الفصل العشرون من رواية روضتنى بقلم اسماء المصرى
لفصل العشرون روضتنى
لم يعارضه وصمت مطرقا رأسه لأسفل وهمس متمتما:
-مكنتش حابب اﻷمور بينا توصل لكده، بس هي عنديه أوي.
هتفت والدته ترد:
-هي اللي عايزه خراب وفضايح كمان، يبقى هي اللي لازم تدفع التمن حتى لو بعد ما كسبت القضيه حبت تتطلق ساعتها تطلقها بشروطك يا بني.
نظر لها بحزن خيم على ملامحه وقال بصوت مبحوح:
-أنا بحبها يا ماما وعايزها، مش عايز أوصل الموضوع للطلاق، وخايف بجد اطلبها في بيت الطاعه تعند اكتر وترفع طلاق للضرر ولا خلع ساعتها بجد حياتي هتبوظ.
اقترب أنس منه اكثر ونظر له بتركيز في حدقتيه وقال بصوت صارم:
-اسمعني كويس عشان تفهمني، أنت وهي عيشتكم انتهت وكل اللي بيحصل دلوقتي ده حلاوة روح.
صمت وصر على أسنانه قائلا بغل:
-من اﻻخر كده بتاخد منها حق أخوك اللي خاضت في سيرته واتهمتوا زور، فلو انت شايف نفسك مش هتقدر تعمل ده قولي من دلوقتي وأنا اتصرف.
حدق به بدهشة وفضول:
-ايه؟! أحنا متفقناش على كده، أنا كل اللي جه في دماغي اننا هنعمل كده عشان ترجع عن اللي في دماغها و….
قاطعه انس صارخا بحدة:
-أنت اتجننت ولا ايه؟ بعد اللي قالته عني لسه عايزها؟ انا بجد مش قادر اصدق إن اخويا اللي فنيت عمري عشانه يكون ده رد فعله على اتهامي بالإتهام البشع ده!
ابتلع ريقه بألم ورد:
-انا مش قصدي يا أنس، بس ….
عاد لمقاطعته هاتفا:
-انسى يا مالك، خلاص روح الصبح خبط على بابهم واترجاهم يرجعوهالك ونفذ طلباتهم وهم هيوافقوا لأن ده هدفهم الوحيد، انك تاخد شقه بره وتبعد.
زغر بعينه وهدر بغضب:
-ومش هتفرق كتير يا ابن أبويا ترجعها وتعيش معاها من تاني وهي متهمة اخوك الإتهام ده، أو حتى تنفذ طلباتها وتبعد عننا.
حاول التحدث معه، ولكنه لم يمهله الفرصة فابتعد وهو يصيح بغضب:
-اعمل اللي انت عايزه وأنا بره الموضوع ده خالص.
وقف مسرعاً ناحيته وأوقفه مجاهداً حتى يستمع له، ولكنه وجد اﻻصرار والغضب متمثل في حدقتيه المحتقنتين؛ فأمسكه من ذراعه وقال بتردد:
-خلاص يا أنس متبقاش حمقي كده يا أخي.
التفت ينظر له بحدة وقال بصوت اجش:
-حمقي! انا اكتر واحد متفهم في الدنيا دي يا مالك، بس لحد سمعتي ومش هقبل ابدا اني اتهان بالشكل ده منها أو من اهلها، أنا دكتور أمراض نسا عارف يعني ايه مراتك تتهمني اﻻتهام ده؟ يعني مستقبلي يضيع وكل الستات اللي بتجيلي تخاف مني والعيار اللي ميصبش يدوش وشوف انت بقى يا حضرة الظابط لو الكلام ده انتشر ايه اللي ممكن يحصل وكل ده عشان ايه؟ عشان حته بت مدلعه عايزه تمشيك على دماغها.
