الفصل الخامس عشر رواية طمس الهوية الجزء الرابع من أحببت طريدتي للكاتبة أسماء المصري
الفصل الخامس عشر طمس الهوية
-أنا حبيتها غصب عني، سامحني.
تجعدت ملامحه وسأله بانهيار:
-حبيت مرات أخوك؟
أكد حديثه:
-طول ما كانت مراتك مقربتش منها، أنا قربت بعد انفصالكم.
رمش بعينيه وحاول تمالك غضبه:
-هعمل نفسي مصدقك، بس قولي الحقيقة.
رمقه بنظرة حزينة وسأله:
-لما طلبت الطلاق وراحت لأهلها أنت قولتلي اطلبها في بيت الطاعه وأنا عملت كده، كان هدفك ايه من التصرف ده؟ ما كنت سبتنا نتطلق طالما حبيتها على الأقل تبقى مبتخونش اخوك.
ابتلع ريقه وتوتر ورد بنفس الصوت الضعيف:
-خوفت مشوفهاش تاني، سامحني يا مالك المشاعر دي مش بايد البني آدم.
هز رأسه موافقا على حديثه وتركه وهو يبكي حتى خرج خارج المشفى ووقف يستنشق الهواء البارد بقوة وأخرج هاتفه واتصل بها، بنفس التوقيت كانت هي تجلس بغرفتها تحاول الوصول لتوأم روحها وابنة عمها فهاتفت حنان من جديد التي ردت بدورها:
-متقلقيش يا بنتي هم كويسين بس تليفون ياسمين وقع منها.
كذبت تلك الكذبة حتى لا تقلق عليها أكثر فتكلمت الأخرى بلهفة واضحة:
-طيب ما تديهالي اكلمها.
ارتبكت حنان ورفضت مفسرة:
-يا بنتي دول طلعوا الجناح بتاعهم من بدري وناموا، الصباح رباح يا نرمين.
جاءها ذلك الاتصال وهي لا تزال تتحدث مع حنان فنظرت لرقم المتصل وجعدت جبينها متسائلة بداخل نفسها:
-ده عايز ايه ده كمان؟
أضطرت لأنهاء المكالمة مع حنان بلباقة:
-خلاص يا داده معلش لو صحيتك انا عارفه بتنامي بدري، بس لما ياسمين تصحى خليها تكلمني ضروري.
وافقتها وأغلقت معها ولكنه عاد بمهاتفتها فقادها فضولها لتجيب لعل هناك أمرا بخصوص التحقيقات قد تعرفه منه:
-أفندم.
استمعت لصوت نحنته وبكاءه ولكنها حقا لن تهتم فقالت بجمود:
-خير!
رد وهو فاقدا لكل معالم الحياة:
-انا محتاجك.
تجعدت ملامحها لتشعر بالتقزز وهي تجيبه:
-أنا ميشرفنيش اعرف واحد زيك، الموضوع خلص بينا يا مالك وكفايه اللي حصل لحد كده.
بكى وانتحب وهو يعتذر لها:
-أنا آسف، آسف عشان مصدقتش إن أخويا اللي مربيني بيخوني وبيكشف عرضي، آسف أني كنت اعمى ووثقت في لحمي ودمي على حسابك بس أنا محتاجك اوي يا نرمين متتخليش عني.
فتحت النافذة ووقفت أمامها فلفحها الهواء البارد، ولكنها شعرت بالراحة لمجرد شعورها بأنها لا زالت تتنفس وردت بألم:
-أنت مش متخيل انا عيشت معاك ازاي الفترة دي، صدقني يا ملك قصتنا انتهت وعمري ما هقدر لا أغفر ولا أنسى، مستحيييل.
