الفصل الخامس والثلاثون رواية طمس الهوية الجزء الرابع من أحببت طريدتي للكاتبة أسماء المصري

إن جائتك الفرصة للمرة الثانية فلا تضيعها وأستغل كل لحظة فيها حتى تصل لهدفك مهما كان فإنها لو ضاعت لن تأت مرة أخرى، فالفرصة كما هي وقت إضافي أعطاه لك الطرف الآخر كي تحاول من جديد لكسب ثقته فهي بالنسبة له كالرصاصة التي يعطيها لك لتق*تله بها إن استغليتها بشكل خاطئ لذا فأحرص عليها واستغلها بشكل صحيح. استقبلها بابتسامة نضرة وعينين لامعتين واقفا يحاول إخفاء ثوران مشاعرة بداخل قلبه، أما هي فارتدت تلك النظارات المعتمة ليس لإخفاء حدقتيها من أشعة الشمس، ولكن حتى تخفي حماسها الظاهر على حركات جسدها. ابتسمت له عندما اقتربت منه ووجدته يفتح لها باب السيارة كما اتعتادت منه بلباقته التي اعتادت عليها ولكنها وقفت أمامه تسأله بخجل: -مش كنا فطرنا الأول قبل ما نمشي. وحتى تزيل إحساسها بالحرج أضافت: -محدش عارف هنلاقي أكل بره يتاكل ولا لأ. ابتسم بسمة واسعة موضحا: -متقلقيش أنا مجهز برنامج تحفه منه نتفسح ونشوف البلد ومنه نجرب أكلات حلال لكذا بلد، منهم اوذباكستان وغيرهم فاتحين مطاعم هنا. دلفت بالمقعد المجاور له بارتباك فأدار محرك السيارة والتفت يبتسم لها: -ممكن تسيبي نفسك انهارده وتحاولي تتبسطي من غير تفكير. تفاجئت لعلمه ما يدور بخلدها عندما أكمل: -بلاش تفكير وكلام جواكي عن ياترى هنتعامل مع بعض ازاي بعد السفرية والكلام اللي يق*تل الفرحة ده، ممكن؟ أومأت له فقاد سيارته حتى وصلا لوجتهما لسور الصين العظيم وصعدت معه ﻷعلى منطقة بالسور ووقفت تنظر للمدينة من أعلى بشرود فوقف خلفها وانحنى هامسا بأذنها: -جميلة أوي. التفتت فجأة بعد أن انتبهت لصوته وابتلعت ريقها بخجل وهو يبتسم ويكمل: -جميلة الصين. ضحكت رغما عنها عندما قلد ذلك المقطع من الفيلم المصري فول الصين العظيم وهتفت معقبة: -أنت اتعديت من فارس ولا ايه؟ غمز لها بطرف عينه وهو يصحح لها: -بصراحه كنت بقول جميلة عنك بس خوفت تتضايقي فغيرت كلامي. أطرقت رأسها وسحبت نفسا عميقا وحاولت تغيير مجرى الحديث فتسائلت: -هنروح فين تاني؟ أجابها وهو يمسك راحتها ويسحبها خلفه: -حديقة الحيوانات. سحبت راحتها فورا منه وتنحنحت بحرج: -يزن من فضلك بلاش... قاطعها معتذرا: -آسف مكنتش أقصد والله. أومأت عدة مرات مصدقة حديثه وتحركت خلفه ودلفت السيارة حتى وصلا لوجتهما وهناك تحولت نرمين من تلك الحزينة والمقتضبة إلى طفلة تضحك وتبتسم وهي تشاهد الحيوانات المختلفة وتطعهما وتجري هنا وهناك بسعادة. نهجت بعد أن شعرت بالتعب من كثرة اللعب والجري فجلست على أحد المقاعد بجوار بائع للفاكهة وجلس يزن بجوارها ساخرا: -لاااا، أنا مش أدك وصحتي على أدي. رمقته بنظرة حادة وغاضبة وقد فهمت أنه يمزح معها بوقاحة وفهم هو على الفور من نظراتها فاتسعت حدقتيه صارخا: -اقسم بالله ما قصدي اللي انتي فهمتيه، أنا بس تعبت من اللف، راعي فرق السن بينا. تجهم وجهها وسألته بحدة: -ليه انت عندك كام سنه؟ أجابها مبتسما: -عندي 31 سنه. هزت كتفيها: -أكبر من ساجد بسنتين يعني. نفى موضحا: -ﻷ 3 سنين. هزت رأسها ساخرة: -مش كبير أوي يعني عشان تتعب، ثم إن الفرق بينا مش كبير أوي يعني انا تميت 24 سنه يعني كلها 7 سنين. أومأ مبتسما وشرد بها وهي تعدل حجاب رأسها فلمحته وزاغت حدقتيها بخجل فابتسم على الفور وهمس يسألها: -نكمل الtour. أومأت ووقفت تتجه معه لسيارته وقاد بها حتى وصلا لمعبد السماء وترجلا، فوقفت نرمين مشدوهة بذلك التصميم المعماري الخاطف للأنظار ولكنها وجدت نفسها تلقائيا تلتفت له مازحة: -سنك هيسمح لك تطلع كل السلالم دي ولا تستناني هنا؟ لمعت عينيه وضحك عاليا وهو يغمز لها بطرف عينه: -لااا أنتي كده بتحطي جوايا روح التحدي، تحبي نعمل سباق؟ حركت رأسها بالموافقة معقبة: -والخسران؟ أجابها والسعادة تكاد تخرج من محجريه: -هو اللي يدفع تمن العشا انهاردة. وافقته ووقفت على أعتاب أول درجة من السلم وهتفت رافعه أصابعها: -مستعد، 1، 2، 3. هرعا بسرعة يصعدان الدرج، ولكنها ربما كانت الأسرع أو تركها هو لتحظ بتلك اللحظة السعيدة عندما وصلت ووقفت على أعتاب السلم الرخامي تقفز بسعادة: -أنا اللي كسبت. تجولا بالمعبد وانتهت جولتهما ونزلا ليركبا السيارة فالتفتت له مبتسمة: -مع انك اللي دفعت كل تكاليف الtour دي بس للأسف هتدفع كمان تمن العشا ﻷنك الخسران. رمقها بنظرة متفحصة وشاردة وهو يجيب بصوت حاني: -أنا كسبان وجودك معايا. ارتبكت على الفور وأشاحت بوجهها تضع حزام الامان وتكلمت وهي تتحاشى النظر له: -مش زودتها شويه؟ نفى بحركة من رأسه: -بالعكس أنا بحاول أحجم مشاعري عشان مضايقكيش. سحبت نفسا عميقا وهتفت: -طيب انا جعانه هتعشيني ولا ايه؟ أشعلت الحماس به بعد كلمتها فضغط براحتيه على مقود السيارة وبدأ القيادة وهو يرد: -بس كده، تحت أمرك. وصلا للمطعم المصري فضحكت فور أن لمحت اللافتات المكتوبة باللغة العربية والتفتت له تسأله: -أنت جيت الصين قبل كده ولا ايه؟ نفى برأسه فتابعت متعجبة: -حساك عارف كل حاجه هنا وكمان مش سهل تقدر تعمل tour زي دي من غير تجهيز. اصطحبهما النادل للطاولة فجلسا وهو يجيب تساؤلها: -أنا قعدت امبارح طول الليل أعمل سيرش عشان اعرف اظبط الtour دي وتكون بيرفكت كده. عادت لارتباكها فأطرقت رأسها والنادل يعطيهما قائمة الطعام فسحبها منه وسألها: -تحبي تاكلي ايه؟ أنا بصراحة محروم من الأكل المصري وبحبه عشان كده اختارت المكان هنا. نجح بإخراجها من حالة السكون اللحظي الذي دخلت به فأجابته: -أي حاجه انا كمان بحب الأكل المصري. أشار للنادل بالقائمة: -طبق محاشي محترم كده ومعاه حمام وملوخية طبعا. تركهما النادل فالتفت ينظر لها وهي تسأله: -هي مامتك مش بتطبخ أكل مصري في البيت؟ نفى مبتسما بسخرية: -بصراحه ماما أكلها يعني مش اوي، هي في الحقيقة مكانتش فاضية للمطبخ بسبب شغلها ولما سابت الشغل كانت كبرت بقى على شغل المطبخ، بس أنا بعرف أعمل كام صنف كده لو دقتيهم هتاكلي صوابعك وراهم. قادها فضولها لسؤاله: -أنا عارفه انكم عيشتوا بره بس معنديش تفاصيل يعني كنتوا في اي بلد وايه سبب سفركم و... قاطعها والبسمة تتسع حتى أذنيه: -انا مبسوط انك عايزه تسمعيني بتكلم عن نفسي. خجلت من جديد فتوسلها بلهفة: -ﻷ ابوس ايدك مش كل ما اتكلم معاكي بعفوية تتكسفي انا مقصدش حاجه. سحب نفسا عميقا وتنهد بحزن وهو يتابع مطبنا: -ماما عرفت بشغل بابا وأكيد انتي عارفه حكايته مع المافيا والسلاح، لما عرفت خيرته ما بينها هي وولاده وما بين الشغل بس هو ضحك عليها ونيمها كام سنه كده مفهمها انه بطل الشغل ده لحد فارس ما بلغ عنه ووقتها فهمت انه لسه شغال في الممنوعات، وطبعا