطلع أشوف في إيه بنفسي؟!..

_ مينفعش يا فندم دي خصوصية..

صرخت بغضب وخوفها بدأ يتصاعد بقلبها :

_ هو ايه اللي مينفعش أفرض تعبان والا في خطر أنا السكرتيرة بتاعته ومن حقي أدخل أشوف ماله بدل ما أطلب البوليس..

أوما إليها الموظف بضيق من صوتها العالي وقال :

_ أتفضلي يا فندم المفتاح بس يا ريت توطي صوت حضرتك في ناس مهمة في الفندق..

جذبت منه المفتاح وقالت قبل أن تذهب :

_ لو طلع فيه حاجة هقفلك الفندق اللي فرحان بيه ده..

فتحت باب الجناح بجسد مرتجف، أغلقت الباب خلفها بحذر وقالت :

_ علي بيه حضرتك كويس؟!.. طيب أنت هنا؟!..

فتحت باب الغرفة النوم لتجده مثلما تركته على الفراش، انتفض قلبها وأقتربت منه بسرعة وضعت كفها على رأسه وقالت :

_ يا لهوي ده مولع نار.. علي أنت سامعني أو حاسس بايه حاجة؟!..

لم يصدر منه أي رد فسقطت دموعها بخوف وأخذت الهاتف الأرضية لتقول للاستقبال :

_ أطلبوا دكتور بسرعة علي بيه الحسيني تعبان جامد..

_____ شيما سعيد _____