الفصل السادس رواية حارة الدخاخني للكاتبة أسماء المصري

هرعت من أمامه وهي تتذمر بصوت مسموع:
-ربنا ع الظالم والمفتري، ربنا يهدك يا شيخ حسبي الله ونعم الوكيل.

دلفت غرفتها وتبعتها ابنتها فهمست لها بحزن:
-اتصلي بصاحبتك يا بنتي خليها تعمل حسابها إنه لم نسوانه كلهم على ما اكلم ماهيتاب اقولها.

علقت ورد باكية:
-يا ريتك ما كلمتيهم يا ماما كنا هنروحو احنا بس، أهو رايح يستعرض بيهم قدام ملك.

أخرجت تنهيدة حارة بحزن وحركت رأسها مستسلمة لتنفذ أوامره الغير قابلة للنقاش.
❈-❈-❈

جلست بالصالة وبجوارها كل من والدتها وأختها فرحبت بهن حبيبة ترحيبا حارا:
-اهلا اهلا يا سهر، ازيك يا خالتي وانتي يا سالي.

صافحنها وتسائلت سهر باهتمام:
-حسن عامل ايه دلوقت؟

أجابتها مبتسمة:
-زي الفل ياختي متخافيش عليه، أول ما دخل من باب الشقة قال لأمي عايز يستحمى فدخلت تحميه.

تعجبت ولمعت عينيها ولم يخل الأمر من تعقيب والدتها:
-يادي الكسوف، راجل طول بعرض ويخلي امه تحميه! طب كان خلى حسين بدل الكسفة دي.

خرجت والدته بنفس اللحظة تعقب عليها:
-ده ابني يا اختي وبعدين كنتي شوفتيه اتكشف عليا! ده فضل بهدومه عشان الجرح مينفعش ييجي عليه ميه يادوب بس مسحتله جسمه بفوطه مبلوله.

ابتسمت بمجاملة:
-أنا مقصدش يا ام حسن، ربنا يشفيه يارب.

خرجت حبيبة تحمل صينية بها مشروبات فعلقت عليها والدة سهر:
-هو احنا جايين نتعبوكم يا بنتي؟ ده احنا جايين نساعدو شويه، وبعدين الكلام ده للضيوف احنا بقينا اهل ولا ايه يا ام حسن؟

التفتت تنظر لها فأومأت الأخرى ممتعضة تحاول رسم بسمة كاذبة على محياها:
-آه طبعا ياختي أومال ايه، البيت بيتكم بقى انا هدخل افرش لحسن السرير عشان لو حابين تدخلوله.

دلفت غرفته فوجدته يحاول ارتداء قميصه القطني فساعدته وهي تتذمر:
-قال ازاي وازاي بحميك!

ضحك وقد استمع ﻷغلب الحديث الدائر بالخارج فهمس لها:
-خلاص يا امه بقى مش لازم نعملو حوارات من مفيش.

قوست فمها ترمقه بنظرات باردة:
-ده الراجل اللي معندوش دم كان واقف امبارح واحنا بنلمو فلوس المستشفى ومرضاش حتى يطلع 5 جني يديها لممرضة ولا يجيبلك علبه عصير، راجل رمه وبخيل بخل اليهود.

أمسك الفرشاة وقام بتصفيف شعره ووضع عطره وهو يستمع لتذمرها:
-3 سنين خطوبه إلا ما فكر يعزمنا مره على غدوه ولا بوء شاي، ولولا انك بتروح تزورها بالخناق كان منعك خالص تدخل البيت، ولا هي اللي عايزه كل حاجه ومن أغلى الاسعار كأنك قاعد على بنك.