الفصل السادس من رواية ما بعدالجحيم بقلم زكية محمد
الفصل السادس ما بعدالجحيم
:- عندى 21 سنة
:- بتدرسى فى إيه ؟
لاحت سحابة دموع غلفت عينيها قائلة
:- لا أنا ما بدرسش انا طلعت من التعليم زمان من وقت ما بابا إتوفى ..
:- يا حبيبتى أنا آسفة ما أقصدش …
:- لا ولا يهمك عادى ….اصل خالى قعدنى عنده فى البيت فكتر خيره إنه خلانى عنده باكل وبشرب عاوزة إيه تانى ؟
هتفت بتشجيع :- ممكن تطلبى من ماما صفاء إنك عاوزة تكملى تعليمك عادى ….
:- بعد ما شاب ودوه الكتاب … الحمد لله على كدة اهم حاجة بعرف أكتب وأقرا علشان اصلى مش محتاجة حاجة تانية …… هو إبنك دة عنده كام سنة ؟
علمت ندى إنها تغير مجرى الحديث:-
عنده سنتين
– ربنا يخليهولك …
:- ويخليكى يا عمرى ….
☆☆☆☆☆☆☆☆☆☆☆☆☆☆☆☆
فى قسم الشرطة وفى مكتب اللواء صبرى
وقف اللواء أمام شاشة العرض يستعرض المهمة أمام الضباط قائلا
– أنا جمعتكم النهاردة علشان فى مهمة هتتنفذ النهاردة .
هتف مراد بحماس :- أمرك يا فندم فين المهمة وإيه طبيعتها؟
أكمل اللواء قائلا
– القبض على عناصر إجرامية بتروع المواطنين فى حى شبرا الخيمة عاملين مجموعة بتاخد إتاوات دة غير كمية الأسلحة الغير مرخصة اللى معاهم هتاخدوا قوة معاكم وتقبضوا عليهم …..
هتف عمر بهدوء :- تمام يا افندم إمتى بالظبط ؟
:-قدامكم الملف فيه جميع المعلومات اللى محتاجينها إتفضلوا إدرسوه كويس قبل ما تنفذوا …
وقف مراد قائلا –
تمام ياافندم ….بعد إذن سيادتك …
ترك مراد وعمر المكتب ثم رحلوا ليخططوا لتلك المهمة .
♡♡♡♡♡♡♡♡♡♡♡♡♡♡♡♡♡♡♡♡
فى شركة حامد الداغر وفى مكتبه
تحدث حامد بنبرة يشوبها القلق قائلا
:- ها يا مصطفى اخبار الحملة الإنتخابية اللى نازلة إيه لحد دلوقتى ؟
هتف مطمئنا إياه
– متقلقش يا بابا كله عال العال وقريب ان شاء الله هنسمع أخبار حلوة .
زفر ببعض الإرتياح
:- يا مسهل بإذن الله ….وإنت ساكت ليه ما تتكلم ؟
نظر لهم ببرود قائلاً
– هتكلم أقول إيه مش كفاية الورطة اللى دبستنى فيها دى ….
صاح والده فيه هادرا بعنف
:-متنساش إنها بنت اخويا فلو عقلك وزك تعمل حاجة هتلاقينى فى وشك علطول .
هتف ببرود:- وهعملها إيه يعنى إطمن يا بابا مش سليم اللى يعمل كدة . لكن عاوز أعرف هتعمل إيه فى جوازتى اللى فى الشهر الجاى وإنت دبستنى فى بنت أخوك دى ؟
– متقلقش كل حاجة هتمشى طبيعى ما تقلقش جوازتك هتم اما موضوع بنت اخويا دة سهل جدا فمتقلقش من ناحيته …