أنا كنت وقتها عندي 9 سنين ومتعلق ببابا أوي وهو استغل ده عشان يضغط عليها وتفضل معاه. ابتلع ريقه وابتعد عن الطاولة حتى يضع النادل الطعام فأشار لها لتبدأ بتناول الطعام وهم هو الآخر بالأكل وهو يكمل: -فضلت تحاول معاه 5 سنين انه يطلقها أو حتى يسيب الشغل ده بس موافقش، وفي الخمس سنين دول كنت أنا كبرت وبدأت أفهم كل حاجه بتحصل حواليا وقولتها يلا نسيبه ونبعد بس هو مسبناش في حالنا وفضل يطاردها في كل مكان بتروحه ومحدش من عيلة الفهد قدر يقف معاها. تعجبت مما يقصه عليها وسألت سؤالا بدا ساذجا: -وفارس كان فين من كل ده؟ ضحك وهو يجيبها: -كان لسه في الجامعة وفي نفس الوقت انشغل بالشغل في العالمية ﻷنها كانت بتقع فمكانش فاضي لحد ولا كان بيهمه حد في الوقت ده، وغير كده كان يادوب 21 سنه يعني لسه شاب هيقدر يعمل ايه، فارس اللي معانا دلوقتي ده غير فارس اللي أنا عارفه اللي كان بيكره كل العيلة ومش بيهتم بحد غير نفسه ومازن وبس. تنهد عميقا وتابع: -كان لينا خال عايش في النمسا تواصلنا معاه عشان يساعدنا نهرب ونروحله وطبعا بابا كان عنده نفوذ ومعارف جامدين أوي محدش عرف يساعدنا إلا لما ماما وافقت انها تفضل على ذمته وانه يزورنا في اي وقت يعوزه ووقتها سابنا نسافر وعيشنا هناك سنتين ماما كانت بتشتغل ليل نهار عشان تكون فلوس تهربنا بيها بعيد عنه. شعرت بالأسى على حاله ومما يقصه فحاولت إخراجه من تلك الحالة التي تملكته ورأتها هي بوضوح فسألت ساخرة: -يعني اتعلمت لغة البلد على كده في السنتين دول؟ أومأ فأضافت: -ويا ترى النمسا اللغة بتاعتها ايه؟ نمساوي! صدحت ضحكته الرجولية بالمكان ولم يتمالك نفسه وأجابها والضحكات عالقة بصوته وهو متأكد تمام التأكد أنها تعلم الإجابة مسبقا: -ألماني يا نرمين، اللغة الألماني مش النمساوي سا واد يا نمس انت. ضحكت معه فوجدته يقطع الحمام بالشوكة والس*كين فنظرت له مبتسمة وهتفت ضاحكة: -هم ولاد الناس بتاكل الحمام بالشوكة والس*كينه برده؟ رمقها بنظرة متحيرة فأضافت بسخرية: -امينه شلبايه أكيد فخوره بيك. تجلجلت ضحكاته ولكنه انتبه للناس وهي تلتفت لهما فأطرق رأسه هامسا: -بلاش تضحكيني الناس بتبص علينا. غمزت له وهي تمسك فرد الحمام بيديها وتقسمه لنصفين وتبدأ بتناوله ففعل مثلها واستمع لها تسأله: -وبعد النمسا روحتوا فين؟ أجابها وهو يمضغ الطعام: -إيطاليا شويه والمجر وبالنهاية استقرينا في لندن لما كبرنا وبقى صعب على بابا انه يهدد ماما بينا زي عادته. سألته متفاجئة: -كنتوا بتسافروا ولا بتهربوا منه؟ أجابها بغصة علقت بحلقه: -كنا بنهرب منه، في وقت من الأوقات فارس ساعدنا بالهرب، ماما تعبت وكنا محتاجين فلوس للعملية واضطرينا نبعت لعمي مراد فبابا عرف مكانا وجه ياخدنا وافتاجئت بفارس جاي قبله وأخدنا سفرنا على لندن وعمل ﻷمي العملية وساب لنا فلوس في حسابنا، ولما ماما رفضت قالها دي من ارباح اسهم الشركة ومن وقتها بقى كل فتره يبعت لنا جزء من أرباحنا ويعمل طبعا مشاكل كبيره مع بابا عشان بيخصهما منه بالعافيه، عشان كده لما المنظمة دي جت وساومتنا عشان نوقع فارس مقدرناش نعمل كده بالرغم من انهم كانوا بيهددونا بماما لأن كان له رصيد كبير عندنا بالرغم إن مكانش في بينا ود ولا تعامل. اتسعت حدقيتها ولمعت من إعجابها بما يقصه عليها فابتسم وشرد بشرودها به وظلا هكذا ولم ينتبها حتى جاء النادل يقدم لهما كعكة مزينة على شكل قلب وهو يهنئهما: -دي هدية بسيطة للعرسان. حاولت أن تنفي ما ظنه النادل بهما، ولكنها اختنقت بحروفها عندما شكره يزن دون أن يصحح له الأمر وعندما ابتعد غمز لها: -بيحسبونا عرسان، أهي حاجه بلاش كده مش هدفع تمنها أحسن فلست انهاردة. ضحكت وهي تعلم أنه يمزح وعضت على شفتها تسأله: -أنا مش مستعدة لسه يا يزن ومش عايزه أغلط الغلطة اللي غلطتها وقت ما سبت مازن. استمع لها تكمل دون أن يقاطعها: -اتعرفت على مالك ومكنتش مستعدة وحسبت إن هو هيكون الدوا للجرح اللي اتجرحته من مازن بس مقدرش أحبه وحياتي مكانتش أحسن حاجه بعيدا عن اللي حصل من أخوه. استقام بجسده وتكلم بصوت هادئ: -بس انا حاسس بحاجه من ناحيتك يا نرمين، انتي بتحاولي تموتيها جواكي بدل ما تكبريها. أطرقت نظراتها أمامها معقبة: -عشان مبقاش عندي ثقه في حكمي على الأمور، وغير كده إحنا مش مناسبين لبعض. سألها بحدة نابعة من لهفته: -لييييه؟ ليه مش مناسبين لبعض؟ سألته وهي تنظر له بتركيز: -أنت اتجوزت قبل كده أو حتى ارتبطت؟ نفى فضحكت ساخرة: -أظن من حقك تاخد بنت مسبقش لها الجواز و... قاطعها مؤكدا: -من حقي فعلا أخد بنت مسبقش لها الجواز، ومن حقي كمان آخد اللي قلبي اختارها مهما كانت ظروفها. دمعت عينيها فسألها بحزن: -طيب انتي بتعيطي ليه دلوقتي؟ أجابته وهي توبخ نفسها لإظهارها الضعف هكذا أمامه: -أنت دلوقتي بتعمل نفس غلطة مالك، قولتله مش مستعده وهو أصر وقالي أنا هستنى وبعدها لقيت كل حاجه بتحصل بسرعة ومكنتش ملاحقه حتى أفكر و... قاطعها عاقدا جبينه بحدة: -أنا مقبلش تشبيهني باللي اسمه مالك ده، أولا مالك كان عارف بحبك لمازن وقبل على نفسه يدخل معاكي في علاقه وانتي قلبك لسه مش ملكك، لكن أنا متأكد إن مالك مدخلش حياتك أصلا عشان يخرج منها وبالنسبة لمازن فمش هكدب عليكي يمكن شكيت لحظات أنك لسه بتحبيه بس بعدها اتأكدت انه بقى ماضي ولا كلامي غلط؟ أومأت تؤكد: -صح جدا، المشكلة إن كل اللي حواليا فاكرين لما بجيب سيرته أو بسأل عن حياته اني لسه بحبه، بس الحقيقة هي مجرد فضول عشان أعرف انا قصرت في ايه عشان حياتي معاه تفشل وتنجح مع غيري بس أنا مش عايزه ادخل في حوار مع عيلة الفهد. سألها بضيق: -ليه؟ حد ضايقك بكلامه أو لمح برفضه مثلا ولا ايه السبب؟ انا لو كان عندي مشكله مع رأيهم كنت اخدت كلام مازن بعين الاعتبار لما طلب مني ابعد عنك. ظنت أنه يعلم بكل ما دار فعقبت: -وعشان الكلام الكتير اللي هيدور بسبب ده وخصوصا بعد الموقف اللي حصل مع مازن وفارس جاي يقولي مازن لسه بيحبك واعترفلي بكده وهيطلق جنى منه لو انا عيزاه. بكت رغما عنها وهي لم تلاحظ احمرار حدقتيه: -زعلت من فارس أوي وأنا اول مره أزعل منه بجد، بس أهاني جامد أوي بكلامه وكأني خرابة بيوت وبحوم حوالين جوز اخته عشان كده انا عايزه ابعد خالص عن عيلة الفهد و... قاطعها محتدا: -مازن ملوش حق فيكي يا نرمين ولا فارس له دخل بالحوار ده، رأيك انتي وبس هو اللي يهمني وانا بجد رافض تماما تحطيني في مقارنه مع أي حد من العيلة لأني غيرهم كلهم. هزت رأسها مؤكدة: -عارفه والله وإلا مكنتش قعدت معاك وفضفضت بحرية كده. مد راحته وتلمس خاصتها فانتفضت تبتعد عن لمساته، ولكنه أحكم قبضته عليها ونظر بعمق عينها وسألها: -انا بحبك، ومش عايز غير أعرف إذا في جواكي اي مشاعر ليا حتى لو لسه في البداية لأني مش هقبل على نفسي أفضل أطاردك كده وانتي مش عيزاني بجد. انتبهت لحديثه وسحبت راحتها منه بخجل وسألته متعجبة: -تفضل تطاردني؟ أومأ وقد وقع بزلة لسانه ففهمت على الفور: -أنت مجتش هنا صدفة صح؟ أومأ متحاشيا النظر لها فسألت: -ياسمين ولا شيرين اللي عرفوك؟ رد مبتسما: -لا ياسمين ولا شيرين. تعجبت فسألته بحدة أكبر: -مين؟ ساجد؟ نفى مجددا وسحب نفسا عميقا وطرده بتمهل وهو يجيبها: -جدك الحاج السيد غزال. ❈-❈-❈ أغلقت ورائهما الباب وتبعتهما لداخل جناحها مبتسمة وتوجهت لغرفة ملابسها لتخرج منها تلك الملابس المخصصة للرقص وجلست أمامهما تتحدث بهمس: -أخيرا دخلوا يشتغلوا في المكتب وسابونا على راحتنا. عقبت عليها خديجة: -مش عارفه مالهم وكأنهم عارفين إحنا هنعمل ايه؟ ومعطلينا مش عايزنا نطلع لوحدنا. ضحكت ياسمين والتفتت تنظر لچنى الشاردة ودفعتها برقة في كتفها لتنتبه لها: -چوچو، مالك سرحانه في ايه؟ حركت رأسها تنفي حزنها أو شرودها: -مفيش، انتي مطمنه للناني الجديدة دي يا ياسمين؟ احنا سايبن معاها الولاد كلهم، تفتكري هتقدر عليهم؟ أكدت لها بحركة من رأسها: -فارس عمل عليها تحريات ولا بتاعة الأمن القومي والمخابرات متقلقيش، مش هنقع في الغلط ده تاني. همت خديجة بالوقوف وهي تصيح بهما: -يلا بقى بلاش تضييع وقت عشان تراجعوا معايا على الحركات بتاعة المرة اللي فاتت وتاخدوا حركات جديدة. غمزت لها ياسمين: -والله لو فتحتي مدرسة رقص تكسبي دهب وكده كده بنات بس يعني مفيش رجاله هتشوفك. ضحكت خديجة معقبة على حديثها: -عمر رافض شغلي من الأساس حتى قبل ما أحمل في دنيا، وما صدق حملت ومن ساعتها مش بيخرجني من البيت إلا في حدود الزيارات العائلية وبس. تعجبت وهي ترمقها بنظرات مندهشة: -مع إن اللي يشوفه يحسبه فري و open minded بما إن اخواته ومامته مش محجبات، وغير كده بحسه مش متسلط معاكي يعني مش زي الأستاذ بتاعي. اتسعت حدقتي خديجة مؤكدة: -لاااا الحمد لله مش شبه فارس، أنا بشفق عليكي بصراحه من أسلوبه بس عمر بردة له تحكمات زي باقي الرجاله ورافض شغل نهائي بس أنا فعلا هحاول اتكلم معاه تاني في الموضوع ده ﻷنه من ساعة ما اشتغل مع فارس مبقاش بيرجع البيت خالص وبقيت بشوفه بالصدفه وبحس بملل رهيب وأنا لوحدي. شاكستها ياسمين تدغدغها: -وتقعد لوحدك ليه يا جميل؟ تعالي اقعدي معايا واهو نكمل دروسنا سوا. غمزت لها وچنى لا تزال شاردة بمقتطفات مما حدث معها بالأيام المنصرمة ومحاولاتها الدئوبة للحفاظ على زوجها، وبالرغم من شعورها بفتور العلاقة بينهما إلا أنها أصرت أن تكمل طريقها للنهاية معللة لنفسها: -مازن من حقك انتي عشان ابننا محتاجه. دفعتها ياسمين من جديد بغلظة تلك المرة: -أنتي يا بت انتي ما تركزي معانا شوية. ابتسمت وأومأت وبدأت باتباع تلك الحركات اللولبية والمتمايلة التي تعلمها لهما. ❈-❈-❈ زم شفتيه للأمام وهو ينظر لتلك الأوراق أمامه وعاد ينظر لكل منهما وهتف بحدة: -أنا الكلام ده كله ميشغلنيش. أشار لمازن بعد انعقاد جبينه: -أنت مسؤول توفر لي سيوله عشان الشركة والمصنع ميقفوش. وعاد ينظر لعمر وهتف بصيفة أمرة: -وأنت تتصرف وتجيبلي رجال أمن وجردات لكل المؤسسة أنا ما صدقت الدنيا هدت وبقى في وقت نأمن المنشئات عشان ميحصلش اللي حصل قبل كده. زفر عمر بضيق وهو يرد حدته: -أنت محسسني أني هضرب الأرض أطلع جردات، أنت فاهم أنا بتعب أد ايه عشان اجيب الولاد دول وادربهم واعلمهم لحد ما يوصلوا للوضع ده؟ عارف الجارد الواحد بيكلفني كام عشان يتسمي بودي جارد مش فرد امن عادي؟ ضغط فارس على أسنانه وهو لا يقبل بحدته معه فصاح به: -لو عايز تمويل قول على طول من غير مماطلة، لكن اللي طلبته منك يتنفذ ولو مش قادر قولي وأنا أشوف حد يساعدك. لم يقبلها على نفسه فهم بالوقوف وهو يشير له بسبابته بشكل تحذيري: -خد بالك من أسلوبك معايا يا فارس، أنا استحملتك كتير وقولت مضغوط وعنده مشاكل بس الحمد لله الدنيا هدت وحضرتك بقيت حاج يعني المفروض تبقى اهدا من كده و... قاطعه فارس وقد انتفض هو الآخر من مجلسه: -بقيت حاج فاسيبكم تخربوا الدنيا؟ نفذ اللي بقوله يا بني آدم من غير نقاش ومن انهارده تتعود زيك زي غيرك، إن وقت الصحوبية حاجه وساعة الشغل أنا فارس الفهد وكلكم هنا بتشتغلوا عندي، مفهوم؟ زغر بعينه لكيلهما فلم يرد مازن وآثر عمر على تركه وهو يرد: -أنا اشتغلت مع وزراء وسفراء ومحدش استجرا يعاملني بالشكل ده، فلآخر مره يا فارس إكراما للصحوبية اللي لسه قايل عليها خد بالك من أسلوبك معايا. هدر فارس بغضب فوقف مازن حائل بينهما وهرعت الخادمة تطرق الباب على جناح ياسمين ودلفت فورا فذهلت مما تراه أمامها من ألوان وأزياء راقصة وتلك الموسيقى الراقصة التي يتراقصن عليها. انتبهت ياسمين لدخولها المفاجئ فسألتها بخضة: -في ايه؟ حد من الولاد محتاج حاجه؟ نفت وهي توضح: -الباشا بيتخانق مع عمر بيه ومازن بيه وصوتهم عالي أوي. هرعت خديجة لتغيير ملابسها وفعلت كل من ياسمين وچنى المثل وتوجهن لغرفة المكتب حيث يعمل الرجال فوجدن عمر يقف مستعدا للذهاب وهو يهدر بالخادمة الأخرى: -اطلعي ناديلي مراتي من فوق. اقتربت منه تربت عليه وتهدأه: براحه يا عمر ايه اللي حصل بس. اقتربت ياسمين من زوجها وهي تعلم بالطبع أنه ربما السبب بهذا الشجار فسألته بترقب: -في ايه؟ لم يجبها واقترب من عمر الغاضب وحاول أن يسعل ليجلي حشرجة صوته وهتف بقوة ووقار: -خلاص يا عمر متكبرش الموضوع، أنا اتعصب وانت كمان مسكتش يعني. لم يهتم عمر بحديثه ونطق بغضب: -لما تعرف تفرق بين الناس اللي بتساعدك في شغلك وبين الناس اللي شغاله عندك نبقى نتكلم يا فارس. التفت لزوجته وأمرها بغلظة وقد تجلى الغضب بحدقتيه: -اطلعي هاتي دنيا خلينا نمشي. غادر الأخير فنظرت ياسمين في إثرهما وهي ممتعضة من أسلوب زوجها الحاد وهتفت توبخه: -مش هتتغير ابدا، مفيش فايده فيك. تركته وصعدت لجناحها ولم تعر لندائه أي اهتمام فالتفت لمازن يأمره: -خد مراتك وروح دلوقتي يا مازن. أومأ بصمت وأشار لچنى: -هاتي مدحت من فوق. رفضت وهي تخبره: -أنا عايزه فارس في موضوع مهم، معلش اطلع أنت هاته وسبني اتكلم معاه شويه. وافق دون جدال فهو يشعر بالتعب والإرهاق في الآونة الأخيرة، وظن أنها ستتحدث معه بشأن قض*ية والدتها التي لم تحسم بعد ولكنها كان لها رأيا آخر عندما اغلقت الباب وجلست أمامه تستهل حديثها: -كنت قولتلي أجرب وجهة نظري ولو فشلت ارجعلك. لم ينتبه لوهلة عن أي شيئ تتحدث وعندما فهمت نظراته وضحت: -اقصد موضوعي أنا ومازن. انتبه وحرك رأسه دلالة على انصاته وسألها: -في جديد حصل؟ نفت وسحبت تنهيدة حارة وقالت: -مازن مش هو مازن بالرغم من كل محاولاتي اني احافظ عليه، في حاجه ناقصه بينا وأنا مش قادره أحددها. قوس فمه وعقب: -أنتي عارفه ايه اللي ناقص يا چنى وبتحاولي تعملي نفسك مش واخده بالك، بتغلطي نفس الغلط بتاعه لما حاول يخفي مشاعره ناحية نرمين، والنتيجة انه أول ما اعترف بيها لنفسه وليا مبقاش قادر يخبيها حتى عنك. بكت وأطرقت رأسها بحزن فاحتضنها وربت على ظهرها يسألها بحنان: -حبيبتي متعيطيش، أنا وافقتك لما طلبتي مني متدخلش بس لو عايزه مساعدتي في أي وقت انا موجود. رفعت وجهها تنظر له بحب وفخر أن هذا الشخص هو السند والحماية على حق: -انا فعلا محتجاك يا فارس، محتاجه منك تقويني وتقولي الصح فين والغلط فين؟ نظر بعمق حدقيتها الحزينتين وهتف: -أنا رأيي هو هو من لحظة ما عرفت، محدش يقدر يعيش في علاقة بتسحب كل الطاقة دي وفي الآخر قلبه مش معاكي. بكت بانهيار وأحكم هو من احتضانها: -انا السبب في اللي حصل ده، مكانش لازم أوافق أبدا على جوازكم وحتى لو على سيبل الاخوة، لاني أكتر واحد عارف مازن و.... قطع حديثه دخوله المفاجئ بعد أن استمع لحديثهما بالصدفة وهو عائد يحمل صغيره معه فدلف بغضب وهدر بفارس: -أنت بتحاول تعمل ايه بالظبط؟ رمقة بنظرة محذرة من التمادي في صراخه به بهذا الشكل: -خد بالك من صوتك يا مازن. سحب نفسا عميقا وأشار لزوجته: -يلا يا چنى. أحكمت ذراعها على جسد أخيها وهي تخبره: -بما انك سمعت وعرفت اني عارفه فمبقاش ينفع يا مازن اعمل نفسي عايشه عادي. حاول الاقتراب منها وسحبها، ولكنها اختبئت بكنف أخيها فوقف هو أمامه كحائط صد ولم يسعه سوى سؤاله: -أنت مبسوط كده لما زرعت الشك في قلب اختك من ناحيتي؟ ردت هي تدافع عن فارس: -لو فاكر إن فارس هو اللي قالي علي الحوار تبقى غلطان يا مازن، أنا سمعتك وأنت بتعترف له بحبك لنرمين عند عمي مراد وبسذاجتي فكرت اني اقدر اغير ده بس للأسف فشلت. نهج بأنفاسه وهو يجدها تسحب منه الصغير وتعود لحضن اخيها: -انا هفضل هنا لحد ما تخلص إجراءات الطلاق. ❈-❈-❈ ظلت تتقلب بفراشها لا تستطيع النوم فتناولت هاتفها من جوارها ونظرت بالتوقيت لتجده الواحدة بعد منتصف اليل بتوقيت الصين؛ فاحتسبت الوقت لتعلم انها ربما السابعة مساءا الآن بمصر فهاتفت توأم روحها وابنة عمها لتقص عليها ما حدث معها بتلك الرحلة، وربما أخذ رأيها بما حدث منه. ضغطت على شاشة الهاتف تتصل بها فأجابت الأخرى بصوت متضايق وعصبي فسألتها على الفور: -مالك يا بنتي؟ أجابتها بحدة وغضب: -فارس عمره ما هيتغير يا نرمو، أنا تعبت منه بجد ومش لاقيه حل معاه، الواحد قال بعد ما يحج هيهدى ويبقى بني آدم عادي بس طبعه مش عايز يتغير أبداً. ضحكت الأخيرة وهي تعقب: -فارس الفهد هو هو فارس الفهد مهما حاولتي تغيري منه وتروضيه يا ياسمين، مظنش الفهود بتتروض أبدا هي ممكن تتدرب، أظن قدروا يروضوا الأسود ومع ذلك ممكن في لحظة تقلب على المدرب بتاعها لكن عمرك شوفتي فهد متروض؟ ضحكت بنهاية حديثها فتنهدت ياسمين: -اضحكي يا ختي أضحكي على مأساتي. غمزت لها وهي تنظر لحدقتيها الحزينتين عبر المكالمة المرئية: -متدرويش على النكد يا سو، انتي حفظتي جوزك والمفروض بتعرفي تتعاملي معاه، كبري دماغك هو برده شايل هموم. أومأت موافقة على حديثها وانتبهت أخيراً لتسألها: -انتي طولتي ليه كده في الصين؟ ابتسمت تخبرها: -اصل الصين حلوة. ضحكت عاليا وياسمين تصرخ: -لااا انا مش حمل قفشات أفلام مع إن فارس بطلها. سألتها باهتمام: -راجعه امتى طيب انتي وحشتيني؟ أجابتها تبتلع بارتباك: -يوم ولا اتنين. تعجب ياسمين وسألتها: -هو انتي مش عارفه ميعاد طيارتك راجعه امتي يا بنتي؟ حركت كتفيها تخبرها: -طيارتي بعد بكره بس. صمتت فانصتت لها الأخرى وهي تقص عليها ما حدث معها ومعرفتها أن جدها هو من أخبره؛ بملاحقتها فضحكت ياسمين ساخرة: -آخ يا جدو مش قليل برده السيد غزال، بس انتي يعني خلاص وافقتي عليه؟ نفت تعض على شفتيها: -ﻷ، مش عارفه. شردت حدقيتها تخبرها بتيه: -حاجه بتشدني جامد اوي ناحيته، شخصيته جميله اوي يا سو، راجل .. راجل اوي، راجل بجد مش زي.. صمتت وأطرقت رأسها فعقبت عليها الأخرى: -أنا مكنتش عيزاكي تقربي من ولاد مروان، بس بصراحه يزن كويس جداً وأخوه كمان والله ابن حلال واهو بيعافر مع مامته عشان يتجوز البنت اللبنانيه دي اللي جت معاهم. صمتت نرمين فسألتها: -طيب برده ليه مش عارفه هترجعي امتى؟ اجابتها بخجل: -طيارة يزن بكره وقالي نسافر سوا لو لقى مكان في طيارته ولو مكانش هيفوت الرحله ويحاول يحجر في طيارتي. ضحكت ياسمين تسألها: -ولو ملقاش؟ اجبتها والبسمة مرسومة على وجهها: -هنفوت طيارتي ونحجز في طيارة تالثه. فهمت نظرات رفيقتها التي تفهما من صمتها فوضحت: -أصله قالي معقول نبقى في بلد واحده واسيبك ترجعي لوحدك. ردت ياسمين بصوت ساخر: -يا حنين.. لأ طبعا مينفعش، هو معاه حق. أغلقت معها وقررت النزول لزوجها لربما تجده بغرفة مكتبه بعد أن ظنت أن الجميع قد غادر فتفاجئت بوجود چنى بحضنه ومازن يقف أمامهما يصرخ بهما: -انا مش هطلق، فاهمين مش هطلق. وقفت بعيدا حتى لا تثير حنقهم واستمعت لزوجها يهتف: -ده مش قرارك لوحدك يا مازن، لما چنى طلبت مني اسكت واسيبها تحاول أنا سكت، ودلوقتي اللي هي عيزاه هيحصل. هرع مازن ناحيتها وانحنى على ركبتيه ينظر لها بتوسل: -ليه كده يا چنى؟ أنا بحبك والله العظيم بحبك وموضوع نرمين ده ماضي له ذكرى جوايا وبس لان مكانش في مشاكل تسيب كره زي ما بيحصل لما اي اتنين بينفصلوا. بكت وهي تؤكد: -انا عشان بحبك بعرفك يا مازن وبعرف اللي فيك، أنت متغير من اليوم ده وانا حاولت كتير اوي وفشلت وبعترف بفشلي و... قاطعها يسحبها بحضنه هي وصغيره: -مش صحيح، أنا بحبك ومحبتش غيرك ونرمين ملهاش وجود في قلبي والله انا كنت فاهم مشاعري غلط ومفسر اللي حاسه انه غيره بس ﻷ هو مجرد عيل مش عايز الحاجه اللي كانت بتاعته تبقى مع غيره. نظر لها بتدقيق وهو يضيف: -هو انا لو بحب نرمين كنت هسيبها تتجوز؟ طيب ايه اللي يخليني أفضل بعيد عنها يعني؟ أجابته بثقة: -ﻷن هي اللي مش عيزاك. أغلق عينه يحاول استدعاء قوته الزائفة وهتف: -أنا بحبك وبحب حياتي معاكي وبحب ابننا وبحب ولادنا اللي ممكن نجيبهم بعد كده، أرجوكي بلاش تبوظي حياتنا كده. ظل فارس واقفا ينظر لهما وعندما وجد تصميمها اقترب منهما وتكلم بقوة وثبات: -مازن. نظر له الأخير بعد أن وقف على قدميه: -سيبها تاخد قرارها بعيد عن أي ضغوط، افتكر حياتي أنا وياسمين، مكانش ينفع نكمل إلا برجوعنا لبعض واحنا الاتنين عايزين بعض أكتر من الأول. صرخ به رافضا: -ماشي، اسيبها تريح اعصابها تفكر بس إياك تفكر اني ممكن أوافق على طلاقنا أبدا، فاهم يا فارس چنى هتفضل مراتي لحد ما أموت.